ಬೆಂಗಳೂರು : ಇಂಗ್ಲೆಂಡ್ ಮತ್ತು ಐರ್ಲೆಂಡ್ ಪ್ರವಾಸದಲ್ಲಿನ ನಿರಾಶಾದಾಯಕ ಪ್ರದರ್ಶನದ ನಂತರ, ಟೀಮ್ ಇಂಡಿಯಾ ನಾಯಕ ಶ್ರೇಯಸ್ ಅಯ್ಯರ್ ಅವರು ತಮ್ಮ ಆಟಗಾರರು ನಿರ್ಭೀತ ಕ್ರಿಕೆಟ್ ಆಡಬೇಕೆಂದು ಮತ್ತು ಹೊರಗಿನ ಟೀಕೆಗಳನ್ನು ನಿರ್ಲಕ್ಷಿಸಬೇಕೆಂದು ಕರೆ ನೀಡಿದ್ದಾರೆ. ಮುಂಬರುವ ಜಿಂಬಾಬ್ವೆ ವಿರುದ್ಧದ ಮೂರು ಪಂದ್ಯಗಳ ಟಿ-20 ಸರಣಿಗೂ ಮುನ್ನ ಮಾತನಾಡಿದ ಅವರು, ಇಂಗ್ಲೆಂಡ್‌ನ ಕಠಿಣ ಹಂತವು ತಂಡದ ಆಟಗಾರರನ್ನು ಇನ್ನಷ್ಟು ಹತ್ತಿರವಾಗಿಸಿದೆ ಹಾಗೂ ಭವಿಷ್ಯದ ಸವಾಲುಗಳಿಗೆ ಉತ್ತಮವಾಗಿ ಸಿದ್ಧಪಡಿಸಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಕಠಿಣ ಹಂತದಿಂದ ಒಗ್ಗಟ್ಟಾದ ತಂಡ
ಇಂಗ್ಲೆಂಡ್ ಮತ್ತು ಐರ್ಲೆಂಡ್‌ನಲ್ಲಿ ಯಾವುದೇ ಸೀಮಿತ ಓವರ್‌ಗಳ ಪಂದ್ಯಗಳನ್ನು ಗೆಲ್ಲಲಾಗದೆ ಮುಗ್ಗರಿಸಿದ್ದ ಭಾರತ ತಂಡ, ಈಗ ಪುಟಿದೇಳುವ ಹುಮ್ಮಸ್ಸಿನಲ್ಲಿದೆ. ಟಿ-20 ತಂಡದ ನಾಯಕರಾಗಿ ತಮ್ಮ ಪಯಣವನ್ನು ಕಠಿಣ ಸವಾಲುಗಳೊದಿಗೆ ಆರಂಭಿಸಿದ ಶ್ರೇಯಸ್ ಅಯ್ಯರ್, ಇತ್ತೀಚಿನ ಸೋಲುಗಳು ತಂಡಕ್ಕೆ ಅತಿ ದೊಡ್ಡ ಪಾಠವನ್ನು ಕಲಿಸಿವೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. “ನಾವು ಇಂಗ್ಲೆಂಡ್‌ನಲ್ಲಿ ಬಹಳ ಕಠಿಣ ಹಂತವನ್ನು ಎದುರಿಸಿದೆವು. ಆದರೆ ಅದರಿಂದ ಸಾಕಷ್ಟು ಸಕಾರಾತ್ಮಕ ಅಂಶಗಳನ್ನು ಕಲಿತಿದ್ದೇವೆ. ಭವಿಷ್ಯದಲ್ಲಿ ಒಂದು ತಂಡವಾಗಿ ನಾವು ಹೇಗೆ ರೂಪುಗೊಳ್ಳಬೇಕು, ಮೈದಾನದಲ್ಲಿ ಹೆಜ್ಜೆ ಇಟ್ಟಾಗ ಎಂತಹ ಅರಿವು, ಹೊಂದಾಣಿಕೆ ಮತ್ತು ಸಮಯಪ್ರಜ್ಞೆ ಇರಬೇಕು ಎಂಬುದನ್ನು ನಾವು ಚೆನ್ನಾಗಿ ಅರಿತುಕೊಂಡಿದ್ದೇವೆ” ಎಂದು ಮೊದಲ ಟಿ-20 ಪಂದ್ಯದ ಮುನ್ನಾದಿನದ ಜಂಟಿ ಸುದ್ದಿಗೋಷ್ಠಿಯಲ್ಲಿ ವಿವರಿಸಿದರು. ಸೋಲುಗಳು ತಂಡವನ್ನು ವಿಭಜಿಸುವ ಬದಲು ಎಲ್ಲರನ್ನೂ ಒಂದುಗೂಡಿಸಿವೆ ಹಾಗೂ ಒಗ್ಗಟ್ಟಾಗಿ ಆಡುವ ಬಗೆಗಿನ ಚರ್ಚೆಗೆ ದಾರಿ ಮಾಡಿಕೊಟ್ಟಿವೆ ಎಂದು ಅವರು ಸ್ಪಷ್ಟಪಡಿಸಿದರು.
ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವುದು ಮುಖ್ಯ
ಹರಾರೆಯಲ್ಲಿ ನಡೆಯಲಿರುವ ಈ ಸರಣಿಯಲ್ಲಿ ಭಾರತದ ಪಾಲಿಗೆ ಮೊದಲ ಮತ್ತು ಪ್ರಮುಖ ಸವಾಲೆಂದರೆ ಜಿಂಬಾಬ್ವೆಯ ಹವಾಮಾನ ಹಾಗೂ ಪಿಚ್‌ಗಳಿಗೆ ವೇಗವಾಗಿ ಹೊಂದಿಕೊಳ್ಳುವುದು. ತಂಡದ ಬಹಳಷ್ಟು ಆಟಗಾರರು ಮೊದಲ ಬಾರಿಗೆ ಜಿಂಬಾಬ್ವೆ ಪ್ರವಾಸ ಕೈಗೊಂಡಿರುವುದರಿಂದ, ಇದು ಒಂದು ವಿಭಿನ್ನ ಅನುಭವವಾಗಲಿದೆ ಎಂದು ಅಯ್ಯರ್ ತಿಳಿಸಿದರು. ಇಂಗ್ಲೆಂಡ್‌ನಿಂದ ನೇರವಾಗಿ ಪ್ರಯಾಣ ಬೆಳೆಸಿರುವ ತಂಡಕ್ಕೆ ಪಂದ್ಯಕ್ಕೂ ಮುನ್ನ ಕೇವಲ ಒಂದು ಅಭ್ಯಾಸದ ಅವಧಿ ಮಾತ್ರ ಲಭ್ಯವಾಗಿದೆ. ಆದರೆ, ಇದು ಅಂತರರಾಷ್ಟ್ರೀಯ ಕ್ರಿಕೆಟ್‌ನ ಒಂದು ಭಾಗವಾಗಿದ್ದು, ಇಂತಹ ಸವಾಲಿನ ಪರಿಸ್ಥಿತಿಗಳಲ್ಲಿ ಆಡಿ ಉತ್ತಮ ಪ್ರದರ್ಶನ ನೀಡಿದಾಗ ದೊರೆಯುವ ತೃಪ್ತಿ ಅಪಾರ ಎಂಬುದು ನಾಯಕನ ನಿಲುವು.
ಟೀಕೆಗಳಿಗೆ ಕಿವಿಗೊಡದೆ ನಿರ್ಭೀತ ಆಟವಾಡಿ
ಸತತ ಸೋಲುಗಳ ನಂತರ ಕೇಳಿಬರುತ್ತಿರುವ ಹೊರಗಿನ ಟೀಕೆಗಳಿಂದ ಆಟಗಾರರು ಒತ್ತಡಕ್ಕೊಳಗಾಗಬಾರದು ಎನ್ನುವುದು ನಾಯಕನ ಪ್ರಮುಖ ಉದ್ದೇಶವಾಗಿದೆ. ಆಟಗಾರರು ವೈಫಲ್ಯದ ಬಗ್ಗೆ ಭಯಪಡಬಾರದು, ಭಯವಿದ್ದಾಗ ಕೇವಲ ತಮ್ಮ ಸ್ಥಾನವನ್ನು ಉಳಿಸಿಕೊಳ್ಳಲು ಮಾತ್ರ ಅಡುತ್ತಾರೆ. ಆದರೆ ಆ ಭಯವನ್ನು ಬಿಟ್ಟು ನಿರ್ಭೀತಿಯಿಂದ ಆಡಿದಾಗ ಮಾತ್ರ ಆಟಗಾರರಿಂದ ಅತ್ಯುತ್ತಮ ಪ್ರದರ್ಶನ ಹೊರಬರಲು ಸಾಧ್ಯ ಎಂದು ಅವರು ಕಿವಿಮಾತು ಹೇಳಿದರು. ಜನರು ಹೊರಗಡೆ ಏನು ಹೇಳುತ್ತಿದ್ದಾರೆ ಎಂಬುದರ ಬಗ್ಗೆ ತಲೆಕೆಡಿಸಿಕೊಳ್ಳದೆ, ವರ್ತಮಾನದಲ್ಲಿ ಗಮನ ಕೇಂದ್ರೀಕರಿಸಿ ಒಗ್ಗಟ್ಟಿನಿಂದ ಆಡುವುದು ತಂಡದ ಭವಿಷ್ಯಕ್ಕೆ ಒಳ್ಳೆಯದು ಎಂದು ಅವರು ಒತ್ತಿ ಹೇಳಿದರು.
