ಬೆಂಗಳೂರು : ಭಾರತದ ಅತಿದೊಡ್ಡ ಕಾರು ತಯಾರಕ ಕಂಪನಿಯಾಗಿರುವ ಮಾರುತಿ ಸುಜುಕಿ ಇಂಡಿಯಾ ಲಿಮಿಟೆಡ್, ಯುವ ಪ್ರತಿಭೆಗಳನ್ನು ಗುರುತಿಸಿ ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ ‘ಡಿಸೈನ್ ಎಕ್ಸಥಾನ್ 2026’ ವಿನ್ಯಾಸ ಸ್ಪರ್ಧೆಯ ಎರಡನೇ ಆವೃತ್ತಿಯನ್ನು ಅಧಿಕೃತವಾಗಿ ಘೋಷಿಸಿದೆ. 2025ರಲ್ಲಿ ನಡೆದ ಮೊದಲ ಆವೃತ್ತಿಯ ಯಶಸ್ಸಿನ ಬಳಿಕ, ಆಟೋಮೊಬೈಲ್ ವಿನ್ಯಾಸ ಕ್ಷೇತ್ರದಲ್ಲಿ ಕ್ರಾಂತಿ ಮೂಡಿಸುವ ಹಾಗೂ ಹೊಸ ಪೀಳಿಗೆಯ ವಿನ್ಯಾಸಗಾರರನ್ನು ಬೆಳೆಸುವ ಉದ್ದೇಶದಿಂದ ಈ ಸ್ಪರ್ಧೆಯನ್ನು ಆಯೋಜಿಸಲಾಗುತ್ತಿದೆ. ಭಾರತದಲ್ಲಿರುವ ವಿವಿಧ ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ವಿನ್ಯಾಸ ಸಂಸ್ಥೆಗಳ ವಿದ್ಯಾರ್ಥಿಗಳಿಗೆ ತಮ್ಮ ಭವಿಷ್ಯದ ವಾಹನ ವಿನ್ಯಾಸ ಕಲ್ಪನೆಗಳನ್ನು ಜಗತ್ತಿನೆದುರು ಪ್ರಸ್ತುತಪಡಿಸಲು ಇದೊಂದು ಅತ್ಯುತ್ತಮ ವೇದಿಕೆಯಾಗಿದೆ.
ಭವಿಷ್ಯದ ವಾಹನಗಳ ಕಲ್ಪನೆ ಮತ್ತು ಸ್ಪರ್ಧೆಯ ವಸ್ತು-ವಿಷಯ
ಈ ಬಾರಿಯ ಸ್ಪರ್ಧೆಯು ಅತ್ಯಂತ ಕುತೂಹಲಕಾರಿ ವಿಷಯವನ್ನು ಹೊಂದಿದೆ. ‘2036ರ ವೇಳೆಗೆ ಜೆನ್-ಝೆಡ್ (Gen Z) ಮತ್ತು ಆಲ್ಫಾ (Alpha) ಪೀಳಿಗೆಯ ಯುವಕರು ಹೊಂದಲು ಬಯಸುವ ಐಕಾನಿಕ್ ವಾಹನವನ್ನು ಕಲ್ಪಿಸುವುದು’ ಎಂಬ ಥೀಮ್ ಅಡಿಯಲ್ಲಿ ಸ್ಪರ್ಧಿಗಳು ತಮ್ಮ ವಿನ್ಯಾಸವನ್ನು ಸಿದ್ಧಪಡಿಸಬೇಕಿದೆ. 2035-2040ರ ದಶಕದ ಭವಿಷ್ಯದ ಮೊಬಿಲಿಟಿ ಟ್ರೆಂಡ್ಗಳಿಗೆ ಅನುಗುಣವಾಗಿ ವಾಹನಗಳ ಕಾನ್ಸೆಪ್ಟ್ ಇರಬೇಕು. ಈ ಕಲ್ಪನೆಗಳನ್ನು ವಿದ್ಯಾರ್ಥಿಗಳ ವಿನ್ಯಾಸ ದೃಷ್ಟಿಕೋನ, ಸುಸ್ಥಿರತೆ, ತಂತ್ರಜ್ಞಾನದ ಅಳವಡಿಕೆ ಹಾಗೂ ಭವಿಷ್ಯದ ಗ್ರಾಹಕರ ಜೀವನಶೈಲಿಗೆ ಅದು ಎಷ್ಟು ಪೂರಕವಾಗಿದೆ ಎಂಬ ಮಾನದಂಡಗಳ ಆಧಾರದ ಮೇಲೆ ಕಟ್ಟುನಿಟ್ಟಾಗಿ ಮೌಲ್ಯಮಾಪನ ಮಾಡಲಾಗುತ್ತದೆ.
