ವಾಷಿಂಗ್ಟನ್: ಇರಾನ್ ಜೊತೆಗಿನ ಉದ್ವಿಗ್ನತೆ ಮತ್ತು ಭವಿಷ್ಯದ ಬೃಹತ್ ಪ್ರಮಾಣದ ಯುದ್ಧದ ಭೀತಿಯ ನಡುವೆ, ಅಮೆರಿಕ ಸೇನೆಯು ತನ್ನ ಯೋಧರಿಗೆ ಯುದ್ಧಭೂಮಿಯಲ್ಲಿ ಸಮೂಹ ಸಮಾಧಿಗಳನ್ನು ತೋಡುವುದು ಹೇಗೆ ಎಂಬ ಬಗ್ಗೆ ತರಬೇತಿಯನ್ನು ಪುನರಾರಂಭಿಸಿದೆ. 1950-53ರ ಕೊರಿಯನ್ ಯುದ್ಧದ ನಂತರ ಅಮೆರಿಕದ ಮಿಲಿಟರಿಯು ತನ್ನ ಸೈನಿಕರಿಗೆ ಇಂತಹ ತರಬೇತಿಯನ್ನು ನೀಡುತ್ತಿರುವುದು ಇದೇ ಮೊದಲ ಬಾರಿಯಾಗಿದ್ದು, ಯುದ್ಧದ ಸಮಯದಲ್ಲಿ ಸಂಭವಿಸಬಹುದಾದ ಬೃಹತ್ ಪ್ರಮಾಣದ ಜೀವಹಾನಿಯನ್ನು ನಿರ್ವಹಿಸಲು ಈ ಕ್ರಮ ಕೈಗೊಳ್ಳಲಾಗಿದೆ.
‘ಆಪರೇಷನ್ ಡ್ರ್ಯಾಗನ್ ಕೋವೆನೆಂಟ್’ ಸಮರ ಅಭ್ಯಾಸ
ನಾರ್ತ್ ಕ್ಯಾರೋಲಿನಾದ ಫೋರ್ಟ್ ಬ್ರಾಗ್‌ನಲ್ಲಿ ‘ಆಪರೇಷನ್ ಡ್ರ್ಯಾಗನ್ ಕೋವೆನೆಂಟ್ ಫೇಸ್ 2’ ಹೆಸರಿನ ವಿಶೇಷ ಸಮರ ಅಭ್ಯಾಸವನ್ನು ಇತ್ತೀಚೆಗೆ ಆಯೋಜಿಸಲಾಗಿತ್ತು. ಇದರಲ್ಲಿ ಅಮೆರಿಕ ಸೇನೆಯ 3ನೇ ಕಾರ್ಪ್ಸ್ ಸಸ್ಟೈನ್‌ಮೆಂಟ್ ಕಮಾಂಡ್ ಮತ್ತು 20ನೇ ಇಂಜಿನಿಯರ್ ಬ್ರಿಗೇಡ್‌ನ ಯೋಧರು, ಮಿಲಿಟರಿ ಧಾರ್ಮಿಕ ಗುರುಗಳು ಹಾಗೂ ಬೆಂಬಲ ಸಿಬ್ಬಂದಿ ಭಾಗವಹಿಸಿದ್ದರು. ಬುಲ್ಡೋಜರ್‌ಗಳು, ಎಕ್ಸ್‌ಕವೇಟರ್‌ಗಳು ಮತ್ತು ಭಾರೀ ಯಂತ್ರೋಪಕರಣಗಳನ್ನು ಬಳಸಿ ತಾತ್ಕಾಲಿಕ ಸಮಾಧಿ ಸ್ಥಳಗಳನ್ನು ನಿರ್ಮಿಸುವುದು ಹಾಗೂ ಮೃತ ಯೋಧರ ದೇಹಗಳನ್ನು ಗೌರವಯುತವಾಗಿ ನಿರ್ವಹಿಸುವ ಶ್ರಮದಾಯಕ ಅಭ್ಯಾಸವನ್ನು ಅವರು ಈ ವೇಳೆ ನಡೆಸಿದ್ದಾರೆ ಎಂದು ‘ನ್ಯೂಸ್‌ವೀಕ್’ ನಿಯತಕಾಲಿಕೆ ವರದಿ ಮಾಡಿದೆ.
ದಶಕಗಳ ನಂತರ ತರಬೇತಿ ಏಕೆ?
