ಜೈಪುರ : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ರಾಜಸ್ಥಾನ್ ರಾಯಲ್ಸ್ ಮತ್ತು ಲಕ್ನೋ ಸೂಪರ್ ಜೈಂಟ್ಸ್ ನಡುವಿನ ಹೈ-ವೋಲ್ಟೇಜ್ ಪಂದ್ಯವು ಕೇವಲ ರನ್ ಸುರಿಮಳೆಯಿಂದಷ್ಟೇ ಅಲ್ಲ, ದಿಗ್ಗಜ ಕ್ರಿಕೆಟಿಗ ಸುನಿಲ್ ಗವಾಸ್ಕರ್ ಅವರ ಖಡಕ್ ವಿಮರ್ಶೆಯಿಂದಲೂ ಸದ್ದು ಮಾಡುತ್ತಿದೆ. ಲಕ್ನೋ ನೀಡಿದ್ದ 221 ರನ್‌ಗಳ ಬೃಹತ್ ಗುರಿಯನ್ನು ರಕ್ಷಿಸುವಾಗ ದುಬಾರಿಯಾದ ಯುವ ವೇಗಿ ಆಕಾಶ್ ಸಿಂಗ್ ಅವರ ಮೈದಾನದ ಸಂಭ್ರಮಾಚರಣೆಯನ್ನು ಲೈವ್ ಕಾಮೆಂಟರಿಯಲ್ಲಿ ಗವಾಸ್ಕರ್ ಕಟುವಾಗಿ ಟೀಕಿಸಿದ್ದಾರೆ.
ದುಬಾರಿಯಾದ ಆಕಾಶ್, ಗವಾಸ್ಕರ್ ಗರಂ
ಸವಾಯ್ ಮಾನ್‌ಸಿಂಗ್ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಬ್ಯಾಟರ್‌ಗಳು ಲಕ್ನೋ ಬೌಲರ್‌ಗಳನ್ನು ಮನಬಂದಂತೆ ದಂಡಿಸಿದರು. ವಿಶೇಷವಾಗಿ 15 ವರ್ಷದ ಯುವ ತಾರೆ ವೈಭವ್ ಸೂರ್ಯವಂಶಿ ಅವರ 38 ಎಸೆತಗಳ 93 ರನ್‌ಗಳ ಸಿಡಿಲಮರಿ ಆಟದ ಮುಂದೆ ಲಕ್ನೋ ಬೌಲಿಂಗ್ ಸಂಪೂರ್ಣ ಮಂಕಾಯಿತು. ಈ ವೇಳೆ ಬೌಲಿಂಗ್ ಮಾಡಿದ ಎಲ್‌ಎಸ್‌ಜಿ ವೇಗಿ ಆಕಾಶ್ ಸಿಂಗ್ 3 ಓವರ್‌ಗಳಲ್ಲಿ ಬರೋಬ್ಬರಿ 54 ರನ್ ಚಚ್ಚಿಸಿಕೊಂಡರು. ಯಶಸ್ವಿ ಜೈಸ್ವಾಲ್ ವಿಕೆಟ್ ಪಡೆದಿದ್ದರೂ, ಅವರ ಎಕಾನಮಿ ರೇಟ್ ಅತ್ಯಂತ ಕಳಪೆಯಾಗಿತ್ತು. ಈ ಸಮಯದಲ್ಲಿ ಕಾಮೆಂಟರಿ ಮಾಡುತ್ತಿದ್ದ ಸುನಿಲ್ ಗವಾಸ್ಕರ್, ಆಕಾಶ್ ಸಿಂಗ್ ಅವರ ಅತಿಯಾದ ಸಂಭ್ರಮಾಚರಣೆಯನ್ನು ಪ್ರಶ್ನಿಸಿದರು.
