ಬೆಂಗಳೂರು : ಭಾರತ ಹಾಗೂ ಶ್ರೀಲಂಕಾ ಜಂಟಿಯಾಗಿ ಆತಿಥ್ಯ ವಹಿಸಿದ್ದ 2026ರ ಟಿ20 ವಿಶ್ವಕಪ್ ಟೂರ್ನಿಯು ಅತ್ಯಂತ ಯಶಸ್ವಿಯಾಗಿ ಮುಕ್ತಾಯಗೊಂಡಿದೆ. ಫೈನಲ್ನಲ್ಲಿ ನ್ಯೂಜಿಲೆಂಡ್ ತಂಡವನ್ನು ಮಣಿಸಿದ ಭಾರತ ಮೂರನೇ ಬಾರಿಗೆ ಚಾಂಪಿಯನ್ ಪಟ್ಟ ಅಲಂಕರಿಸಿದೆ. ಆದರೆ, ಈ ಪ್ರತಿಷ್ಠಿತ ಟೂರ್ನಿಯ ಪಂದ್ಯವೊಂದರಲ್ಲಿ ಮ್ಯಾಚ್ ಫಿಕ್ಸಿಂಗ್ ನಡೆದಿರುವ ಶಂಕೆ ವ್ಯಕ್ತವಾಗಿದ್ದು, ಐಸಿಸಿ ಭ್ರಷ್ಟಾಚಾರ ನಿಗ್ರಹ ಘಟಕ (ACU) ತನಿಖೆ ಕೈಗೆತ್ತಿಕೊಂಡಿದೆ.
ಕೆನಡಾ ಮತ್ತು ನ್ಯೂಜಿಲೆಂಡ್ ನಡುವಿನ ಪಂದ್ಯದ ಮೇಲೆ ಅನುಮಾನ
ಫೆಬ್ರವರಿ 17ರಂದು ಚೆನ್ನೈನ ಎಂ.ಎ. ಚಿದಂಬರಂ ಕ್ರೀಡಾಂಗಣದಲ್ಲಿ ನ್ಯೂಜಿಲೆಂಡ್ ಮತ್ತು ಕೆನಡಾ ತಂಡಗಳ ನಡುವೆ ನಡೆದಿದ್ದ ಟೂರ್ನಿಯ 31ನೇ ಪಂದ್ಯ ಈ ವಿವಾದಕ್ಕೆ ಕಾರಣವಾಗಿದೆ. ಕೆನಡಾದ ತನಿಖಾ ಸಾಕ್ಷ್ಯಚಿತ್ರ ಕಾರ್ಯಕ್ರಮವಾದ ‘ದ ಫಿಫ್ತ್ ಎಸ್ಟೇಟ್’ (the fifth estate) ಬಿಡುಗಡೆ ಮಾಡಿರುವ “ಕರೆಪ್ಷನ್, ಕ್ರೈಮ್ ಆ್ಯಂಡ್ ಕ್ರಿಕೆಟ್” ಎಂಬ ಸಾಕ್ಷ್ಯಚಿತ್ರದಲ್ಲಿ ಈ ಪಂದ್ಯದ ವೇಳೆ ನಡೆದಿರಬಹುದಾದ ಅಕ್ರಮಗಳ ಬಗ್ಗೆ ಬೆಳಕು ಚೆಲ್ಲಲಾಗಿದೆ. ನ್ಯೂಜಿಲೆಂಡ್ ಎಂಟು ವಿಕೆಟ್ಗಳಿಂದ ಭರ್ಜರಿ ಜಯ ಸಾಧಿಸಿದ್ದ ಈ ಪಂದ್ಯದ ಬಗ್ಗೆ ಇದೀಗ ಅನುಮಾನಗಳು ಹುಟ್ಟಿಕೊಂಡಿವೆ.
