ಬೆಂಗಳೂರು : ಹ್ಯುಂಡೈ ಮೋಟಾರ್ ಇಂಡಿಯಾ ಲಿಮಿಟೆಡ್ ಬಹುನಿರೀಕ್ಷಿತ 2026ರ ನವೀಕೃತ ‘ಹುಂಡೈ ವರ್ನಾ’ ಕಾರನ್ನು ಭಾರತೀಯ ಮಾರುಕಟ್ಟೆಗೆ ಅಧಿಕೃತವಾಗಿ ಬಿಡುಗಡೆ ಮಾಡಿದೆ. ವಿನ್ಯಾಸ, ತಂತ್ರಜ್ಞಾನ, ಸುರಕ್ಷತೆ ಮತ್ತು ಸೌಕರ್ಯ ಸೇರಿದಂತೆ ಒಟ್ಟು 25ಕ್ಕೂ ಅಧಿಕ ಹೊಸ ಅಪ್ಡೇಟ್ಗಳೊಂದಿಗೆ ಎಂಟ್ರಿ ಕೊಟ್ಟಿರುವ ಈ ಪ್ರೀಮಿಯಂ ಸೆಡಾನ್ ಕಾರಿನ ಆರಂಭಿಕ ಬೆಲೆ 10.98 ಲಕ್ಷ ರೂಪಾಯಿಗಳಾಗಿದೆ (ಎಕ್ಸ್ ಶೋರೂಂ).
ಮಧ್ಯಮ ಗಾತ್ರದ ಸೆಡಾನ್ ವಿಭಾಗದಲ್ಲಿ ತನ್ನ ಪ್ರಾಬಲ್ಯವನ್ನು ಮತ್ತಷ್ಟು ವಿಸ್ತರಿಸುವ ಉದ್ದೇಶದಿಂದ ಹ್ಯುಂಡೈ ಸಂಸ್ಥೆಯು ಈ ಕಾರನ್ನು ಅತ್ಯಾಧುನಿಕ ಫೀಚರ್ಗಳೊಂದಿಗೆ ಮರುವಿನ್ಯಾಸಗೊಳಿಸಿದ್ದು, ಈ ವಿಭಾಗದಲ್ಲಿಯೇ ಅತಿ ಉದ್ದದ ವೀಲ್ಬೇಸ್ ಮತ್ತು ವಿಶಾಲವಾದ ಕ್ಯಾಬಿನ್ ಹೊಂದಿರುವ ಕಾರು ಎಂಬ ಹೆಗ್ಗಳಿಕೆಯನ್ನು ಕಾಯ್ದುಕೊಂಡಿದೆ.
ಆಕರ್ಷಕ ಬೆಲೆ ಮತ್ತು ವೈವಿಧ್ಯಮಯ ವೇರಿಯೆಂಟ್ಗಳು
ಹೊಸ ಹುಂಡೈ ವರ್ನಾ ಕಾರು ಗ್ರಾಹಕರ ಆಯ್ಕೆಗೆ ತಕ್ಕಂತೆ ಒಟ್ಟು ಆರು ಪ್ರಮುಖ ವೇರಿಯೆಂಟ್ಗಳಲ್ಲಿ ಲಭ್ಯವಿದೆ. 1.5 ಎಂಪಿಐ ಪೆಟ್ರೋಲ್ ಮ್ಯಾನುವಲ್ ಆವೃತ್ತಿಯ ಬೆಲೆಗಳು ಎಚ್ಎಕ್ಸ್-2 ಮಾಡೆಲ್ಗೆ 10.98 ಲಕ್ಷ ರೂ.ಗಳಿಂದ ಆರಂಭವಾಗಿ ಎಚ್ಎಕ್ಸ್-8 ವೇರಿಯೆಂಟ್ಗೆ 14.88 ಲಕ್ಷ ರೂ.ಗಳವರೆಗೆ ನಿಗದಿಯಾಗಿದೆ. ಅದೇ ರೀತಿ ಸಿವಿಟಿ (CVT) ಟ್ರಾನ್ಸ್ಮಿಷನ್ ಆವೃತ್ತಿಯ ಬೆಲೆಗಳು 14.40 ಲಕ್ಷ ರೂ.ಗಳಿಂದ 17.15 ಲಕ್ಷ ರೂ.ಗಳವರೆಗೆ ಇವೆ. ಇನ್ನು ಹೆಚ್ಚು ಶಕ್ತಿಶಾಲಿಯಾದ 1.5 ಟರ್ಬೊ ಜಿಡಿಐ ಪೆಟ್ರೋಲ್ ಆವೃತ್ತಿಯನ್ನು ಮ್ಯಾನುವಲ್ ಹಾಗೂ 7-ಡಿಸಿಟಿ ಗೇರ್ಬಾಕ್ಸ್ ಆಯ್ಕೆಗಳಲ್ಲಿ ಒದಗಿಸಲಾಗಿದ್ದು, ಇವುಗಳ ಬೆಲೆ 16.28 ಲಕ್ಷ ರೂ.ಗಳಿಂದ ಟಾಪ್ ಎಂಡ್ ಮಾಡೆಲ್ ಎಚ್ಎಕ್ಸ್-10ಗೆ 18.25 ಲಕ್ಷ ರೂ.ಗಳವರೆಗೆ ನಿಗದಿಪಡಿಸಲಾಗಿದೆ.
