ಬೆಂಗಳೂರು : ಜೆಎಸ್ಡಬ್ಲ್ಯೂ ಎಂಜಿ ಮೋಟಾರ್ ಇಂಡಿಯಾ ಕಂಪನಿಯು ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಬಹುನಿರೀಕ್ಷಿತ ‘ಹೆಕ್ಟರ್ ಟೊಮಾಹಾಕ್ ಇವಿ’ ಎಲೆಕ್ಟ್ರಿಕ್ ಎಸ್ಯುವಿಯನ್ನು ಅದ್ಧೂರಿಯಾಗಿ ಬಿಡುಗಡೆ ಮಾಡಿದೆ. ಹೊಸ ತಂತ್ರಜ್ಞಾನ ಹಾಗೂ ಅತ್ಯಾಕರ್ಷಕ ವಿನ್ಯಾಸದೊಂದಿಗೆ ಮಾರುಕಟ್ಟೆ ಪ್ರವೇಶಿಸಿರುವ ಈ ಕಾರಿನ ಆರಂಭಿಕ ಬೆಲೆಯು 19.49 ಲಕ್ಷ ರೂಪಾಯಿಗಳಾಗಿದೆ (ಎಕ್ಸ್ ಶೋರೂಮ್).
ಇದರೊಂದಿಗೆ ಗ್ರಾಹಕರಿಗೆ ಬ್ಯಾಟರಿ-ಆಸ್-ಎ-ಸರ್ವೀಸ್ ಎಂಬ ವಿಶಿಷ್ಟ ಯೋಜನೆಯನ್ನೂ ಪರಿಚಯಿಸಲಾಗಿದ್ದು, ಈ ಆಯ್ಕೆಯನ್ನು ಆರಿಸಿಕೊಳ್ಳುವ ಗ್ರಾಹಕರು ಕೇವಲ 13.99 ಲಕ್ಷ ರೂಪಾಯಿ ಪಾವತಿಸಿ ವಾಹನವನ್ನು ಖರೀದಿಸಬಹುದು. ಈ ಯೋಜನೆಯಡಿ ಬ್ಯಾಟರಿ ಬಾಡಿಗೆಯಾಗಿ ಪ್ರತಿ ಕಿಲೋಮೀಟರ್ಗೆ 4.90 ರೂಪಾಯಿ ಪಾವತಿಸಬೇಕಾಗುತ್ತದೆ. ಎಂಜಿ ಸಂಸ್ಥೆಯ ನೂತನ ‘ಅಡಾಪ್ಟ್’ (ADAPT) ವಾಸ್ತುಶಿಲ್ಪದಡಿ ನಿರ್ಮಾಣವಾದ ಭಾರತದ ಮೊದಲ ಮಾಡೆಲ್ ಇದಾಗಿದೆ.
ಬ್ಯಾಟರಿ ಸಾಮರ್ಥ್ಯ ಹಾಗೂ ಅತ್ಯುತ್ತಮ ಚಾರ್ಜಿಂಗ್ ವ್ಯವಸ್ಥೆ
ಹೊಸ ಹೆಕ್ಟರ್ ಟೊಮಾಹಾಕ್ ಇವಿ ಕಾರು 69.2kWh ಸಾಮರ್ಥ್ಯದ ನವೀನ ಬ್ಯಾಟರಿ ಪ್ಯಾಕ್ ಹೊಂದಿದ್ದು, ಒಂದು ಬಾರಿ ಪೂರ್ಣ ಪ್ರಮಾಣದಲ್ಲಿ ಚಾರ್ಜ್ ಮಾಡಿದರೆ ಬರೋಬ್ಬರಿ 517 ಕಿಲೋಮೀಟರ್ (MIDC) ಮೈಲೇಜ್ ನೀಡುತ್ತದೆ ಎಂದು ಕಂಪನಿ ಖಚಿತಪಡಿಸಿದೆ. ಇದರ ಎಲೆಕ್ಟ್ರಿಕ್ ಮೋಟಾರ್ 204hp ಗರಿಷ್ಠ ಶಕ್ತಿ ಹಾಗೂ 310Nm ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಇದರ ವೇಗವು ಕೇವಲ 8.2 ಸೆಕೆಂಡುಗಳಲ್ಲಿ ಸೊನ್ನೆಯಿಂದ 100 ಕಿ.ಮೀ ವೇಗವನ್ನು ತಲುಪುವಷ್ಟು ಶಕ್ತಿಶಾಲಿಯಾಗಿದೆ.
