ಬೆಂಗಳೂರು: ಸಂಬಳ ಹೆಚ್ಚಳ, ಪ್ರಮೋಷನ್ ಸೇರಿ ಹಲವು ಕಾರಣಗಳಿಗಾಗಿ ಕಂಪನಿ ಉದ್ಯೋಗಿಗಳು ಒಂದು ಕಂಪನಿಯಿಂದ ಇನ್ನೊಂದು ಕಂಪನಿಗೆ ಸೇರುವುದು ಸಾಮಾನ್ಯ. ಹೀಗೆ, ಒಂದು ಕಂಪನಿ ತೊರೆದ ಬಳಿಕ ಉದ್ಯೋಗಿಗಳು ಇಪಿಎಫ್ಒ ವೆಬ್ ಪೋರ್ಟಲ್ ನಲ್ಲಿ ಕೆಲವು ಅಪ್ಡೇಟ್ ಮಾಡಬೇಕು. ಇಲ್ಲದಿದ್ದರೆ, ಪಿಎಫ್ ಮೊತ್ತದ ಜಮೆ ಹಾಗೂ ಪಿಂಚಣಿಗೆ ಭಾರಿ ಹೊಡೆತ ಬೀಳುತ್ತದೆ. ಅದರಲ್ಲೂ, ಕಂಪನಿಯ ಎಕ್ಸಿಟ್ ಡೇಟ್ ಹಾಗೂ ಹೊಸ ಕಂಪನಿಯ ಜಾಯ್ನಿಂಗ್ ಡೇಟ್ ಅಪ್ಡೇಟ್ ಮಾಡುವುದು ಪ್ರಮುಖ ಸಂಗತಿಯಾಗಿದೆ.
ಒಂದು ಕಂಪನಿಗೆ ರಾಜೀನಾಮೆ ನೀಡಿದ ಬಳಿಕ ಉದ್ಯೋಗಿಗಳು ಇಪಿಎಫ್ಒ ವೆಬ್ ಪೋರ್ಟಲ್ ಗೆ ತೆರಳಿ ಎಕ್ಸಿಟ್ ಡೇಟ್ ಅಪ್ಡೇಟ್ ಮಾಡಬೇಕು. ಹಾಗೆಯೇ, ಹೊಸ ಕಂಪನಿ ಸೇರಿದ ದಿನಾಂಕವನ್ನು ಕೂಡ ನಮೂದಿಸಬೇಕು. ಎರಡನ್ನೂ ಸರಿಯಾಗಿ ನಮೂದಿಸಿದ ಬಳಿಕವೇ ನಿಮಗೆ ಹೊಸ ಕಂಪನಿಯ ಪಿಎಫ್ ಜಮೆಯಾಗುವ ಜತೆಗೆ, ಹಳೆಯ ಪಿಎಫ್ ಖಾತೆಗೆ ಬಡ್ಡಿ ಜಮೆಯಾಗುತ್ತದೆ. ಹಾಗೆಯೇ, ಎಕ್ಸಿಟ್ ಡೇಟ್ ನಮೂದಿಸಿದ ಬಳಿಕ ಹೊಸ ಪಿಎಫ್ ಖಾತೆಗೆ ಹಳೆಯ ಪಿಎಫ್ ಖಾತೆಯ ಹಣ ವರ್ಗಾವಣೆ ಮಾಡುವುದು ಕೂಡ ಒಳಿತು.