ಹೊಸ ವಿನ್ಯಾಸ ಮತ್ತು ಅತ್ಯಾಧುನಿಕ ಒಳಾಂಗಣ ಸೌಕರ್ಯ
ಕಾರಿನ ಹೊರಾಂಗಣ ವಿನ್ಯಾಸಕ್ಕೆ ಹೆಚ್ಚು ಸ್ಪೋರ್ಟಿ ಲುಕ್ ನೀಡಲು ಕಪ್ಪು ಬಣ್ಣದ ಕ್ರೋಮ್ ರೇಡಿಯೇಟರ್ ಗ್ರಿಲ್, ಡ್ಯುಯಲ್ ಎಲ್ಇಡಿ ಪ್ರೊಜೆಕ್ಟರ್ ಹೆಡ್ಲ್ಯಾಂಪ್ ಹಾಗೂ ಹೊಸದಾಗಿ ವಿನ್ಯಾಸಗೊಳಿಸಲಾದ ಮುಂಭಾಗ ಮತ್ತು ಹಿಂಭಾಗದ ಬಂಪರ್ಗಳನ್ನು ಅಳವಡಿಸಲಾಗಿದೆ. ಇದರ ಜೊತೆಗೆ ಹೊಸ 16 ಇಂಚಿನ ಡೈಮಂಡ್-ಕಟ್ ಅಲಾಯ್ ವೀಲ್ಗಳು ಕಾರಿನ ಗಾಂಭೀರ್ಯವನ್ನು ಹೆಚ್ಚಿಸಿವೆ. ಒಳಾಂಗಣದಲ್ಲಿ ಪ್ರೀಮಿಯಂ ಲೆದರೆಟ್ ಸೀಟ್ಗಳು ಹಾಗೂ ಡಿ-ಕಟ್ ಸ್ಟೀರಿಂಗ್ ವೀಲ್ ಗಮನ ಸೆಳೆಯುತ್ತವೆ. ಚಾಲಕನ ಸೀಟಿಗೆ 8-ವೇ ಎಲೆಕ್ಟ್ರಿಕ್ ಅಡ್ಜಸ್ಟ್ಮೆಂಟ್ ಜೊತೆಗೆ ಮೆಮೊರಿ ಫಂಕ್ಷನ್ ನೀಡಲಾಗಿದ್ದು, ಮುಂಭಾಗದ ಪ್ರಯಾಣಿಕರ ಸೀಟಿಗೆ 4-ವೇ ಎಲೆಕ್ಟ್ರಿಕ್ ಅಡ್ಜಸ್ಟ್ಮೆಂಟ್ ಸೌಲಭ್ಯ ಒದಗಿಸಲಾಗಿದೆ. ಇದು ಸೆಡಾನ್ ವಿಭಾಗದಲ್ಲೇ ಅತಿ ದೊಡ್ಡದಾದ 528 ಲೀಟರ್ ಬೂಟ್ ಸ್ಪೇಸ್ ಹೊಂದಿದೆ. ಕ್ಲಾಸಿ ಬ್ಲೂ ಮತ್ತು ಟೈಟಾನ್ ಗ್ರೇ ಮ್ಯಾಟ್ ಎಂಬ ಎರಡು ಹೊಸ ಆಕರ್ಷಕ ಬಣ್ಣಗಳ ಆಯ್ಕೆಯನ್ನೂ ಸಂಸ್ಥೆ ಪರಿಚಯಿಸಿದೆ.
