ಬೆಂಗಳೂರು : ಜಾಗತಿಕ ಭೌಗೋಳಿಕ ಸಂಘರ್ಷದ ಮಧ್ಯೆಯೂ ಚಿನ್ನದ ಬೆಲೆಯಲ್ಲಿ ಸ್ಥಿರತೆ ಇದೆ. ಈಗಾಗಲೇ ಮದುವೆ ಸೀಸನ್ ಶುರುವಾಗಿರುವ ಕಾರಣ ಚಿನ್ನಾಭರಣಗಳ ಖರೀದಿ ಭರಾಟೆ ಜೋರಾಗಿದೆ. ಜನ ಹೆಚ್ಚಿನ ಪ್ರಮಾಣದಲ್ಲಿ ಚಿನ್ನಾಭರಣಗಳನ್ನು ಖರೀದಿಸುತ್ತಿದ್ದಾರೆ. ಹೀಗೆ ಚಿನ್ನಾಭರಣ ಖರೀದಿಸಲು ಮಳಿಗೆಗಳಿಗೆ ತೆರಳುವ ಮೊದಲು ಕೆಲವೊಂದಿಷ್ಟು ಅಂಶಗಳನ್ನು ಗಮನದಲ್ಲಿಟ್ಟುಕೊಳ್ಳುವುದು ಒಳ್ಳೆಯದು. ನೀವು ಚಿನ್ನಾಭರಣ ಖರೀದಿಸುವಾಗ ಯಾವುದೇ ಕಾರಣಕ್ಕೂ ಈ ತಪ್ಪುಗಳನ್ನು ಮಾಡಬಾರದು. ಇಲ್ಲದಿದ್ದರೆ ನಷ್ಟ ಅನುಭವಿಸಬೇಕಾಗುತ್ತದೆ ಎಂಬುದು ಗಮನದಲ್ಲಿರಲಿ.
ಹಾಲ್ ಮಾರ್ಕ್ (Hallmark) ಗಮನಿಸದಿರುವುದು
ಚಿನ್ನದ ಶುದ್ಧತೆಯನ್ನು ಗುರುತಿಸಲು BIS Hallmark ಅತ್ಯಗತ್ಯ. ಆಭರಣದ ಮೇಲೆ ಬಿಐಎಸ್ ಲೋಗೋ, ಶುದ್ಧತೆ (ಉದಾಹರಣೆಗೆ 22K916) ಮತ್ತು ಎಚ್ ಯುಐಡಿ (HUID) ಸಂಖ್ಯೆ ಇದೆಯೇ ಎಂದು ಪರೀಕ್ಷಿಸದೆ ಖರೀದಿಸಬೇಡಿ. ಇದು ನೀವು ಖರೀದಿಸುವ ಚಿನ್ನದ ಅಸಲಿತನಕ್ಕೆ ಇರುವ ಏಕೈಕ ಸಾಕ್ಷಿ.
ಮೇಕಿಂಗ್ ಚಾರ್ಜಸ್ ಬಗ್ಗೆ ಚೌಕಾಸಿ ಮಾಡದಿರುವುದು
ಪ್ರತಿ ಜ್ಯುವೆಲ್ಲರಿ ಅಂಗಡಿಯವರು ವಿಭಿನ್ನ ಮೇಕಿಂಗ್ ಚಾರ್ಜ್ ಗಳನ್ನು ವಿಧಿಸುತ್ತಾರೆ. ವಿನ್ಯಾಸದ ಆಧಾರದ ಮೇಲೆ ಇದು 8% ರಿಂದ 25% ರವರೆಗೆ ಇರಬಹುದು. ನೀವು ಸರಿಯಾಗಿ ಚೌಕಾಸಿ ಮಾಡದಿದ್ದರೆ ಹೆಚ್ಚಿನ ಹಣ ನೀಡಬೇಕಾಗಬಹುದು. ಆಭರಣದ ವಿನ್ಯಾಸ ಸರಳವಾಗಿದ್ದರೆ ಮೇಕಿಂಗ್ ಚಾರ್ಜ್ ಕೂಡ ಕಡಿಮೆ ಇರಬೇಕು.
