ಬೆಂಗಳೂರು : ಭಾರತ ತಂಡದ ಯುವ ಆಲ್ ರೌಂಡರ್ ಹಾಗೂ ಐಪಿಎಲ್ನಲ್ಲಿ ರಾಜಸ್ಥಾನ್ ರಾಯಲ್ಸ್ (RR) ತಂಡದ ನಾಯಕ ರಿಯಾನ್ ಪರಾಗ್ ಅವರ ಹೆಗಲಿನ ಶಸ್ತ್ರಚಿಕಿತ್ಸೆ ಯಶಸ್ವಿಯಾಗಿದೆ. ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಐಪಿಎಲ್ 2026ರ ಸೀಸನ್ನಲ್ಲಿ ತೀವ್ರ ಹೆಗಲಿನ ನೋವಿನ ನಡುವೆಯೂ ಆಡಿದ್ದ ಪರಾಗ್, ಗುರುವಾರ (ಜೂನ್ 11) ಮಧ್ಯಾಹ್ನ ಆಸ್ಪತ್ರೆಯ ಬೆಡ್ ಮೇಲಿರುವ ಫೋಟೋವನ್ನು ಹಂಚಿಕೊಳ್ಳುವ ಮೂಲಕ ಸರ್ಜರಿ ಯಶಸ್ವಿಯಾಗಿ ನಡೆದಿರುವುದನ್ನು ಖಚಿತಪಡಿಸಿದ್ದಾರೆ. ಶಸ್ತ್ರಚಿಕಿತ್ಸೆ ಮುಗಿದಿರುವುದರಿಂದ ಅಭಿಮಾನಿಗಳು ಸದ್ಯ ನಿರಾಳರಾಗಿದ್ದಾರೆ. ಐಪಿಎಲ್ ಟೂರ್ನಿಯುದ್ದಕ್ಕೂ ಅವರನ್ನು ಕಾಡಿದ್ದ ಈ ಗಾಯಕ್ಕೆ ಅಂತಿಮವಾಗಿ ವೈದ್ಯರ ಸಲಹೆಯ ಮೇರೆಗೆ ಸರ್ಜರಿ ಮಾಡಿಸಲಾಗಿದ್ದು, ಸದ್ಯ ರಿಯಾನ್ ಪರಾಗ್ ಚೇತರಿಕೆಯ ಹಾದಿಯಲ್ಲಿದ್ದಾರೆ.
ಮಾನಸಿಕ ಹೋರಾಟ ಬಿಚ್ಚಿಟ್ಟ ಯುವ ಆಟಗಾರ
ಶಸ್ತ್ರಚಿಕಿತ್ಸೆಯ ನಂತರ ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಭಾವುಕ ಪೋಸ್ಟ್ ಒಂದನ್ನು ಹಂಚಿಕೊಂಡಿರುವ ರಿಯಾನ್ ಪರಾಗ್, ತಮ್ಮ ಕಠಿಣ ದಿನಗಳನ್ನು ಸ್ಮರಿಸಿದ್ದಾರೆ. “ನನ್ನ ಆರೋಗ್ಯದ ಬಗ್ಗೆ ವಿಚಾರಿಸುತ್ತಿದ್ದ ಎಲ್ಲರಿಗೂ ಧನ್ಯವಾದಗಳು, ಶಸ್ತ್ರಚಿಕಿತ್ಸೆ ಮುಗಿದಿದ್ದು ಅತ್ಯಂತ ಯಶಸ್ವಿಯಾಗಿ ನಡೆದಿದೆ. ಕಳೆದ ಎರಡು ವರ್ಷಗಳು ನನ್ನನ್ನು ದೈಹಿಕವಾಗಿ ಹಾಗೂ ಮಾನಸಿಕವಾಗಿ ನಾನು ಊಹಿಸದ ರೀತಿಯಲ್ಲಿ ಪರೀಕ್ಷಿಸಿವೆ. ಕೆಲವು ಒಳ್ಳೆಯ ದಿನಗಳಿದ್ದರೆ, ಇನ್ನು ಕೆಲವು ತೀವ್ರ ನಿರಾಶೆಯ ದಿನಗಳಾಗಿದ್ದವು. ಕೇವಲ ಒಂದು ಪಂದ್ಯವನ್ನು ಪೂರ್ಣಗೊಳಿಸುವುದೇ ನನಗೆ ದೊಡ್ಡ ಸವಾಲಾಗಿ ಪರಿಣಮಿಸಿದ ದಿನಗಳೂ ಇದ್ದವು. ಆದರೆ ಆ ಸವಾಲುಗಳನ್ನು ನಾನು ಬೇರೆ ರೀತಿಯಲ್ಲಿ ಎದುರಿಸಲು ಬಯಸುತ್ತಿರಲಿಲ್ಲ” ಎಂದು ಪರಾಗ್ ಬರೆದುಕೊಂಡಿದ್ದಾರೆ. ಗಾಯದ ನಡುವೆಯೂ ತಂಡಕ್ಕಾಗಿ ಅವರು ಮೈದಾನಕ್ಕಿಳಿದಿದ್ದನ್ನು ಈ ಪೋಸ್ಟ್ ನೆನಪಿಸುತ್ತದೆ.
