ಅಮೆರಿಕ ಚುನಾವಣಾ ಸುಧಾರಣೆಗೆ ಭಾರತವೇ ಮಾದರಿ : ‘ಸೇವ್ ಅಮೆರಿಕ ಆಕ್ಟ್’ ಪರ ಟ್ರಂಪ್ ವಾದ

ನವದೆಹಲಿ : ಅಮೆರಿಕದಲ್ಲಿ ಚುನಾವಣಾ ಅಕ್ರಮ ತಡೆಯಲು ಮತ್ತು ಮತದಾನದ ನಿಯಮಗಳನ್ನು ಬಿಗಿಗೊಳಿಸಲು ಉದ್ದೇಶಿಸಲಾದ ‘ಸೇವ್ ಅಮೆರಿಕ ಆಕ್ಟ್’ (SAVE America Act) ಜಾರಿಗೆ ತರಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಭಾರತದ ಚುನಾವಣಾ ವ್ಯವಸ್ಥೆಯನ್ನು ಉದಾಹರಣೆಯಾಗಿ ನೀಡಿದ್ದಾರೆ. ವಿಶ್ವದಲ್ಲೇ ಅತಿ ದೊಡ್ಡ ಪ್ರಜಾಪ್ರಭುತ್ವ ರಾಷ್ಟ್ರ ಎಂಬ ಹೆಗ್ಗಳಿಕೆ ಗಳಿಸಿರುವ ಭಾರತದ ಚುನಾವಣಾ ಪಾರದರ್ಶಕತೆ ಮತ್ತು ಮತದಾರರ ಗುರುತಿನ ಚೀಟಿ ಕಡ್ಡಾಯ ನಿಯಮದ ಕುರಿತು ಉಲ್ಲೇಖಿಸಿರುವ ಅವರು, ಅಮೆರಿಕದಲ್ಲೂ ಚುನಾವಣೆ ಪ್ರಕ್ರಿಯೆಗೆ ಇದೇ ರೀತಿಯ ಕಟ್ಟುನಿಟ್ಟಿನ ಕ್ರಮಗಳ ಅಗತ್ಯವಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಈ ಕುರಿತು ತಮ್ಮ ‘ಟ್ರುತ್ ಸೋಷಿಯಲ್’ (Truth Social) ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿರುವ ಅವರು, ಭಾರತದ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಅವರು ಅಮೆರಿಕ ಆಡಳಿತವನ್ನು ಕೇಳಿದ್ದ ಪ್ರಶ್ನೆಯೊಂದನ್ನು ಪ್ರಸ್ತಾಪಿಸಿದ್ದಾರೆ. “ಅಮೆರಿಕದಲ್ಲಿ ಅಧಿಕೃತ ಭಾವಚಿತ್ರವಿರುವ ಗುರುತಿನ ಚೀಟಿ (Photo ID) ಇಲ್ಲದೆ ಎಲೆಕ್ಷನ್ ನಡೆಸಲು ಹೇಗೆ ಸಾಧ್ಯ?” ಎಂದು ಜ್ಞಾನೇಶ್ ಕುಮಾರ್ ಪ್ರಶ್ನಿಸಿದ್ದರು ಎಂದು ಟ್ರಂಪ್ ತಿಳಿಸಿದ್ದಾರೆ. ಭಾರತದ ಇತ್ತೀಚಿನ ಸಾರ್ವತ್ರಿಕ ಚುನಾವಣೆಯಲ್ಲಿ 64.6 ಕೋಟಿಗೂ ಹೆಚ್ಚು ಮತದಾರರು ಭಾಗವಹಿಸಿದ್ದು, ಪ್ರತಿಯೊಬ್ಬರೂ ಅಧಿಕೃತ ಫೋಟೋ ಐಡಿ ಹೊಂದಿದ್ದರು ಮತ್ತು ಶೇಕಡಾ ಒಂದಕ್ಕಿಂತ ಕಡಿಮೆ ಭಾಗದಷ್ಟು ಮಾತ್ರ ಅಂಚೆ ಮತದಾನ (Postal Ballot) ನಡೆದಿತ್ತು ಎಂಬುದನ್ನು ಅವರು ಎತ್ತಿಹಿಡಿದಿದ್ದಾರೆ.

