ಬೆಂಗಳೂರು : ಇಂಗ್ಲೆಂಡ್ ಮತ್ತು ವೇಲ್ಸ್ ಆತಿಥ್ಯದಲ್ಲಿ ಜೂನ್ 12ರಿಂದ ಜುಲೈ 5ರವರೆಗೆ ನಡೆಯಲಿರುವ 2026ರ ಮಹಿಳಾ ಟಿ20 ವಿಶ್ವಕಪ್ ಟೂರ್ನಿಗೆ ಕ್ರಿಕೆಟ್ ಜಗತ್ತು ಕಾತುರದಿಂದ ಕಾಯುತ್ತಿದೆ. ತವರಿನಲ್ಲಿ ಏಕದಿನ ವಿಶ್ವಕಪ್ ಗೆದ್ದಿರುವ ಹರ್ಮನ್ಪ್ರೀತ್ ಕೌರ್ ನೇತೃತ್ವದ ಭಾರತ ತಂಡವು ಟ್ರೋಫಿ ಗೆಲ್ಲುವ ನೆಚ್ಚಿನ ತಂಡಗಳಲ್ಲಿ ಒಂದಾಗಿ ಕಣಕ್ಕಿಳಿಯುತ್ತಿರುವುದು ಒಂದೆಡೆಯಾದರೆ, ಬೇರೆ ಬೇರೆ ರಾಷ್ಟ್ರಗಳನ್ನು ಪ್ರತಿನಿಧಿಸುತ್ತಿರುವ ಭಾರತೀಯ ಮೂಲದ ಆಟಗಾರ್ತಿಯರು ಈ ಬಾರಿಯ ವಿಶ್ವಕಪ್ನಲ್ಲಿ ತೀವ್ರ ಕುತೂಹಲ ಮೂಡಿಸಿದ್ದಾರೆ. ಜಾಗತಿಕ ಮಟ್ಟದಲ್ಲಿ ಭಾರತೀಯರ ಪ್ರಭಾವ ಎಷ್ಟರಮಟ್ಟಿಗೆ ಹರಡಿದೆ ಎಂಬುದಕ್ಕೆ ಈ ಆಟಗಾರ್ತಿಯರ ಸಾಧನೆಯೇ ಹಿಡಿದ ಕನ್ನಡಿಯಾಗಿದೆ.
ಆಸ್ಟ್ರೇಲಿಯಾದ ಸ್ಪಿನ್ ಅಸ್ತ್ರ: ಚೆನ್ನೈ ಕನೆಕ್ಷನ್ ಹೊಂದಿರುವ ಅಲಾನಾ ಕಿಂಗ್
ಆಸ್ಟ್ರೇಲಿಯಾ ಮಹಿಳಾ ತಂಡದ ಪ್ರಮುಖ ಸ್ಪಿನ್ನರ್ ಆಗಿ ಹೊರಹೊಮ್ಮಿರುವ ಅಲಾನಾ ಕಿಂಗ್ ಅವರ ಬೇರುಗಳು ಭಾರತದ ಚೆನ್ನೈನಲ್ಲಿವೆ. ಮೆಲ್ಬೋರ್ನ್ನಲ್ಲಿ ಜನಿಸಿದ ಇವರ ಪೋಷಕರಾದ ಶರೋನ್ ಮತ್ತು ಲೆರಾಯ್ ಕಿಂಗ್ 1980ರ ದಶಕದಲ್ಲಿ ಚೆನ್ನೈನಿಂದ ಆಸ್ಟ್ರೇಲಿಯಾಗೆ ವಲಸೆ ಹೋಗಿದ್ದರು. 2022ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ ಅಲಾನಾ, ಇದುವರೆಗೆ ಮೂರೂ ಮಾದರಿಗಳಲ್ಲಿ 132 ವಿಕೆಟ್ ಕಬಳಿಸಿ ಕಾಂಗರೂ ಪಡೆಯ ಪ್ರಮುಖ ಅಸ್ತ್ರವಾಗಿದ್ದಾರೆ. ಆಸ್ಟ್ರೇಲಿಯಾದ ದಂತಕಥೆ ಶೇನ್ ವಾರ್ನ್ ಅವರನ್ನು ಆರಾಧಿಸುವ ಇವರು, ಇಂಗ್ಲೆಂಡ್ನ ಸ್ಪಿನ್-ಸ್ನೇಹಿ ಪಿಚ್ಗಳಲ್ಲಿ ಎದುರಾಳಿಗಳನ್ನು ಕಟ್ಟಿಹಾಕುವ ಜವಾಬ್ದಾರಿ ಹೊತ್ತಿದ್ದಾರೆ. ಇತ್ತೀಚೆಗೆ ಸೋಫಿಯಾ ಡಂಕ್ಲಿಗೆ ಅವರು ಎಸೆದಿದ್ದ ಎಸೆತವು ಶೇನ್ ವಾರ್ನ್ ಅವರ ‘ಶತಮಾನದ ಎಸೆತ’ವನ್ನು ನೆನಪಿಸಿತ್ತು ಎಂಬುದು ಇವರ ಸ್ಪಿನ್ ಮೋಡಿಗೆ ಸಾಕ್ಷಿಯಾಗಿದೆ.
