ಭೋಪಾಲ್ : ಯುವತಿ ವಾಪಸ್ ಬಂದೇ ಬರುತ್ತಾಳೆ ಎಂಬ ಭರವಸೆಯ ಕಂಗಳಿಂದ ನ್ಯಾಯಾಲಯದ ಕಟಕಟೆಯಲ್ಲಿ ಪತಿ ಹಾಗೂ ಪೋಷಕರು ಕಾದು ನಿಂತಿದ್ದರು. ಆದರೆ 19 ವರ್ಷದ ಆ ಯುವತಿ ಮಾತ್ರ ತನ್ನ ಜೀವನದ ದಿಕ್ಕನ್ನೇ ಬದಲಿಸುವಂತಹ ದಿಟ್ಟ ನಿರ್ಧಾರವೊಂದನ್ನು ತೆಗೆದುಕೊಂಡು ಆಗಿತ್ತು. “ನಾನು ವಯಸ್ಕಳು, ನನ್ನ ಸ್ವಂತ ಇಚ್ಛೆಯಂತೆ ಬದುಕಲು ಇಚ್ಛಿಸುತ್ತಿದ್ದೇನೆ. ನನಗೆ ಪತಿ ಅಥವಾ ಪೋಷಕರೊಂದಿಗೆ ವಾಸಿಸಲು ಇಷ್ಟವಿಲ್ಲ” ಎಂದು ಆಕೆ ನ್ಯಾಯಾಧೀಶರ ಮುಂದೆ ನಿರ್ಭಯವಾಗಿ ನುಡಿದಳು. ಆಕೆಯ ಈ ದಿಟ್ಟ ವಾದವನ್ನು ಆಲಿಸಿದ ಮಧ್ಯಪ್ರದೇಶ ಹೈಕೋರ್ಟ್ನ ಗ್ವಾಲಿಯರ್ ಪೀಠವು, ವಯಸ್ಕರು ತಮ್ಮ ಬದುಕಿನ ಸಂಗಾತಿಯನ್ನು ಆಯ್ಕೆ ಮಾಡಿಕೊಳ್ಳುವ ಮೂಲಭೂತ ಹಕ್ಕನ್ನು ಎತ್ತಿಹಿಡಿದು, ಆಕೆಯ ಸ್ವಾತಂತ್ರ್ಯಕ್ಕೆ ಹಸಿರು ನಿಶಾನೆ ತೋರಿತು.
ಏನಿದು ಪ್ರಕರಣ?
ಯುವತಿಯ 40 ವರ್ಷದ ಪತಿ ಸಲ್ಲಿಸಿದ್ದ ‘ಹೇಬಿಯಸ್ ಕಾರ್ಪಸ್’ ಅರ್ಜಿಯಿಂದ ಆರಂಭವಾದ ಪ್ರಕರಣವಿದು. ಅನುಜ್ ಕುಮಾರ್ ಎಂಬಾತ ನನ್ನ ಪತ್ನಿಯನ್ನು ಅಕ್ರಮವಾಗಿ ಬಂಧನದಲ್ಲಿರಿಸಿದ್ದಾನೆ ಎಂದು ಆತ ಅರ್ಜಿಯಲ್ಲಿ ಆರೋಪಿಸಿದ್ದ. ಇದರ ಆಧಾರದ ಮೇಲೆ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಯುವತಿಯನ್ನು ಪತ್ತೆಹಚ್ಚಿ ‘ಒನ್-ಸ್ಟಾಪ್ ಸೆಂಟರ್’ನಲ್ಲಿರಿಸಿ, ಬಳಿಕ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದರು. ಆದರೆ ನ್ಯಾಯಾಧೀಶರು ಆಕೆಯ ಅಭಿಪ್ರಾಯ ಕೇಳಿದಾಗ, ಆಕೆ ಯಾವುದೇ ಅಳುಕಿಲ್ಲದೆ ತನ್ನ ನಿರ್ಧಾರವನ್ನು ಸ್ಪಷ್ಟಪಡಿಸಿದಳು. ನನಗೆ 