ಬೆಂಗಳೂರು: ವಾಹನಗಳ ಮಾಲೀಕರಿಗೆ ಅನುಕೂಲವಾಗಲಿ, ಅವರ ಹಣವೂ ಉಳಿಯಲಿ ಎಂದು ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು (ಎನ್ ಎಚ್ ಎಐ) ಫಾಸ್ಟ್ಯಾಗ್ ಜಾರಿಗೊಳಿಸಿದೆ. ಅಲ್ಲದೆ, ಫಾಸ್ಟ್ಯಾಗ್ ವಾರ್ಷಿಕ ಪಾಸ್ ಗಳನ್ನೂ ನೀಡಲಾಗುತ್ತಿದೆ. ಇದರ ಮಧ್ಯೆಯೇ, ವಾಹನ ಸವಾರರಿಗೆ ಶಾಕಿಂಗ್ ನ್ಯೂಸ್ ಲಭಿಸಿದೆ. ಏಪ್ರಿಲ್ 1ರಿಂದ ಫಾಸ್ಟ್ಯಾಗ್ ಪಾಸ್ ಗಳ ಬೆಲೆಯು ಏರಿಕೆಯಾಗಲಿದೆ. ಹಾಗಾಗಿ, ವಾಹನ ಸವಾರರು ಈಗಲೇ ಎಚ್ಚೆತ್ತುಕೊಂಡರೆ 75 ರೂಪಾಯಿ ಉಳಿಸಬಹುದು.
ಹೌದು, ಪ್ರಸ್ತುತ 3 ಸಾವಿರ ರೂಪಾಯಿ ಇರುವ ವಾರ್ಷಿಕ ಪಾಸ್ ದರವು 3,075 ರೂಪಾಯಿಗೆ ಏರಿಕೆಯಾಗಲಿದೆ. ಮೂಲ ಬೆಲೆಯಲ್ಲಿ ಸುಮಾರು 2.5% ರಷ್ಟು ಏರಿಕೆ ಮಾಡಲಾಗಿದೆ. ಈ ಪಾಸ್ ಒಂದು ವರ್ಷ ಅಥವಾ 200 ಟೋಲ್ ದಾಟುವಿಕೆಗಳಿಗೆ (ಯಾವುದು ಮೊದಲು ಅನ್ವಯವಾಗುತ್ತದೆಯೋ ಅಲ್ಲಿಯವರೆಗೆ) ಮಾನ್ಯತೆ ಹೊಂದಿರುತ್ತದೆ.
ಕರ್ನಾಟಕದಾದ್ಯಂತ ಇರುವ ಸುಮಾರು 66 ಟೋಲ್ ಪ್ಲಾಜಾಗಳಲ್ಲಿ ಈ ಪರಿಷ್ಕೃತ ದರ ಜಾರಿಗೆ ಬರಲಿದ್ದು, ಬೆಂಗಳೂರು-ಮೈಸೂರು ಎಕ್ಸ್ಪ್ರೆಸ್ ವೇ ಸೇರಿದಂತೆ ಪ್ರಮುಖ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಪ್ರಯಾಣಿಸುವವರು ಈ ಹೊಸ ದರವನ್ನು ಪಾವತಿಸಬೇಕಾಗುತ್ತದೆ. ಈ ಪಾಸ್ಅನ್ನು ನೀವು ರಾಜಮಾರ್ಗ ಯಾತ್ರಾ (Rajmargyatra) ಮೊಬೈಲ್ ಆಪ್ ಅಥವಾ NHAI ಅಧಿಕೃತ ಪೋರ್ಟಲ್ ಮೂಲಕ ಆನ್ ಲೈನ್ ನಲ್ಲಿ ಪಡೆಯಬಹುದು.
ಏಪ್ರಿಲ್ 1ರಿಂದ ಹೊಸ ದರವು ಜಾರಿಗೆ ಬರುವ ಕಾರಣ ವಾಹನ ಚಾಲಕರು ಅಥವಾ ಮಾಲೀಕರು ಈಗಲೇ ಫಾಸ್ಟ್ಯಾಗ್ ಪಾಸ್ ಗಳನ್ನು ರಿಚಾರ್ಜ್ ಮಾಡಿಸುವುದು, ರಿನಿವಲ್ ಮಾಡಿಸುವುದು ಒಳ್ಳೆಯದು ಎಂದು ಹೇಳಲಾಗುತ್ತಿದೆ. ಇದರಿಂದ 75 ರೂಪಾಯಿ ಉಳಿಯಲಿದೆ. ಪ್ರತಿ ವರ್ಷವೂ ಹೆದ್ದಾರಿ ಪ್ರಾಧಿಕಾರವು ಟೋಲ್ ಶುಲ್ಕ ಹಾಗೂ ಪಾಸ್ ದರಗಳನ್ನು ಏರಿಕೆ ಮಾಡುತ್ತದೆ.
ಇದನ್ನೂ ಓದಿ : ಉಡುಪಿ ಕೊಚ್ಚಿನ್ ಶಿಪ್ ಯಾರ್ಡ್ನಲ್ಲಿ 14 ಹುದ್ದೆಗಳ ನೇಮಕ : ಸಂದರ್ಶನದ ದಿನಾಂಕ ಇಲ್ಲಿದೆ
