ಬೆಂಗಳೂರು : ಷೇರು ಮಾರುಕಟ್ಟೆಯಲ್ಲಿ ಏರಿಳಿತ ಇರುವುದರಿಂದ, ಮ್ಯೂಚುವಲ್ ಫಂಡ್ ಹೂಡಿಕೆಯೂ ರಿಸ್ಕ್ ಹೊಂದಿರುವುದರಿಂದ ಈಗಲೂ ಹೆಚ್ಚಿನ ಜನ ಬ್ಯಾಂಕ್ ಗಳಲ್ಲಿ ನಿಶ್ಚಿತ ಠೇವಣಿ (ಎಫ್ ಡಿ) ಹೂಡಿಕೆ ಮಾಡುತ್ತಾರೆ. ನಿಯಮಿತ ಆದಾಯದ ಗ್ಯಾರಂಟಿ ಇರುವುದರಿಂದ ಹೆಚ್ಚಿನ ಜನ ಎಫ್ ಡಿ ಇರಿಸುತ್ತಾರೆ. ಅದರಲ್ಲೂ, ಸಣ್ಣ ಹಣಕಾಸು ಬ್ಯಾಂಕ್ ಗಳು ಹೆಚ್ಚಿನ ಬಡ್ಡಿ ನೀಡುವುದರಿಂದ ಸಾರ್ವಜನಿಕರು ಹೆಚ್ಚಾಗಿ ಹೂಡಿಕೆ ಮಾಡುತ್ತಾರೆ. ಇದರ ಮಧ್ಯೆಯೇ, ಸಣ್ಣ ಹಣಕಾಸು ಬ್ಯಾಂಕ್ ಗಳಿಗೆ ಎಫ್ ಡಿ ಬಡ್ಡಿ ದರದ ಕುರಿತು ಭಾರತೀಯ ರಿಸರ್ವ್ ಬ್ಯಾಂಕ್ ಹೊಸ ನಿಯಮಗಳನ್ನು ಜಾರಿಗೆ ತರುತ್ತಿದೆ.
ಹೌದು, ಸಣ್ಣ ಹಣಕಾಸು ಬ್ಯಾಂಕ್ ಗಳಿಗೆ ಆರ್ ಬಿಐ ಹೊಸ ಮಾರ್ಗಸೂಚಿಗಳನ್ನು ಹೊರಡಿಸಿದೆ. ನಿಶ್ಚಿತ ಠೇವಣಿಗೆ ಸಣ್ಣ ಹಣಕಾಸು ಬ್ಯಾಂಕ್ ಗಳು ಪ್ರತಿಯೊಂದು ಬ್ರ್ಯಾಂಚ್ ಗಳಲ್ಲಿ ಏಕರೂಪದ ಬಡ್ಡಿದರವನ್ನೇ ನೀಡಬೇಕು. ಗ್ರಾಹಕರು ಎಷ್ಟೇ ಮೊತ್ತವನ್ನು ಹೂಡಿಕೆ ಮಾಡಿದರೂ ಒಂದೇ ಮಾದರಿಯ ಬಡ್ಡಿದರವನ್ನು ನಿಗದಿಪಡಿಸಬೇಕು ಎಂದು ತಿಳಿಸಲಾಗಿದೆ. ಹೊಸ ನಿಯಮಗಳು ಅಕ್ಟೋಬರ್ 1ರಿಂದ ಜಾರಿಗೆ ಬರಲಿವೆ.
ಒಂದೇ ಮಾದರಿಯ ಬಡ್ಡಿದರವು ಬಲ್ಕ್ (3 ಕೋಟಿ ರೂ. ಅಥವಾ ಅದಕ್ಕಿಂತ ಹೆಚ್ಚಿನ ಮೊತ್ತ) ಹೂಡಿಕೆದಾರರಿಗೆ ಅನ್ವಯವಾಗುವುದಿಲ್ಲ ಎಂದು ಕೂಡ ಆರ್ ಬಿಐ ತಿಳಿಸಿದೆ. ಸಣ್ಣ ಪ್ರಮಾಣದ ಮೊತ್ತವನ್ನು ಹೂಡಿಕೆ ಮಾಡುವವರಿಗೆ ನೀಡುವ ಬಡ್ಡಿದರದಲ್ಲಿ ಏಕರೂಪತೆ ತರುವ ಉದ್ದೇಶದಿಂದ ಹೊಸ ನಿಯಮಗಳನ್ನು ಜಾರಿಗೆ ತರಲಾಗುತ್ತಿದೆ ಎಂದು ತಿಳಿದುಬಂದಿದೆ. ಅಲ್ಲದೆ, ಎಲ್ಲ ಬ್ರ್ಯಾಂಚ್ ಗಲ್ಲೂ ಒಂದೇ ರೀತಿಯ ಬಡ್ಡಿ ಇರಬೇಕು ಎಂದು ಕೂಡ ಸೂಚಿಸಿದೆ.
ಪ್ರತಿದಿನ ಬಡ್ಡಿ ಘೋಷಣೆ
ಸಣ್ಣ ಹಣಕಾಸು ಬ್ಯಾಂಕ್ ಗಳು ಪ್ರತಿ ದಿನ ಬಡ್ಡಿದರವನ್ನು ಘೋಷಣೆ ಮಾಡಬೇಕು. ಬ್ಯಾಂಕ್ ಗಳ ವೆಬ್ ಸೈಟ್ ಗಳಲ್ಲಿ ಪ್ರತಿ ದಿನ ಬೆಳಗ್ಗೆ 10 ಗಂಟೆಗೆ (10.10ರವರೆಗೆ ಸಮಯಾವಕಾಶ ಇರಲಿದೆ) ಇವತ್ತಿನ ಬಡ್ಡಿದರ ಎಷ್ಟಿರಲಿದೆ ಎಂಬುದನ್ನು ಕೂಡ ಘೋಷಣೆ ಮಾಡಬೇಕು ಎಂದು ಮಾರ್ಗಸೂಚಿಗಳು ತಿಳಿಸಿವೆ. ಎಫ್ ಡಿ ಬಡ್ಡಿದರದಲ್ಲಿ ಏಕರೂಪತೆ ಹಾಗೂ ಪಾರದರ್ಶಕತೆ ಇರಬೇಕು ಎಂಬ ಕಾರಣಕ್ಕಾಗಿ ಹೊಸ ನಿಯಮ ಜಾರಿಗೆ ತರುತ್ತಿದೆ ಎಂದು ತಿಳಿದುಬಂದಿದೆ.
ಇದನ್ನೂ ಓದಿ : ಬೆಂಗಳೂರಿನ ನಿಮ್ಹಾನ್ಸ್ ಆಸ್ಪತ್ರೆಯಲ್ಲಿ 2 ಹುದ್ದೆಗಳ ನೇಮಕಾತಿ : 25 ಸಾವಿರ ರೂಪಾಯಿ ಸ್ಯಾಲರಿ