ನ್ಯೂಜಿಲೆಂಡ್ ತಂಡದಲ್ಲಿ ಗುಜರಾತ್ ಕುವರಿ ನೆನ್ಸಿ ಪಟೇಲ್
ನ್ಯೂಜಿಲೆಂಡ್ ಮಹಿಳಾ ತಂಡವನ್ನು ಪ್ರತಿನಿಧಿಸುತ್ತಿರುವ ನೆನ್ಸಿ ಪಟೇಲ್ ಅವರ ಕಥೆ ಅತ್ಯಂತ ಸ್ಪೂರ್ತಿದಾಯಕವಾಗಿದೆ. ಗುಜರಾತ್ನ ಭರೂಚ್ ಜಿಲ್ಲೆಯ ಕರಮ್ಡಿ ಎಂಬ ಪುಟ್ಟ ಹಳ್ಳಿಯಲ್ಲಿ ಜನಿಸಿದ ಇವರು, ತಮ್ಮ ಆರನೇ ವಯಸ್ಸಿನಲ್ಲಿ ಕುಟುಂಬದೊಂದಿಗೆ ನ್ಯೂಜಿಲೆಂಡ್ಗೆ ವಲಸೆ ಹೋದರು. ಈ ವರ್ಷದ ಆರಂಭದಲ್ಲಿ ಜಿಂಬಾಬ್ವೆ ವಿರುದ್ಧ ಕಣಕ್ಕಿಳಿಯುವ ಮೂಲಕ ನ್ಯೂಜಿಲೆಂಡ್ ತಂಡವನ್ನು ಪ್ರತಿನಿಧಿಸಿದ ಭಾರತದಲ್ಲಿ ಜನಿಸಿದ ಮೊದಲ ಮಹಿಳಾ ಕ್ರಿಕೆಟರ್ ಎಂಬ ಐತಿಹಾಸಿಕ ಸಾಧನೆ ಮಾಡಿದರು. ದೇಶೀಯ ಟೂರ್ನಿಗಳಲ್ಲಿ ಅತಿ ಹೆಚ್ಚು ವಿಕೆಟ್ ಕಬಳಿಸಿ ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಿರುವ ನೆನ್ಸಿ, ಇದುವರೆಗೆ ಏಳು ಏಕದಿನ ಹಾಗೂ ಆರು ಟಿ20 ಪಂದ್ಯಗಳನ್ನಾಡಿ 14 ವಿಕೆಟ್ ಪಡೆದಿದ್ದಾರೆ. ಕಿವೀಸ್ ಪಡೆಯ ಪ್ರಶಸ್ತಿ ಉಳಿಸಿಕೊಳ್ಳುವ ಹಾದಿಯಲ್ಲಿ ಇವರು ಪ್ರಮುಖ ಪಾತ್ರ ವಹಿಸುವ ನಿರೀಕ್ಷೆಯಿದೆ.
ಸ್ಕಾಟ್ಲೆಂಡ್ನ ಭರವಸೆ: ಬಂಗಾಳಿ ಮೂಲದ ಪ್ರಿಯಾನಾಝ್ ಚಟರ್ಜಿ
ಸ್ಕಾಟ್ಲೆಂಡ್ ತಂಡವು ಈ ಬಾರಿಯ ವಿಶ್ವಕಪ್ಗೆ ಅರ್ಹತೆ ಪಡೆಯುವಲ್ಲಿ ಪ್ರಮುಖ ಪಾತ್ರ ವಹಿಸಿರುವ ಪ್ರಿಯಾನಾಝ್ ಚಟರ್ಜಿ ಕೂಡ ಭಾರತೀಯ ಮೂಲದವರು. ಭಾರತೀಯ ಬಂಗಾಳಿ ಮೂಲದ ಅರ್ಥಶಾಸ್ತ್ರಜ್ಞ ಮನೋಜಿತ್ ಚಟರ್ಜಿ ಅವರ ಪುತ್ರಿಯಾಗಿರುವ ಪ್ರಿಯಾನಾಝ್, ಸ್ಕಾಟ್ಲೆಂಡ್ನಲ್ಲಿ ಬೆಳೆದರೂ ತಮ್ಮ ಭಾರತೀಯ ಬೇರುಗಳನ್ನು ಉಳಿಸಿಕೊಂಡಿದ್ದಾರೆ. ಬಲಗೈ ಬ್ಯಾಟರ್ ಹಾಗೂ ಮೀಡಿಯಂ ಪೇಸ್ ಬೌಲರ್ ಆಗಿರುವ ಇವರು, ಅರ್ಹತಾ ಸುತ್ತಿನ ಪಂದ್ಯಗಳಲ್ಲಿ 119 ರನ್ ಕಲೆಹಾಕುವ ಜೊತೆಗೆ 6 ವಿಕೆಟ್ ಪಡೆದು ಮಿಂಚಿದ್ದರು. ಇಂಗ್ಲೆಂಡ್, ಆಸ್ಟ್ರೇಲಿಯಾ ಹಾಗೂ ನ್ಯೂಜಿಲೆಂಡ್ ದೇಶೀಯ ಟೂರ್ನಿಗಳಲ್ಲಿ ಆಡಿದ ಅಪಾರ ಅನುಭವ ಹೊಂದಿರುವ ಇವರು ಸ್ಕಾಟ್ಲೆಂಡ್ ತಂಡದ ಬೆನ್ನೆಲುಬಾಗಿದ್ದು, ಪ್ರಮುಖ ಪಂದ್ಯಗಳಲ್ಲಿ ತಂಡಕ್ಕೆ ಆಸರೆಯಾಗಲಿದ್ದಾರೆ.
