ನವದೆಹಲಿ : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಆವೃತ್ತಿಯಲ್ಲಿ ಪಂಜಾಬ್ ಕಿಂಗ್ಸ್ (PBKS) ತಂಡ ಅಜೇಯ ಓಟ ಮುಂದುವರಿಸಿದೆ. ತಂಡದ ಈ ಭರ್ಜರಿ ಯಶಸ್ಸಿನ ರೂವಾರಿ, ನಾಯಕ ಶ್ರೇಯಸ್ ಅಯ್ಯರ್ ಅವರ ನಾಯಕತ್ವ ಹಾಗೂ ಮೈದಾನದ ಆಚೆಗಿನ ಅವರ ಸರಳ ವ್ಯಕ್ತಿತ್ವವನ್ನು ಫ್ರಾಂಚೈಸಿಯ ಸಹ-ಮಾಲೀಕಿ ಪ್ರೀತಿ ಜಿಂಟಾ ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ.
ಕಳೆದ 2025ರ ಐಪಿಎಲ್ ಹರಾಜಿನಲ್ಲಿ ಬರೋಬ್ಬರಿ 26.75 ಕೋಟಿ ರೂ. ನೀಡಿ ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿಯು ಶ್ರೇಯಸ್ ಅಯ್ಯರ್ ಅವರನ್ನು ತನ್ನ ತೆಕ್ಕೆಗೆ ಸೆಳೆದುಕೊಂಡಿತ್ತು. ಅಂದಿನಿಂದ ತಂಡದ ಪ್ರಮುಖ ಅಸ್ತ್ರವಾಗಿರುವ ಶ್ರೇಯಸ್ ಕುರಿತು ಎಕ್ಸ್ (ಟ್ವಿಟರ್) ವೇದಿಕೆಯಲ್ಲಿ ಬರೆದುಕೊಂಡಿರುವ ಪ್ರೀತಿ ಜಿಂಟಾ, “ಶ್ರೇಯಸ್ ಒಬ್ಬ ಸ್ಪೂರ್ತಿದಾಯಕ ಹಾಗೂ ಅದ್ಭುತ ತಂತ್ರಗಾರಿಕೆಯ ನಾಯಕ. ಅವರು ಅತ್ಯಂತ ಬುದ್ಧಿವಂತ, ಶಾಂತ ಸ್ವಭಾವದವರು ಹಾಗೂ ಇಡೀ ತಂಡವನ್ನು ಒಟ್ಟಾಗಿ ಕೊಂಡೊಯ್ಯುವ ಗುಣ ಹೊಂದಿದ್ದಾರೆ” ಎಂದು ಪ್ರಶಂಸಿಸಿದ್ದಾರೆ.
‘ಶ್ರೇಯಸ್ ಭಯ್ಯಾ’ ಎಂದೇ ಕರೆಯುವ ಮಕ್ಕಳು
ಮೈದಾನದಲ್ಲಿ ಮಾತ್ರವಲ್ಲದೆ, ಹೊರಗಡೆಯೂ ಶ್ರೇಯಸ್ ಎಲ್ಲರೊಂದಿಗೆ ಬೆರೆಯುವ ರೀತಿಯನ್ನು ಪ್ರೀತಿ ಜಿಂಟಾ ವಿವರಿಸಿದ್ದಾರೆ. “ಮಕ್ಕಳೊಂದಿಗೆ ಶ್ರೇಯಸ್ ಬೆರೆಯುವ ರೀತಿ ಅದ್ಭುತವಾಗಿದೆ. ಇದೇ ಕಾರಣಕ್ಕೆ ನನ್ನ ಮಕ್ಕಳು ಆತನನ್ನು ಪ್ರೀತಿಯಿಂದ ‘ಶ್ರೇಯಸ್ ಭಯ್ಯಾ’ ಎಂದು ಕರೆಯುತ್ತಾರೆ ಹಾಗೂ ಆತನನ್ನು ಬಹಳ ಹಚ್ಚಿಕೊಂಡಿದ್ದಾರೆ” ಎಂದು ತಮ್ಮ ಹೃದಯಸ್ಪರ್ಶಿ ಅನುಭವವನ್ನು ಹಂಚಿಕೊಂಡಿದ್ದಾರೆ. ಇದು ಕ್ರಿಕೆಟ್ ಆಚೆಗೂ ಅಯ್ಯರ್ ಹೊಂದಿರುವ ಪ್ರಬುದ್ಧ ವ್ಯಕ್ತಿತ್ವಕ್ಕೆ ಕನ್ನಡಿ ಹಿಡಿದಿದೆ.