ಕೆನಡಾ ನಾಯಕನ ಓವರ್ ಬಗ್ಗೆ ಶಂಕೆ
ನ್ಯೂಜಿಲೆಂಡ್ ಇನಿಂಗ್ಸ್ನ 5ನೇ ಓವರ್ ಈ ಫಿಕ್ಸಿಂಗ್ ಆರೋಪಗಳ ಕೇಂದ್ರಬಿಂದುವಾಗಿದೆ. ಆ ಓವರ್ ಅನ್ನು ಕೆನಡಾ ತಂಡದ ನಾಯಕ ದಿಲ್ಪ್ರೀತ್ ಬಾಜ್ವಾ ಬೌಲ್ ಮಾಡಿದ್ದರು. ಮೂಲತಃ ಬ್ಯಾಟಿಂಗ್ ಆಲ್ರೌಂಡರ್ ಆಗಿರುವ ಹಾಗೂ ಆಫ್-ಸ್ಪಿನ್ ಬೌಲಿಂಗ್ ಮಾಡುವ ಬಾಜ್ವಾ, ಆ ಓವರ್ನಲ್ಲಿ ಕಳಪೆ ಬೌಲಿಂಗ್ ಪ್ರದರ್ಶಿಸಿದ್ದರು. ತಮ್ಮ ಓವರ್ನ ಮೊದಲ ಎಸೆತವನ್ನೇ ನೋಬಾಲ್ ಹಾಕಿದ್ದ ಅವರು, ನಂತರ ಲೆಗ್-ಸೈಡ್ನಲ್ಲಿ ವೈಡ್ ಎಸೆದಿದ್ದರು. ಒಟ್ಟಾರೆಯಾಗಿ ಆ ಒಂದು ಓವರ್ನಲ್ಲಿ ಅವರು 15 ರನ್ ಬಿಟ್ಟುಕೊಟ್ಟಿದ್ದರು. ಈ ಅಚ್ಚರಿಯ ಬೌಲಿಂಗ್ ಪ್ರದರ್ಶನವೇ ಇದೀಗ ತನಿಖೆಗೆ ಒಳಪಟ್ಟಿದೆ.
ನ್ಯೂಜಿಲೆಂಡ್ ಆಟಗಾರರ ಮೇಲೆ ಯಾವುದೇ ಆರೋಪವಿಲ್ಲ
ಈ ಪಂದ್ಯದ ಬಗ್ಗೆ ಐಸಿಸಿ ತನಿಖೆ ನಡೆಸುತ್ತಿದ್ದರೂ, ನ್ಯೂಜಿಲೆಂಡ್ ಆಟಗಾರರ ಮೇಲೆ ಯಾವುದೇ ತಪ್ಪು ಮಾಡಿರುವ ಆರೋಪಗಳಿಲ್ಲ ಎಂಬುದನ್ನು ವರದಿಗಳು ಸ್ಪಷ್ಟಪಡಿಸಿವೆ. ತನಿಖೆಯು ಪ್ರಮುಖವಾಗಿ ಕೆನಡಾ ತಂಡದ ಆಟಗಾರರ ನಡೆ ಹಾಗೂ ನಿರ್ದಿಷ್ಟ ಓವರ್ನಲ್ಲಿನ ಬೆಳವಣಿಗೆಗಳ ಮೇಲೆ ಕೇಂದ್ರೀಕೃತವಾಗಿದೆ. ಕ್ರಿಕೆಟ್ನಲ್ಲಿ ಭ್ರಷ್ಟಾಚಾರವನ್ನು ತಡೆಗಟ್ಟಲು ಐಸಿಸಿ ಕಠಿಣ ನಿಯಮಗಳನ್ನು ಹೊಂದಿದ್ದು, ಈ ತನಿಖೆಯ ವರದಿ ಬಂದ ಬಳಿಕ ಮುಂದಿನ ಕ್ರಮಗಳ ಬಗ್ಗೆ ನಿರ್ಧಾರ ಕೈಗೊಳ್ಳುವ ನಿರೀಕ್ಷೆಯಿದೆ.
ಇದನ್ನೂ ಓದಿ : ಪಂತ್ ವಿವಾದದ ಬೆನ್ನಲ್ಲೇ ಟ್ರೋಲ್ಗಳಿಗೆ ಸಂಜೀವ್ ಗೋಯೆಂಕಾ ತಿರುಗೇಟು