ಸ್ಮಾರ್ಟ್ ತಂತ್ರಜ್ಞಾನ ಮತ್ತು ಶಕ್ತಿಶಾಲಿ ಇಂಜಿನ್
ತಂತ್ರಜ್ಞಾನದ ವಿಚಾರದಲ್ಲಿ ಹೊಸ ವರ್ನಾ ಹತ್ತು ಹಲವು ನವೀನತೆಗಳನ್ನು ಅಳವಡಿಸಿಕೊಂಡಿದೆ. ಮನರಂಜನೆ ಮತ್ತು ಡಿಜಿಟಲ್ ಮಾಹಿತಿಗಾಗಿ ತಲಾ 10.25 ಇಂಚಿನ ಡ್ಯುಯಲ್ ಇಂಟಿಗ್ರೇಟೆಡ್ ಡಿಸ್ಪ್ಲೇ, ವೈರ್ಲೆಸ್ ಆಂಡ್ರಾಯ್ಡ್ ಆಟೋ ಮತ್ತು ಆಪಲ್ ಕಾರ್ಪ್ಲೇ, ಎಲೆಕ್ಟ್ರಿಕ್ ಸನ್ರೂಫ್, ವೈರ್ಲೆಸ್ ಚಾರ್ಜರ್ ಹಾಗೂ ಬೋಸ್ ಕಂಪನಿಯ 8 ಸ್ಪೀಕರ್ಗಳ ಪ್ರೀಮಿಯಂ ಸೌಂಡ್ ಸಿಸ್ಟಮ್ ನೀಡಲಾಗಿದೆ. ಇಂಜಿನ್ ವಿಭಾಗದಲ್ಲಿ 1.5 ಲೀಟರ್ ಎಂಪಿಐ ನ್ಯಾಚುರಲಿ ಆಸ್ಪಿರೇಟೆಡ್ ಪೆಟ್ರೋಲ್ ಇಂಜಿನ್ 115 ಬಿಎಚ್ಪಿ ಪವರ್ ಉತ್ಪಾದಿಸಿದರೆ, 1.5 ಲೀಟರ್ ಟರ್ಬೊ ಜಿಡಿಐ ಪೆಟ್ರೋಲ್ ಇಂಜಿನ್ 160 ಬಿಎಚ್ಪಿ ಪವರ್ ಹಾಗೂ 253 ಎನ್ಎಂ ಟಾರ್ಕ್ ಉತ್ಪಾದಿಸುವ ಮೂಲಕ ಈ ವಿಭಾಗದ ಅತ್ಯಂತ ಶಕ್ತಿಶಾಲಿ ಕಾರು ಎನಿಸಿಕೊಂಡಿದೆ. ಸುಗಮ ಚಾಲನೆಗಾಗಿ ಪ್ಯಾಡಲ್ ಶಿಫ್ಟರ್ಗಳು ಹಾಗೂ ಮೂರು ವಿಭಿನ್ನ ಡ್ರೈವ್ ಮೋಡ್ಗಳನ್ನು ನೀಡಲಾಗಿದೆ.
ಪ್ರಯಾಣಿಕರ ಸುರಕ್ಷತೆಗೆ ಗರಿಷ್ಠ ಆದ್ಯತೆ
ಹೊಸ ವರ್ನಾದಲ್ಲಿ ಪ್ರಯಾಣಿಕರ ಸುರಕ್ಷತೆಗೆ ಅತಿ ಹೆಚ್ಚಿನ ಒತ್ತು ನೀಡಲಾಗಿದ್ದು, 75 ಸುಧಾರಿತ ಹಾಗೂ 35 ಸ್ಟ್ಯಾಂಡರ್ಡ್ ಸುರಕ್ಷತಾ ಫೀಚರ್ಗಳನ್ನು ನೀಡಲಾಗಿದೆ. ವಿಶೇಷವಾಗಿ 20 ಫೀಚರ್ಗಳನ್ನೊಳಗೊಂಡ ‘ಹ್ಯುಂಡೈ ಸ್ಮಾರ್ಟ್ ಸೆನ್ಸ್ ಲೆವೆಲ್ 2 ಎಡಿಎಎಸ್’ (ADAS) ತಂತ್ರಜ್ಞಾನವನ್ನು ಅಳವಡಿಸಲಾಗಿದೆ. ಈ ಸೆಗ್ಮೆಂಟ್ನಲ್ಲಿಯೇ ಮೊದಲ ಬಾರಿಗೆ ಸೆಂಟರ್ ಸೈಡ್ ಏರ್ಬ್ಯಾಗ್ ಸೇರಿದಂತೆ ಒಟ್ಟು 7 ಏರ್ಬ್ಯಾಗ್ಗಳು, ಇನ್-ಬಿಲ್ಟ್ ಡ್ಯಾಶ್ಕ್ಯಾಮ್, ಸರೌಂಡ್ ವ್ಯೂ ಮಾನಿಟರ್ ಮತ್ತು ಬ್ಲೈಂಡ್-ಸ್ಪಾಟ್ ವ್ಯೂ ಮಾನಿಟರ್ ವ್ಯವಸ್ಥೆಯನ್ನು ಒದಗಿಸಲಾಗಿದೆ. ಮೂಲಭೂತ ಸುರಕ್ಷತೆಗಾಗಿ ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಕಂಟ್ರೋಲ್, ಹಿಲ್ ಸ್ಟಾರ್ಟ್ ಅಸಿಸ್ಟ್, ಎಬಿಎಸ್ ವಿತ್ ಇಬಿಡಿ ಸೇರಿದಂತೆ ಅತ್ಯಾಧುನಿಕ ಸುರಕ್ಷತಾ ಸಾಧನಗಳನ್ನು ಕಾರಿನ ಎಲ್ಲಾ ಆವೃತ್ತಿಗಳಲ್ಲೂ ಸ್ಟ್ಯಾಂಡರ್ಡ್ ಆಗಿ ನೀಡಲಾಗಿದೆ.
ಇದನ್ನೂ ಓದಿ : ನರೇಂದ್ರ ಮೋದಿ ಕ್ರೀಡಾಂಗಣ ‘ಅಪಶಕುನ’ ಎಂಬ ಮೂಢನಂಬಿಕೆಗೆ ತಿರುಗೇಟು!
