ಟೆಹ್ರಾನ್ : ಕಳೆದ ಫೆಬ್ರವರಿ 28 ರಂದು ಇರಾನ್ನ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಹತ್ಯೆಗೆ ಪ್ರತಿಕಾರವಾಗಿ ಶುರುವಾದ ಯುದ್ಧವು ಎರಡನೇ ವಾರಕ್ಕೆ ಕಾಲಿಟ್ಟಿದೆ. ಯುದ್ಧದ ಆರಂಭಿಕ ದಿನಗಳಲ್ಲಿ ಇರಾನ್ ನಡೆಸಿದ ಭಾರಿ ಕ್ಷಿಪಣಿ ದಾಳಿಗಳು ಈಗ ಶೇಕಡಾ 90ರಷ್ಟು ಕಡಿಮೆಯಾಗಿವೆ. ಈ ಇಳಿಕೆಯನ್ನು ಅಮೆರಿಕ ಹಾಗೂ ಇಸ್ರೇಲ್ ತಮ್ಮ ಸೇನಾ ಕಾರ್ಯಾಚರಣೆಯ ಯಶಸ್ಸು ಎಂದು ಬಿಂಬಿಸಿಕೊಳ್ಳುತ್ತಿದ್ದರೆ, ಇರಾನ್ ಮಾತ್ರ ಇದು ತನ್ನ ಬದಲಾದ ರಣತಂತ್ರದ ಭಾಗ ಎಂದು ತಿರುಗೇಟು ನೀಡಿದೆ. ಮಂಗಳವಾರ ರಾತ್ರಿ ಇರಾನ್ ತನ್ನ ನೂತನ ಹಾಗೂ ಹೆಚ್ಚು ತೂಕದ ಕ್ಷಿಪಣಿಗಳನ್ನು ಶತ್ರು ದೇಶಗಳತ್ತ ಉಡಾಯಿಸುವ ಮೂಲಕ ತನ್ನ ಶತ್ರುಗಳ ವಾದವನ್ನು ತಳ್ಳಿಹಾಕಿದೆ.
ಯುದ್ಧದ ಮೊದಲ ದಿನವಾದ ಫೆ.28ರಂದು ಇರಾನ್ 480 ಕ್ಷಿಪಣಿಗಳನ್ನು ಉಡಾವಣೆ ಮಾಡಿತ್ತು. ಆದರೆ ಮಾರ್ಚ್ 9 ರ ವೇಳೆಗೆ ಈ ಸಂಖ್ಯೆ ದಿನಕ್ಕೆ ಕೇವಲ 40ಕ್ಕೆ ಕುಸಿದಿದೆ. ಡ್ರೋನ್ ದಾಳಿಗಳ ಸಂಖ್ಯೆ ಕೂಡ 720 ರಿಂದ 60ಕ್ಕೆ ಇಳಿಕೆಯಾಗಿದ್ದು, ಒಟ್ಟಾರೆ ಶೇ.92ರಷ್ಟು ಕುಸಿತ ಕಂಡಿದೆ. ಕಳೆದ ಹತ್ತು ದಿನಗಳಲ್ಲಿ ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ 3,000ಕ್ಕೂ ಹೆಚ್ಚು ಪ್ರತಿದಾಳಿಗಳನ್ನು ನಡೆಸಿವೆ. ಇರಾನ್ ಬಳಿಯಿದ್ದ 400 ರಿಂದ 550 ಕ್ಷಿಪಣಿ ಉಡಾವಣಾ ವಾಹನಗಳ (ಲಾಂಚರ್ಗಳ) ಪೈಕಿ 300 ರಿಂದ 415 ಲಾಂಚರ್ಗಳನ್ನು ನಾಶಪಡಿಸಲಾಗಿದೆ. ಅಂದರೆ, ಇರಾನ್ನ ಶೇಕಡಾ 75ರಷ್ಟು ಉಡಾವಣಾ ಸಾಮರ್ಥ್ಯವನ್ನು ಧ್ವಂಸಗೊಳಿಸಿದ್ದೇ ಈ ಕ್ಷಿಪಣಿ ಇಳಿಕೆಗೆ ಪ್ರಮುಖ ಕಾರಣ ಎಂದು ಅಮೆರಿಕ ಮತ್ತು ಇಸ್ರೇಲ್ ಪಡೆಯ ಮೂಲಗಳು ಪ್ರತಿಪಾದಿಸಿವೆ.
