ಬೆಂಗಳೂರು : ಇಂಗ್ಲೆಂಡ್ ಕ್ರಿಕೆಟ್ ತಂಡದ ಸ್ಟಾರ್ ಬ್ಯಾಟರ್ ಹಾಗೂ ನಾಯಕ ಹ್ಯಾರಿ ಬ್ರೂಕ್ ಫ್ರಾಂಚೈಸಿ ಕ್ರಿಕೆಟ್ ಕುರಿತ ತಮ್ಮ ಹಿಂದಿನ ಕಠಿಣ ನಿಲುವನ್ನು ಸಡಿಲಿಸಿದ್ದಾರೆ. ದೇಶೀಯ ಹಾಗೂ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಮಾತ್ರವೇ ತಮ್ಮ ಆದ್ಯತೆ ಎಂದು ಈ ಹಿಂದೆ ಸ್ಪಷ್ಟಪಡಿಸಿದ್ದ ಅವರು, ಇದೀಗ ದಿಢೀರ್ ಯೂ-ಟರ್ನ್ ಹೊಡೆದಿದ್ದು, ಭವಿಷ್ಯದಲ್ಲಿ ವಿಶ್ವದ ಶ್ರೀಮಂತ ಕ್ರಿಕೆಟ್ ಲೀಗ್ ಆಗಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಆಡುವ ಬಗ್ಗೆ ಮುಕ್ತ ಮನಸ್ಸು ಹೊಂದಿದ್ದಾರೆ. ಈ ಮೂಲಕ ಐಪಿಎಲ್ ಅಂಗಳಕ್ಕೆ ಮರಳುವ ಮಹತ್ವದ ಸುಳಿವು ನೀಡಿದ್ದಾರೆ.
ಕಳೆದ ತಿಂಗಳು ಭಾರತದ ವಿರುದ್ಧದ ಟಿ20 ಸರಣಿಗೂ ಮುನ್ನ ಮಾತನಾಡಿದ್ದ ಹ್ಯಾರಿ ಬ್ರೂಕ್, ತಾವು ಇಂಗ್ಲೆಂಡ್ ಕ್ರಿಕೆಟ್ಗೆ ಸಂಪೂರ್ಣವಾಗಿ ಬದ್ಧರಾಗಿದ್ದು, ತಮ್ಮ ತಾಯ್ನಾಡಿನ ‘ದಿ ಹಂಡ್ರೆಡ್’ ಟೂರ್ನಿಯನ್ನು ಹೊರತುಪಡಿಸಿ ವಿಶ್ವದ ಬೇರೆ ಯಾವುದೇ ಫ್ರಾಂಚೈಸಿ ಲೀಗ್ಗಳಲ್ಲಿ ಆಡುವುದಿಲ್ಲ ಎಂದು ಕಡ್ಡಿಮುರಿದಂತೆ ಹೇಳಿದ್ದರು.
ಐಪಿಎಲ್ ಹಾಗೂ ಪಿಎಸ್ಎಲ್ನಂತಹ ಟೂರ್ನಿಗಳಿಂದ ತಾವು ದೂರ ಉಳಿಯಲು ಇದೇ ಪ್ರಮುಖ ಕಾರಣ ಎಂದಿದ್ದರು. ಆದರೆ, ಹೆಡಿಂಗ್ಲೆಯಲ್ಲಿ ನಡೆಯುತ್ತಿರುವ ದಿ ಹಂಡ್ರೆಡ್ ಟೂರ್ನಿಯ ವೇಳೆ ಕ್ರೀಡಾ ಮಾಧ್ಯಮವೊಂದರ ಜೊತೆ ಮಾತನಾಡಿದ ಅವರು ತಮ್ಮ ಹಿಂದಿನ ಹೇಳಿಕೆಗೆ ತದ್ವಿರುದ್ಧವಾದ ಪ್ರತಿಕ್ರಿಯೆ ನೀಡಿದ್ದಾರೆ. ಐಪಿಎಲ್ ಒಂದು ಅತ್ಯುತ್ತಮ ಟೂರ್ನಿಯಾಗಿದ್ದು, ಅಲ್ಲಿ ಆಡುವುದರಿಂದ ಆಟಗಾರನ ಸಾಮರ್ಥ್ಯ ಮತ್ತಷ್ಟು ವೃದ್ಧಿಸುತ್ತದೆ ಎಂದಿರುವ ಅವರು, ಭವಿಷ್ಯದಲ್ಲಿ ಐಪಿಎಲ್ ಆಡುವ ಬಗ್ಗೆ ಖಂಡಿತವಾಗಿಯೂ ಯೋಚಿಸುತ್ತೇನೆ ಎಂದು ಹೇಳಿದ್ದಾರೆ.
ಐಪಿಎಲ್ ಜೊತೆಗಿನ ಹ್ಯಾರಿ ಬ್ರೂಕ್ ನಂಟು ಮತ್ತು ನಿಷೇಧ
ಹ್ಯಾರಿ ಬ್ರೂಕ್ ಮತ್ತು ಐಪಿಎಲ್ ನಡುವಿನ ಸಂಬಂಧ ಮೊದಲಿನಿಂದಲೂ ಏರಿಳಿತಗಳಿಂದಲೇ ಕೂಡಿದೆ. 2023ರ ಹರಾಜಿನಲ್ಲಿ ಸನ್ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿಯು ಬರೋಬ್ಬರಿ 13.25 ಕೋಟಿ ರೂಪಾಯಿ ನೀಡಿ ಅವರನ್ನು ಖರೀದಿಸಿತ್ತು. ತಮ್ಮ ಚೊಚ್ಚಲ ಆವೃತ್ತಿಯಲ್ಲೇ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಶತಕ ಸಿಡಿಸಿ ಅವರು ಮಿಂಚಿದ್ದರು. ಆದರೆ 2024ರ ಆವೃತ್ತಿಯ ವೇಳೆ ಅಜ್ಜಿಯ ನಿಧನದ ಕಾರಣ ನೀಡಿ ಟೂರ್ನಿಯಿಂದ ಹಿಂದೆ ಸರಿದಿದ್ದರು.
