ನವದೆಹಲಿ : ನಮೀಬಿಯಾ ವಿರುದ್ಧ ಭರ್ಜರಿ ಜಯ ಸಾಧಿಸಿ, ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದಿದ್ದರೂ ಟೀಮ್ ಇಂಡಿಯಾದ ಸ್ಟಾರ್ ಆಲ್ ರೌಂಡರ್ ಹಾರ್ದಿಕ್ ಪಾಂಡ್ಯ ಅವರು ಪಿಚ್ ಬಗ್ಗೆ ತಮ್ಮ ಅಸಮಾಧಾನ ಹೊರಹಾಕಿದ್ದಾರೆ. ಸತತ ಎರಡು ಪಂದ್ಯಗಳಲ್ಲಿ ಬ್ಯಾಟಿಂಗ್ಗೆ ಕಠಿಣವಾದ ಪಿಚ್ಗಳು ಎದುರಾಗಿದ್ದರಿಂದ, ಮುಂದಿನ ಪಂದ್ಯಗಳಿಗಾದರೂ ಬ್ಯಾಟಿಂಗ್ ಸ್ನೇಹಿ ‘ಫ್ಲಾಟ್ ವಿಕೆಟ್’ (Flat Wickets) ನೀಡುವಂತೆ ಅವರು ಬಿಸಿಸಿಐ ಹಾಗೂ ಪಿಚ್ ಕ್ಯುರೇಟರ್ಗಳಿಗೆ ಪರೋಕ್ಷವಾಗಿ ಸೂಚನೆ ನೀಡಿದ್ದಾರೆ.
ಹಾರ್ದಿಕ್ ಹೇಳಿದ್ದೇನು?
ದೆಹಲಿಯ ಅರುಣ್ ಜೆಟ್ಲಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದ ನಂತರ ಮಾತನಾಡಿದ ಹಾರ್ದಿಕ್, “ಸತತ ಎರಡು ಪಂದ್ಯಗಳಲ್ಲಿ ನಮಗೆ ಬ್ಯಾಟಿಂಗ್ಗೆ ಯೋಗ್ಯವಾದ ಪಿಚ್ ಸಿಕ್ಕಿಲ್ಲ. ಇಲ್ಲಿನ ಪಿಚ್ನಲ್ಲಿ ಚೆಂಡು ನಿಂತು ಬರುತ್ತಿತ್ತು (Holding a bit). ನಾವು ಪರಿಸ್ಥಿತಿಗೆ ತಕ್ಕಂತೆ ಆಡಿದ್ದೇವೆ ನಿಜ. ಆದರೆ, ನಾವು ಇನ್ನೂ ಉತ್ತಮವಾದ ಫ್ಲಾಟ್ ವಿಕೆಟ್ಗಳಲ್ಲಿ ಆಡಲು ಇಷ್ಟಪಡುತ್ತೇವೆ,” ಎಂದು ನೇರವಾಗಿ ಹೇಳಿದ್ದಾರೆ. ಈ ಪಂದ್ಯದಲ್ಲಿ ಹಾರ್ದಿಕ್ ಪಾಂಡ್ಯ 28 ಎಸೆತಗಳಲ್ಲಿ 52 ರನ್ ಸಿಡಿಸಿದ್ದಲ್ಲದೆ, ಬೌಲಿಂಗ್ನಲ್ಲಿ 2 ವಿಕೆಟ್ ಪಡೆದು ಆಲ್ ರೌಂಡ್ ಆಟ ಪ್ರದರ್ಶಿಸಿದ್ದರು.
ಇಶಾನ್ ಕಿಶನ್ ಬೆಂಬಲ
ಆರಂಭಿಕ ಆಟಗಾರ ಇಶಾನ್ ಕಿಶನ್ (24 ಎಸೆತಗಳಲ್ಲಿ 61 ರನ್) ಕೂಡ ಹಾರ್ದಿಕ್ ಮಾತಿಗೆ ಧ್ವನಿಗೂಡಿಸಿದ್ದಾರೆ. ಮೇಲ್ನೋಟಕ್ಕೆ ಪಿಚ್ ಬ್ಯಾಟಿಂಗ್ಗೆ ಪೂರಕವಾಗಿ ಕಂಡರೂ, ವಾಸ್ತವದಲ್ಲಿ ಅದು ಸುಲಭವಾಗಿರಲಿಲ್ಲ ಎಂದು ಅವರು ಒಪ್ಪಿಕೊಂಡಿದ್ದಾರೆ. “ನಾವು ನಿರೀಕ್ಷಿಸಿದ್ದಕ್ಕಿಂತ ಪಿಚ್ ಭಿನ್ನವಾಗಿ ವರ್ತಿಸಿತು. ಕೊನೆಯ ಓವರ್ಗಳಲ್ಲಿ ನಮೀಬಿಯಾ ಬೌಲರ್ಗಳು ಸ್ಲೋವರ್ ಒನ್ ಮತ್ತು ಯಾರ್ಕರ್ ಎಸೆತಗಳ ಮೂಲಕ ನಮ್ಮನ್ನು ಕಟ್ಟಿಹಾಕಿದರು,” ಎಂದು ಕಿಶನ್ ವಿಶ್ಲೇಷಿಸಿದ್ದಾರೆ.
ಮುಂದಿದೆ ಕಠಿಣ ಸವಾಲು
ಮುಂದಿನ ಪಂದ್ಯದಲ್ಲಿ ಭಾರತ ತಂಡ ಶ್ರೀಲಂಕಾದ ಕೊಲಂಬೊದಲ್ಲಿ ಪಾಕಿಸ್ತಾನವನ್ನು ಎದುರಿಸಲಿದೆ. ಲಂಕಾದ ಪಿಚ್ಗಳು ಸಾಮಾನ್ಯವಾಗಿ ನಿಧಾನಗತಿಯಿಂದ ಕೂಡಿರುತ್ತವೆ ಮತ್ತು ಸ್ಪಿನ್ನರ್ಗಳಿಗೆ ನೆರವು ನೀಡುತ್ತವೆ. ಪಾಕಿಸ್ತಾನ ಈಗಾಗಲೇ 4-5 ಸ್ಪಿನ್ನರ್ಗಳೊಂದಿಗೆ ಕಣಕ್ಕಿಳಿಯುವ ತಂತ್ರ ರೂಪಿಸಿರುವುದರಿಂದ, ಟೀಮ್ ಇಂಡಿಯಾ ಸ್ಪಿನ್ ಟ್ರ್ಯಾಕ್ನಲ್ಲಿ ಆಡುವುದು ಅನಿವಾರ್ಯವಾಗುವ ಸಾಧ್ಯತೆಯೇ ಹೆಚ್ಚಿದೆ.
ಇದನ್ನೂ ಓದಿ : ಪರೀಕ್ಷೆಯಲ್ಲಿ ಸಾಧನೆ ಮಾಡಿ.. ಮಾಸ್ತಿಯಂತೆ ಕನ್ನಡದ ಆಸ್ತಿಯಾಗಿ | ನಾರಾಯಣ ಗುರು ಸೇವಾ ಟ್ರಸ್ಟ್ ಅಧ್ಯಕ್ಷ ಟಿ.ಸಿ. ರಮೇಶ್ ಕರೆ
