ವಾಷಿಂಗ್ಟನ್ : ಅಮೆರಿಕದ ಕ್ಯಾಲಿಫೋರ್ನಿಯಾದಲ್ಲಿ ಇತ್ತೀಚೆಗೆ ನಡೆದಿದ್ದ ಕೇರಳ ಮೂಲದ ಇಬ್ಬರು ಮಹಿಳೆಯರ ಹತ್ಯೆ ಪ್ರಕರಣಕ್ಕೆ ಸಂಬಂಧಿ ಆ ಮಹಿಳೆಯರ ಸ್ನೇಹಿತೆಯನ್ನು ಪೊಲೀಸರು ಈಗಾಗಲೇ ಬಂಧಿಸಿದ್ದು, ಇದೀಗ ಆಕೆಯ ವಿರುದ್ಧ ಕೊಲೆ ದೋಷಾರೋಪ ಪಟ್ಟಿ ಸಲ್ಲಿಸಲಾಗಿದೆ.
ಓಣಂ ಹಬ್ಬವನ್ನು ಒಟ್ಟಾಗಿ ಆಚರಿಸಿದ ಮರುದಿನವೇ ಇಬ್ಬರು ಮಲಯಾಳಿ ಮಹಿಳೆಯರು ಅನುಮಾನಾಸ್ಪದ ರೀತಿಯಲ್ಲಿ ಕೊಲೆಯಾಗಿದ್ದರು. ಈ ಅವಳಿ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅವರ ನಿಕಟವರ್ತಿಯಾಗಿದ್ದ 32 ವರ್ಷದ ಅನಿಲಾ ಬೇಬಿಯನ್ನು ಪೊಲೀಸರು ಬಂಧಿಸಿದ್ದಾರೆ.
ಖುಷಿಯಿಂದ ಬಂದವಳ ಮೇಲೆ ಹರಿದ ಎಸ್ಯುವಿ ಕಾರು
ಮಿಲ್ಪಿಟಾಸ್ನ ಮಿಲ್ ಕ್ರೀಕ್ ಅಪಾರ್ಟ್ಮೆಂಟ್ ಆವರಣದ ಪಾರ್ಕಿಂಗ್ ಲಾಟ್ನಲ್ಲಿ ಹರಿ ಎಂಬ ಮಹಿಳೆ ನಡೆದುಕೊಂಡು ಹೋಗುತ್ತಿದ್ದಾಗ, ನೀಲಿ ಬಣ್ಣದ ಟೊಯೋಟಾ ಹೈಲ್ಯಾಂಡರ್ ಎಸ್ಯುವಿ ಕಾರು ಅವರ ಮೇಲೆಯೇ ಹರಿದು ಭೀಕರ ಅಪಘಾತ ಸಂಭವಿಸಿತ್ತು. ಕಾರು ಡಿಕ್ಕಿ ಹೊಡೆದ ರಭಸಕ್ಕೆ ಹರಿ ಅವರ ತಲೆಗೆ ತೀವ್ರ ಪೆಟ್ಟಾಗಿ, ಸ್ಥಳದಲ್ಲೇ ಅವರು ಕೊನೆಯುಸಿರೆಳೆದಿದ್ದರು.
