ಲಂಡನ್ : ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿಯು (ECB) ನ್ಯೂಜಿಲೆಂಡ್ ದಿಗ್ಗಜ ಸ್ಟೀಫನ್ ಫ್ಲೆಮಿಂಗ್ ಅವರನ್ನು ಇಂಗ್ಲೆಂಡ್ ಟೆಸ್ಟ್ ತಂಡದ ಹೊಸ ಮುಖ್ಯ ತರಬೇತುದಾರರನ್ನಾಗಿ ಇತ್ತೀಚೆಗೆ ನೇಮಕ ಮಾಡಿದೆ. ಆದರೆ, ಅವರು ತಕ್ಷಣವೇ ತಮ್ಮ ಜವಾಬ್ದಾರಿಯನ್ನು ವಹಿಸಿಕೊಳ್ಳದಿರುವುದು ಇದೀಗ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಮೈಕಲ್ ವಾನ್, ಇಸಿಬಿಯ ಈ ನಿರ್ಧಾರವನ್ನು ತರಾಟೆಗೆ ತೆಗೆದುಕೊಂಡಿದ್ದು, ಇದೊಂದು “ಹತಾಶೆಯ ನಡೆ” ಎಂದು ಕಟುವಾಗಿ ಟೀಕಿಸಿದ್ದಾರೆ.
ಬೆನ್ ಸ್ಟೋಕ್ಸ್ ಬದಲಾಗಿ, ಅನುಭವಿ ಆಟಗಾರ ಜೋ ರೂಟ್ ಅವರನ್ನು ಮತ್ತೆ ಇಂಗ್ಲೆಂಡ್ ಟೆಸ್ಟ್ ತಂಡದ ನಾಯಕರನ್ನಾಗಿ ಮಂಡಳಿ ನೇಮಿಸಿದೆ. ಇದರ ಜೊತೆಗೆ, ಸ್ಟೀಫನ್ ಫ್ಲೆಮಿಂಗ್ ಅವರನ್ನು ಕೋಚ್ ಆಗಿ ಘೋಷಿಸಿದ್ದರೂ, ಮುಂಬರುವ ಪಾಕಿಸ್ತಾನ ವಿರುದ್ಧದ ತವರಿನ ಟೆಸ್ಟ್ ಸರಣಿಯಲ್ಲಿ ಅವರು ತಂಡದೊಂದಿಗೆ ಇರುವುದಿಲ್ಲ. ಈ ಸರಣಿಯಲ್ಲಿ ಮಾರ್ಕಸ್ ಟ್ರೆಸ್ಕೋಥಿಕ್ ಅವರು ಹಂಗಾಮಿ ತರಬೇತುದಾರರಾಗಿ ಜವಾಬ್ದಾರಿ ನಿರ್ವಹಿಸಲಿದ್ದಾರೆ. ತಮ್ಮ ಕುಟುಂಬದೊಂದಿಗೆ ಸಮಯ ಕಳೆಯಲು ನ್ಯೂಜಿಲೆಂಡ್ನಲ್ಲೇ ಉಳಿಯಲು ಫ್ಲೆಮಿಂಗ್ ಕಾಲಾವಕಾಶ ಕೇಳಿದ್ದಾರೆ ಹಾಗೂ ಈ ವರ್ಷದ ಕೊನೆಯಲ್ಲಿ ದಕ್ಷಿಣ ಆಫ್ರಿಕಾದ ಪ್ರವಾಸದ ವೇಳೆ ಅವರು ಅಧಿಕೃತವಾಗಿ ತಂಡವನ್ನು ಸೇರಿಕೊಳ್ಳಲಿದ್ದಾರೆ ಎಂಬ ಮಂಡಳಿಯ ನಿರ್ಧಾರವನ್ನು ಮೈಕಲ್ ವಾನ್ ಗಂಭೀರವಾಗಿ ಪ್ರಶ್ನಿಸಿದ್ದಾರೆ.
ಪಾಕಿಸ್ತಾನ ಸರಣಿಗೇ ಏಕೆ ಆಗಮಿಸಬಾರದು?
