ಬೆಂಗಳೂರು : ದೇಶದ ಸಾರ್ವಜನಿಕ ವಲಯದ ಬೃಹತ್ ವಿಮಾ ಸಂಸ್ಥೆಯಾಗಿರುವ ಭಾರತೀಯ ಜೀವ ವಿಮಾ ನಿಗಮವು ಷೇರು ಖರೀದಿದಾರರಿಗೆ ಭರ್ಜರಿ ಸಿಹಿ ಸುದ್ದಿ ನೀಡಿದೆ. ಕಳೆದ ತ್ರೈಮಾಸಿಕದಲ್ಲಿ ಭರ್ಜರಿ ಲಾಭ ಗಳಿಸಿದ ಬೆನ್ನಲ್ಲೇ ಷೇರು ಖರೀದಿಸಿದವರಿಗೆ 1:1 ಬೋನಸ್ ಷೇರುಗಳನ್ನು ಘೋಷಣೆ ಮಾಡಿದೆ. ಅಷ್ಟೇ ಅಲ್ಲ, ಹೂಡಿಕೆದಾರರಿಗೆ ಪ್ರತಿ ಷೇರಿಗೆ 10 ರೂಪಾಯಿ ಡೆವಿಡೆಂಡ್ ಅನ್ನು ಕೂಡ ಘೋಷಣೆ ಮಾಡಿದೆ. ಇದು ಎಲ್ಐಸಿ ಹೂಡಿಕೆದಾರರಿಗೆ ಭರ್ಜರಿ ಸಿಹಿ ಸುದ್ದಿಯಾಗಿದೆ.
ಎಲ್ಐಸಿ ಸ್ಥಾಪನೆಯಾದ ಕಳೆದ 69 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಎಲ್ಐಸಿಯು ಹೂಡಿಕೆದಾರರಿಗೆ ಬೋನಸ್ ಷೇರು ಘೋಷಣೆ ಮಾಡಿದೆ. ನಿಮ್ಮ ಬಳಿ ಈಗ ಎಲ್ಐಸಿಯ 200 ಷೇರುಗಳಿದ್ದರೆ, ಬೋನಸ್ ಸೇರಿ ಯಾವುದೇ ಹೆಚ್ಚುವರಿ ಹಣದ ಹೂಡಿಕೆಯಿಲ್ಲದೆ ನಿಮ್ಮ ಷೇರುಗಳ ಸಂಖ್ಯೆ 400 ಆಗಲಿದೆ. ಹಾಗೆಯೇ, ಆ 400 ಷೇರುಗಳಿಗೆ ತಲಾ 10 ರೂಪಾಯಿಯಂತೆ ಡಿವಿಡೆಂಡ್ ನೀಡಲಾಗುತ್ತದೆ. ಅಂದರೆ, ನಿಮಗೆ 4 ಸಾವಿರ ರೂಪಾಯಿ ಡಿವಿಡೆಂಡ್ ಸಿಗಲಿದೆ.
ಬೋನಸ್ ಷೇರು ಎಂದರೆ, ಕಂಪನಿಯು ತನ್ನ ಬಳಿ ಇರುವ ಹೆಚ್ಚುವರಿ ನಗದು ಮೀಸಲು (Reserves) ಹಣವನ್ನು ಬಳಸಿಕೊಂಡು, ಪ್ರಸ್ತುತ ಇರುವ ಷೇರುದಾರರಿಗೆ ಯಾವುದೇ ಹೆಚ್ಚುವರಿ ವೆಚ್ಚವಿಲ್ಲದೆ ಉಚಿತವಾಗಿ ನೀಡುವ ಷೇರುಗಳನ್ನು ‘ಬೋನಸ್ ಷೇರು’ ಎನ್ನಲಾಗುತ್ತದೆ.
ರೆಕಾರ್ಡ್ ಡೇಟ್ ಕೂಡ ಫಿಕ್ಸ್
ಎಲ್ಐಸಿ ಬೋನಸ್ ಷೇರುಗಳಿಗೆ ಸಂಬಂಧಿಸಿದಂತೆ ಮಂಡಳಿಯು ರೆಕಾರ್ಡ್ ಡೇಟ್ ಕೂಡ ಫಿಕ್ಸ್ ಮಾಡಿದೆ. ಎಲ್ಐಸಿ ಷೇರುಗಳನ್ನು ಹೊಂದಿರುವವರು ಮೇ 29ರಂದು ಬೋನಸ್ ಷೇರುಗಳನ್ನು ಪಡೆಯಲು ಅರ್ಹರಾಗುತ್ತಾರೆ. ಜೂನ್ 1ರಂದು ಹೂಡಿಕೆದಾರರಿಗೆ ಹೆಚ್ಚುವರಿ ಬೋನಸ್ ಷೇರುಗಳು ಜಮೆಯಾಗುತ್ತವೆ. ಅಂದರೆ, ಹೂಡಿಕೆದಾರರ ಷೇರುಗಳ ಸಂಖ್ಯೆ ಅಂದು ದುಪ್ಪಟ್ಟಾಗುತ್ತದೆ. ಹಾಗೆಯೇ, ಡಿವಿಡೆಂಡ್ ಪಡೆಯಲು ಕೂಡ ಜೂನ್ 25ಅನ್ನು ರೆಕಾರ್ಡ್ ಡೇಟ್ ಆಗಿ ಫಿಕ್ಸ್ ಮಾಡಿದೆ.
ಇದನ್ನೂ ಓದಿ : ಕೇಂದ್ರ ಸರ್ಕಾರದ Balmer Lawrie ಸಂಸ್ಥೆಯಲ್ಲಿ 62 ಹುದ್ದೆಗಳ ನೇಮಕ : ಬೆಂಗಳೂರಿನಲ್ಲೂ ಉದ್ಯೋಗ!