“ಈಗ ಆ ಚೀಟಿ ಎಲ್ಲಿದೆ?” – ಗವಾಸ್ಕರ್ ವ್ಯಂಗ್ಯ
ಆಕಾಶ್ ಸಿಂಗ್ ಈ ಹಿಂದೆ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ತಮ್ಮ ಪದಾರ್ಪಣೆ ಪಂದ್ಯದಲ್ಲಿ ವಿಕೆಟ್ ಪಡೆದಾಗಲೆಲ್ಲ ಜೇಬಿನಿಂದ ಚೀಟಿಯೊಂದನ್ನು ತೆಗೆದು ಪ್ರದರ್ಶಿಸುವ ಮೂಲಕ ವೈರಲ್ ಆಗಿದ್ದರು. ಆ ಪಂದ್ಯದಲ್ಲಿ 26 ರನ್‌ಗಳಿಗೆ 3 ವಿಕೆಟ್ ಪಡೆದು ಮಿಂಚಿದ್ದ ಅವರು, ಈ ಚೀಟಿ ಪ್ರದರ್ಶನವನ್ನು ತಮ್ಮ ವೈಯಕ್ತಿಕ ಸ್ಫೂರ್ತಿಯ ಸಂಕೇತ ಎಂದು ಸಮರ್ಥಿಸಿಕೊಂಡಿದ್ದರು. ಇದೇ ವಿಚಾರವನ್ನು ಉಲ್ಲೇಖಿಸಿದ ಗವಾಸ್ಕರ್, “ನಿಮ್ಮ ಚೀಟಿ ಈಗ ಎಲ್ಲಿದೆ, ಅದು ಜೇಬಿನಲ್ಲೇ ಇದೆಯಲ್ಲವೇ? ನನಗೆ ಆಟಗಾರರಲ್ಲಿ ಸ್ವಲ್ಪ ವಿನಯತೆ ಇರುವುದು ಇಷ್ಟ. ಒಂದು ಓವರ್‌ನ ಯಾವುದೋ ಒಂದು ಎಸೆತದಲ್ಲಿ ನೀವು ವಿಕೆಟ್ ಪಡೆಯಬಹುದು. ಆದರೆ ಉಳಿದ ಐದು ಎಸೆತಗಳಲ್ಲಿ ನಿಮಗೆ ಭಾರಿ ಹೊಡೆತ ಬೀಳುತ್ತಿರುತ್ತದೆ. 17 ಎಸೆತಗಳಲ್ಲಿ ಅವರು 48 ರನ್ ನೀಡಿದ್ದಾರೆ” ಎಂದು ಖಾರವಾಗಿ ನುಡಿದರು. ರಾಜಸ್ಥಾನ್ ವಿರುದ್ಧ ಜೈಸ್ವಾಲ್ ವಿಕೆಟ್ ಪಡೆದಾಗ ಆಕಾಶ್ ಸಿಂಗ್ ತಲೆಗೆ ಬೆರಳಿಟ್ಟು ಆಕಾಶದತ್ತ ಕೈತೋರಿಸುವ ಫುಟ್ಬಾಲ್ ಆಟಗಾರ ಮಾರ್ಕಸ್ ರಾಶ್‌ಫೋರ್ಡ್ ಶೈಲಿಯ ಸಂಭ್ರಮಾಚರಣೆ ಮಾಡಿದ್ದು ಗವಾಸ್ಕರ್ ಅವರ ಅಸಮಾಧಾನಕ್ಕೆ ಕಾರಣವಾಗಿತ್ತು.
ರಾಜಸ್ಥಾನ್ ರಾಯಲ್ಸ್ ಪ್ಲೇಆಫ್‌ಗೆ ಲಗ್ಗೆ
ಈ ಪಂದ್ಯವು ರಾಜಸ್ಥಾನ್ ರಾಯಲ್ಸ್ ತಂಡಕ್ಕೆ ಪ್ಲೇಆಫ್ ದೃಷ್ಟಿಯಿಂದ ಅತ್ಯಂತ ನಿರ್ಣಾಯಕವಾಗಿತ್ತು. ಹಿಂದಿನ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸೋಲು ಕಂಡಿದ್ದ ತಂಡಕ್ಕೆ ಈ ಪಂದ್ಯದಲ್ಲಿ ಗೆಲುವು ಅನಿವಾರ್ಯವಾಗಿತ್ತು. 221 ರನ್‌ಗಳ ಬೃಹತ್ ಗುರಿ ಬೆನ್ನಟ್ಟಿದ ರಾಜಸ್ಥಾನ್‌ಗೆ ವೈಭವ್ ಸೂರ್ಯವಂಶಿ ಅವರ ಭಯಮುಕ್ತ ಬ್ಯಾಟಿಂಗ್ ನೆರವಾಯಿತು. ಅವರ ಅದ್ಭುತ ಪ್ರದರ್ಶನವು ಲಕ್ನೋ ಬೌಲರ್‌ಗಳನ್ನು ತೀವ್ರ ಒತ್ತಡಕ್ಕೆ ಸಿಲುಕಿಸುವ ಜೊತೆಗೆ, ರಾಜಸ್ಥಾನ್ ತಂಡದ ಪ್ಲೇಆಫ್ ಹಾದಿಯನ್ನು ಮತ್ತಷ್ಟು ಸುಗಮಗೊಳಿಸಿತು. ಈ ಪಂದ್ಯದ ಮೂಲಕ ಐಪಿಎಲ್ 2026ರ ಅತಿದೊಡ್ಡ ಆವಿಷ್ಕಾರವಾಗಿ ವೈಭವ್ ಮತ್ತೊಮ್ಮೆ ಹೊರಹೊಮ್ಮಿದ್ದಾರೆ.
ಇದನ್ನೂ ಓದಿ : ಎತ್ತಿನ ಗಾಡಿ ಕಾರಿನ ಮಧ್ಯೆ ಭೀಕರ ಅಪಘಾತ – 2 ಎತ್ತುಗಳು ಸ್ಥಳದಲ್ಲೇ ಸಾವು!
