ಬೆಂಗಳೂರು : ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯು (ಇಪಿಎಫ್ಒ) ಪಿಎಫ್ ವಿತ್ ಡ್ರಾಗೆ ಸಂಬಂಧಿಸಿದಂತೆ ಇತ್ತೀಚೆಗೆ ಹತ್ತಾರು ಬದಲಾವಣೆ ಮಾಡಿದೆ. ಆನ್ ಲೈನ್ ಮೂಲಕವೇ ಸುಲಭವಾಗಿ ಪಿಎಫ್ ವಿತ್ ಡ್ರಾ ಮಾಡುವುದು, ಆಟೋ ಸೆಟಲ್ ಮೆಂಟ್ ಮಿತಿಯನ್ನು 5 ಲಕ್ಷ ರೂಪಾಯಿಗೆ ಏರಿಕೆ ಮಾಡಿರುವುದು ಸೇರಿ ಹಲವು ಸುಧಾರಣೆಗಳನ್ನು ಜಾರಿಗೆ ತಂದಿದೆ. ಇದರ ಬೆನ್ನಲ್ಲೇ, ಪಿಎಫ್ ವಿತ್ ಡ್ರಾ ಮೊತ್ತಕ್ಕೂ ತೆರಿಗೆಗೆ ಸಂಬಂಧಿಸಿದಂತೆ ಹೊಸ ನಿಯಮ ಜಾರಿಗೆ ತಂದಿದೆ.
ಹೌದು, 2026ರ ಏಪ್ರಿಲ್ 1ರಿಂದ ಫಾರ್ಮ್ 121 ಜಾರಿಗೆ ಬಂದಿದೆ. ಇದರ ಅನ್ವಯ, ಪಿಎಫ್ ವಿತ್ ಡ್ರಾ ಮಿತಿಗೆ ತೆರಿಗೆ ವಿಧಿಸಲಾಗುತ್ತದೆ. ನೀವು ಉದ್ಯೋಗಕ್ಕೆ ಸೇರಿ ಅಥವಾ 5 ವರ್ಷ ಪಿಎಫ್ ಗೆ ಕೊಡುಗೆ ನೀಡಿದ್ದರೆ, ಆಗ ನೀವು ವಿತ್ ಡ್ರಾ ಮಾಡುವ ಪಿಎಫ್ ಮೊತ್ತಕ್ಕೆ ತೆರಿಗೆ ಅನ್ವಯವಾಗುವುದಿಲ್ಲ. 5 ವರ್ಷಗಳ ಸೇವೆಯ ನಂತರ ನೀವು ಎಷ್ಟು ಮೊತ್ತವನ್ನು ವಿತ್ ಡ್ರಾ ಮಾಡಿದರೂ ಯಾವುದೇ ತೆರಿಗೆ ಅನ್ವಯವಾಗುವುದಿಲ್ಲ ಎಂದು ಇಪಿಎಫ್ಒ ತಿಳಿಸಿದೆ.
ತೆರಿಗೆ ಯಾವಾಗ ಅನ್ವಯ?
ನೀವು ಪಿಎಫ್ ಸದಸ್ಯರಾಗಿ 5 ವರ್ಷ ತುಂಬುವ ಮೊದಲೇ 50 ಸಾವಿರ ರೂ.ಗಿಂತ ಹೆಚ್ಚಿನ ಹಣವನ್ನು ವಿತ್ ಡ್ರಾ ಮಾಡಲು ಮುಂದಾದರೆ, ನಿಮಗೆ ಆಗ TDS ಕಡಿತವಾಗುತ್ತದೆ. ನಿಮ್ಮ ಪಿಎಫ್ ಖಾತೆಗೆ ಪ್ಯಾನ್ ಕಾರ್ಡ್ ಲಿಂಕ್ ಆಗಿದ್ದರೆ ಶೇ.10ರಷ್ಟು ಮೊತ್ತವನ್ನು ಟಿಡಿಎಸ್ ಆಗಿ ಕಡಿತಗೊಳಿಸಲಾಗುತ್ತದೆ. ಹಾಗೊಂದು ವೇಳೆ, ಪ್ಯಾನ್ ಕಾರ್ಡ್ ಲಿಂಕ್ ಆಗಿರದಿದ್ದರೆ, ಶೇ.30ರಷ್ಟು ಟಿಡಿಎಸ್ ಕಡಿತಗೊಳಿಸಲಾಗುತ್ತದೆ.
ಇದರ ಮಧ್ಯೆಯೇ, ಇಪಿಎಫ್ಒ 3.0 ಡಿಜಿಟಲ್ ವ್ಯವಸ್ಥೆ ಜಾರಿಗೂ ದಿನಗಣನೆ ಆರಂಭವಾಗಿದೆ. ಎಟಿಎಂ ಹಾಗೂ ಯುಪಿಐ ಆ್ಯಪ್ ಗಳ ಮೂಲಕವೇ ಪಿಎಫ್ ಹಣವನ್ನು ವಿತ್ ಡ್ರಾ ಮಾಡುವುದು ಸೇರಿ ಹಲವು ಸುಧಾರಣೆಗಳನ್ನು ಇಪಿಎಫ್ಒ 3.0 ಒಳಗೊಂಡಿದೆ. ಹೊಸ ವ್ಯವಸ್ಥೆ ಜಾರಿಯಾದ ಬಳಿಕ ಇಪಿಎಫ್ಒ ಸದಸ್ಯರು ಇನ್ನೂ ಸುಲಭವಾಗಿ ಪಿಎಫ್ ಮೊತ್ತವನ್ನು ವಿತ್ ಡ್ರಾ ಮಾಡಬಹುದಾಗಿದೆ. ಇದರಿಂದ 7 ಕೋಟಿಗೂ ಅಧಿಕ ಪಿಎಫ್ ಸದಸ್ಯರಿಗೆ ಅನುಕೂಲವಾಗಲಿದೆ.
ಇದನ್ನೂ ಓದಿ : ಪಂಚಾಯತ್ ರಾಜ್ ಇಲಾಖೆಯಲ್ಲಿ 4 ಹುದ್ದೆಗಳ ನೇಮಕಾತಿ : 28 ಸಾವಿರ ರೂ. ಸ್ಯಾಲರಿ!