ಚಾರ್ಜಿಂಗ್ ವಿಷಯದಲ್ಲಿಯೂ ಗ್ರಾಹಕರಿಗೆ ಅತ್ಯುತ್ತಮ ಆಯ್ಕೆಗಳನ್ನು ನೀಡಲಾಗಿದ್ದು, 90kW ಸಾಮರ್ಥ್ಯದ ಡಿಸಿ ಫಾಸ್ಟ್ ಚಾರ್ಜರ್ ಬಳಸಿದರೆ ಕೇವಲ 35 ನಿಮಿಷಗಳಲ್ಲಿ ಬ್ಯಾಟರಿಯು ಶೇಕಡಾ 30 ರಿಂದ 80 ರಷ್ಟು ಚಾರ್ಜ್ ಆಗುತ್ತದೆ. ಇದರೊಟ್ಟಿಗೆ 7.4kW ಎಸಿ ಚಾರ್ಜರ್ ಮೂಲಕ 10 ರಿಂದ 100 ರಷ್ಟು ಚಾರ್ಜ್ ಆಗಲು 12.5 ಗಂಟೆಗಳ ಸಮಯಾವಕಾಶ ಬೇಕಾಗುತ್ತದೆ. ಇದಲ್ಲದೆ, ವಾಹನದಿಂದ ವಾಹನಕ್ಕೆ (V2V) ಹಾಗೂ ವಾಹನದಿಂದ ಬಾಹ್ಯ ಸಾಧನಗಳಿಗೆ (V2L) ವಿದ್ಯುತ್ ಪೂರೈಸುವಂತಹ ಅತ್ಯಾಧುನಿಕ ತಂತ್ರಜ್ಞಾನವೂ ಈ ಕಾರಿನಲ್ಲಿದೆ.
ವೈವಿಧ್ಯಮಯ ವಿನ್ಯಾಸ ಹಾಗೂ ಸ್ಥಳಾವಕಾಶ
ಈ ಕಾರು ಐದು ಮತ್ತು ಏಳು ಸೀಟುಗಳ ಎರಡು ವಿಭಿನ್ನ ಮಾದರಿಗಳಲ್ಲಿ ಲಭ್ಯವಿದೆ. ಐದು ಸೀಟಿನ ಮಾದರಿಯು ಕೇವಲ ‘ಎಸ್ಸೆನ್ಸ್’ (Essence) ಟ್ರಿಮ್ನಲ್ಲಿ ಲಭ್ಯವಿದ್ದರೆ, ಏಳು ಸೀಟುಗಳ ಆವೃತ್ತಿಯು ಎಕ್ಸೈಟ್, ಎಕ್ಸ್ಕ್ಲೂಸಿವ್ ಹಾಗೂ ಎಸ್ಸೆನ್ಸ್ ಎಂಬ ಮೂರು ಟ್ರಿಮ್ಗಳಲ್ಲಿ ಸಿಗಲಿದೆ. ಹೊರನೋಟದಲ್ಲಿ ಅತ್ಯಂತ ಆಕರ್ಷಕವಾಗಿರುವ ಈ ಎಸ್ಯುವಿಯಲ್ಲಿ ಎಲ್ಇಡಿ ಪ್ರೊಜೆಕ್ಟರ್ ಹೆಡ್ ಲ್ಯಾಂಪ್, ಎಲ್ಇಡಿ ಡೇ ಟೈಮ್ ರನ್ನಿಂಗ್ ಲೈಟ್ಸ್ ಹಾಗೂ ಇವುಗಳ ಮಧ್ಯೆ ಪ್ರಕಾಶಿಸುವ ಎಂಜಿ ಲೋಗೋ ಅಳವಡಿಸಲಾಗಿದೆ. ವಾಹನವು 18 ಇಂಚಿನ ಡ್ಯುಯಲ್-ಟೋನ್ ಅಲಾಯ್ ವೀಲ್, ರೂಫ್ ರೈಲ್ಸ್ ಹಾಗೂ ಕಪ್ಪು ಬಣ್ಣದ ಕ್ಲಾಡಿಂಗ್ ಸೇರಿದಂತೆ ಭರ್ಜರಿ ಲುಕ್ ಹೊಂದಿದೆ. 4,745 ಎಂಎಂ ಉದ್ಧ, 1,850 ಎಂಎಂ ಅಗಲ ಹಾಗೂ 1,770 ಎಂಎಂ ಎತ್ತರವಿರುವ ಈ ವಾಹನ ವಿಶಾಲವಾದ ಕ್ಯಾಬಿನ್ ಜಾಗವನ್ನು ಒದಗಿಸುತ್ತದೆ.
