ಮುಲ್ಲನ್‌ಪುರ : ಇಲ್ಲಿ ಬುಧವಾರ ನಡೆದ ಐಪಿಎಲ್ 2026ರ ಎಲಿಮಿನೇಟರ್ ಪಂದ್ಯದಲ್ಲಿ ಸನ್ ರೈಸರ್ಸ್ ಹೈದರಾಬಾದ್ (SRH) ವಿರುದ್ಧ ರಾಜಸ್ಥಾನ್ ರಾಯಲ್ಸ್ ತಂಡದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ ಐತಿಹಾಸಿಕ ಬ್ಯಾಟಿಂಗ್ ಪ್ರದರ್ಶನ ನೀಡಿದ್ದಾರೆ.
ಕೇವಲ 29 ಎಸೆತಗಳಲ್ಲಿ 97 ರನ್ ಚಚ್ಚುವ ಮೂಲಕ ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ವಿನಾಶಕಾರಿ ಇನ್ನಿಂಗ್ಸ್ ಆಡಿದ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಹೈದರಾಬಾದ್ ತಂಡದ ಯಾವುದೇ ತಂತ್ರಗಳಿಗೂ ಬಗ್ಗದ ಈ ಯುವ ಪ್ರತಿಭೆ ಮೈದಾನದ ಮೂಲೆಮೂಲೆಗೂ ಸಿಕ್ಸರ್, ಬೌಂಡರಿಗಳ ಸುರಿಮಳೆಗೈದು ಕ್ರಿಕೆಟ್ ಜಗತ್ತನ್ನೇ ನಿಬ್ಬೆರಗಾಗಿಸಿದ್ದಾರೆ.
ಎಸ್ಆರ್ಹೆಚ್ ತಂಡದ ‘ಎ, ಬಿ, ಸಿ’ ತಂತ್ರಗಳು ಉಡೀಸ್
ಪಂದ್ಯಕ್ಕೂ ಮುನ್ನ ಸನ್‌ರೈಸರ್ಸ್ ಹೈದರಾಬಾದ್ ನಾಯಕ ಪ್ಯಾಟ್ ಕಮಿನ್ಸ್ ಅವರು ವೈಭವ್ ಅವರನ್ನು ಕಟ್ಟಿಹಾಕಲು ತಮ್ಮ ಬಳಿ ಎ, ಬಿ ಮತ್ತು ಸಿ ಎಂಬ ಮೂರು ನಿರ್ದಿಷ್ಟ ಯೋಜನೆಗಳಿವೆ ಎಂದು ವಿಶ್ವಾಸದಿಂದ ಹೇಳಿದ್ದರು. ಆದರೆ, ವೈಭವ್ ಈ ಎಲ್ಲಾ ತಂತ್ರಗಳನ್ನು ಪವರ್‌ಪ್ಲೇನಲ್ಲೇ ಧೂಳಿಪಟ ಮಾಡಿದರು. ಮೊದಲನೆಯದಾಗಿ ‘ಪ್ಲಾನ್ ಎ’ ಅಡಿಯಲ್ಲಿ ಕಮಿನ್ಸ್ ಸ್ವತಃ ಯಾರ್ಕರ್ ಎಸೆತಗಳನ್ನು ಪ್ರಯೋಗಿಸಿದರು.
ಆದರೆ ಕೆಲವೇ ಎಸೆತಗಳ ನಂತರ ಕೋನ ಬದಲಿಸಿ ಆಫ್ ಸ್ಟಂಪ್‌ಗೆ ಗುರಿಯಿಟ್ಟಾಗ, ವೈಭವ್ ಅದ್ಭುತವಾಗಿ ಸಿಕ್ಸರ್ ಸಿಡಿಸಿ ಎಚ್ಚರಿಕೆ ರವಾನಿಸಿದರು. ‘ಪ್ಲಾನ್ ಬಿ’ ಅಡಿಯಲ್ಲಿ ಇಶಾನ್ ಮಾಲಿಂಗ ಅವರ ಮೂಲಕ ಶಾರ್ಟ್ ಪಿಚ್ ಹಾಗೂ ವೇಗದ ಎಸೆತಗಳನ್ನು ಹಾಕಿಸಲಾಯಿತು. ಆದರೆ, ಮಿಂಚಿನ ವೇಗದ ಕೈಚಳಕ ತೋರಿದ ವೈಭವ್, ಲೆಗ್ ಸೈಡ್‌ನಲ್ಲಿ ಭಾರಿ ಸಿಕ್ಸರ್‌ಗಳನ್ನು ಬಾರಿಸಿದರು. ಅಂತಿಮವಾಗಿ ಕಂಗಾಲಾದ ಎಸ್ಆರ್ಹೆಚ್ ‘ಪ್ಲಾನ್ ಸಿ’ ಮೊರೆಹೋಗಿ ಆಫ್ ಕಟ್ಟರ್ ಹಾಗೂ ನಿಧಾನಗತಿಯ ಎಸೆತಗಳನ್ನು ಪ್ರಯೋಗಿಸಿದರೂ ಆ ಚೆಂಡುಗಳು ಕೂಡ ನೇರವಾಗಿ ಗ್ಯಾಲರಿ ಸೇರುವ ಮೂಲಕ ಹೈದರಾಬಾದ್ ತಂಡದ ಎಲ್ಲಾ ಲೆಕ್ಕಾಚಾರಗಳು ಸಂಪೂರ್ಣ ತಲೆಕೆಳಗಾದವು.
