ಲಾಸ್ ಏಂಜಲೀಸ್ : ಟಿಬೆಟಿಯನ್ನರ ಪರಮೋಚ್ಚ ಧರ್ಮಗುರು, ಆಧ್ಯಾತ್ಮಿಕ ನಾಯಕ ದಲೈ ಲಾಮಾ ಅವರು ತಮ್ಮ 90ನೇ ವಯಸ್ಸಿನಲ್ಲಿ ಚೊಚ್ಚಲ ಗ್ರ್ಯಾಮಿ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಳ್ಳುವ ಮೂಲಕ ಇತಿಹಾಸ ಬರೆದಿದ್ದಾರೆ. ಅಮೆರಿಕದ ಲಾಸ್ ಏಂಜಲೀಸ್ನಲ್ಲಿ ನಡೆದ 68ನೇ ವಾರ್ಷಿಕ ಗ್ರ್ಯಾಮಿ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ, ಅವರ ವಿಶಿಷ್ಟ ಶೈಲಿಯ ‘ಸ್ಪೋಕನ್ ವರ್ಡ್’ ಅಲ್ಬಮ್ಗೆ ಈ ಪ್ರತಿಷ್ಠಿತ ಗೌರವ ಲಭಿಸಿದೆ. ಶಾಂತಿ ಮತ್ತು ಮಾನವೀಯತೆಯ ಸಂದೇಶ ಸಾರುವ ದಲೈ ಲಾಮಾ ಅವರ ಧ್ವನಿಗೆ ಈಗ ಸಂಗೀತ ಲೋಕದ ಅತ್ಯುನ್ನತ ವೇದಿಕೆಯಲ್ಲೂ ಜಯ ಸಿಕ್ಕಂತಾಗಿದೆ.
‘ಮೆಡಿಟೇಷನ್ಸ್’ ಅಲ್ಬಮ್ಗೆ ಸಂದ ಗೌರವ
ದಲೈ ಲಾಮಾ ಅವರ ‘ಮೆಡಿಟೇಷನ್ಸ್: ದಿ ರಿಫ್ಲೆಕ್ಷನ್ಸ್ ಆಫ್ ಹಿಸ್ ಹೋಲಿನೆಸ್ ದ ದಲೈ ಲಾಮಾ’ (Meditations: The Reflections of His Holiness the Dalai Lama) ಎಂಬ ಅಲ್ಬಮ್ಗೆ ‘ಅತ್ಯುತ್ತಮ ಆಡಿಯೋ ಬುಕ್, ನರೇಶನ್ ಮತ್ತು ಸ್ಟೋರಿ ಟೆಲ್ಲಿಂಗ್ ರೆಕಾರ್ಡಿಂಗ್’ ವಿಭಾಗದಲ್ಲಿ ಈ ಪ್ರಶಸ್ತಿ ನೀಡಲಾಗಿದೆ. ಈ ಅಲ್ಬಮ್ನಲ್ಲಿ ದಲೈ ಲಾಮಾ ಅವರು ತಮ್ಮ ಜೀವನದ ಚಿಂತನೆಗಳು, ಬೌದ್ಧ ಧರ್ಮದ ಬೋಧನೆಗಳು ಮತ್ತು ಧ್ಯಾನದ ಕ್ರಮಗಳನ್ನು ವಿವರಿಸಿದ್ದಾರೆ. ಅವರ ಸ್ಪಷ್ಟವಾದ ಧ್ವನಿ ಮತ್ತು ಆಳವಾದ ತಾತ್ವಿಕ ವಿಚಾರಗಳು ಜಾಗತಿಕ ಮಟ್ಟದಲ್ಲಿ ಕೇಳುಗರ ಗಮನ ಸೆಳೆದಿದ್ದವು. ಕತಿ ಗಾರ್ವರ್, ಟ್ರೆವರ್ ನೋವಾ ಮತ್ತು ಕೇತಾಂಜಿ ಬ್ರೌನ್ ಜಾಕ್ಸನ್ ಅವರಂತಹ ಪ್ರಸಿದ್ಧ ನಾಮನಿರ್ದೇಶಿತರನ್ನು ಹಿಂದಿಕ್ಕಿ ದಲೈ ಲಾಮಾ ಈ ಸಾಧನೆ ಮಾಡಿದ್ದಾರೆ.
