ನವದೆಹಲಿ : ಕೃತಕ ಬುದ್ಧಿಮತ್ತೆ (AI) ಎನ್ನುವುದು ಕೇವಲ ಯಂತ್ರ ಕೇಂದ್ರಿತವಾಗಿರದೆ, ಅದು ಮಾನವ ಕೇಂದ್ರಿತವಾಗಿರಬೇಕು ಎಂದು ಪ್ರಧಾನಿ ನರೇಂದ್ರ ಮೋದಿಯವರು ಕರೆ ನೀಡಿದ್ದು, ದೆಹಲಿಯಲ್ಲಿ ನಡೆಯುತ್ತಿರುವ ‘ಇಂಡಿಯಾ ಎಐ ಇಂಪ್ಯಾಕ್ಟ್ ಶೃಂಗಸಭೆ 2026’ರಲ್ಲಿ ಭಾರತದ ಮಹತ್ವಾಕಾಂಕ್ಷೆಯ ‘MANAV'(ಮಾನವ್) ದೃಷ್ಟಿಕೋನವನ್ನು ಪ್ರಸ್ತುತಪಡಿಸಿದ್ದಾರೆ.
ಎಐ ತಂತ್ರಜ್ಞಾನವು ಕೇವಲ ಕೆಲವರ ಸ್ವತ್ತಾಗದೆ ಜಾಗತಿಕ ದಕ್ಷಿಣದ (Global South) ರಾಷ್ಟ್ರಗಳಿಗೂ ಲಭ್ಯವಾಗುವಂತೆ ‘ಪ್ರಜಾಪ್ರಭುತ್ವೀಕರಣ’ಗೊಳಿಸಬೇಕು ಎಂದೂ ಅವರು ಕರೆ ನೀಡಿದರು. ಶೃಂಗಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ ಮೋದಿ, ಎಐ ಯುಗದಲ್ಲಿ ಮನುಷ್ಯರು ಕೇವಲ ಅಂಕಿ-ಅಂಶಗಳಾಗಿ ಉಳಿಯಬಾರದು. ತಂತ್ರಜ್ಞಾನದ ಅಂತಿಮ ಗುರಿ ಸರ್ವರ ಕಲ್ಯಾಣ ಮತ್ತು ಸಂತೋಷವಾಗಿರಬೇಕು. ಎಐ ಒಂದು ಸಬಲೀಕರಣದ ಸಾಧನವಾಗಬೇಕೇ ಹೊರತು ಶೋಷಣೆಯ ಮೂಲವಾಗಬಾರದು ಎಂದು ಅವರು ತಿಳಿಸಿದರು. ಎಐ ಅಭಿವೃದ್ಧಿಯು ನೈತಿಕತೆ ಮತ್ತು ಮಾನವೀಯ ನಿಯಂತ್ರಣದಲ್ಲಿರಬೇಕು ಎಂಬುದು ಭಾರತದ ಸ್ಪಷ್ಟ ನಿಲುವಾಗಿದೆ ಎಂದರು.
ಏನಿದು ಮಾನವ್ ಫ್ರೇಮ್ವರ್ಕ್?
ಭವಿಷ್ಯದ ಎಐ ಆಡಳಿತಕ್ಕಾಗಿ ಪ್ರಧಾನಿ ಮೋದಿ ಅವರು ಐದು ಪ್ರಮುಖ ಸ್ತಂಭಗಳನ್ನು ಒಳಗೊಂಡ ‘MANAV'(ಮಾನವ್) ಎಂಬ ಹೊಸ ಪರಿಕಲ್ಪನೆಯನ್ನು ವಿವರಿಸಿದರು.
M – Moral (ನೈತಿಕತೆ): ಎಐ ವ್ಯವಸ್ಥೆಗಳು ನೈತಿಕ ಮತ್ತು ಮೌಲ್ಯಧಾರಿತವಾಗಿರಬೇಕು.
