ಕೊಲೊಂಬೊ : ಭಾರತದ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಶ್ರೀಲಂಕಾ ತಂಡವು ಸಾಧಾರಣ ಪ್ರದರ್ಶನ ನೀಡುತ್ತಿರಬಹುದು. ಆದರೆ, ಆತಿಥೇಯ ತಂಡದ ಯುವ ಎಡಗೈ ಬ್ಯಾಟರ್ ಸೋನಾಲ್ ದಿನುಷಾ ಮಾತ್ರ ಟೀಮ್ ಇಂಡಿಯಾ ಪಾಲಿಗೆ ಅಕ್ಷರಶಃ ನುಂಗಲಾರದ ತುತ್ತಾಗಿ ಪರಿಣಮಿಸಿದ್ದಾರೆ.
ಅತ್ಯಂತ ಬಲಿಷ್ಠ ಹಾಗೂ ವಿಶ್ವದರ್ಜೆಯ ಭಾರತೀಯ ಬೌಲಿಂಗ್ ದಾಳಿಯನ್ನು ದಿಟ್ಟವಾಗಿ ಎದುರಿಸುತ್ತಿರುವ ದಿನುಷಾ, ತಮ್ಮ ತಾಳ್ಮೆ ಹಾಗೂ ಎಚ್ಚರಿಕೆಯ ಆಕ್ರಮಣಕಾರಿ ಆಟದ ಮೂಲಕ ಗಮನ ಸೆಳೆದಿದ್ದಾರೆ. ಭಾರತದ ವಿರುದ್ಧ ತಾವು ಆಡಿದ ಮೊದಲ ಮೂರು ಟೆಸ್ಟ್ ಇನ್ನಿಂಗ್ಸ್‌ಗಳಲ್ಲಿ ಕ್ರಮವಾಗಿ 100, 84 ಹಾಗೂ 80ಕ್ಕೂ ಅಧಿಕ ರನ್ ಗಳಿಸುವ ಮೂಲಕ ದಿನುಷಾ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಈ ಮೂಲಕ, ಭಾರತದ ವಿರುದ್ಧದ ತಮ್ಮ ಮೊದಲ ಮೂರು ಟೆಸ್ಟ್ ಇನ್ನಿಂಗ್ಸ್‌ಗಳಲ್ಲಿ 80ಕ್ಕಿಂತ ಅಧಿಕ ರನ್ ಗಳಿಸಿದ ವಿಶ್ವದ ಕೇವಲ ಮೂರನೇ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಈ ಹಿಂದೆ ಜಹೀರ್ ಅಬ್ಬಾಸ್ ಹಾಗೂ ಎವರ್ಟನ್ ವೀಕ್ಸ್ ಮಾತ್ರ ಈ ಸಾಧನೆ ಮಾಡಿದ್ದರು.
ಗಾಲೆ ಟೆಸ್ಟ್‌ನಲ್ಲಿ ಸಂಕಷ್ಟದ ಸಮಯದಲ್ಲಿ ಸಿಡಿದ ಶತಕ
ಸೋನಾಲ್ ದಿನುಷಾ ಅವರ ಬ್ಯಾಟಿಂಗ್ ಪರಾಕ್ರಮ ಮೊದಲಿಗೆ ಬೆಳಕಿಗೆ ಬಂದಿದ್ದು ಗಾಲೆ ಟೆಸ್ಟ್ ಪಂದ್ಯದಲ್ಲಿ. ಶ್ರೀಲಂಕಾ ತಂಡ ಭಾರಿ ಸಂಕಷ್ಟದಲ್ಲಿದ್ದಾಗ ಕ್ರೀಸ್‌ಗೆ ಇಳಿದ ಅವರು, ಭಾರತದ ಸ್ಪಿನ್ನರ್‌ಗಳಿಗೆ ಪ್ರಾಬಲ್ಯ ಮೆರೆಯಲು ಅವಕಾಶ ನೀಡಲಿಲ್ಲ. ಬದಲಾಗಿ, ಅತ್ಯುತ್ತಮ ಫುಟ್‌ವರ್ಕ್ ಮೂಲಕ ಕುಲದೀಪ್ ಯಾದವ್, ಮಾನವ್ ಸುತಾರ್ ಹಾಗೂ ರವೀಂದ್ರ ಜಡೇಜಾ ಅವರ ಸ್ಪಿನ್ ತಂತ್ರಗಳನ್ನು ವಿಫಲಗೊಳಿಸಿದರು.