ಸ್ಟೀಫನ್ ಫ್ಲೆಮಿಂಗ್ ಅವರ ನೇಮಕವನ್ನು ಶ್ಲಾಘಿಸಿರುವ ವಾನ್, ಅವರೊಬ್ಬ ಅದ್ಭುತ ತರಬೇತುದಾರ ಎಂಬುದನ್ನು ಒಪ್ಪಿಕೊಂಡಿದ್ದಾರೆ. ಆದರೆ, ಡಿಸೆಂಬರ್ ತನಕ ಕಾಯುವ ಬದಲು, ಮುಂಬರುವ ಪಾಕಿಸ್ತಾನ ವಿರುದ್ಧದ ಸರಣಿಯಿಂದಲೇ ಅವರು ತಂಡದ ಚುಕ್ಕಾಣಿ ಹಿಡಿಯಬೇಕಿತ್ತು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಪ್ರತಿಷ್ಠಿತ ‘ಆ್ಯಷಸ್’ ಸರಣಿಯಂತಹ ಮಹತ್ವದ ಟೂರ್ನಿಗಳಿಗೂ ಮುನ್ನ ಇಂಗ್ಲೆಂಡ್ನ ವಾತಾವರಣ, ಎಜ್ಬಾಸ್ಟನ್ನಂತಹ ಪ್ರಮುಖ ಮೈದಾನಗಳು, ಕೌಂಟಿ ಕೋಚ್ಗಳು ಹಾಗೂ ದೇಶಿ ಕ್ರಿಕೆಟ್ ವ್ಯವಸ್ಥೆಯನ್ನು ಅರ್ಥಮಾಡಿಕೊಳ್ಳಲು ಪಾಕಿಸ್ತಾನ ಸರಣಿ ಫ್ಲೆಮಿಂಗ್ಗೆ ಅತ್ಯುತ್ತಮ ವೇದಿಕೆಯಾಗಿತ್ತು ಎಂದು ‘ದಿ ಟೆಲಿಗ್ರಾಫ್’ ಪತ್ರಿಕೆಯ ತಮ್ಮ ಅಂಕಣದಲ್ಲಿ ವಾನ್ ಬರೆದುಕೊಂಡಿದ್ದಾರೆ.
ಫ್ಲೆಮಿಂಗ್ ವಿಳಂಬವಾಗಿ ತಂಡ ಸೇರುವುದರಿಂದ, ಮುಂದಿನ ಆ್ಯಷಸ್ ಸರಣಿಗೂ ಮುನ್ನ ಅವರು ಇಂಗ್ಲೆಂಡ್ನಲ್ಲಿ ಕೇವಲ ಒಂದು ತವರಿನ ಟೆಸ್ಟ್ ಪಂದ್ಯದಲ್ಲಿ (ಮುಂದಿನ ಬೇಸಿಗೆಯಲ್ಲಿ ಬಾಂಗ್ಲಾದೇಶದ ವಿರುದ್ಧ) ಮಾತ್ರ ಕೋಚ್ ಆಗಿ ಕಾರ್ಯನಿರ್ವಹಿಸುವಂತಾಗುತ್ತದೆ. ಇದು ಪರೋಕ್ಷವಾಗಿ ತಂಡದ ಸಿದ್ಧತೆಯ ಮೇಲೆ ಪ್ರಭಾವ ಬೀರಲಿದೆ ಎಂಬ ಆತಂಕವನ್ನು ಅವರು ವ್ಯಕ್ತಪಡಿಸಿದ್ದಾರೆ.
ಷರತ್ತುಗಳಿಗೆ ಸುಲಭವಾಗಿ ಮಣಿದ ಇಸಿಬಿ
ಬ್ರೆಂಡನ್ ಮೆಕಲಮ್ ಅವರನ್ನು ಟೆಸ್ಟ್ ಕೋಚ್ ಆಗಿ ನೇಮಿಸುವಾಗ ಇಸಿಬಿ ಮಾಡಿದ ತಪ್ಪನ್ನೇ ಈಗ ಮತ್ತೆ ಪುನರಾವರ್ತನೆ ಮಾಡಿದೆ ಎಂದು ಕ್ರಿಕೆಟ್ ಪಂಡಿತರೂ ಆಗಿರುವ ವಾನ್ ಅಸಮಾಧಾನ ಹೊರಹಾಕಿದ್ದಾರೆ. ನ್ಯೂಜಿಲೆಂಡ್ ದಿಗ್ಗಜನ ಷರತ್ತುಗಳಿಗೆ ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ಇಷ್ಟು ಸುಲಭವಾಗಿ ತಲೆಬಾಗಿರುವುದು ಅವರಿಗೆ ಬಹುದೊಡ್ಡ ಅಚ್ಚರಿ ಮೂಡಿಸಿದೆ. ನೇಮಕಗೊಂಡ ಆರು ತಿಂಗಳ ಬಳಿಕ ತಂಡ ಸೇರಿಕೊಳ್ಳುತ್ತೇನೆಂಬ ಬೇಡಿಕೆಯನ್ನು ಒಪ್ಪಿಕೊಂಡಿರುವುದು ಇಸಿಬಿಯ ಹತಾಶೆಯ ಮನಸ್ಥಿತಿಯನ್ನು ತೋರಿಸುತ್ತದೆ. ಅಲ್ಲದೆ, ಇಂಗ್ಲೆಂಡ್ ತಂಡದ ಕೋಚ್ ಹುದ್ದೆ ತನ್ನ ಹಿಂದಿನ ಘನತೆ ಮತ್ತು ಆಕರ್ಷಣೆಯನ್ನು ಕಳೆದುಕೊಂಡಿದೆಯೇ ಎಂಬ ಅನುಮಾನವನ್ನು ಹುಟ್ಟುಹಾಕಿದೆ ಎಂದು ವಾನ್ ಖಾರವಾಗಿ ನುಡಿದಿದ್ದಾರೆ. ಐಪಿಎಲ್ 2026 ಮೇ ತಿಂಗಳಲ್ಲೇ ಮುಗಿದಿರುವುದರಿಂದ ಫ್ಲೆಮಿಂಗ್ ಅವರು ಪ್ರಸ್ತುತ ಬಿಡುವಿನಲ್ಲಿದ್ದಾರೆ, ಹೀಗಾಗಿ ಸ್ವಲ್ಪ ಶ್ರಮಪಟ್ಟಿದ್ದರೆ ಪಾಕಿಸ್ತಾನ ಸರಣಿಗೇ ಅವರು ಸಂಪೂರ್ಣ ಲಭ್ಯವಾಗುತ್ತಿದ್ದರು ಎನ್ನುವುದು ಅವರ ವಾದ.