ತೂಕದ ಬಗ್ಗೆ ಸ್ಪಷ್ಟತೆ ಇಲ್ಲದಿರುವುದು
ಆಭರಣದಲ್ಲಿ ಕಲ್ಲುಗಳು (Stones) ಅಥವಾ ಮುತ್ತುಗಳಿದ್ದರೆ, ಅವುಗಳ ತೂಕವನ್ನೂ ಸೇರಿಸಿ ಚಿನ್ನದ ಬೆಲೆಗೆ ಲೆಕ್ಕ ಹಾಕಲಾಗುತ್ತದೆಯೇ ಎಂದು ಗಮನಿಸಿ. ನೆನಪಿಡಿ, ನೀವು ಆಭರಣವನ್ನು ಮರುಮಾರಾಟ ಮಾಡುವಾಗ ಕಲ್ಲುಗಳ ತೂಕಕ್ಕೆ ಚಿನ್ನದ ಬೆಲೆ ಸಿಗುವುದಿಲ್ಲ. ಆದ್ದರಿಂದ ಕಲ್ಲುಗಳ ತೂಕವನ್ನು ಹೊರತುಪಡಿಸಿ ಕೇವಲ ನಿವ್ವಳ ಚಿನ್ನದ ತೂಕಕ್ಕೆ (Net Weight) ಹಣ ಪಾವತಿಸಿ.
ದೈನಂದಿನ ಚಿನ್ನದ ದರ ಪರಿಶೀಲಿಸದಿರುವುದು
ಚಿನ್ನದ ಬೆಲೆ ಪ್ರತಿದಿನವೂ ಬದಲಾಗುತ್ತಿರುತ್ತದೆ. ಮಳಿಗೆಗಳಿಗೆ ಹೋಗುವ ಮೊದಲು ಅಂದಿನ ಅಧಿಕೃತ ಮಾರುಕಟ್ಟೆ ದರವನ್ನು ಪರಿಶೀಲಿಸಿ. ಕೆಲವು ಅಂಗಡಿಗಳಲ್ಲಿ ಬೆಲೆ ಸ್ವಲ್ಪ ವ್ಯತ್ಯಾಸವಿರಬಹುದು, ಅದನ್ನು ಗಮನಿಸುವುದು ಮುಖ್ಯ. ಹಾಗೆಯೇ, ಭವಿಷ್ಯದಲ್ಲಿ ಅದೇ ಆಭರಣವನ್ನು ನೀವು ಬದಲಾಯಿಸಲು ಅಥವಾ ಮಾರಾಟ ಮಾಡಲು ಹೋದಾಗ ಎಷ್ಟು ಹಣ ವಾಪಸ್ ಸಿಗುತ್ತದೆ ಎಂಬ ಪಾಲಿಸಿಯನ್ನು ಮೊದಲೇ ಕೇಳಿ ತಿಳಿಯಿರಿ.
ರಸೀದಿ ಪಡೆಯಲು ನಿರ್ಲಕ್ಷ್ಯ ವಹಿಸುವುದು
ಖರೀದಿಸಿದ ನಂತರ ಕಡ್ಡಾಯವಾಗಿ ಪಕ್ಕಾ ಬಿಲ್ ಪಡೆಯಿರಿ. ಬಿಲ್ ನಲ್ಲಿ ಚಿನ್ನದ ತೂಕ, ಕ್ಯಾರೆಟ್ (22K ಅಥವಾ 24K), ಮೇಕಿಂಗ್ ಚಾರ್ಜಸ್ ಮತ್ತು ಜಿಎಸ್ ಟಿ (GST) ವಿವರಗಳು ಸ್ಪಷ್ಟವಾಗಿರಲಿ. ಇದು ವಿಮೆ ಪಡೆಯಲು ಅಥವಾ ಮರುಮಾರಾಟಕ್ಕೆ ಬಹಳ ಸಹಕಾರಿ.
ಇದನ್ನೂ ಓದಿ : ಬೆಂಗಳೂರಲ್ಲಿ 10 ಮಂದಿಯನ್ನು ಬಲಿ ಪಡೆದ ‘ರಕ್ಕಸ’ ಮಳೆ – ಅಮ್ಮನ ಎದುರೇ ಪ್ರಾಣ ಬಿಟ್ಟ ಮಗ!