ಘಟನೆಯನ್ನು ನೋಡಿದ ಪ್ರತ್ಯಕ್ಷದರ್ಶಿಯೊಬ್ಬರು ಪೊಲೀಸರಿಗೆ ನೀಡಿರುವ ಹೇಳಿಕೆಯ ಪ್ರಕಾರ, ಹರಿ ಅವರು ಅತ್ಯಂತ ಖುಷಿಯಿಂದ ಕಾರಿನಲ್ಲಿದ್ದ ಚಾಲಕಿಯ ಬಳಿಗೆ ತೆರಳಿದ್ದರು. ಕಾರಿನಲ್ಲಿದ್ದ ಬೇಬಿ ಹಾಗೂ ಹರಿ ನಡುವೆ ಯಾವುದೇ ರೀತಿಯ ಜಗಳ ಅಥವಾ ವಾಗ್ವಾದ ನಡೆದಂತೆ ಕಾಣಿಸಿರಲಿಲ್ಲ. ಆದರೆ, ಹರಿ ಕಾರಿನ ಮುಂಭಾಗಕ್ಕೆ ಬರುತ್ತಿದ್ದಂತೆ ಎಸ್ಯುವಿ ಹಠಾತ್ತಾಗಿ ವೇಗವನ್ನು ಹೆಚ್ಚಿಸಿ ಅವರ ಮೇಲೆಯೇ ಹರಿದಿದೆ. ವಾಹನವನ್ನು ತಡೆಯಲು ಬ್ರೇಕ್ ಹಾಕಿದ ಯಾವುದೇ ಗುರುತುಗಳು ಸ್ಥಳದಲ್ಲಿ ಪತ್ತೆಯಾಗಿಲ್ಲ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ. ಅಪಘಾತವೆಸಗಿದ ಕಾರು ಅಕ್ಕಪಕ್ಕದಲ್ಲಿದ್ದ ಮೂರು ವಾಹನಗಳಿಗೆ ಡಿಕ್ಕಿ ಹೊಡೆದು ಸ್ಥಳದಿಂದ ಕಾಲ್ಕಿತ್ತಿತ್ತು.
ಮತ್ತೊಂದು ಮನೆಯಲ್ಲಿ ಇರಿದು ಕೊಲೆಯಾಗಿದ್ದ ಗೆಳತಿ
ಈ ಭೀಕರ ಅಪಘಾತ ನಡೆದು ಕೇವಲ ಎರಡು ಗಂಟೆಗಳ ಅಂತರದಲ್ಲಿ, ಅಂದರೆ ಮಧ್ಯಾಹ್ನ 1.53 ರ ಸುಮಾರಿಗೆ ಸ್ಯಾನ್ ಜೋಸ್ ನಗರದ ಲಿಂಡಾ ವಿಸ್ಟಾ ಸ್ಟ್ರೀಟ್ನಲ್ಲಿರುವ ಮನೆಯೊಂದರಲ್ಲಿ ಮ್ಯಾಥ್ಯೂ ಎಂಬ ಮತ್ತೊಬ್ಬ ಮಹಿಳೆ ನಿಗೂಢ ರೀತಿಯಲ್ಲಿ ಗಂಭೀರ ಗಾಯಗೊಂಡು ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದಿರುವುದು ಪೊಲೀಸರ ಗಮನಕ್ಕೆ ಬಂದಿತ್ತು. ತಕ್ಷಣ ಸ್ಥಳಕ್ಕೆ ಆಗಮಿಸಿದ ಪೊಲೀಸರಿಗೆ ಮ್ಯಾಥ್ಯೂ ಆಗಲೇ ಮೃತಪಟ್ಟಿರುವುದು ಖಚಿತವಾಗಿತ್ತು. ಪ್ರಕರಣ ಕೈಗೆತ್ತಿಕೊಂಡ ಸ್ಯಾನ್ ಜೋಸ್ ಪೊಲೀಸ್ ಕೊಲೆ ತನಿಖಾ ವಿಭಾಗವು, ಮ್ಯಾಥ್ಯೂ ಅವರ ದೇಹದ ಮೇಲೆ ಚಾಕು ಇರಿತದ ಗಾಯಗಳಿರುವುದನ್ನು ಪತ್ತೆಹಚ್ಚಿತ್ತು. ಮ್ಯಾಥ್ಯೂ ಕೂಡ ಕೊಲೆಯಾದ ಹರಿ ಹಾಗೂ ಹಂತಕಿ ಬೇಬಿ ಅವರ ಸ್ನೇಹಿತೆಯಾಗಿದ್ದರು.