ಪಂಜಾಬ್ ಕಿಂಗ್ಸ್ ಹಾರೈಕೆ
ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಮುನ್ನಡೆಸುವ ದೊಡ್ಡ ಜವಾಬ್ದಾರಿಯ ನಡುವೆ ಗಾಯದ ಸಮಸ್ಯೆಯನ್ನು ನಿಭಾಯಿಸಿದ್ದ ರಿಯಾನ್ ಪರಾಗ್, ಈಗ ಮುಂದಿರುವ ವಿಶ್ರಾಂತಿ ಮತ್ತು ಪುನಶ್ಚೇತನ (Rehab) ಶಿಬಿರದ ಸವಾಲಿಗೆ ಸಿದ್ಧರಾಗುತ್ತಿದ್ದಾರೆ. “ಈಗ ನನ್ನ ಮುಂದೆ ಮತ್ತೊಂದು ಭಿನ್ನವಾದ ಸವಾಲಿದೆ. ಅದುವೇ ಚೇತರಿಕೆ, ರೇಹಾಬ್ ಮತ್ತು ತಾಳ್ಮೆ. ನಾನು ಅತ್ಯಂತ ಇಷ್ಟಪಡುವ ಕ್ರಿಕೆಟ್ ಆಟಕ್ಕೆ ಶೀಘ್ರದಲ್ಲೇ ಮರಳಲಿದ್ದೇನೆ, ಅಲ್ಲಿಯವರೆಗೆ ಕಾಯೋಣ” ಎಂದು ಪರಾಗ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಪರಾಗ್ ಅವರ ಈ ಪೋಸ್ಟ್ಗೆ ಕ್ರಿಕೆಟ್ ವಲಯದಿಂದ ವ್ಯಾಪಕ ಬೆಂಬಲ ವ್ಯಕ್ತವಾಗುತ್ತಿದ್ದು, ಐಪಿಎಲ್ನ ಮತ್ತೊಂದು ಫ್ರಾಂಚೈಸಿ ಪಂಜಾಬ್ ಕಿಂಗ್ಸ್ (PBKS) ಸೇರಿದಂತೆ ಹಲವು ಸಹ ಆಟಗಾರರು ರಿಯಾನ್ ಪರಾಗ್ ಶೀಘ್ರವಾಗಿ ಗುಣಮುಖರಾಗಲಿ ಎಂದು ಹಾರೈಸಿದ್ದಾರೆ.
ಇದನ್ನೂ ಓದಿ : ಆಸೀಸ್ ನಾಯಕನಿಗೆ ‘ಅಗ್ರೆಸ್ಸಿವ್ ಸೆಂಡ್-ಆಫ್’ : ಬಾಂಗ್ಲಾದೇಶದ ವೇಗಿ ನಹೀದ್ ರಾಣಾಗೆ ಐಸಿಸಿ ಶಿಕ್ಷೆ!