ಇದು ಮಾನವೀಯತೆಗೆ ಸಂದ ಗೌರವ ಎಂದ ಲಾಮಾ
ತಮಗೆ ಲಭಿಸಿದ ಈ ಪ್ರಶಸ್ತಿಯ ಬಗ್ಗೆ ಪ್ರತಿಕ್ರಿಯಿಸಿರುವ ದಲೈ ಲಾಮಾ ಅವರು, “ಈ ಮನ್ನಣೆಯನ್ನು ನಾನು ಅತ್ಯಂತ ವಿನಮ್ರತೆಯಿಂದ ಸ್ವೀಕರಿಸುತ್ತೇನೆ. ಇದನ್ನು ನಾನು ವೈಯಕ್ತಿಕ ಸಾಧನೆ ಎಂದು ಭಾವಿಸುವುದಿಲ್ಲ, ಬದಲಾಗಿ ಜಾಗತಿಕ ಜವಾಬ್ದಾರಿಗೆ ಸಿಕ್ಕ ಮನ್ನಣೆ ಎಂದು ಪರಿಗಣಿಸುತ್ತೇನೆ. ಶಾಂತಿ, ಕರುಣೆ ಮತ್ತು ಪರಿಸರದ ಕಾಳಜಿಯ ಸಂದೇಶವನ್ನು ಈ ಪ್ರಶಸ್ತಿಯ ಮೂಲಕ ಎಂಟು ಶತಕೋಟಿ ಜನರಿಗೆ ತಲುಪಿಸಲು ಸಾಧ್ಯವಾಗುತ್ತಿರುವುದಕ್ಕೆ ನನಗೆ ಸಂತೋಷವಿದೆ,” ಎಂದು ಹೇಳಿದ್ದಾರೆ. ದಲೈ ಲಾಮಾ ಅವರ ಪರವಾಗಿ ಸಂಗೀತಗಾರ ರೂಫಸ್ ವೈನ್ ರೈಟ್ ಅವರು ವೇದಿಕೆಯಲ್ಲಿ ಪ್ರಶಸ್ತಿಯನ್ನು ಸ್ವೀಕರಿಸಿದ್ದಾರೆ.
ಮನರಂಜನಾ ಕ್ಷೇತ್ರದ ಹೊರಗಿನ ಸಾಧಕರು
ಕೇವಲ ಗಾಯಕರು ಅಥವಾ ಸಂಗೀತಗಾರರಿಗೆ ಮಾತ್ರ ಗ್ರ್ಯಾಮಿ ಸೀಮಿತವಾಗಿಲ್ಲ ಎಂಬುದನ್ನು ದಲೈ ಲಾಮಾ ಅವರ ಗೆಲುವು ಮತ್ತೊಮ್ಮೆ ಸಾಬೀತುಪಡಿಸಿದೆ. ಈ ಹಿಂದೆ ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಎರಡು ಬಾರಿ ಗ್ರ್ಯಾಮಿ ಪ್ರಶಸ್ತಿ ಗೆದ್ದಿದ್ದರು. ಅವರ ಪತ್ನಿ ಮಿಚೆಲ್ ಒಬಾಮಾ ಕೂಡ ತಮ್ಮ ಆತ್ಮಕಥೆಗಳ ಧ್ವನಿ ಮುದ್ರಣಕ್ಕಾಗಿ ಎರಡು ಗ್ರ್ಯಾಮಿ ಪ್ರಶಸ್ತಿಗಳನ್ನು ಪಡೆದಿದ್ದಾರೆ. ಇನ್ನು ಆಪಲ್ ಸಂಸ್ಥೆಯ ಸ್ಟೀವ್ ಜಾಬ್ಸ್ ಅವರಿಗೆ ಸಂಗೀತ ಕ್ಷೇತ್ರಕ್ಕೆ ನೀಡಿದ ತಾಂತ್ರಿಕ ಕೊಡುಗೆಗಾಗಿ ಮರಣೋತ್ತರ ಗೌರವ ನೀಡಲಾಗಿತ್ತು. ಇದೀಗ ಆ ಸಾಲಿಗೆ ಈಗ ದಲೈ ಲಾಮಾ ಅವರ ಹೆಸರೂ ಸೇರ್ಪಡೆಯಾಗಿದೆ.
ಇದನ್ನೂ ಓದಿ : ಧೂಮಪಾನಿಗಳಿಗೆ ಶಾಕ್ | ನಿನ್ನೆಯಿಂದಲೇ ಸಿಗರೇಟ್ ಬೆಲೆ ಭಾರೀ ಏರಿಕೆ, ಪ್ಯಾಕೆಟ್ ಮೇಲೆ 55 ರೂ.ವರೆಗೆ ಹೆಚ್ಚಳ!
