ಬೆಂಗಳೂರು: ಬ್ಯಾಂಕ್ ಖಾತೆ ತೆರೆಯುವುದು, ಯಾವುದೇ ಮಾದರಿಯ ಹೂಡಿಕೆ ಸೇರಿ ಹಲವು ಹಣಕಾಸು ಚಟುವಟಿಕೆಗಳಿಗೆ ಪ್ಯಾನ್ ಕಾರ್ಡ್ ಪ್ರಮುಖ ಹಾಗೂ ಕಡ್ಡಾಯ ದಾಖಲೆಯಾಗಿದೆ. ಇಂತಹ ಪ್ಯಾನ್ ಕಾರ್ಡ್ ಗಳಿಗೆ ಸಂಬಂಧಿಸಿದಂತೆ ಏಪ್ರಿಲ್ 1ರಿಂದ ಹೊಸ ನಿಯಮಗಳು ಜಾರಿಗೆ ಬರಲಿವೆ. ಅದರಲ್ಲೂ, ಹೊಸದಾಗಿ ಪ್ಯಾನ್ ಕಾರ್ಡ್ ಗೆ ಅರ್ಜಿ ಸಲ್ಲಿಸುವವರು ಮಹತ್ವದ ಅಪ್ ಡೇಟ್ ಬಗ್ಗೆ ತಿಳಿದುಕೊಳ್ಳುವುದು ಅತ್ಯವಶ್ಯಕವಾಗಿದೆ. ಹಾಗಾದರೆ, ಏಪ್ರಿಲ್ 1ರಿಂದ ಯಾವ ನಿಯಮಗಳು ಬದಲಾಗುತ್ತವೆ ಎಂಬುದರ ಕುರಿತ ಮಾಹಿತಿ ಇಲ್ಲಿದೆ.
ಇದಕ್ಕೂ ಮೊದಲು ಕೇವಲ ಆಧಾರ್ ಕಾರ್ಡ್ ಬಳಸಿ ಸುಲಭವಾಗಿ ಪ್ಯಾನ್ ಕಾರ್ಡ್ ಪಡೆಯಬಹುದಿತ್ತು. ಆದರೆ ಏಪ್ರಿಲ್ 1 ರಿಂದ, ಆಧಾರ್ ಜತೆಗೆ ಹುಟ್ಟಿದ ದಿನಾಂಕದ ಪುರಾವೆ (Proof of Date of Birth) ನೀಡುವುದು ಕಡ್ಡಾಯವಾಗಲಿದೆ. ಇದಕ್ಕಾಗಿ ಜನನ ಪ್ರಮಾಣಪತ್ರ, ಮತದಾರರ ಗುರುತಿನ ಚೀಟಿ, 10ನೇ ತರಗತಿ ಅಂಕಪಟ್ಟಿ, ಚಾಲನಾ ಪರವಾನಗಿ (DL) ಅಥವಾ ಪಾಸ್ ಪೋರ್ಟ್ ಅನ್ನು ಬಳಸಬಹುದು.
ಹೊಸ ಅರ್ಜಿ ನಮೂನೆಗಳು: ಹಳೆಯ ಪ್ಯಾನ್ ಅರ್ಜಿ ನಮೂನೆಗಳನ್ನು (Application Forms) ಕೂಡ ಸ್ಥಗಿತಗೊಳಿಸಲಾಗುತ್ತದೆ. ಏಪ್ರಿಲ್ 1 ರಿಂದ ಹೊಸದಾಗಿ ಪರಿಷ್ಕರಿಸಿದ ಅರ್ಜಿ ನಮೂನೆಗಳನ್ನು ಮಾತ್ರ ಬಳಸಬೇಕಾಗುತ್ತದೆ. ಹೊಸ ದಾಖಲೆಗಳ ಅವಶ್ಯಕತೆ ಸೇರಿ ಹಲವು ಕಾರಣಗಳಿಂದಾಗಿ ಅರ್ಜಿ ನಮೂನೆಗಳಲ್ಲಿ ಬದಲಾವಣೆ ಮಾಡಲಾಗುತ್ತಿದೆ ಎಂದು ತಿಳಿದುಬಂದಿದೆ.
ಅಲ್ಲದೆ, ಹೊಸ ಪ್ರಸ್ತಾವಿತ ನಿಯಮಗಳ ಪ್ರಕಾರ, ಯಾವುದೇ ವ್ಯಕ್ತಿ ವರ್ಷಕ್ಕೆ ಒಟ್ಟು 10 ಲಕ್ಷ ರೂಪಾಯಿಗಿಂತ ಹೆಚ್ಚು ನಗದು ಠೇವಣಿ ಅಥವಾ ಹಿಂಪಡೆಯುವಿಕೆ ಮಾಡಿದರೆ ಪ್ಯಾನ್ ಕಾರ್ಡ್ ನೀಡುವುದು ಕಡ್ಡಾಯವಾಗಬಹುದು. ಹಾಗೆಯೇ, ಕೇವಲ ಆಧಾರ್ ಮೂಲಕ ಪ್ಯಾನ್ ಪಡೆಯುವ ಸುಲಭ ವಿಧಾನವು ಮಾರ್ಚ್ 31 ರವರೆಗೆ ಮಾತ್ರ ಲಭ್ಯವಿರುತ್ತದೆ ಎಂಬುದು ಹೊಸದಾಗಿ ಅರ್ಜಿ ಸಲ್ಲಿಸುವವರು ಗಮನಿಸಬೇಕಾದ ಪ್ರಮುಖ ಸಂಗತಿಯಾಗಿದೆ.
ಇದನ್ನೂ ಓದಿ : ಮಾರ್ಚ್ 22 ರಿಂದ 25 ರ ವರೆಗೆ ಬೆಸ್ಕಾಂ ವ್ಯಾಪ್ತಿಯ ವಿವಿಧೆಡೆ ವಿದ್ಯುತ್ ಕಡಿತ.. ನಿಮ್ಮ ಏರಿಯಾ ಇದ್ಯಾ ಚೆಕ್ ಮಾಡಿ
