ಬೆಂಗಳೂರು : ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಸಾಂಪ್ರದಾಯಿಕ ಟೆಸ್ಟ್ ಮಾದರಿಯ ಪಂದ್ಯಗಳ ಅಬ್ಬರ ಮರುಕಳಿಸಿದ್ದು, ಬ್ಯಾಟರ್ಗಳು ತಮ್ಮ ನೈಜ ಕೌಶಲ್ಯಗಳನ್ನು ಪ್ರದರ್ಶಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಟೀಮ್ ಇಂಡಿಯಾದ ಮಾಜಿ ಸ್ಪಿನ್ ದಿಗ್ಗಜ ರವಿಚಂದ್ರನ್ ಅಶ್ವಿನ್ ಅವರು ಪ್ರಸ್ತುತ ಕ್ರಿಕೆಟ್ ಜಗತ್ತಿನ ಅತ್ಯುತ್ತಮ ಟೆಸ್ಟ್ ಬ್ಯಾಟರ್ ಯಾರು ಎಂಬ ಕುತೂಹಲಕಾರಿ ಚರ್ಚೆಯಲ್ಲಿ ಪಾಲ್ಗೊಂಡು ಅಚ್ಚರಿಯ ಆಯ್ಕೆಗಳನ್ನು ಮಾಡಿದ್ದಾರೆ. ‘ಕ್ರಿಕ್ಇನ್ಫೋ’ ನಡೆಸಿದ ‘ವಿನ್ನರ್ಸ್ ಸ್ಟೇ ಆನ್, ಕರೆಂಟ್ ಟೆಸ್ಟ್ ಬ್ಯಾಟರ್ಸ್’ (Winners Stay On, Current Test Batters) ಎಂಬ ವಿಶೇಷ ವಿಡಿಯೋ ಸೆಗ್ಮೆಂಟ್ನಲ್ಲಿ ಅಶ್ವಿನ್, ಕೆಲವು ಪ್ರಮುಖ ಆಟಗಾರರನ್ನು ಕಡೆಗಣಿಸಿ ತಮ್ಮದೇ ಆದ ವಿಶಿಷ್ಟ ದೃಷ್ಟಿಕೋನವನ್ನು ಹಂಚಿಕೊಂಡಿದ್ದಾರೆ.
ಕೆಎಲ್ ರಾಹುಲ್ಗೆ ಶಾಕ್, ಬವುಮಾಗೆ ಮಣೆ ಹಾಕಿದ ಅಶ್ವಿನ್
ವಿವಿಧ ಬ್ಯಾಟರ್ಗಳ ನಡುವಿನ ಮುಖಾಮುಖಿ ಹೋಲಿಕೆಯಲ್ಲಿ ಅಶ್ವಿನ್ ಅವರ ಆಯ್ಕೆಗಳು ಹಲವರ ಹುಬ್ಬೇರಿಸುವಂತೆ ಮಾಡಿದೆ. ಈ ರೌಂಡ್ನ ಆರಂಭದಲ್ಲಿ ಹ್ಯಾರಿ ಬ್ರೂಕ್ ಬದಲಿಗೆ ನ್ಯೂಜಿಲೆಂಡ್ನ ಡ್ಯಾರಿಲ್ ಮಿಚೆಲ್ ಅವರನ್ನು ಆಯ್ಕೆ ಮಾಡಿದ ಅಶ್ವಿನ್, ನಂತರ ಬೆನ್ ಡಕೆಟ್, ಏಡನ್ ಮಾರ್ಕ್ರಮ್ ಮತ್ತು ರಚಿನ್ ರವೀಂದ್ರ ಅವರನ್ನು ಕಡೆಗಣಿಸಿ ಡ್ಯಾರಿಲ್ ಮಿಚೆಲ್ ಅವರನ್ನೇ ಉಳಿಸಿಕೊಂಡರು. ಆದರೆ, ಡ್ಯಾರಿಲ್ ಮಿಚೆಲ್ ಹಾಗೂ ಭಾರತದ ಕೆಎಲ್ ರಾಹುಲ್ ನಡುವೆ ಆಯ್ಕೆ ಎದುರಾದಾಗ, ರಾಹುಲ್ ಪರ ಒಲವು ತೋರಿದರು. ಕಮಿಂದು ಮೆಂಡಿಸ್ ಎದುರು ಕೂಡ ರಾಹುಲ್ ಅವರನ್ನೇ ಬೆಂಬಲಿಸಿದ ಅಶ್ವಿನ್, ದಕ್ಷಿಣ ಆಫ್ರಿಕಾದ ನಾಯಕ ಟೆಂಬಾ ಬವುಮಾ ಹಾಗೂ ಕೆಎಲ್ ರಾಹುಲ್ ನಡುವೆ ಹೋಲಿಕೆ ಬಂದಾಗ ಅಚ್ಚರಿಯೆಂಬಂತೆ ಬವುಮಾ ಅವರನ್ನು ಆಯ್ಕೆ ಮಾಡಿದರು. “ಒತ್ತಡದ ಪರಿಸ್ಥಿತಿಯಲ್ಲಿ ನಾನು ಟೆಂಬಾ ಬವುಮಾ ಅವರನ್ನು ಆಯ್ಕೆ ಮಾಡುತ್ತೇನೆ” ಎಂದು ಅಶ್ವಿನ್ ಸ್ಪಷ್ಟಪಡಿಸಿದ್ದಾರೆ.