ರಣತಂತ್ರ ಬದಲಿಸಿದ ಇರಾನ್ :
ತನ್ನ ಉಡಾವಣಾ ಸಾಮರ್ಥ್ಯ ನಾಶವಾಗಿದೆ ಎಂಬ ಅಮೆರಿಕ-ಇಸ್ರೇಲ್ ವಾದವನ್ನು ಇರಾನ್ ಸ್ಪಷ್ಟವಾಗಿ ತಳ್ಳಿಹಾಕಿದೆ. ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ಸ್ ಕಾರ್ಪ್ಸ್ (IRGC) ಏರೋಸ್ಪೇಸ್ ಪಡೆಯ ಕಮಾಂಡರ್ ಬ್ರಿಗೇಡಿಯರ್ ಜನರಲ್ ಸೈಯದ್ ಮಜೀದ್ ಮೌಸವಿ ಅವರು, ಇರಾನ್ ತನ್ನ ಯುದ್ಧ ತಂತ್ರವನ್ನು ಬದಲಿಸಿದೆ ಎಂದು ಘೋಷಿಸಿದ್ದಾರೆ. ಇನ್ನು ಮುಂದೆ ಒಂದು ಟನ್ಗಿಂತ ಕಡಿಮೆ ತೂಕದ ಸಿಡಿತಲೆಗಳನ್ನು ಹೊಂದಿರುವ ಯಾವುದೇ ಕ್ಷಿಪಣಿಯನ್ನು ಉಡಾವಣೆ ಮಾಡುವುದಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಇದರ ಬೆನ್ನಲ್ಲೇ, ಖೋರಮ್ಶಹರ್, ಫತ್ತಾಹ್ ಮತ್ತು ಖೈಬರ್ನಂತಹ ಭಾರಿ ತೂಕದ ಹಾಗೂ ಬಹು-ಸಿಡಿತಲೆಗಳ (multi-warhead) ನೂತನ ಕ್ಷಿಪಣಿಗಳನ್ನು ಮಂಗಳವಾರ ರಾತ್ರಿ ಇರಾನ್ ಪ್ರಯೋಗಿಸಿದೆ. ಕ್ಷಿಪಣಿಗಳ ಸಂಖ್ಯೆ ಕಡಿಮೆಯಾಗಿದ್ದರೂ, ಅವುಗಳ ವಿನಾಶಕಾರಿ ಸಾಮರ್ಥ್ಯ ಮತ್ತು ದಾಳಿಯ ತೀವ್ರತೆಯನ್ನು ಹೆಚ್ಚಿಸುವುದು ಇರಾನ್ನ ಹೊಸ ತಂತ್ರಗಾರಿಕೆಯಾಗಿದೆ. ದೀರ್ಘಕಾಲಿಕ ಯುದ್ಧಕ್ಕಾಗಿ ತನ್ನ ಪ್ರಬಲ ಅಸ್ತ್ರಗಳನ್ನು ಕಾಯ್ದಿರಿಸಿಕೊಳ್ಳುವ ಉದ್ದೇಶವೂ ಇದರ ಹಿಂದಿದೆ ಎಂದು ರಕ್ಷಣಾ ತಜ್ಞರು ವಿಶ್ಲೇಷಿಸಿದ್ದಾರೆ.
ಮಧ್ಯಪ್ರಾಚ್ಯದಲ್ಲಿ ತೀವ್ರಗೊಂಡ ದಾಳಿ
ಇರಾನ್ ಕೇವಲ ಇಸ್ರೇಲ್ ಮತ್ತು ಅಮೆರಿಕದ ಸೇನಾ ನೆಲೆಗಳನ್ನಷ್ಟೇ ಗುರಿಯಾಗಿಸದೆ, ಒಮಾನ್, ಬಹ್ರೇನ್, ಕತಾರ್, ಸೌದಿ ಅರೇಬಿಯಾ ಹಾಗೂ ಯುಎಇ ದೇಶಗಳಲ್ಲಿರುವ ಮೂಲಸೌಕರ್ಯಗಳ ಮೇಲೂ ದಾಳಿ ನಡೆಸಿದೆ. ಇರಾಕ್ನ ಕುರ್ದಿಸ್ತಾನ್ನಲ್ಲಿರುವ ಅಲ್ ಹರೀರ್ ನೆಲೆ, ಕತಾರ್ನ ಅಲ್ ಉದೈದ್ ನೆಲೆ, ಯುಎಇಯ ಅಲ್ ದಫ್ರಾ ವಾಯುನೆಲೆ ಮತ್ತು ಬಹ್ರೇನ್ನ ಜುಫೇರ್ ನೌಕಾನೆಲೆಗಳನ್ನು ಗುರಿಯಾಗಿಸಿ ಇರಾನ್ ಮಂಗಳವಾರ ಭಾರಿ ದಾಳಿ ನಡೆಸಿದೆ. ಸೌದಿ ಅರೇಬಿಯಾದ ಪ್ರಿನ್ಸ್ ಸುಲ್ತಾನ್ ವಾಯುನೆಲೆಯತ್ತ ಉಡಾಯಿಸಲಾಗಿದ್ದ ಆರು ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ತಡೆದು ನಾಶಪಡಿಸಲಾಗಿದೆ ಎಂದು ಸೌದಿ ರಕ್ಷಣಾ ಸಚಿವಾಲಯ ತಿಳಿಸಿದೆ. ಸದ್ಯದ ಮಟ್ಟಿಗೆ ಇರಾನ್ನ ಕೆಲವು ಉಡಾವಣಾ ಕೇಂದ್ರಗಳು ನಾಶವಾಗಿದ್ದರೂ, ಮಂಗಳವಾರದ ಭಾರಿ ದಾಳಿಯ ಮೂಲಕ ತನ್ನ ಪ್ರಹಾರ ಸಾಮರ್ಥ್ಯ ಇನ್ನೂ ಅಚ್ಚಳಿಯದೆ ಉಳಿದಿದೆ ಎಂಬುದನ್ನು ಇರಾನ್ ಜಗತ್ತಿಗೆ ಸಾರಿದೆ.
ಇದನ್ನೂ ಓದಿ : ಕೇರಳ ಜಾತ್ಯತೀತರ ಗೋಸುಂಬೆತನ!