ಬಳಿಕ 2025ರ ಮೆಗಾ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ 6.25 ಕೋಟಿ ರೂಪಾಯಿಗೆ ಅವರನ್ನು ತನ್ನ ತೆಕ್ಕೆಗೆ ಹಾಕಿಕೊಂಡಿತ್ತಾದರೂ, ಬ್ರೂಕ್ ಮತ್ತೆ ಟೂರ್ನಿಯಿಂದ ಹಿಂದೆ ಸರಿದಿದ್ದರು. ಸತತ ಎರಡು ಬಾರಿ ಟೂರ್ನಿಯಿಂದ ಹಿಂದೆ ಸರಿದ ಕಾರಣ, ಬಿಸಿಸಿಐನ ಪರಿಷ್ಕೃತ ವಿದೇಶಿ ಆಟಗಾರರ ನಿಯಮಾವಳಿಗಳ ಅನ್ವಯ ಅವರ ಮೇಲೆ ಎರಡು ವರ್ಷಗಳ ನಿಷೇಧ ಹೇರಲಾಗಿದೆ. ಹೀಗಾಗಿ 2026ರ ಐಪಿಎಲ್ ಆವೃತ್ತಿಗೂ ಅವರು ಅಲಭ್ಯರಾಗಲಿದ್ದು, 2027ರ ಆವೃತ್ತಿಯಿಂದಷ್ಟೇ ಅವರು ಮತ್ತೆ ಐಪಿಎಲ್ ಆಡಲು ಅರ್ಹತೆ ಪಡೆಯಲಿದ್ದಾರೆ.
ಅಮೋಘ ಫಾರ್ಮ್ನಲ್ಲಿ ಇಂಗ್ಲೆಂಡ್ ಆಟಗಾರ
ಹ್ಯಾರಿ ಬ್ರೂಕ್ ಪ್ರಸ್ತುತ ಭರ್ಜರಿ ಫಾರ್ಮ್ನಲ್ಲಿದ್ದಾರೆ. ಇತ್ತೀಚೆಗೆ ಭಾರತದ ವಿರುದ್ಧ ನಡೆದ ಟಿ20 ಸರಣಿಯಲ್ಲಿ ಇಂಗ್ಲೆಂಡ್ 4-0 ಅಂತರದ ಜಯ ಸಾಧಿಸುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದರು. ಲಾರ್ಡ್ಸ್ ಮೈದಾನದಲ್ಲಿ ನಡೆದಿದ್ದ ಪಂದ್ಯದಲ್ಲಿ ಕೇವಲ 35 ಎಸೆತಗಳಲ್ಲಿ 79 ರನ್ ಚಚ್ಚಿ ಪಂದ್ಯಶ್ರೇಷ್ಠ ಪ್ರಶಸ್ತಿಗೂ ಭಾಜನರಾಗಿದ್ದರು. ಪ್ರಸ್ತುತ ನಡೆಯುತ್ತಿರುವ ದಿ ಹಂಡ್ರೆಡ್ ಟೂರ್ನಿಯಲ್ಲೂ ಸನ್ರೈಸರ್ಸ್ ಲೀಡ್ಸ್ ತಂಡದ ಪರ ಆಡುತ್ತಿರುವ ಅವರು, ಲಂಡನ್ ಸ್ಪಿರಿಟ್ ವಿರುದ್ಧ ಕೇವಲ 15 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿ ಅಬ್ಬರಿಸಿದ್ದಾರೆ. ಈ ಟೂರ್ನಿಯಲ್ಲಿ ಬರೋಬ್ಬರಿ 187.27ರ ಸ್ಟ್ರೈಕ್ ರೇಟ್ ಕಾಯ್ದುಕೊಂಡಿರುವ ಅವರು, ಚುಟುಕು ಕ್ರಿಕೆಟ್ನಲ್ಲಿ ತಾವು ಎಷ್ಟು ಅಪಾಯಕಾರಿ ಎಂಬುದನ್ನು ಸಾಬೀತುಪಡಿಸುತ್ತಿದ್ದಾರೆ. ಪ್ರಸ್ತುತ ಐಪಿಎಲ್ ಆಡಲು ಅವರ ಮೇಲಿನ ನಿಷೇಧ ಅಡ್ಡಿಯಾಗಿದ್ದರೂ, 2027ರಲ್ಲಿ ಅವರು ಹರಾಜಿಗೆ ಲಭ್ಯರಾದರೆ ಫ್ರಾಂಚೈಸಿಗಳು ಮತ್ತೆ ಅವರ ಮೇಲೆ ಕೋಟಿ ಕೋಟಿ ಸುರಿಯಲು ಮುಗಿಬೀಳುವುದು ಖಚಿತ.
ಇದನ್ನೂ ಓದಿ : ಸರ್ಫರಾಜ್ ಭವಿಷ್ಯದ ಬಗ್ಗೆ ಸ್ಪಷ್ಟತೆ ಇರಲಿ : ಟೀಮ್ ಇಂಡಿಯಾ ಮ್ಯಾನೇಜ್ಮೆಂಟ್ಗೆ ಅಶ್ವಿನ್ ಮಹತ್ವದ ಸಲಹೆ