ಕಾರುಗಳ ವಿನ್ಯಾಸವು ಕೇವಲ ಸೌಂದರ್ಯಕ್ಕೆ ಸೀಮಿತವಾಗಿರದೆ, ನಾವೀನ್ಯತೆ ಹಾಗೂ ಹೊಸ ದೃಷ್ಟಿಕೋನದ ಮೂಲಕ ಗ್ರಾಹಕರ ಆಯ್ಕೆಯ ಮೇಲೆ ಪ್ರಭಾವ ಬೀರುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ಮಾರುತಿ ಸುಜುಕಿ ಸಂಸ್ಥೆಯ ಹಿಸಾಶಿ ಟೆಕುಚಿ ಅಭಿಪ್ರಾಯಪಟ್ಟಿದ್ದಾರೆ. ಯುವಕರ ವಿಭಿನ್ನ ಆಲೋಚನೆಗಳು ವಾಹನೋದ್ಯಮದ ಭವಿಷ್ಯವನ್ನು ರೂಪಿಸಲಿವೆ ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದ್ದಾರೆ.
ಆಕರ್ಷಕ ನಗದು ಬಹುಮಾನ ಹಾಗೂ ಪ್ರತಿಷ್ಠಿತ ಇಂಟರ್ನ್ಶಿಪ್ ಅವಕಾಶ
ಈ ಬೃಹತ್ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳುವ ವಿದ್ಯಾರ್ಥಿಗಳಿಗೆ ಹಲವು ಆಕರ್ಷಕ ಬಹುಮಾನಗಳನ್ನು ಪ್ರಕಟಿಸಲಾಗಿದೆ. ಒಟ್ಟಾರೆ 4.5 ಲಕ್ಷ ರೂಪಾಯಿಗಳವರೆಗಿನ ನಗದು ಬಹುಮಾನಗಳನ್ನು ಗೆಲ್ಲುವ ಅವಕಾಶ ಸ್ಪರ್ಧಿಗಳಿಗಿದೆ. ಅಂತಿಮ ಸುತ್ತಿಗೆ ಆಯ್ಕೆಯಾಗುವ ಶ್ರೇಷ್ಠ 25 ತಂಡಗಳಿಗೆ ಆಟೋಮೋಟಿವ್ ವಿನ್ಯಾಸ ಕ್ಷೇತ್ರದ ಅನುಭವಿ ವೃತ್ತಿಪರರು ನೇರವಾಗಿ ಮಾರ್ಗದರ್ಶನ ನೀಡಲಿದ್ದಾರೆ. ಸ್ಪರ್ಧೆಯಲ್ಲಿ ಮೊದಲ ಮೂರು ಸ್ಥಾನಗಳನ್ನು ಪಡೆಯುವ ವಿಜೇತ ತಂಡಗಳಿಗೆ ಮಾರುತಿ ಸುಜುಕಿಯ ಡಿಸೈನ್ ವಿಭಾಗದಲ್ಲಿ ಆರು ತಿಂಗಳ ಸುದೀರ್ಘ ಇಂಟರ್ನ್ಶಿಪ್ ಮಾಡುವ ಬಂಪರ್ ಅವಕಾಶ ಸಿಗಲಿದೆ. ಹಾಗೆಯೇ ನಾಲ್ಕರಿಂದ ಹತ್ತನೇ ಸ್ಥಾನದವರೆಗಿನ ತಂಡಗಳಿಗೆ ವಿಶೇಷ ಮಾನ್ಯತೆ ದೊರೆಯಲಿದ್ದು, ಭವಿಷ್ಯದಲ್ಲಿ ಆಟೋಮೇಕರ್ ಕಂಪನಿಯಲ್ಲಿ ಇಂಟರ್ನ್ಶಿಪ್ಗೆ ಅರ್ಜಿ ಸಲ್ಲಿಸುವ ಆದ್ಯತೆಯನ್ನು ಒದಗಿಸಲಾಗುತ್ತದೆ.