ಫ್ಲೆಮಿಂಗ್ ಕೋಚ್ ಅಲ್ಲ, ಉತ್ತಮ ಮ್ಯಾನೇಜರ್ ಅಷ್ಟೇ
ಸ್ಟೀಫನ್ ಫ್ಲೆಮಿಂಗ್ ಅವರು ಅತ್ಯುತ್ತಮ ತಂತ್ರಗಾರಿಕೆ ಹೊಂದಿರುವ, ಆಧುನಿಕ ಕ್ರಿಕೆಟಿಗರನ್ನು ನಿಭಾಯಿಸುವ ಕಲೆ ಬಲ್ಲ ವ್ಯಕ್ತಿ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಅವರು ಮೈದಾನದಲ್ಲಿ ಇಳಿದು ಆಟಗಾರರನ್ನು ತಿದ್ದುವ ನಿರ್ದಿಷ್ಟ ‘ಕೋಚ್’ ಆಗಿರುವುದಕ್ಕಿಂತ ಹೆಚ್ಚಾಗಿ, ಒಬ್ಬ “ಉತ್ತಮ ಮ್ಯಾನೇಜರ್” ಮಾತ್ರ ಎಂದು ವಾನ್ ವಿಶ್ಲೇಷಿಸಿದ್ದಾರೆ. ದಕ್ಷಿಣ ಆಫ್ರಿಕಾ ಸರಣಿಗೆ ಮುನ್ನ ಹೊಸ ನಾಯಕ ಜೋ ರೂಟ್ ಹಾಗೂ ಫ್ಲೆಮಿಂಗ್ ನಡುವೆ ದೃಢವಾದ ಬಾಂಧವ್ಯ ಬೆಸೆಯಲು ಬಹಳ ಕಡಿಮೆ ಸಮಯ ಸಿಗಲಿದೆ. ಇಂಗ್ಲೆಂಡ್ ಟೆಸ್ಟ್ ತಂಡ ಹಿಂದಿನ ಗೆಲುವಿನ ಲಯಕ್ಕೆ ಮರಳಬೇಕಿದ್ದರೆ ನಾಯಕ ಮತ್ತು ಕೋಚ್ ನಡುವಿನ ಆರಂಭಿಕ ಒಡನಾಟ ಬಹಳ ಮುಖ್ಯ. ಹಾಗಾಗಿ, ಮಂಡಳಿಯು ಬ್ಯಾಕ್ರೂಮ್ ಸಿಬ್ಬಂದಿಯಲ್ಲಾದರೂ ಬದಲಾವಣೆ ತಂದು, ಮೈದಾನದಲ್ಲಿ ಶ್ರದ್ಧೆಯಿಂದ ಬೆವರಿಳಿಸಿ ತರಬೇತಿ ನೀಡುವಂತಹ ನೈಜ ಕೋಚಿಂಗ್ ಮೌಲ್ಯವುಳ್ಳ ಹೊಸ ನಿರ್ವಾಹಕರನ್ನು ಕರೆತರಬೇಕು ಎಂದು ಟೆಸ್ಟ್ ಕ್ರಿಕೆಟ್ನ ಯಶಸ್ವಿ ಮಾಜಿ ನಾಯಕ ಮೈಕಲ್ ವಾನ್ ಇಸಿಬಿಗೆ ಸಲಹೆ ನೀಡಿದ್ದಾರೆ.
ಇದನ್ನೂ ಓದಿ : ಅಜಿಂಕ್ಯ ರಹಾನೆಗೆ ಭಾವನಾತ್ಮಕ ಸಂದೇಶ ಕೊಟ್ಟ ವಿರಾಟ್ ಕೊಹ್ಲಿ, ರಿಷಬ್ ಪಂತ್