ಐಷಾರಾಮಿ ಕ್ಯಾಬಿನ್ ಹಾಗೂ ಅತ್ಯಾಧುನಿಕ ಫೀಚರ್ಸ್
ಕಾರಿನ ಒಳಾಂಗಣ ವಿನ್ಯಾಸವು ಕಂದು ಹಾಗೂ ಕಪ್ಪು ಬಣ್ಣದ ಡ್ಯಾಶ್ಬೋರ್ಡ್ ಹೊಂದಿದ್ದು, ಕನಿಷ್ಠ ಹಾಗೂ ಆಕರ್ಷಕ ವಿನ್ಯಾಸವನ್ನು ಹೊಂದಿದೆ. ಇಲ್ಲಿ ಭೌತಿಕ ಗುಂಡಿಗಳ ಬಳಕೆಯನ್ನು ತಗ್ಗಿಸಲಾಗಿದ್ದು, ಬಹುಪಾಲು ನಿಯಂತ್ರಣಗಳಿಗೆ 15.6 ಇಂಚಿನ ಬೃಹತ್ ಇನ್ಫோடೈನ್ಮೆಂಟ್ ಟಚ್ಸ್ಕ್ರೀನ್ ಹಾಗೂ ಸನ್ನೆ(Gesture) ನಿಯಂತ್ರಣಗಳನ್ನು ನೀಡಲಾಗಿದೆ. ಚಾಲಕನಿಗಾಗಿ 8.8 ಇಂಚಿನ ಡಿಜಿಟಲ್ ಡಿಸ್ಪ್ಲೇ, ವೈರ್ಲೆಸ್ ಆಪಲ್ ಕಾರ್ಪ್ಲೇ, ಆಂಡ್ರಾಯ್ಡ್ ಆಟೋ ಮತ್ತು ವೈರ್ಲೆಸ್ ಫೋನ್ ಚಾರ್ಜಿಂಗ್ ಸೌಲಭ್ಯಗಳಿವೆ. ಇದರೊಂದಿಗೆ ಪನೋರಮಿಕ್ ಸನ್ರೂಫ್, 256 ಬಣ್ಣಗಳ ಆಂಬಿಯೆಂಟ್ ಲೈಟಿಂಗ್, ಹತ್ತು-ಸ್ಪೀಕರ್ಗಳ ಇನ್ಫಿನಿಟಿ ಸೌಂಡ್ ಸಿಸ್ಟಮ್ ಹಾಗೂ ಹಿಂಬದಿ ಪ್ರಯಾಣಿಕರಿಗೆ ಸನ್ಬ್ಲೈಂಡ್ಗಳು ಸೇರಿದಂತೆ ಹಲವು ಐಷಾರಾಮಿ ಸೌಕರ್ಯಗಳನ್ನು ಅಳವಡಿಸಲಾಗಿದೆ.
ಉನ್ನತ ಮಟ್ಟದ ಸುರಕ್ಷತೆ ಮತ್ತು ಪ್ರತಿಸ್ಪರ್ಧಿ ವಾಹನಗಳು
ಸುರಕ್ಷತೆಯ ದೃಷ್ಟಿಯಿಂದ ಈ ವಾಹನದಲ್ಲಿ ಆರು ಏರ್ಬ್ಯಾಗ್ಗಳನ್ನು ಕಡ್ಡಾಯವಾಗಿ ನೀಡಲಾಗಿದೆ. ಜೊತೆಗೆ ಲೆವೆಲ್-2 ಸಾಮರ್ಥ್ಯದ ಸುಧಾರಿತ ಚಾಲಕ ಸಹಾಯ ವ್ಯವಸ್ಥೆ (ADAS) ಅಳವಡಿಸಲಾಗಿದ್ದು, ಇದು 11 ಮುಖ್ಯ ಕಾರ್ಯಗಳನ್ನು ನಿರ್ವಹಿಸುತ್ತದೆ. ಇದರಲ್ಲಿ ಲೇನ್ ಡಿಪಾರ್ಚರ್ ವಾರ್ನಿಂಗ್, ಆಟೋಮ್ಯಾಟಿಕ್ ಎಮರ್ಜೆನ್ಸಿ ಬ್ರೇಕಿಂಗ್, ಅಡಾಪ್ಟಿವ್ ಕ್ರೂಸ್ ಕಂಟ್ರೋಲ್ ಸೇರಿದಂತೆ ಹಲವು ರಕ್ಷಣಾ ತಂತ್ರಜ್ಞಾನಗಳಿವೆ. ಇದಲ್ಲದೇ ವಾಹನದ ಸುತ್ತಮುತ್ತಲಿನ ದೃಶ್ಯವನ್ನು ಸೆರೆಹಿಡಿಯುವ 360 ಡಿಗ್ರಿ ಕ್ಯಾಮರಾ ಕೂಡ ಇದರಲ್ಲಿದೆ. ಮಾರುಕಟ್ಟೆಯಲ್ಲಿ ಈ ಹೊಸ ಎಂಜಿ ಟೊಮಾಹಾಕ್ ಇವಿಯ ಐದು ಸೀಟಿನ ಮಾದರಿಯು ಟಾಟಾ ಹ್ಯಾರಿಯರ್ ಇವಿ ಹಾಗೂ ಮಹೀಂದ್ರಾ XEV 9e ಕಾರುಗಳಿಗೆ ನೇರ ಪೈಪೋಟಿ ನೀಡಲಿದ್ದು, ಏಳು ಸೀಟಿನ ಮಾದರಿಯು ಮಹೀಂದ್ರಾ XEV 9S ಹಾಗೂ ಕಿಯಾ ಕಾರೆನ್ಸ್ ಕ್ಲೇವಿಸ್ ಇವಿ ವಾಹನಗಳಿಗೆ ಪ್ರಬಲ ಸ್ಪರ್ಧೆ ಒಡ್ಡುವ ನಿರೀಕ್ಷೆಯಿದೆ.
ಇದನ್ನೂ ಓದಿ : 200 ಕೋಟಿ ವೆಚ್ಚದ 18 ಮಹಡಿ ಕಟ್ಟಡ ಇಂದಿನಿಂದ ನೆಲಸಮ!