ಹಿಂದಿನ ಯಶಸ್ಸು ಹಾಗೂ ಅರ್ಜಿ ಸಲ್ಲಿಕೆಯ ಕಡೆಯ ದಿನಾಂಕ
ಭಾರತದ ಆಟೋಮೊಬೈಲ್ ವಿನ್ಯಾಸ ಪರಿಸರ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವ ಮತ್ತು ಉದಯೋನ್ಮುಖ ಪ್ರತಿಭೆಗಳೊಂದಿಗೆ ಕೈಜೋಡಿಸುವ ಮಾರುತಿ ಸುಜುಕಿಯ ವ್ಯಾಪಕ ಪ್ರಯತ್ನದ ಭಾಗವಾಗಿ ಈ ‘ಡಿಸೈನ್ ಎಕ್ಸಥಾನ್’ ಹೊರಹೊಮ್ಮಿದೆ. ಕಳೆದ ವರ್ಷ ನಡೆದ ಮೊದಲ ಆವೃತ್ತಿಯಲ್ಲಿ ದೇಶ-ವಿದೇಶಗಳ 70ಕ್ಕೂ ಹೆಚ್ಚು ವಿನ್ಯಾಸ ಸಂಸ್ಥೆಗಳಿಂದ ಸುಮಾರು 400ಕ್ಕೂ ಅಧಿಕ ವಿದ್ಯಾರ್ಥಿಗಳು ಅತ್ಯುತ್ಸಾಹದಿಂದ ಭಾಗವಹಿಸಿದ್ದರು. ಎಂಐಟಿ ಇನ್ಸ್ಟಿಟ್ಯೂಟ್ ಆಫ್ ಡಿಸೈನ್, ವಿಐಟಿ ವೆಲ್ಲೂರ್ ಮತ್ತು ಸ್ಟ್ರೇಟ್ ಸ್ಕೂಲ್ ಆಫ್ ಡಿಸೈನ್ ವಿದ್ಯಾರ್ಥಿಗಳು ಕಳೆದ ಬಾರಿ ವಿಜೇತರಾಗಿ ಹೊರಹೊಮ್ಮಿದ್ದರು. ಪ್ರಸ್ತುತ ಎಂಟು ಮಂದಿ ವಿದ್ಯಾರ್ಥಿಗಳು ಮಾರುತಿ ಸುಜುಕಿ ವಿನ್ಯಾಸ ತಂಡದೊಂದಿಗೆ ಇಂಟರ್ನ್ಶಿಪ್ ಮಾಡುತ್ತಿರುವುದು ಗಮನಾರ್ಹ. ಈ ಬಾರಿಯ ‘ಡಿಸೈನ್ ಎಕ್ಸಥಾನ್ 2026’ ಸ್ಪರ್ಧೆಯಲ್ಲಿ ಭಾಗವಹಿಸಲು ಇಚ್ಛಿಸುವ ಯುವ ವಿನ್ಯಾಸಗಾರರು ತಮ್ಮ ಅರ್ಜಿಗಳನ್ನು ಸಲ್ಲಿಸಲು ಜುಲೈ 13, 2026 ಕಡೆಯ ದಿನಾಂಕವಾಗಿದೆ ಎಂದು ಕಂಪನಿಯು ತನ್ನ ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ.
ಇದನ್ನೂ ಓದಿ : ಮುಂಬೈ ವಿರುದ್ಧ RCB ರೋಚಕ ಗೆಲುವಿನ ಬೆನ್ನಲ್ಲೇ ಅಸಭ್ಯ ವರ್ತನೆ – ಟಿಮ್ ಡೇವಿಡ್ಗೆ ದಂಡದ ಬರೆ!
