ಬೆಂಗಳೂರು : ರಾಜ್ಯ ರಾಜಧಾನಿ ಬೆಂಗಳೂರು ಸೇರಿ ಕರ್ನಾಟಕದ ಪ್ರಮುಖ ನಗರಗಳಲ್ಲಿ ಮನೆ ಮಾಲೀಕರು ಬಾಡಿಗೆದಾರರಿಂದ ನಗದು ರೂಪದಲ್ಲಿಯೇ ಬಾಡಿಗೆ ಸ್ವೀಕರಿಸುತ್ತಾರೆ. ಯುಪಿಐ ಮೂಲಕ ಪಾವತಿಸಬಹುದಾದರೂ ಮಾಲೀಕರ ಒತ್ತಾಸೆ ಮೇರೆಗೆ ಬಾಡಿಗೆದಾರರು ನಗದು ರೂಪದಲ್ಲೇ ಬಾಡಿಗೆ ಪಾವತಿಸುತ್ತಾರೆ. ಆದರೆ, ಕ್ಯಾಶ್ ಮೂಲಕ ರೆಂಟ್ ಪೇ ಮಾಡುವ ಬಾಡಿಗೆದಾರರಿಗೆ ಕೆಲ ಅನನುಕೂಲಗಳು ಆಗುತ್ತವೆ. ತೆರಿಗೆ ವಿನಾಯಿತಿ ಲಭಿಸುವುದಿಲ್ಲ ಎಂಬುದು ಪ್ರಮುಖ ಸಂಗತಿಯಾಗಿದೆ.
ಹಾಗೆ ನೋಡಿದರೆ, ನಗದು ರೂಪದಲ್ಲಿ ಬಾಡಿಗೆ ನೀಡುವುದು ಕಾನೂನುಬಾಹಿರ ಅಲ್ಲದಿದ್ದರೂ, ಸೂಕ್ತ ದಾಖಲೆಗಳನ್ನು ನಿರ್ವಹಿಸದಿದ್ದರೆ ಆದಾಯ ತೆರಿಗೆ ಇಲಾಖೆಯಿಂದ ದೊಡ್ಡ ಹೊಡೆತ ಬೀಳಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ. ನಗದು ಪಾವತಿಯಲ್ಲಿ ಯಾವುದೇ ಡಿಜಿಟಲ್ ಅಥವಾ ಬ್ಯಾಂಕ್ ದಾಖಲೆಗಳು ಲಭ್ಯವಿಲ್ಲದಿರುವುದರಿಂದ, ತೆರಿಗೆ ಪರಿಶೀಲನೆಯ ಸಂದರ್ಭದಲ್ಲಿ ಅದನ್ನು ಸಾಬೀತುಪಡಿಸುವುದು ಕಷ್ಟವಾಗುತ್ತದೆ. ತೆರಿಗೆ ವಿನಾಯಿತಿ ಪಡೆಯಲು ಉದ್ಯೋಗಿಗಳು ಕೆಲವು ಪ್ರಮುಖ ಎಚ್ಚರಿಕೆಗಳನ್ನು ವಹಿಸಬೇಕು.
ಬಾಡಿಗೆ ಒಪ್ಪಂದ, ಸಹಿಯೊಂದಿಗೆ ನಗದು ಪಡೆದ ರಸೀದಿಗಳು ಮತ್ತು ಸ್ಟ್ಯಾಂಪ್ ಕಾಯ್ದೆಯ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಸ್ಟ್ಯಾಂಪ್ ಆಕ್ಟ್ ಪ್ರಕಾರ 5 ಸಾವಿರ ರೂ.ಗಿಂತ ಹೆಚ್ಚಿನ ನಗದು ಬಾಡಿಗೆ ರಸೀದಿಗೆ ಕಡ್ಡಾಯವಾಗಿ ರೆವೆನ್ಯೂ ಸ್ಟ್ಯಾಂಪ್ ಅಂಟಿಸಬೇಕು. ಮಾಸಿಕ ಬಾಡಿಗೆ 50 ಸಾವಿರ ರೂ. ದಾಟಿದರೆ, ನಗದು ಅಥವಾ ಆನ್ ಲೈನ್ ಮೂಲಕ ಪಾವತಿಸಿದರೂ ಕಡ್ಡಾಯವಾಗಿ ಟಿಡಿಎಸ್ ಕಡಿತಗೊಳಿಸಬೇಕು ಎಂಬ ನಿಯಮಗಳಿವೆ.
ಸಾಮಾನ್ಯವಾಗಿ ನಗದು ಬಾಡಿಗೆ ಪಾವತಿಗೆ ಯಾವುದೇ ತಡೆ ಇಲ್ಲದಿದ್ದರೂ, ಪಾರದರ್ಶಕ ದಾಖಲೆಗಳ ಕೊರತೆಯು ನಿಮ್ಮ ಎಚ್ಆರ್ಎ ಕ್ಲೈಮ್ ಅನ್ನು ತಿರಸ್ಕರಿಸುವಂತೆ ಮಾಡಬಹುದು. ಆದ್ದರಿಂದ ಯುಪಿಐ, ಚೆಕ್ ಅಥವಾ ಬ್ಯಾಂಕ್ ವರ್ಗಾವಣೆಯಂತಹ ಡಿಜಿಟಲ್ ವಿಧಾನಗಳನ್ನು ಬಳಸುವುದು ಹೆಚ್ಚು ಸುರಕ್ಷಿತ ಎಂದು ತೆರಿಗೆ ತಜ್ಞರು ಸಲಹೆ ನೀಡಿದ್ದಾರೆ. ಇದಕ್ಕಾಗಿ ಮನೆ ಓನರ್ ಮನವೊಲಿಸುವುದು ಪ್ರಮುಖವಾಗಿರುತ್ತದೆ.
ಇದನ್ನೂ ಓದಿ : ಗಮನಿಸಿ ; ಆಗಸ್ಟ್ 16ರೊಳಗೆ ಈ ಕೆಲಸ ಮಾಡದಿದ್ದರೆ ಮನೆಗೆ ಬರಲ್ಲ LPG ಸಿಲಿಂಡರ್!
