ಕೋಲ್ಕತ್ತಾ : ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್ (TMC)ನಲ್ಲಿ ಸೃಷ್ಟಿಯಾಗಿರುವ ಬಂಡಾಯವು ಇದೀಗ ದೀದಿಯ ರಾಜಕೀಯ ಸಾಮ್ರಾಜ್ಯವನ್ನೇ ಪತನಗೊಳಿಸುವತ್ತ ಸಾಗಿದೆ. ಇಂದು ಪಕ್ಷದ ಹಿರಿಯ ರಾಜ್ಯಸಭಾ ಸಂಸದ ಪ್ರಕಾಶ್ ಚಿಕ್ ಬಾರೈಕ್ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡುವ ಮೂಲಕ ದೀದಿಗೆ ಮತ್ತೊಂದು ದೊಡ್ಡ ಆಘಾತ ನೀಡಿದ್ದಾರೆ. ಈ ಮೂಲಕ ಕೇವಲ ಒಂದೇ ವಾರದಲ್ಲಿ ಮೂವರು ಪಕ್ಷಕ್ಕೆ ರಾಜೀನಾಮೆ ನೀಡಿದಂತಾಗಿದೆ. ಮುಂಬರುವ ದಿನಗಳಲ್ಲಿ ಇನ್ನೂ ಮೂವರು ಸಂಸದರು ಹೊರಹೋಗುವ ಮುನ್ಸೂಚನೆ ಸಿಕ್ಕಿರುವುದರಿಂದ ಪಕ್ಷವು ಅಧಿಕೃತವಾಗಿ ಇಬ್ಭಾಗವಾಗುವ ಭೀತಿ ಎದುರಾಗಿದೆ.
ಮೇಲ್ಮನೆಯಲ್ಲಿ ಕುಸಿದ ಸಂಖ್ಯಾಬಲ
ಪ್ರಕಾಶ್ ಚಿಕ್ ಬಾರೈಕ್ ಅವರ ಈ ದಿಢೀರ್ ನಿರ್ಗಮನಕ್ಕೂ ಮುನ್ನ ಪಕ್ಷದ ಪ್ರಮುಖ ನಾಯಕರಾದ ಸುಖೇಂದು ಶೇಖರ್ ರಾಯ್ ಮತ್ತು ಸುಷ್ಮಿತಾ ದೇವ್ ಅವರು ಸಂಸದ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಇದರಿಂದಾಗಿ ರಾಜ್ಯಸಭೆಯಲ್ಲಿ ತೃಣಮೂಲ ಕಾಂಗ್ರೆಸ್ನ ಬಲವು ಕೇವಲ 10 ಸ್ಥಾನಗಳಿಗೆ ಕುಸಿದಿದೆ. ತಮ್ಮ ರಾಜೀನಾಮೆಯ ನಂತರ ಮಾತನಾಡಿದ ಬಾರೈಕ್, “ನಾನು ಬಂಗಾಳದ ಜನಾದೇಶವನ್ನು ಗೌರವಿಸಿ ಈ ನಿರ್ಧಾರ ಕೈಗೊಂಡಿದ್ದೇನೆ. ನನ್ನ ಮೇಲೆ ಬಿಜೆಪಿಯ ಯಾವುದೇ ಒತ್ತಡವಿಲ್ಲ. ಇನ್ಮುಂದೆ ರಾಜ್ಯದ ನೂತನ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ನೀಡುವ ಜವಾಬ್ದಾರಿಯನ್ನು ನಾನು ನಿರ್ವಹಿಸಲಿದ್ದೇನೆ” ಎಂದು ಬಹಿರಂಗವಾಗಿ ಘೋಷಿಸುವ ಮೂಲಕ ಬಂಡಾಯ ಪಾಳಯ ಸೇರಿದ್ದಾರೆ.
ದಿಲ್ಲಿಯಲ್ಲಿ ಮಮತಾ ಸಭೆ
ವಿಧಾನಸಭಾ ಚುನಾವಣೆಯ ಭಾರಿ ಸೋಲಿನ ನಂತರ ಮಮತಾ ಬ್ಯಾನರ್ಜಿ ಅವರು ದಿಲ್ಲಿಯಲ್ಲಿ ಸೋನಿಯಾ ಗಾಂಧಿ ಸೇರಿದಂತೆ ‘ಇಂಡಿಯಾ’ (INDIA) ಒಕ್ಕೂಟದ ನಾಯಕರೊಂದಿಗೆ ರಾಷ್ಟ್ರಮಟ್ಟದ ಕಾರ್ಯತಂತ್ರ ರೂಪಿಸಲು ಸಭೆ ನಡೆಸುತ್ತಿದ್ದ ಸಂದರ್ಭದಲ್ಲೇ ಇತ್ತ ಕೋಲ್ಕತ್ತಾದಲ್ಲಿ ಅವರ ಕೋಟೆ ಕುಸಿಯಲು ಆರಂಭವಾಗಿತ್ತು. ಮಮತಾ ಅವರ ಆಪ್ತರಾಗಿದ್ದ ಸುಖೇಂದು ಶೇಖರ್ ರಾಯ್ ಅವರು ಸೋಮವಾರ ಆರಂಭಿಸಿದ ರಾಜೀನಾಮೆ ಪರ್ವ, ಇದೀಗ ಇಡೀ ಪಕ್ಷಕ್ಕೆ ವ್ಯಾಪಿಸಿದೆ. ಪಶ್ಚಿಮ ಬಂಗಾಳ ವಿಧಾನಸಭೆಯಲ್ಲೂ ಮಮತಾ ಅವರ ಹಿಡಿತ ಸಂಪೂರ್ಣವಾಗಿ ಸಡಿಲಗೊಂಡಿದ್ದು, ಒಟ್ಟು 80 ಶಾಸಕರ ಪೈಕಿ 64 ಶಾಸಕರು ಬಂಡಾಯ ನಾಯಕ ರಿತಬ್ರತಾ ಬ್ಯಾನರ್ಜಿ ಅವರಿಗೆ ಬೆಂಬಲ ಸೂಚಿಸಿದ್ದಾರೆ. ವಿಶೇಷವೆಂದರೆ, ಮಮತಾ ಅವರಿಗೆ ಇಷ್ಟವಿಲ್ಲದಿದ್ದರೂ ಶಾಸಕರು ರಿತಬ್ರತಾ ಅವರನ್ನೇ ವಿಧಾನಸಭೆಯ ವಿರೋಧ ಪಕ್ಷದ ನಾಯಕನನ್ನಾಗಿ ಆಯ್ಕೆ ಮಾಡಿರುವುದು ದೀದಿಗೆ ಎದುರಾದ ಅತಿ ದೊಡ್ಡ ಹಿನ್ನಡೆಯಾಗಿದೆ.