ಕ್ರಿಸ್ ಗೇಲ್ ದಾಖಲೆ ಮುರಿದ ಯುವತಾರೆ
ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಕೇವಲ 16 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ವೈಭವ್ ಸೂರ್ಯವಂಶಿ ಹಲವು ಐತಿಹಾಸಿಕ ದಾಖಲೆಗಳನ್ನು ತಮ್ಮ ಹೆಸರಿಗೆ ಬರೆದುಕೊಂಡರು. ತಮ್ಮ ಈ ಬಿರುಗಾಳಿಯ ಇನ್ನಿಂಗ್ಸ್‌ನಲ್ಲಿ ಅವರು ಬರೋಬ್ಬರಿ 12 ಸಿಕ್ಸರ್‌ಗಳನ್ನು ಸಿಡಿಸಿದರು. ಇದು ಐಪಿಎಲ್ ಪಂದ್ಯವೊಂದರಲ್ಲಿ ಭಾರತೀಯ ಬ್ಯಾಟರ್ ಓರ್ವ ಸಿಡಿಸಿದ ಅತಿ ಹೆಚ್ಚು ಸಿಕ್ಸರ್‌ಗಳ ದಾಖಲೆಯಾಗಿದೆ. ಇದರೊಂದಿಗೆ, 2012ರಲ್ಲಿ ಯೂನಿವರ್ಸ್ ಬಾಸ್ ಕ್ರಿಸ್ ಗೇಲ್ ಒಂದು ಐಪಿಎಲ್ ಸೀಸನ್‌ನಲ್ಲಿ ಸಿಡಿಸಿದ್ದ 59 ಸಿಕ್ಸರ್‌ಗಳ ದಶಕದ ಹಳೆಯ ದಾಖಲೆಯನ್ನೂ ಸಹ ವೈಭವ್ ಹಿಂದಿಕ್ಕಿದ್ದಾರೆ. ಐಪಿಎಲ್ ಇತಿಹಾಸದ ಅತಿ ವೇಗದ ಶತಕ ಬಾರಿಸುವ ಹೊಸ್ತಿಲಲ್ಲಿದ್ದ ಅವರು 97 ರನ್ ಗಳಿಸಿದ್ದಾಗ ಎಂಟನೇ ಓವರ್‌ನಲ್ಲಿ ಪ್ರಫುಲ್ ಹಿಂಗೆ ಅವರ ಬೌಲಿಂಗ್‌ನಲ್ಲಿ ಥರ್ಡ್ ಮ್ಯಾನ್‌ಗೆ ಕ್ಯಾಚ್ ನೀಡಿ ನಿರಾಸೆ ಮೂಡಿಸಿದರು.