ಯಶಸ್ವಿ ಜೈಸ್ವಾಲ್, ಟ್ರಾವಿಸ್ ಹೆಡ್ ಪಾರುಪತ್ಯ
ಬವುಮಾ ನಂತರ ಯಶಸ್ವಿ ಜೈಸ್ವಾಲ್ ಅವರೊಂದಿಗೆ ಹೋಲಿಕೆ ಬಂದಾಗ, ಅಶ್ವಿನ್ ಭಾರತದ ಯುವ ಆರಂಭಿಕ ಬ್ಯಾಟರ್ ಜೈಸ್ವಾಲ್ ಅವರನ್ನು ಆಯ್ಕೆ ಮಾಡಿದರು. ಮತ್ತೊಂದು ಅಚ್ಚರಿಯೆಂದರೆ, ಪಾಕಿಸ್ತಾನದ ತಾರಾ ಬ್ಯಾಟರ್ ಬಾಬರ್ ಅಜಮ್ ಮತ್ತು ಜೈಸ್ವಾಲ್ ನಡುವಿನ ಆಯ್ಕೆಯಲ್ಲಿ ಅಶ್ವಿನ್, ಜೈಸ್ವಾಲ್ ಅವರನ್ನೇ ಬೆಂಬಲಿಸುವ ಮೂಲಕ ಪಾಕ್ ಆಟಗಾರನನ್ನು ಪಕ್ಕಕ್ಕಿಟ್ಟರು. ತದನಂತರ ಯಶಸ್ವಿ ಜೈಸ್ವಾಲ್ ಹಾಗೂ ಆಸ್ಟ್ರೇಲಿಯಾದ ಸ್ಫೋಟಕ ಬ್ಯಾಟರ್ ಟ್ರಾವಿಸ್ ಹೆಡ್ ನಡುವಿನ ಆಯ್ಕೆಯಲ್ಲಿ ಹೆಡ್ ಅವರನ್ನು ಆರಿಸಿದ ಅಶ್ವಿನ್, ಮುಂದಿನ ಹಂತದಲ್ಲಿ ಶುಭಮನ್ ಗಿಲ್ ಮತ್ತು ರಿಷಬ್ ಪಂತ್ ಅವರನ್ನೂ ಕಡೆಗಣಿಸಿ ಟ್ರಾವಿಸ್ ಹೆಡ್ ಅವರನ್ನೇ ನೆಚ್ಚಿನ ಆಟಗಾರನನ್ನಾಗಿ ಮುಂದುವರಿಸಿದರು.
ಅಂತಿಮ ಸಮರ: ಸ್ಮಿತ್ ಹಿಂದಿಕ್ಕಿ ಅಗ್ರಸ್ಥಾನಕ್ಕೇರಿದ ರೂಟ್
ಆಟದ ಅಂತಿಮ ಹಂತದಲ್ಲಿ ವಿಶ್ವದ ಇಬ್ಬರು ಶ್ರೇಷ್ಠ ಬ್ಯಾಟರ್ಗಳಾದ ಜೋ ರೂಟ್ ಮತ್ತು ಟ್ರಾವಿಸ್ ಹೆಡ್ ನಡುವೆ ಹೋಲಿಕೆ ಎದುರಾದಾಗ, ಇಂಗ್ಲೆಂಡ್ನ ರೂಟ್ ಅವರನ್ನು ಅಶ್ವಿನ್ ಆಯ್ಕೆ ಮಾಡಿದರು. ಕೊನೆಯದಾಗಿ, ದಿಗ್ಗಜ ಬ್ಯಾಟರ್ಗಳಾದ ಜೋ ರೂಟ್ ಹಾಗೂ ಸ್ಟೀವ್ ಸ್ಮಿತ್ ನಡುವೆ ಯಾರನ್ನು ಆರಿಸುತ್ತೀರಿ ಎಂಬ ಪ್ರಶ್ನೆಗೆ, “ಪ್ರಸ್ತುತ ಫಾರ್ಮ್ನ ಆಧಾರದ ಮೇಲೆ ನಾನು ಜೋ ರೂಟ್ ಅವರನ್ನು ಆಯ್ಕೆ ಮಾಡುತ್ತೇನೆ” ಎಂದು ಅಶ್ವಿನ್ ಉತ್ತರಿಸಿದ್ದಾರೆ. ಈ ಮೂಲಕ ಈ ಕಾಲದ ಅತ್ಯುತ್ತಮ ಟೆಸ್ಟ್ ಬ್ಯಾಟರ್ ಎಂಬ ಕಿರೀಟವನ್ನು ಅಶ್ವಿನ್, ಜೋ ರೂಟ್ ಅವರಿಗೆ ತೊಡಿಸಿದ್ದಾರೆ. ಸದ್ಯ ಟೆಸ್ಟ್ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಸಕ್ರಿಯ ಆಟಗಾರರ ಪಟ್ಟಿಯಲ್ಲಿ ಜೋ ರೂಟ್ ಅಗ್ರಸ್ಥಾನದಲ್ಲಿದ್ದು, ಸಚಿನ್ ತೆಂಡೂಲ್ಕರ್ ಅವರ ದಾಖಲೆ ಮುರಿಯುವತ್ತ ಮುನ್ನುಗ್ಗುತ್ತಿದ್ದಾರೆ ಎಂಬುದು ಗಮನಾರ್ಹ.
ಇದನ್ನೂ ಓದಿ ; ಲಂಕಾ ಪಾಳಯದಲ್ಲಿ ಆತಂಕ : ಡೈವ್ ಮಾಡಲು ಹೋಗಿ ಕುತ್ತಿಗೆಗೆ ಪೆಟ್ಟು ಮಾಡಿಕೊಂಡ ಚಾಂಡಿಮಲ್