ಸ್ಪಿನ್ನರ್‌ಗಳ ಲೆಂಗ್ತ್ ಅನ್ನು ಅರಿತುಕೊಂಡು ಸ್ವೀಪ್ ಹಾಗೂ ರಿವರ್ಸ್-ಸ್ವೀಪ್ ಶಾಟ್‌ಗಳ ಮೂಲಕ ನಿರಂತರವಾಗಿ ರನ್ ಕಲೆಹಾಕಿದರು. ಕ್ರೀಸ್‌ನಲ್ಲಿ ಭದ್ರವಾಗಿ ನೆಲೆಯೂರಿದ ಬಳಿಕ ರಕ್ಷಣಾತ್ಮಕ ಆಟದ ಜೊತೆಗೆ ಆಕರ್ಷಕ ಹೊಡೆತಗಳನ್ನು ಬಾರಿಸುತ್ತಾ ಸ್ಟ್ರೈಕ್ ರೊಟೇಟ್ ಮಾಡಿದರು. ಕೇವಲ 168 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 2 ಸಿಕ್ಸರ್ ನೆರವಿನಿಂದ ತಮ್ಮ ಚೊಚ್ಚಲ ಟೆಸ್ಟ್ ಶತಕ ಪೂರೈಸಿದ ಅವರು ಅಂತಿಮವಾಗಿ 100 ರನ್ ಗಳಿಸಿ ವಿಕೆಟ್ ಒಪ್ಪಿಸಿದ್ದರು. ಅದೇ ಪಂದ್ಯದ ಎರಡನೇ ಇನ್ನಿಂಗ್ಸ್‌ನಲ್ಲೂ ತಮ್ಮ ಜವಾಬ್ದಾರಿಯುತ ಆಟವನ್ನು ಮುಂದುವರಿಸಿದ ದಿನುಷಾ 84 ರನ್ ಸಿಡಿಸಿ ಕೇವಲ 16 ರನ್‌ಗಳ ಅಂತರದಿಂದ ಸತತ ಎರಡನೇ ಶತಕ ವಂಚಿತರಾಗಿದ್ದರು.
ಕೊಲಂಬೊ ಟೆಸ್ಟ್‌ನಲ್ಲೂ ಮುಂದುವರಿದ ಲಂಕಾ ಹರೆಯದ ಆಟಗಾರನ ಪಾರುಪತ್ಯ
ಎರಡನೇ ಟೆಸ್ಟ್ ಪಂದ್ಯ ನಡೆಯುತ್ತಿರುವ ಕೊಲಂಬೊದಲ್ಲಿಯೂ ದಿನುಷಾ ಅವರನ್ನು ಬೇಟೆ ಆಡುವುದು ಭಾರತೀಯ ಬೌಲರ್‌ಗಳಿಗೆ ದೊಡ್ಡ ಸವಾಲಾಗಿದೆ. ಇಲ್ಲಿಯೂ ಅವರು ಸ್ಪಿನ್ನರ್‌ಗಳ ವಿರುದ್ಧ ಪಾರುಪತ್ಯವನ್ನು ಮುಂದುವರಿಸಿದ್ದಾರೆ. ಆರಂಭದಲ್ಲಿ ರಕ್ಷಣಾತ್ಮಕ ಆಟಕ್ಕೆ ಒತ್ತು ನೀಡಿದ ಅವರು, ಚೆಂಡಿನ ತಿರುವನ್ನು ಅರಿತುಕೊಳ್ಳಲು ಕ್ರೀಸ್‌ನಿಂದ ಮುಂದಕ್ಕೆ ಬಂದು ಆಡಿದರು. ಒಮ್ಮೆ ವಿಶ್ವಾಸ ಮೂಡಿದ ನಂತರ, ಮಾನವ್ ಸುತಾರ್ ಹಾಗೂ ಸಾರಾಂಶ ಜೈನ್ ಬೌಲಿಂಗ್‌ನಲ್ಲಿ ಸ್ವೀಪ್, ರಿವರ್ಸ್-ಸ್ವೀಪ್ ಹಾಗೂ ಸ್ಲಾಗ್-ಸ್ವೀಪ್ ಮೂಲಕ ದೈತ್ಯ ಸಿಕ್ಸರ್‌ಗಳನ್ನು ಸಿಡಿಸಿದರು. ಕೇವಲ ಬಲೆಗೆ ಬೀಳದಂತೆ ತಾಳ್ಮೆಯಿಂದ ಆಡುವುದಷ್ಟೇ ಅಲ್ಲದೆ, ರನ್ ಗಳಿಸಲು ಸಿಗುವ ಪ್ರತಿಯೊಂದು ಅವಕಾಶವನ್ನು ಬಳಸಿಕೊಂಡು ಟೀಮ್ ಇಂಡಿಯಾ ಬೌಲರ್‌ಗಳು ತಮ್ಮ ರಣತಂತ್ರಗಳನ್ನು ಪದೇಪದೇ ಬದಲಾಯಿಸುವಂತೆ ಮಾಡುವಲ್ಲಿ ದಿನುಷಾ ಯಶಸ್ವಿಯಾಗಿದ್ದಾರೆ.