ಲೋಕಸಭೆಯಲ್ಲೂ ರೆಕ್ಕೆ ಬಿಚ್ಚಿದ ಬಂಡಾಯದ ಹಕ್ಕಿಗಳು
ವಿಧಾನಸಭೆ ಮತ್ತು ರಾಜ್ಯಸಭೆಯ ಬಿಕ್ಕಟ್ಟು ಇದೀಗ ಲೋಕಸಭೆಗೂ ಹರಡಿದ್ದು, ಪರಿಸ್ಥಿತಿ ಕೈಮೀರಿ ಹೋಗಿದೆ. ತೃಣಮೂಲ ಕಾಂಗ್ರೆಸ್ನ ಒಟ್ಟು 28 ಲೋಕಸಭಾ ಸಂಸದರ ಪೈಕಿ 20 ಸಂಸದರು ಮಮತಾ ಬ್ಯಾನರ್ಜಿ ಅವರ ನಾಯಕತ್ವಕ್ಕೆ ಸೆಡ್ಡು ಹೊಡೆದು ಎನ್ಡಿಎ (NDA) ಮೈತ್ರಿಕೂಟವನ್ನು ಸೇರಲು ಸಜ್ಜಾಗಿದ್ದಾರೆ. ಹಿರಿಯ ನಾಯಕಿ ಕಾಕೋಲಿ ಘೋಷ್ ದಸ್ತಿದಾರ್ ನೇತೃತ್ವದ ಈ ಬಂಡಾಯ ಸಂಸದರ ಗುಂಪು ತಮಗೆ ಸಂಸತ್ತಿನಲ್ಲಿ ಪ್ರತ್ಯೇಕ ಬಣವಾಗಿ ಅಧಿಕೃತ ಮಾನ್ಯತೆ ನೀಡುವಂತೆ ಸ್ಪೀಕರ್ ಅವರಿಗೆ ಮನವಿ ಮಾಡಿದೆ.
ಆರಂಭದಲ್ಲಿ ಮಮತಾ ಅವರಿಗೆ ನಿಷ್ಠೆ ತೋರಿದ್ದ ಜಾದವ್ಪುರ ಸಂಸದೆ ಸಯೋನಿ ಘೋಷ್ ಕೂಡ ಈ ಬಂಡಾಯ ಪಾಳಯ ಸೇರಿರುವುದು ಅಚ್ಚರಿಗೆ ಕಾರಣವಾಗಿದೆ. ಇವರ ಜೊತೆಗೆ ಯೂಸುಫ್ ಪಠಾಣ್, ಹಿರಿಯ ನಟ ಶತ್ರುಘ್ನ ಸಿನ್ಹಾ ಮತ್ತು ಗುರುವಾರವಷ್ಟೇ ಬಂಡಾಯವೆದ್ದ ಖ್ಯಾತ ಫುಟ್ಬಾಲ್ ಆಟಗಾರ ಪ್ರಸೂನ್ ಬ್ಯಾನರ್ಜಿ ಸೇರಿದಂತೆ 20 ಸಂಸದರು ದೀದಿ ನೆರಳಿನಿಂದ ಹೊರಬಂದಿದ್ದಾರೆ. ಪ್ರತಿ ದಿನವೂ ಹೊಸ ನಾಯಕರು ಬಂಡಾಯ ಪಾಳಯವನ್ನು ಸೇರುತ್ತಿರುವುದರಿಂದ, ತೃಣಮೂಲ ಕಾಂಗ್ರೆಸ್ ಪಕ್ಷದ ಇತಿಹಾಸದಲ್ಲೇ ಇದು ಅತ್ಯಂತ ಕರಾಳ ಮತ್ತು ಅನಿಶ್ಚಿತತೆಯ ದಿನಗಳಾಗಿ ಪರಿಣಮಿಸಿದೆ.
ಇದನ್ನೂ ಓದಿ : ಮತ್ತೆ ಹೊತ್ತಿ ಉರಿಯುತ್ತಿದೆ ಮಧ್ಯಪ್ರಾಚ್ಯ : ಇರಾನ್ ಮೇಲೆ ಅಮೆರಿಕ, ಅಮೆರಿಕದ ಸೇನಾ ನೆಲೆಗಳ ಮೇಲೆ ಟೆಹ್ರಾನ್ ಪ್ರತಿದಾಳಿ!