ಐಪಿಎಲ್ 2026ರಲ್ಲಿ ಅಯ್ಯರ್ ಅಬ್ಬರ
ಪ್ರಸಕ್ತ ಆವೃತ್ತಿಯಲ್ಲಿ ನಾಯಕನಾಗಿ ಮಾತ್ರವಲ್ಲದೆ, ಬ್ಯಾಟರ್ ಆಗಿಯೂ ಶ್ರೇಯಸ್ ಅಯ್ಯರ್ ಮಿಂಚುತ್ತಿದ್ದಾರೆ. ಈವರೆಗೆ ಆಡಿರುವ 7 ಪಂದ್ಯಗಳಲ್ಲಿ ಸುಮಾರು 69.75ರ ಸರಾಸರಿ ಹಾಗೂ 186ರ ಅತ್ಯುತ್ತಮ ಸ್ಟ್ರೈಕ್ ರೇಟ್ನಲ್ಲಿ 279 ರನ್ ಸಿಡಿಸಿದ್ದಾರೆ. ಸತತ ಪಂದ್ಯಗಳಲ್ಲಿ 50, 66 ಹಾಗೂ ಅಜೇಯ 69 ರನ್ ಗಳಿಸಿ ಗಮನ ಸೆಳೆದಿದ್ದಾರೆ. ವಿಶೇಷವಾಗಿ ದೆಹಲಿ ಕ್ಯಾಪಿಟಲ್ಸ್ ವಿರುದ್ಧದ ಪಂದ್ಯದಲ್ಲಿ ಅಜೇಯ 71 ರನ್ ಗಳಿಸಿ, ಟಿ20 ಕ್ರಿಕೆಟ್ ಇತಿಹಾಸದ ಅತಿ ದೊಡ್ಡ ರನ್ ಚೇಸ್ ದಾಖಲಿಸಿ ತಂಡಕ್ಕೆ ಐತಿಹಾಸಿಕ ಗೆಲುವು ತಂದುಕೊಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.
ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಪಂಜಾಬ್
ಶ್ರೇಯಸ್ ಅಯ್ಯರ್ ಸಾರಥ್ಯದ ಪಂಜಾಬ್ ಕಿಂಗ್ಸ್ ಈ ಬಾರಿಯ ಟೂರ್ನಿಯಲ್ಲಿ ಆಡಿರುವ 7 ಪಂದ್ಯಗಳ ಪೈಕಿ 6ರಲ್ಲಿ ಜಯಭೇರಿ ಬಾರಿಸಿದ್ದು, ಯಾವುದೇ ಪಂದ್ಯದಲ್ಲಿ ಸೋಲು ಕಂಡಿಲ್ಲ. ಒಟ್ಟು 13 ಅಂಕಗಳೊಂದಿಗೆ (+1.333 ನೆಟ್ ರನ್ ರೇಟ್) ಅಜೇಯ ತಂಡವಾಗಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡು ಪ್ಲೇ-ಆಫ್ನತ್ತ ದಾಪುಗಾಲಿಟ್ಟಿದೆ.
ಇದನ್ನೂ ಓದಿ : ಇಂಡೋನೇಷ್ಯಾದಲ್ಲಿ ರೈಲುಗಳ ನಡುವೆ ಭೀಕರ ಡಿಕ್ಕಿ : 7 ಸಾವು, 81 ಮಂದಿಗೆ ಗಾಯ!