ಕಳೆದ 25 ವರ್ಷಗಳಲ್ಲಿ ಇರಾಕ್ ಮತ್ತು ಅಫ್ಘಾನಿಸ್ತಾನದಲ್ಲಿ ನಡೆದ ಯುದ್ಧಗಳಲ್ಲಿ ಮೃತರಾದ ಅಮೆರಿಕನ್ ಸೈನಿಕರ ದೇಹಗಳನ್ನು ತಕ್ಷಣವೇ ಅವರ ಸ್ವದೇಶಕ್ಕೆ ತರಲಾಗುತ್ತಿತ್ತು. ಆದರೆ, ಮುಂಬರುವ ಯುದ್ಧಗಳಲ್ಲಿ ಸಾವು-ನೋವಿನ ಪ್ರಮಾಣ ಅತ್ಯಂತ ಹೆಚ್ಚಾಗಿದ್ದರೆ ಹಾಗೂ ತಕ್ಷಣವೇ ಮೃತದೇಹಗಳನ್ನು ಸ್ವದೇಶಕ್ಕೆ ಕಳುಹಿಸಲು ಸಾಧ್ಯವಾಗದ ಸನ್ನಿವೇಶ ಎದುರಾದರೆ ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸಬೇಕು ಎಂಬುದಕ್ಕಾಗಿ ಈ ತರಬೇತಿ ನೀಡಲಾಗುತ್ತಿದೆ. ಸೇನೆಯ ನಿಯಮಾವಳಿಯಂತೆ, ಐದು ಕಂದಕಗಳನ್ನೊಳಗೊಂಡ ಒಂದು ತಾತ್ಕಾಲಿಕ ಸಮಾಧಿ ಸ್ಥಳದಲ್ಲಿ 100 ಮೃತದೇಹಗಳನ್ನು ಹೂಳಲು ಅವಕಾಶವಿರುತ್ತದೆ. ನಾರ್ತ್ ಕ್ಯಾರೋಲಿನಾದಲ್ಲಿ ನಡೆದ ಅಭ್ಯಾಸದಲ್ಲಿ 8 ಬುಲ್ಡೋಜರ್ ಮತ್ತು 4 ಎಕ್ಸ್‌ಕವೇಟರ್‌ಗಳ ನೆರವಿನಿಂದ ಕೇವಲ 24 ಗಂಟೆಗಳಲ್ಲಿ ಸುಮಾರು 2,400 ಸೈನಿಕರ ಮೃತದೇಹಗಳನ್ನು ಹೂಳುವ ಸಾಮರ್ಥ್ಯವನ್ನು ಪರೀಕ್ಷಿಸಲಾಗಿದೆ.
ಮೃತದೇಹಗಳ ಗುರುತು ಮತ್ತು ಗೌರವ
ಈ ಸಮರ ಅಭ್ಯಾಸವು ಕೇವಲ ಸಮಾಧಿ ತೋಡುವುದಕ್ಕೆ ಸೀಮಿತವಾಗಿರದೆ, ಯುದ್ಧದ ನಂತರ ಮೃತದೇಹಗಳನ್ನು ಗುರುತಿಸಿ ಸ್ವದೇಶಕ್ಕೆ ಕಳುಹಿಸಲು ಅನುಕೂಲವಾಗುವಂತೆ ದೇಹಗಳನ್ನು ಸಂರಕ್ಷಿಸುವ ವಿಧಾನಗಳ ಮೇಲೆಯೂ ಗಮನ ಹರಿಸಿದೆ. ಯುದ್ಧದ ಕಠಿಣ ಪರಿಸ್ಥಿತಿಯಲ್ಲೂ ಪ್ರತಿಯೊಬ್ಬ ಯೋಧನ ಮೃತದೇಹಕ್ಕೂ ಸೂಕ್ತ ಗೌರವ ಸಿಗುವಂತೆ ಮಾಡುವುದು ಮತ್ತು ವ್ಯವಸ್ಥಿತ ರೀತಿಯಲ್ಲಿ ಪ್ರಕ್ರಿಯೆ ನಡೆಸುವುದು ಈ ತರಬೇತಿಯ ಮುಖ್ಯ ಉದ್ದೇಶವಾಗಿದೆ ಎಂದು ಸೇನಾ ಅಧಿಕಾರಿಗಳು ತಿಳಿಸಿದ್ದಾರೆ.