ಪವರ್‌ಪ್ಲೇನಲ್ಲಿ ಡೇವಿಡ್ ವಾರ್ನರ್ ದಾಖಲೆ ಪತನ
ವೈಭವ್ ಅವರ ಈ ಅಬ್ಬರದ ಬ್ಯಾಟಿಂಗ್ ನೆರವಿನಿಂದ ರಾಜಸ್ಥಾನ್ ರಾಯಲ್ಸ್ ಪವರ್‌ಪ್ಲೇ ಮುಕ್ತಾಯಕ್ಕೆ ವಿಕೆಟ್ ನಷ್ಟವಿಲ್ಲದೆ 80 ರನ್ ಕಲೆಹಾಕಿತು. ಇದರಲ್ಲಿ 60 ರನ್‌ಗಳು ಕೇವಲ ವೈಭವ್ ಅವರ ಬ್ಯಾಟ್‌ನಿಂದಲೇ ಸಿಡಿದಿದ್ದವು. ಮತ್ತೊಂದೆಡೆ ಯಶಸ್ವಿ ಜೈಸ್ವಾಲ್ 19 ರನ್ ಗಳಿಸಿ ಅವರಿಗೆ ಸಾಥ್ ನೀಡಿದರು. ಈ ಋತುವಿನಲ್ಲಿ ಪವರ್‌ಪ್ಲೇನಲ್ಲಿ ಒಟ್ಟು 490 ರನ್ ಕಲೆಹಾಕಿರುವ ವೈಭವ್, 2016ರಲ್ಲಿ ಡೇವಿಡ್ ವಾರ್ನರ್ (467 ರನ್) ನಿರ್ಮಿಸಿದ್ದ ಸಾರ್ವಕಾಲಿಕ ದಾಖಲೆಯನ್ನೂ ಅಳಿಸಿಹಾಕಿ ಹೊಸ ಇತಿಹಾಸ ಬರೆದಿದ್ದಾರೆ.
ನಾಯಕ ಪ್ಯಾಟ್ ಕಮಿನ್ಸ್ ಕಂಗಾಲು
ವೈಭವ್ ಅವರ ಈ ಪರಾಕ್ರಮದ ಮುಂದೆ ಹೈದರಾಬಾದ್ ತಂಡದ ಬೌಲರ್‌ಗಳು ಸಂಪೂರ್ಣವಾಗಿ ಮಂಕಾದರು. ವೈಭವ್ 97 ರನ್‌ಗಳಿಗೆ ಔಟಾಗುವ ಹೊತ್ತಿಗೆ ಕೇವಲ ಎಂಟು ಓವರ್‌ಗಳಲ್ಲಿ ರಾಜಸ್ಥಾನ್ ತಂಡ 125 ರನ್ ಗಳಿಸಿ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿತ್ತು. ಆ ಬಳಿಕ ಕ್ರೀಸ್‌ಗೆ ಬಂದ ಧ್ರುವ್ ಜುರೆಲ್ ಕೂಡ ಎದುರಿಸಿದ ಮೊದಲ ಎಸೆತದಿಂದಲೇ ಅದೇ ಆಕ್ರಮಣಕಾರಿ ಆಟವನ್ನು ಮುಂದುವರಿಸಿದರು. ಹೀಗಾಗಿ 10 ಓವರ್‌ಗಳ ಅಂತ್ಯಕ್ಕೆ ರಾಜಸ್ಥಾನ್ 136 ರನ್ ಕಲೆಹಾಕಿತು. ಇಡೀ ಟೂರ್ನಿಯಲ್ಲಿ ಶ್ರೇಷ್ಠ ಪ್ರದರ್ಶನ ನೀಡಿದ್ದ ಹೈದರಾಬಾದ್ ನಾಯಕ ಪ್ಯಾಟ್ ಕಮಿನ್ಸ್ ಈ ಪಂದ್ಯದಲ್ಲಿ ತೀವ್ರ ದುಬಾರಿಯಾದರು. ಕಮಿನ್ಸ್ ತಮ್ಮ ಮೊದಲ ಮೂರು ಓವರ್‌ಗಳಲ್ಲೇ 51 ರನ್ ಬಿಟ್ಟುಕೊಡುವ ಮೂಲಕ ತೀವ್ರ ನಿರಾಸೆ ಅನುಭವಿಸಿದರು. ಒಟ್ಟಾರೆಯಾಗಿ, ಈ ಎಲಿಮಿನೇಟರ್ ಪಂದ್ಯವು 15 ವರ್ಷದ ಯುವ ಆಟಗಾರನ ಅಸಾಧಾರಣ ಹಾಗೂ ವಿನಾಶಕಾರಿ ಬ್ಯಾಟಿಂಗ್ ಪ್ರದರ್ಶನಕ್ಕೆ ಸಾಕ್ಷಿಯಾಯಿತು.
ಇದನ್ನೂ ಓದಿ : ಭಾರತ ವಿರುದ್ಧದ ಟೆಸ್ಟ್ ಪಂದ್ಯದಿಂದ ಹೊರಗುಳಿದ ಸ್ಟಾರ್ ಸ್ಪಿನ್ನರ್ ರಶೀದ್ ಖಾನ್ ಏಕದಿನ ಸರಣಿಗೆ ವಾಪಸ್!