ನೆದರ್ಲೆಂಡ್ಸ್ ಪರ ಮಿಂಚುತ್ತಿರುವ ಸನ್ಯಾ ಖುರಾನ
ಮೊದಲ ಬಾರಿಗೆ ಟಿ20 ವಿಶ್ವಕಪ್ಗೆ ಲಗ್ಗೆಯಿಟ್ಟಿರುವ ನೆದರ್ಲೆಂಡ್ಸ್ ತಂಡದಲ್ಲಿ ಭಾರತೀಯ ಮೂಲದ ಸನ್ಯಾ ಖುರಾನ ಗಮನ ಸೆಳೆಯುತ್ತಿದ್ದಾರೆ. ಕ್ರೀಡಾ ಹಿನ್ನೆಲೆಯುಳ್ಳ ಕುಟುಂಬದಿಂದ ಬಂದಿರುವ 21 ವರ್ಷದ ಸನ್ಯಾ, ಆರಂಭದಲ್ಲಿ ಟೆನಿಸ್ ಆಟಗಾರ್ತಿಯಾಗಿದ್ದು ನಂತರ ಕ್ರಿಕೆಟ್ನತ್ತ ಮುಖಮಾಡಿದರು. ವಿಶ್ವಕಪ್ ಅರ್ಹತಾ ಸುತ್ತಿನಲ್ಲಿ ಬಾಂಗ್ಲಾದೇಶದ ವಿರುದ್ಧ ಅಜೇಯ 43 ರನ್ ಸಿಡಿಸುವ ಮೂಲಕ ತಮ್ಮ ತಂಡಕ್ಕೆ ಐತಿಹಾಸಿಕ ಅರ್ಹತೆ ತಂದುಕೊಡುವಲ್ಲಿ ಅವರು ಪ್ರಮುಖ ಪಾತ್ರ ವಹಿಸಿದ್ದರು. ಕಾರ್ಡಿಫ್ ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡುತ್ತಲೇ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಮಿಂಚುತ್ತಿರುವ ಸನ್ಯಾ, ನೆದರ್ಲೆಂಡ್ಸ್ ತಂಡದ ಭರವಸೆಯ ಟಾಪ್-ಆರ್ಡರ್ ಬ್ಯಾಟರ್ ಆಗಿ ಗುರುತಿಸಿಕೊಂಡಿದ್ದಾರೆ.
ಒಟ್ಟಾರೆಯಾಗಿ, 2026ರ ಮಹಿಳಾ ಟಿ20 ವಿಶ್ವಕಪ್ ಕೇವಲ ಟ್ರೋಫಿಗಾಗಿನ ಹೋರಾಟವಷ್ಟೇ ಅಲ್ಲದೆ, ವಿಶ್ವಾದ್ಯಂತ ಹರಡಿರುವ ಭಾರತೀಯ ಪ್ರತಿಭೆಗಳ ಸಮ್ಮಿಲನದ ವೇದಿಕೆಯಾಗಿಯೂ ಮಾರ್ಪಟ್ಟಿದೆ. ತವರು ನೆಲದ ಹೊರತಾಗಿಯೂ ವಿವಿಧ ದೇಶಗಳ ಜೆರ್ಸಿಯಲ್ಲಿ ಕಣಕ್ಕಿಳಿಯುತ್ತಿರುವ ಈ ಭಾರತೀಯ ಮೂಲದ ಆಟಗಾರ್ತಿಯರ ಪ್ರದರ್ಶನವನ್ನು ಕಣ್ತುಂಬಿಕೊಳ್ಳಲು ಕ್ರಿಕೆಟ್ ಪ್ರೇಮಿಗಳು ಕಾತುರದಿಂದ ಕಾಯುತ್ತಿದ್ದಾರೆ.
ಇದನ್ನೂ ಓದಿ : ಧೋನಿ ನಂತರ CSK ವಿಕೆಟ್ ಕೀಪರ್ ಯಾರು? 2027ರ IPLಗೆ ಮೂವರು ಪ್ರಬಲ ಆಕಾಂಕ್ಷಿಗಳು