19 ವರ್ಷ. ನನ್ನ ಪತಿಗೆ 40 ವರ್ಷ ವಯಸ್ಸಾಗಿದೆ. ನಮ್ಮಿಬ್ಬರ ನಡುವೆ ಬರೋಬ್ಬರಿ 21 ವರ್ಷಗಳ ಅಂತರವಿದೆ. ಈ ವಿವಾಹದಲ್ಲಿ ಹೊಂದಾಣಿಕೆ ಸಾಧ್ಯವಾಗುತ್ತಿಲ್ಲ ಮತ್ತು ನನಗೆ ಕಿರುಕುಳ ನೀಡಲಾಗುತ್ತಿದೆ ಎಂದು ಆರೋಪಿಸಿದ ಆಕೆ, ನನ್ನ ಪ್ರಿಯಕರನೊಂದಿಗೇ ಜೀವಿಸಲು ಬಯಸುವುದಾಗಿ ನ್ಯಾಯಾಲಯಕ್ಕೆ ಖಡಾಖಂಡಿತವಾಗಿ ತಿಳಿಸಿದಳು.
ಆಪ್ತ ಸಮಾಲೋಚನೆ ವಿಫಲ
ಯುವತಿಗೆ ತನ್ನ ನಿರ್ಧಾರವನ್ನು ಮರುಪರಿಶೀಲಿಸಲು ಅವಕಾಶ ನೀಡುವ ನಿಟ್ಟಿನಲ್ಲಿ ನ್ಯಾಯಾಲಯವು ಆಪ್ತ ಸಮಾಲೋಚನೆಗೆ ಆದೇಶಿಸಿತ್ತು. ಆದರೆ ಸಮಾಲೋಚನೆಯ ನಂತರವೂ ಆಕೆ ತನ್ನ ನಿಲುವಿಗೆ ಬದ್ಧಳಾಗಿದ್ದಳು. ಈ ವೇಳೆ ಆಕೆಯ ಜೊತೆಯಲ್ಲೇ ನಿಂತಿದ್ದ ಪ್ರಿಯಕರ, ಆಕೆಯನ್ನು ಚೆನ್ನಾಗಿ ನೋಡಿಕೊಳ್ಳುವುದಾಗಿ ಹಾಗೂ ಆಕೆಯ ಸುರಕ್ಷತೆಯನ್ನು ಖಚಿತಪಡಿಸುವುದಾಗಿ ನ್ಯಾಯಾಲಯಕ್ಕೆ ಭರವಸೆ ನೀಡಿದ. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಆನಂದ್ ಪಾಠಕ್ ಮತ್ತು ನ್ಯಾಯಮೂರ್ತಿ ಪುಷ್ಪೇಂದ್ರ ಯಾದವ್ ಅವರನ್ನೊಳಗೊಂಡ ವಿಭಾಗೀಯ ಪೀಠವು, ಯುವತಿಯ ಇಚ್ಛೆಗೆ ಮನ್ನಣೆ ನೀಡಿತು. ಆಕೆಯನ್ನು ಯಾರೂ ಅಕ್ರಮವಾಗಿ ಬಂಧನದಲ್ಲಿರಿಸಿಲ್ಲ ಎಂಬುದು ಸ್ಪಷ್ಟವಾದ ಕೂಡಲೇ, ಪತಿ ಸಲ್ಲಿಸಿದ್ದ ಅರ್ಜಿಯ ಆಧಾರವೇ ಕುಸಿದುಬಿದ್ದಿತು. ವಯಸ್ಕ ವ್ಯಕ್ತಿಗೆ ತಾನು ಎಲ್ಲಿ ಮತ್ತು ಯಾರೊಂದಿಗೆ ವಾಸಿಸಬೇಕು ಎಂಬುದನ್ನು ನಿರ್ಧರಿಸುವ ಹಕ್ಕಿದೆ ಎಂದು ಸ್ಪಷ್ಟಪಡಿಸಿದ ನ್ಯಾಯಾಲಯ, ಯುವತಿ ತನ್ನ ಪ್ರಿಯಕರನೊಂದಿಗೆ ತೆರಳಲು ಮುಕ್ತ ಅವಕಾಶ ಕಲ್ಪಿಸಿತು.