ಯುವ ಆಟಗಾರರಿಗೆ ಬೆಂಬಲ ಮತ್ತು ಎದುರಾಳಿಗೆ ಗೌರವ
ಇಂಗ್ಲೆಂಡ್ ಪ್ರವಾಸದ ಕಠಿಣ ಪರಿಸ್ಥಿತಿಯಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿ ಸಂಕಷ್ಟ ಎದುರಿಸಿದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ ಅವರಿಗೂ ಅಯ್ಯರ್ ಬೆಂಬಲ ಸೂಚಿಸಿದರು. ಸರಣಿಯ ನಡುವಿನ ಬಿಡುವಿನಲ್ಲಿ ಆತ ತಮ್ಮ ತಪ್ಪುಗಳನ್ನು ತಿದ್ದಿಕೊಂಡಿರಬಹುದು ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದರು. ಇದರ ಜೊತೆಗೆ, ಆತಿಥೇಯ ಜಿಂಬಾಬ್ವೆ ತಂಡವನ್ನು ಹಗುರವಾಗಿ ಪರಿಗಣಿಸಬಾರದು ಎಂದು ಎಚ್ಚರಿಸಿದರು. ಜಿಂಬಾಬ್ವೆ ತಂಡದಲ್ಲಿ ಹಲವು ಬ್ಯಾಟರ್‌ಗಳು ಐಪಿಎಲ್ ಆಡಿದ ಅನುಭವ ಹೊಂದಿದ್ದು, ಅದ್ಭುತ ತಂಡವನ್ನು ಕಟ್ಟಿದ್ದಾರೆ. ಹಾಗಾಗಿ ಅವರು ಪ್ರಬಲ ಪೈಪೋಟಿ ನೀಡಲಿದ್ದಾರೆ ಎಂದು ಶ್ಲಾಘಿಸಿದರು.
ಗಾಯದಿಂದ ಮರಳಿದ ನಂತರ ಹೆಚ್ಚಿದ ಆತ್ಮವಿಶ್ವಾಸ
ತಮ್ಮ ವೈಯಕ್ತಿಕ ಗಾಯದ ಸಮಸ್ಯೆಯಿಂದ ಚೇತರಿಸಿಕೊಂಡು ತಂಡಕ್ಕೆ ಮರಳಿರುವ ಬಗ್ಗೆಯೂ ಮಾತನಾಡಿದ ಶ್ರೇಯಸ್, ಪುನರ್ವಸತಿ ಅವಧಿಯು ತಮ್ಮನ್ನು ಮಾನಸಿಕವಾಗಿ ಮತ್ತಷ್ಟು ಬಲಿಷ್ಠಗೊಳಿಸಿದೆ ಎಂದರು. ಕಠಿಣ ಹಂತವನ್ನು ದಾಟಿಬಂದಾಗ ವ್ಯಕ್ತಿಯಾಗಿ ಮತ್ತು ಆಟಗಾರನಾಗಿ ಆತ್ಮವಿಶ್ವಾಸ ಹೆಚ್ಚಾಗುತ್ತದೆ; ಮೈದಾನದಲ್ಲಿ ಎದುರಾಗುವ ಯಾವುದೇ ಸವಾಲನ್ನಾದರೂ ಬೇಗನೆ ವಿಶ್ಲೇಷಿಸಿ ಅದನ್ನು ಹೇಗೆ ಮೀರಿಬರಬೇಕು ಎನ್ನುವ ಸ್ಪಷ್ಟತೆ ದೊರೆಯುತ್ತದೆ ಎಂದು ಅಯ್ಯರ್ ಹರ್ಷ ವ್ಯಕ್ತಪಡಿಸಿದರು. ಒಟ್ಟಾರೆಯಾಗಿ, ಹಿಂದಿನ ಹಿನ್ನಡೆಗಳನ್ನು ಹಿಂದಿಕ್ಕಿ, ಜಿಂಬಾಬ್ವೆ ವಿರುದ್ಧದ ಸರಣಿಯಲ್ಲಿ ಭಾರತ ಜಯದ ಹಾದಿಗೆ ಮರಳುವ ದೃಢ ವಿಶ್ವಾಸವನ್ನು ನಾಯಕ ಶ್ರೇಯಸ್ ಅಯ್ಯರ್ ಮುಂದಿಟ್ಟಿದ್ದಾರೆ.
ಇದನ್ನೂ ಓದಿ : ಅಂತರರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಬೆನ್ನಲ್ಲೇ ದೇಶೀಯ ಕ್ರಿಕೆಟ್‌ನಲ್ಲಿ ಅಬ್ಬರಿಸಿದ ಬೆನ್ ಸ್ಟೋಕ್ಸ್