ಉದ್ಯೋಗಿಯು ಕೆಲಸ ತೊರೆದ ಬಳಿಕ ಹೆಚ್ಚಿನ ಕಂಪನಿಗಳು ಇಪಿಎಫ್ಒದಲ್ಲಿ ಎಕ್ಸಿಟ್ ಡೇಟ್ ಅಪ್ಡೇಟ್ ಮಾಡುವುದಿಲ್ಲ. ಉದ್ಯೋಗಿಯು ಕೆಲಸ ಬಿಟ್ಟ ಬಳಿಕ ಎಕ್ಸಿಟ್ ಡೇಟ್ ಅಪ್ಡೇಟ್ ಮಾಡಲು ಎರಡು ತಿಂಗಳು ಸಮಯ ಇರುತ್ತದೆ. ಹಾಗಾಗಿ, ಉದ್ಯೋಗಿಯೇ ಅಪ್ಡೇಟ್ ಮಾಡಿದರೆ ಹಳೆಯ ಖಾತೆಯು ನಿಷ್ಕ್ರಿಯ ಎಂಬುದಾಗಿ ಇಪಿಎಫ್ಒ ಘೋಷಣೆ ಮಾಡುವುದಿಲ್ಲ. ಹಾಗಾದರೆ, ಆನ್ ಲೈನ್ ಮೂಲಕ ಅಪ್ಡೇಟ್ ಮಾಡುವುದು ಹೇಗೆ? ಇಲ್ಲಿದೆ ಗೈಡೆನ್ಸ್.
ಆನ್ ಲೈನ್ ಮೂಲಕ ಅಪ್ಡೇಟ್ ಮಾಡುವ ವಿಧಾನ
• ಲಾಗಿನ್ ಆಗಿ: EPFO Member Portal ಗೆ ಭೇಟಿ ನೀಡಿ, ನಿಮ್ಮ UAN, ಪಾಸ್ ವರ್ಡ್ ಮತ್ತು ಕ್ಯಾಪ್ಚಾ ನಮೂದಿಸಿ ಲಾಗಿನ್ ಆಗಿ.
• Manage ಆಯ್ಕೆ: ಮೇಲಿನ ಮೆನುವಿನಲ್ಲಿರುವ ‘Manage’ ಟ್ಯಾಬ್ ಮೇಲೆ ಕ್ಲಿಕ್ ಮಾಡಿ, ಅಲ್ಲಿ ‘Mark Exit’ ಎಂಬ ಆಯ್ಕೆ ಮೇಲೆ ಕ್ಲಿಕ್ ಮಾಡಿ.
• ಉದ್ಯೋಗ ಆಯ್ಕೆ: ‘Select Employment’ ಡ್ರಾಪ್-ಡೌನ್ ನಿಂದ ನೀವು ಯಾವ ಕಂಪನಿಗೆ ನಿರ್ಗಮನ ದಿನಾಂಕ ದಾಖಲಿಸಬೇಕೋ ಆ ಪಿಎಫ್ ಖಾತೆಯನ್ನು (Member ID) ಆಯ್ಕೆ ಮಾಡಿ.
• ದಿನಾಂಕ ನಮೂದಿಸಿ: ಕೆಲಸ ಬಿಟ್ಟ ತಿಂಗಳ ಕೊನೆಯ ಕೊಡುಗೆಯ ಆಧಾರದ ಮೇಲೆ ಅಲ್ಲಿ ದಿನಾಂಕಗಳು ಕಾಣಿಸುತ್ತವೆ. ನೀವು ಕೆಲಸ ಬಿಟ್ಟ ನಿಖರವಾದ ದಿನಾಂಕ (Date of Exit) ಮತ್ತು ಕಾರಣವನ್ನು (Reason for Exit) ಆಯ್ಕೆ ಮಾಡಿ. (ಸಾಮಾನ್ಯವಾಗಿ ‘Cessation – Short Service’ ಆಯ್ಕೆ ಮಾಡಲಾಗುತ್ತದೆ).
• OTP ದೃಢೀಕರಣ: ‘Request OTP’ ಮೇಲೆ ಕ್ಲಿಕ್ ಮಾಡಿ. ನಿಮ್ಮ ಆಧಾರ್ ಲಿಂಕ್ಡ್ ಮೊಬೈಲ್ ಗೆ ಬರುವ OTP ಯನ್ನು ನಮೂದಿಸಿ, ‘Submit’ ಕೊಟ್ಟರೆ ಪ್ರಕ್ರಿಯೆ ಮುಗಿಯುತ್ತದೆ.
ಇದನ್ನೂ ಓದಿ: ಕೆಂಪೇಗೌಡ ಏರ್ಪೋರ್ಟ್ನ ಇಂಡಿಗೋ ವಿಮಾನದಲ್ಲಿ ಬಾಂಬ್ ಬೆದರಿಕೆ ಸಂದೇಶ