A – Accountable (ಹೊಣೆಗಾರಿಕೆ): ಆಡಳಿತದಲ್ಲಿ ಪಾರದರ್ಶಕತೆ ಮತ್ತು ಜವಾಬ್ದಾರಿ ಇರಬೇಕು.
N – National Sovereignty (ರಾಷ್ಟ್ರೀಯ ಸಾರ್ವಭೌಮತೆ): ದೇಶದ ಡೇಟಾ ಆ ದೇಶಕ್ಕೇ ಸೇರಿರಬೇಕು ಮತ್ತು ಆಯಾ ರಾಷ್ಟ್ರದ ಕಾನೂನಿನ ವ್ಯಾಪ್ತಿಯಲ್ಲೇ ಇರಬೇಕು.
A – Accessible (ಸುಲಭ ಲಭ್ಯತೆ): ತಂತ್ರಜ್ಞಾನವು ಎಲ್ಲರಿಗೂ ಸಿಗುವಂತಿರಬೇಕು, ಇದು ಏಕಸ್ವಾಮ್ಯವಾಗಬಾರದು.
V – Valid (ಸಿಂಧುತ್ವ): ಎಐ ಕಾನೂನುಬದ್ಧ ಮತ್ತು ನಂಬಲರ್ಹವಾಗಿರಬೇಕು.
ಜಾಗತಿಕ ನಾಯಕರ ಸಮ್ಮುಖದಲ್ಲಿ ಭಾರತದ ನಾಯಕತ್ವ
6 ದಿನಗಳ ಕಾಲ ನಡೆಯಲಿರುವ ಈ ಬೃಹತ್ ಶೃಂಗಸಭೆಯಲ್ಲಿ ಸ್ಯಾಮ್ ಆಲ್ಟ್ಮನ್, ಸುಂದರ್ ಪಿಚೈ ಮತ್ತು ಜೆನ್ಸನ್ ಹುವಾಂಗ್ ಅವರಂತಹ ಟೆಕ್ ದಿಗ್ಗಜರು ಹಾಗೂ ವಿವಿಧ ದೇಶಗಳ ಮುಖ್ಯಸ್ಥರು ಭಾಗವಹಿಸಿದ್ದಾರೆ. ಜಾಗತಿಕ ದಕ್ಷಿಣದ ರಾಷ್ಟ್ರವೊಂದರಲ್ಲಿ ನಡೆಯುತ್ತಿರುವ ಇಂತಹ ಮೊದಲ ಶೃಂಗಸಭೆ ಇದಾಗಿದ್ದು, ಭಾರತವು ಎಐ ನಿಯಂತ್ರಣ ಮತ್ತು ಅಭಿವೃದ್ಧಿಯಲ್ಲಿ ವಿಶ್ವಕ್ಕೆ ದಾರಿದೀಪವಾಗುತ್ತಿದೆ. ಇದೇ ವೇಳೆ ರಿಲಯನ್ಸ್ ಮುಖ್ಯಸ್ಥ ಮುಕೇಶ್ ಅಂಬಾನಿ ಅವರು ಎಐ ಕ್ಷೇತ್ರದಲ್ಲಿ 10 ಲಕ್ಷ ಕೋಟಿ ರೂ. ಹೂಡಿಕೆಯ ಘೋಷಣೆ ಮಾಡಿದ್ದಾರೆ. ಇದು ಭಾರತದ ಎಐ ಪಯಣಕ್ಕೆ ಹೊಸ ವೇಗ ನೀಡಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದನ್ನೂ ಓದಿ : ಕೊಪ್ಪಳದಲ್ಲಿ ಮರ್ಯಾದಾ ಹ*ತ್ಯೆಗೆ ಯತ್ನ | ಗರ್ಭಿಣಿ ತಂಗಿಯ ಮೇಲೆ ಕೊಡಲಿಯಿಂದ ದಾಳಿ