ಅಮೆರಿಕ ರಾಯಭಾರಿ ಸರ್ಗಿಯೋ ಬೆಂಬಲ

ಟ್ರಂಪ್ ಅವರ ಈ ನಿಲುವನ್ನು ಭಾರತದಲ್ಲಿನ ಅಮೆರಿಕ ರಾಯಭಾರಿ ಸರ್ಗಿಯೋ ಗೋರ್ ಅವರೂ ಬೆಂಬಲಿಸಿದ್ದಾರೆ. ಅಮೆರಿಕದ ಪ್ರಜಾಪ್ರಭುತ್ವದ ಸುಧಾರಣೆಗೆ ಭಾರತದ ಮತದಾನ ವ್ಯವಸ್ಥೆಯು ಅತ್ಯುತ್ತಮ ಮಾದರಿಯಾಗಿದೆ ಎಂದು ಹೇಳಿರುವ ಗೋರ್, ಭಾರತದಂತಹ ಬೃಹತ್ ದೇಶದಲ್ಲೇ ಪ್ರತಿಯೊಬ್ಬ ಮತದಾರನಿಗೆ ಐಡಿ ಕಡ್ಡಾಯವಾಗಿರುವಾಗ, ಅಮೆರಿಕ ಕಾಂಗ್ರೆಸ್ ತಕ್ಷಣವೇ ‘ಅಮೆರಿಕ ಉಳಿಸಿ ಕಾಯ್ದೆ’ಯನ್ನು ಅಂಗೀಕರಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಏನಿದು ‘ಸೇವ್ ಅಮೆರಿಕ ಆಕ್ಟ್’?

ಅಮೆರಿಕ ಫೆಡರಲ್ ಚುನಾವಣೆಗಳಲ್ಲಿ ಕೇವಲ ಅಮೆರಿಕನ್ನರು ಮಾತ್ರ ಭಾಗವಹಿಸುವುದನ್ನು ಖಚಿತಪಡಿಸಿಕೊಳ್ಳುವುದು ಈ ಕಾಯ್ದೆಯ ಮುಖ್ಯ ಉದ್ದೇಶವಾಗಿದೆ. ಹೊಸ ಕಾಯ್ದೆಯ ಪ್ರಕಾರ, ಮತದಾರರ ಪಟ್ಟಿಗೆ ಹೆಸರು ಸೇರಿಸಲು ಪೌರತ್ವದ ಸಾಕ್ಷ್ಯ ಮತ್ತು ಫೋಟೋ ಐಡಿ ಕಡ್ಡಾಯವಾಗಲಿದೆ. ಅಲ್ಲದೆ, ಅನಾರೋಗ್ಯ, ಅಂಗವಿಕಲತೆ, ಮಿಲಿಟರಿ ಸೇವೆ ಅಥವಾ ಪ್ರವಾಸದಲ್ಲಿರುವ ಸಂದರ್ಭಗಳನ್ನು ಹೊರತುಪಡಿಸಿ ಉಳಿದಂತೆ ಅಂಚೆ ಮತದಾನದ (Mail-in Ballots) ಬಳಕೆಯನ್ನು ಕಡಿತಗೊಳಿಸಲು ಪ್ರಸ್ತಾಪಿಸಲಾಗಿದೆ. ಭಾರತ ಮತ್ತು ಬ್ರೆಜಿಲ್ ದೇಶಗಳು ಬಯೋಮೆಟ್ರಿಕ್ ಆಧಾರಿತ ಮತದಾರರ ಗುರುತಿಸುವಿಕೆಯನ್ನು ಬಳಸುತ್ತಿದ್ದರೆ, ಅಮೆರಿಕ ಇನ್ನೂ ಸ್ವಯಂ-ದೃಢೀಕರಣವನ್ನು ನೆಚ್ಚಿಕೊಂಡಿದೆ ಎಂದು ಶ್ವೇತಭವನ ಕಳವಳ ವ್ಯಕ್ತಪಡಿಸಿದೆ.

ಇದನ್ನೂ ಓದಿ : ಕ್ರೆಡಿಟ್ ಕಾರ್ಡ್ ಮೂಲಕ ಮನೆ ಬಾಡಿಗೆ ಪಾವತಿಸಿದರೆ ಕ್ರೆಡಿಟ್ ಸ್ಕೋರ್ ಹೆಚ್ಚಾಗುತ್ತಾ? ಇಲ್ಲಿದೆ ಮಾಹಿತಿ