ಬೆಂಟ್ಲಿ ಮೋಟಾರ್ಸ್‌ನ ಜಾಗತಿಕ ರಾಯಭಾರಿಯಾಗಿ ಪ್ರಿಯಾಂಕಾ ಚೋಪ್ರಾ ; ಐಷಾರಾಮಿ ಕಾರು ಸಂಸ್ಥೆಯ ನೂತನ ಪಯಣ!

ಬೆಂಗಳೂರು: ಐಷಾರಾಮಿ ವಾಹನಗಳ ಜಗತ್ತಿನಲ್ಲಿ ಬೆಂಟ್ಲಿ ಮೋಟಾರ್ಸ್ ತನ್ನದೇ ಆದ ವಿಶಿಷ್ಟ ಸ್ಥಾನವನ್ನು ಹೊಂದಿದೆ. ಈಗ ಈ ಸಂಸ್ಥೆಯು ಭಾರತೀಯ ಮೂಲದ ಜಾಗತಿಕ ತಾರೆ ಪ್ರಿಯಾಂಕಾ ಚೋಪ್ರಾ ಅವರನ್ನು ರಾಯಭಾರಿಯನ್ನಾಗಿ ಆಯ್ಕೆ ಮಾಡಿಕೊಳ್ಳುವ ಮೂಲಕ ತನ್ನ ಬ್ರ್ಯಾಂಡ್ ಇಮೇಜ್ ಅನ್ನು ಮತ್ತಷ್ಟು ವಿಸ್ತರಿಸಲು ಮುಂದಾಗಿದೆ.

ಪ್ರಿಯಾಂಕಾ ಅವರ ಅಪ್ರತಿಮ ವ್ಯಕ್ತಿತ್ವ, ಕಲೆ ಮತ್ತು ಸೃಜನಶೀಲತೆ ಬೆಂಟ್ಲಿ ಬ್ರ್ಯಾಂಡ್‌ನ ಮೌಲ್ಯಗಳಿಗೆ ಪೂರಕವಾಗಿದೆ ಎಂದು ಸಂಸ್ಥೆ ಅಭಿಪ್ರಾಯಪಟ್ಟಿದೆ. ಈ ಸಹಯೋಗದ ಕುರಿತು ಬೆಂಟ್ಲಿಯ ಮಾರುಕಟ್ಟೆ ನಿರ್ದೇಶಕ ಬೆನ್ ವಾಟ್ಟಮ್ ಅವರು ಸಂತಸ ವ್ಯಕ್ತಪಡಿಸಿದ್ದು, ಪ್ರಿಯಾಂಕಾ ಅವರ ಆಗಮನವು ಸಂಸ್ಥೆಗೆ ಹೊಸ ಶಕ್ತಿಯನ್ನು ತಂದಿದೆ ಎಂದು ಹೇಳಿದ್ದಾರೆ.

ವಿಶಿಷ್ಟ ಶೈಲಿಯ ಜಾಹೀರಾತು ಅಭಿಯಾನ

ಸಂಪ್ರದಾಯಿಕ ಕಾರ್ ಜಾಹೀರಾತುಗಳಿಗಿಂತ ಭಿನ್ನವಾಗಿ, ಬೆಂಟ್ಲಿ ಈ ಬಾರಿ ‘ಡಾಕ್ಯುಮೆಂಟರಿ’ ಮಾದರಿಯ ವಿಶಿಷ್ಟ ಅಭಿಯಾನವನ್ನು ಕೈಗೆತ್ತಿಕೊಂಡಿದೆ. ಖ್ಯಾತ ಛಾಯಾಗ್ರಾಹಕ ಗ್ರೆಗ್ ವಿಲಿಯಮ್ಸ್ ಅವರು ಲಾಸ್ ಏಂಜಲೀಸ್‌ನ ಸೋನಿ ಸ್ಟುಡಿಯೋದಲ್ಲಿ ಈ ಅಭಿಯಾನವನ್ನು ಚಿತ್ರೀಕರಿಸಿದ್ದಾರೆ. ಇದರಲ್ಲಿ ಪ್ರಿಯಾಂಕಾ ಚೋಪ್ರಾ ಅವರು ತಮ್ಮ ಜೀವನದ ಪಯಣ, ವೃತ್ತಿಜೀವನದ ಸವಾಲುಗಳು ಮತ್ತು ಸೃಜನಶೀಲ ದೃಷ್ಟಿಕೋನದ ಬಗ್ಗೆ ಮುಕ್ತವಾಗಿ ಮಾತನಾಡಲಿದ್ದಾರೆ. ಈ ವಿಡಿಯೋದಲ್ಲಿ ಬೆಂಟ್ಲಿ ಸಂಸ್ಥೆಯ ಪ್ರಸಿದ್ಧ ‘ಕಾಂಟಿನೆಂಟಲ್ ಜಿಟಿ’ (Continental GT) ಕಾರು ಕೂಡ ಸದ್ದಿಲ್ಲದೆ ಕಾಣಿಸಿಕೊಳ್ಳಲಿದ್ದು, ಆಕರ್ಷಕವಾಗಿ ಮೂಡಿಬರಲಿದೆ.

ಕಲೆ ಮತ್ತು ಕರಕುಶಲತೆಯ ಸಂಗಮ

ಈ ನೂತನ ಸಹಯೋಗದ ಕುರಿತು ಮಾತನಾಡಿದ ಪ್ರಿಯಾಂಕಾ ಚೋಪ್ರಾ, “ಬೆಂಟ್ಲಿ ಸಂಸ್ಥೆಯ ಕರಕುಶಲತೆ ಮತ್ತು ಕಥೆ ಹೇಳುವ ಶೈಲಿಗೆ ನಾನು ಸದಾ ಮಾರುಹೋಗಿದ್ದೇನೆ. ಅವರ ಪ್ರತಿಯೊಂದು ಸಣ್ಣ ವಿವರದ ಹಿಂದೆಯೂ ಒಂದು ಉದ್ದೇಶವಿರುತ್ತದೆ, ಅದು ಬಹಳ ಅಪರೂಪ. ನನ್ನ ವೃತ್ತಿಜೀವನ ಮತ್ತು ಬೆಂಟ್ಲಿಯ ಮೌಲ್ಯಗಳು ಒಂದಕ್ಕೊಂದು ಹೊಂದಿಕೆಯಾಗುವುದರಿಂದ ಈ ಸಹಯೋಗವು ನನಗೆ ಸಹಜವೆನಿಸಿತು,” ಎಂದು ತಿಳಿಸಿದ್ದಾರೆ. ಈ ಮೂಲಕ ಬೆಂಟ್ಲಿಯ ರಾಯಭಾರಿಗಳ ಪಟ್ಟಿಗೆ ಸೇರಿರುವ ಪ್ರಿಯಾಂಕಾ, ಜಾಗತಿಕ ಮಟ್ಟದಲ್ಲಿ ಬ್ರ್ಯಾಂಡ್‌ನ ಪ್ರಸಿದ್ಧಿಯನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ಯುವ ನಿರೀಕ್ಷೆಯಿದೆ.