ಬೆಂಗಳೂರು : ಕೇವಲ 10-15 ನಿಮಿಷಗಳಲ್ಲಿ ತರಕಾರಿ, ದಿನಸಿ ವಸ್ತುಗಳನ್ನು ಜನರ ಮನೆ ಬಾಗಿಲಿಗೆ ಪೂರೈಸುವ ಕ್ವಿಕ್ ಕಾಮರ್ಸ್ ಕಂಪನಿ ಸ್ವಿಗ್ಗಿ ಇನ್ ಸ್ಟಾಮಾರ್ಟ್ ಈಗ ಮತ್ತೊಂದು ಮಹತ್ವದ ಹೆಜ್ಜೆ ಇರಿಸಿದೆ. ಬೆಂಗಳೂರಿನಲ್ಲಿ ಜನರ ಮನೆ ಬಾಗಿಲಿಗೆ LPG ಸಿಲಿಂಡರ್ ಗಳನ್ನು ಪೂರೈಕೆ ಮಾಡುವ ಉದ್ದೇಶದೊಂದಿಗೆ ಕಂಪನಿಯು ಎಚ್ಪಿಸಿಎಲ್ ಜತೆ ಒಪ್ಪಂದ ಮಾಡಿಕೊಂಡಿದೆ. ಹಾಗಾಗಿ, ಗ್ರಾಹಕರು ಇನ್ನುಮುಂದೆ ಕೇವಲ 10-15 ನಿಮಿಷಗಳಲ್ಲಿ ಮನೆಗೆ ಅಡುಗೆ ಅನಿಲ ಸಿಲಿಂಡರ್ ಗಳನ್ನು ತರಿಸಿಕೊಳ್ಳಬಹುದಾಗಿದೆ. ಇದು ದೇಶದಲ್ಲೇ ಮೊದಲ ಬಾರಿಗೆ ಬೆಂಗಳೂರಿನಲ್ಲಿ ಜಾರಿಗೆ ತರುತ್ತಿರುವ ಸೌಲಭ್ಯವಾಗಿದೆ.
ಹೊಸ ಒಪ್ಪಂದದ ಪ್ರಕಾರ, ಗ್ರಾಹಕರು ಇನ್ನು ಮುಂದೆ ಇನ್ ಸ್ಟಾಮಾರ್ಟ್ ಆ್ಯಪ್ ಮೂಲಕವೇ ಎಚ್ ಪಿಸಿಎಲ್ ಕಂಪನಿಯ ಹೊಸ 10 ಕೆಜಿ ತೂಕದ ‘ಎಚ್.ಪಿ ನವ್ಯ’ (HP Navya) ಕಾಂಪೋಸಿಟ್ ಎಲ್ ಪಿಜಿ ಸಿಲಿಂಡರ್ ಆರ್ಡರ್ ಮಾಡಬಹುದಾಗಿದೆ. ಅಲ್ಲದೆ, 5 ಕೆ.ಜಿ ತೂಕದ ಮೆಟಲ್ ಸಿಲಿಂಡರ್ ಅನ್ನು ಕೂಡ ಇನ್ ಸ್ಟಾಮಾರ್ಟ್ ಆ್ಯಪ್ ಮೂಲಕ ಆರ್ಡರ್ ಮಾಡಬಹುದಾಗಿದೆ. ಆದರೆ, ಗೃಹಬಳಕೆಯ 14.2 ಕೆ.ಜಿ ತೂಕದ ಎಲ್ ಪಿಜಿ ಸಿಲಿಂಡರ್ ಗಳನ್ನು ಆ್ಯಪ್ ಮೂಲಕ ಡೆಲಿವರಿ ಮಾಡುವುದಿಲ್ಲ.
ಮತ್ತೊಂದು ಗಮನಾರ್ಹ ಸಂಗತಿ ಎಂದರೆ, ಇನ್ ಸ್ಟಾಮಾರ್ಟ್ ಮೂಲಕ ಸಿಲಿಂಡರ್ ಆರ್ಡರ್ ಮಾಡಲು ಗ್ರಾಹಕರಿಗೆ ನಿಗದಿತ ಗ್ಯಾಸ್ ಸಂಪರ್ಕ ಇರಬೇಕಾದ ಅಗತ್ಯವಿಲ್ಲ. ನಿಮ್ಮ ಸ್ವಿಗ್ಗಿ ಆ್ಯಪ್ ತೆರೆದು ಇನ್ ಸ್ಟಾಮಾರ್ಟ್ ವಿಭಾಗಕ್ಕೆ ಹೋಗಬೇಕು. ಅಲ್ಲಿ ಲಭ್ಯವಿರುವ 10 ಕೆ.ಜಿ ಕಾಂಪೋಸಿಟ್ ಅಥವಾ 5 ಕೆ.ಜಿ ಸಿಲಿಂಡರ್ ಅನ್ನು ಕಾರ್ಟ್ಗೆ ಸೇರಿಸಿ ಆರ್ಡರ್ ಮಾಡಬಹುದಾಗಿದೆ.
ಪ್ರಧಾನಮಂತ್ರಿ ಉಜ್ವಲ ಯೋಜನೆ ಅಡಿಯಲ್ಲಿ ನೀಡುವ ಸಬ್ಸಿಡಿಯನ್ನು ಈ ಸಿಲಿಂಡರ್ ಗಳಿಗೆ ನೀಡುವುದಿಲ್ಲ. ಹಾಗೆಯೇ, ಗ್ರಾಹಕರು ಮೊದಲ ಬಾರಿಗೆ ಸಿಲಿಂಡರ್ ಆರ್ಡರ್ ಮಾಡುತ್ತಿದ್ದರೆ, ನಿಯಮಗಳ ಪ್ರಕಾರ ಡೆಲಿವರಿ ಸಿಬ್ಬಂದಿಯು ನಿಮ್ಮ ಗುರುತಿನ ಚೀಟಿ (ಕೆವೈಸಿ ದಾಖಲೆ) ಮತ್ತು ವಿಳಾಸವನ್ನು ಸ್ಥಳದಲ್ಲೇ ಪರಿಶೀಲಿಸಿ ಹೊಸ ಸಿಲಿಂಡರ್ ನೀಡುತ್ತಾರೆ. ಇದರೊಂದಿಗೆ, ಮಧ್ಯಪ್ರಾಚ್ಯ ಸಂಘರ್ಷದಿಂದಾಗಿ ಅಡುಗೆ ಅನಿಲ ಪೂರೈಕೆಯಲ್ಲಿ ವ್ಯತ್ಯಯ ಅನುಭವಿಸುತ್ತಿರುವ ಗ್ರಾಹಕರಿಗೆ ಒಳ್ಳೆಯ ಸುದ್ದಿ ದೊರೆತಂತಾಗಿದೆ.
ಇದನ್ನೂ ಓದಿ : UGCET ಮೊದಲ ಸುತ್ತಿನ ಸೀಟು ಹಂಚಿಕೆ ಅಂತಿಮ ಫಲಿತಾಂಶ ಪ್ರಕಟ!