ಓಣಂ ಆಚರಿಸಿದ್ದ ಗೆಳತಿಯರ ಕರಾಳ ಅಂತ್ಯ
ಮೃತಪಟ್ಟ ಮ್ಯಾಥ್ಯೂ ತಿರುವನಂತಪುರಂ ಮೂಲದವರಾಗಿದ್ದರೆ, ಹರಿ ಅವರು ತ್ರಿಶೂರ್ ಮೂಲದವರಾಗಿದ್ದರು. ಕೊಲೆ ಆರೋಪಿ ಬೇಬಿ ಮತ್ತು ಹರಿ ಇಬ್ಬರೂ ಒಂದೇ ಅಪಾರ್ಟ್ಮೆಂಟ್ನಲ್ಲಿ ವಾಸಿಸುತ್ತಿದ್ದರು ಹಾಗೂ ಇವರಿಬ್ಬರೂ ಅತ್ಯಂತ ಆಪ್ತ ಗೆಳತಿಯರಾಗಿದ್ದರು. ಕೊಲೆಯಾದ ಮ್ಯಾಥ್ಯೂ ಕೂಡ ಇವರಿಗೆ ನಿಕಟ ಪರಿಚಿತರಾಗಿದ್ದರು. ವಿಶೇಷವೆಂದರೆ, ಘಟನೆ ನಡೆಯುವ ಹಿಂದಿನ ದಿನವಷ್ಟೇ (ಆಗಸ್ಟ್ 27) ಈ ಮೂವರೂ ಮಹಿಳೆಯರು ಒಟ್ಟಾಗಿ ಓಣಂ ಹಬ್ಬವನ್ನು ಆಚರಿಸಿ, ಸಿನಿಮಾ ನೋಡಿ ಸಂಭ್ರಮಿಸಿ ವಾಪಸಾಗಿದ್ದರು ಎಂದು ಸಂಬಂಧಿಕರು ಮಾಹಿತಿ ನೀಡಿದ್ದಾರೆ.
ಆರೋಪಿಯ ಬಂಧನ
ಘಟನೆ ನಡೆದ ಕೆಲವೇ ಗಂಟೆಗಳಲ್ಲಿ ಮಿಲ್ಪಿಟಾಸ್ ಪೊಲೀಸರು ಅಪಾರ್ಟ್ಮೆಂಟ್ನಿಂದ ಅರ್ಧ ಮೈಲಿ ದೂರದಲ್ಲಿದ್ದ ವಾಲ್ಗ್ರೀನ್ಸ್ ಸ್ಟೋರ್ ಬಳಿ ಹಾನಿಗೊಳಗಾಗಿದ್ದ ಎಸ್ಯುವಿ ಕಾರಿನೊಳಗೆ ರಕ್ತಸಿಕ್ತ ಸ್ಥಿತಿಯಲ್ಲಿದ್ದ ಆರೋಪಿ ಬೇಬಿಯನ್ನು ಪತ್ತೆಹಚ್ಚಿದ್ದಾರೆ. ಕೈ-ಕಾಲುಗಳ ಮೇಲೆ ಗಾಯಗಳೊಂದಿಗೆ ಪ್ರಜ್ಞಾಹೀನ ಹಾಗೂ ಮಾತನಾಡಲಾಗದ ಸ್ಥಿತಿಯಲ್ಲಿದ್ದ ಆಕೆಯನ್ನು ವಶಕ್ಕೆ ಪಡೆದ ಪೊಲೀಸರು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆರಂಭದಲ್ಲಿ ಸ್ಯಾನ್ ಜೋಸ್ ಪೊಲೀಸರು ಮ್ಯಾಥ್ಯೂ ಕೊಲೆ ಪ್ರಕರಣವನ್ನು ಪ್ರತ್ಯೇಕವಾಗಿ ತನಿಖೆ ನಡೆಸಿದ್ದರೂ, ಲಭ್ಯವಿರುವ ಸಾಕ್ಷ್ಯಾಧಾರಗಳನ್ನು ಆಧರಿಸಿ ಪ್ರಾಸಿಕ್ಯೂಟರ್ಗಳು ಈಗ ಬೇಬಿ ವಿರುದ್ಧ ಹರಿ ಮತ್ತು ಮ್ಯಾಥ್ಯೂ ಇಬ್ಬರನ್ನೂ ಕೊಲೆ ಮಾಡಿದ ಗಂಭೀರ ಆರೋಪ ಹೊರಿಸಿದ್ದಾರೆ.
ಇದನ್ನೂ ಓದಿ : ಆಟಗಾರರ ಗಾಯದ ಸಮಸ್ಯೆಗೆ ಬ್ರೇಕ್ ಹಾಕಲು ಬಿಸಿಸಿಐ ಮಾಸ್ಟರ್ ಪ್ಲ್ಯಾನ್!