50 ಪಂದ್ಯಗಳ ಅನುಭವವಿರುವ ಆಟಗಾರನಂತೆ ಕಾಣುತ್ತಾರೆ ಎಂದ ಮಂಜ್ರೇಕರ್
ದಿನುಷಾ ಅವರ ಅತ್ಯುನ್ನತ ಮಟ್ಟದ ಆಟವನ್ನು ಕಂಡು ದಿಗ್ಗಜ ಕ್ರಿಕೆಟಿಗರು ಹಾಗೂ ವಿಮರ್ಶಕರು ಬೆರಗಾಗಿದ್ದಾರೆ. ಭಾರತದ ಮಾಜಿ ವಿಕೆಟ್ ಕೀಪರ್ ಸಬಾ ಕರೀಮ್ ಅವರು ದಿನುಷಾ ಆಟವನ್ನು ಗುಣಗಾನ ಮಾಡಿದ್ದಾರೆ. ಯುವ ಬ್ಯಾಟರ್ ಒಬ್ಬನಲ್ಲಿ ಇರಬೇಕಾದ ಸ್ಪಷ್ಟತೆ ಅವರಲ್ಲಿದೆ ಎಂದಿರುವ ಸಬಾ ಕರೀಮ್, ವೇಗಿಗಳ ಹಾಗೂ ಸ್ಪಿನ್ನರ್‌ಗಳ ವಿರುದ್ಧ ಹೇಗೆ ಆಡಬೇಕು ಎಂಬ ಬಗ್ಗೆ ದಿನುಷಾ ಅವರ ಲೆಕ್ಕಾಚಾರಗಳು ಅದ್ಭುತವಾಗಿವೆ ಎಂದು ಶ್ಲಾಘಿಸಿದ್ದಾರೆ.
ವಿಶೇಷವಾಗಿ ಫೀಲ್ಡರ್‌ಗಳಿದ್ದರೂ ರವೀಂದ್ರ ಜಡೇಜಾ ಅವರ ಬೌಲಿಂಗ್‌ನಲ್ಲಿ ಗ್ಯಾಪ್ ಹುಡುಕಿ ಹೊಡೆಯುವ ಅವರ ಕೌಶಲ್ಯವನ್ನು ಸಬಾ ಕರೀಮ್ ಕೊಂಡಾಡಿದ್ದಾರೆ. ಇನ್ನು ಖ್ಯಾತ ವೀಕ್ಷಕ ವಿವರಣೆಗಾರ ಸಂಜಯ್ ಮಂಜ್ರೇಕರ್ ಸಹ ದಿನುಷಾ ಆಟಕ್ಕೆ ಫಿದಾ ಆಗಿದ್ದಾರೆ. ಸ್ಪಿನ್ನರ್‌ಗಳನ್ನು ಅದ್ಭುತವಾಗಿ ಎದುರಿಸುವ ದಿನುಷಾ, ಕೇವಲ ಬೌಂಡರಿಗಳ ಮೇಲೆ ಅವಲಂಬಿತರಾಗದೆ ಸಿಂಗಲ್ಸ್ ಮತ್ತು ಡಬಲ್ಸ್ ಕದಿಯುವ ತಂತ್ರಗಾರಿಕೆಯನ್ನು ಕರಗತ ಮಾಡಿಕೊಂಡಿದ್ದಾರೆ ಎಂದಿದ್ದಾರೆ. ಜೊತೆಗೆ, ಅವರ ಬ್ಯಾಟಿಂಗ್ ಶೈಲಿ ಹಾಗೂ ತಾಳ್ಮೆಯನ್ನು ನೋಡಿದರೆ ಶ್ರೀಲಂಕಾ ಪರ ಈಗಾಗಲೇ 50 ಟೆಸ್ಟ್ ಪಂದ್ಯಗಳನ್ನು ಆಡಿದ ಅನುಭವಿ ಆಟಗಾರನಂತೆ ಕಾಣುತ್ತಾರೆ ಎಂದು ಮಂಜ್ರೇಕರ್ ಬಣ್ಣಿಸಿದ್ದಾರೆ. ಒಟ್ಟಾರೆಯಾಗಿ, ದಿನುಷಾ ಅವರ ಕೌಶಲ್ಯ, ತಾಳ್ಮೆ ಮತ್ತು ಆತ್ಮವಿಶ್ವಾಸವು ಭಾರತಕ್ಕೆ ಟೆಸ್ಟ್ ಸರಣಿಯಲ್ಲಿ ಬಹುದೊಡ್ಡ ಸವಾಲಾಗಿ ಪರಿಣಮಿಸಿದೆ.
ಇದನ್ನೂ ಓದಿ : ಟೀಕಾಕಾರರ ಬಾಯಿ ಮುಚ್ಚಿಸಿದ ಪ್ರಸಿದ್ಧ್ ಕೃಷ್ಣ : ಕೊಲಂಬೊ ಟೆಸ್ಟ್‌ನಲ್ಲಿ ಮಿಂಚಿದ ಕರ್ನಾಟಕದ ವೇಗಿ