ಯುವತಿಯ ರಕ್ಷಣೆಗೆ ‘ಶೌರ್ಯ ದೀದಿ’ ವ್ಯವಸ್ಥೆ
ಪ್ರಕರಣವನ್ನು ಮುಕ್ತಾಯಗೊಳಿಸುವ ಮುನ್ನ, ನ್ಯಾಯಾಲಯವು ಯುವತಿಯ ಸುರಕ್ಷತೆಗಾಗಿ ವಿಶೇಷ ಕ್ರಮವೊಂದನ್ನು ಕೈಗೊಂಡಿದೆ. ಮುಂದಿನ ಆರು ತಿಂಗಳ ಕಾಲ “ಶೌರ್ಯ ದೀದಿ” ಎಂದು ಕರೆಯಲ್ಪಡುವ ನಿಯೋಜಿತ ಮಹಿಳಾ ಅಧಿಕಾರಿಗಳು ಯುವತಿಯ ಸಂಪರ್ಕದಲ್ಲಿರಲಿದ್ದು, ಆಕೆಯ ಯೋಗಕ್ಷೇಮ ಹಾಗೂ ಸುರಕ್ಷತೆಯನ್ನು ಖಾತರಿಪಡಿಸಿಕೊಳ್ಳಲಿದ್ದಾರೆ. ಅಗತ್ಯ ಕಾನೂನು ಔಪಚಾರಿಕತೆಗಳನ್ನು ಪೂರ್ಣಗೊಳಿಸಿದ ಬಳಿಕ ಆಕೆಯನ್ನು ‘ಒನ್-ಸ್ಟಾಪ್ ಸೆಂಟರ್’ನಿಂದ ಬಿಡುಗಡೆ ಮಾಡಲಾಗುವುದು ಎಂದು ಕೋರ್ಟ್ ತಿಳಿಸಿದೆ. ಕೇವಲ ಒಂದು ಕೌಟುಂಬಿಕ ವ್ಯಾಜ್ಯವಾಗಿ ಶುರುವಾಗಿದ್ದ ಈ ಪ್ರಕರಣ, ಅಂತಿಮವಾಗಿ ವ್ಯಕ್ತಿಗತ ಸ್ವಾತಂತ್ರ್ಯದ ಮಹತ್ವವನ್ನು ಸಾರುವ ಮೂಲಕ ಅಂತ್ಯಕಂಡಿದೆ. ವಯಸ್ಕರ ಬದುಕಿನ ವಿಚಾರ ಬಂದಾಗ ಅಂತಿಮ ನಿರ್ಧಾರವು ಆಯಾ ವ್ಯಕ್ತಿಗೆ ಮಾತ್ರ ಸೇರಿದ್ದು ಎಂಬುದನ್ನು ನ್ಯಾಯಾಲಯವು ಮತ್ತೊಮ್ಮೆ ಸ್ಪಷ್ಟವಾಗಿ ಸಾರಿದೆ.
ಇದನ್ನೂ ಓದಿ : ಕಿರುತರೆ ಲೋಕಕ್ಕೆ ಬಿಗ್ ಶಾಕ್ – ಪತಿಯೊಂದಿಗೆ ವಿಡಿಯೋ ಕಾಲ್ನಲ್ಲಿರುವಾಗಲೇ ಆತ್ಮಹತ್ಯೆ ಮಾಡಿಕೊಂಡ ನಟಿ ಸುಭಾಷಿಣಿ!
