ಕರ್ನೂಲ್: ಪ್ರೀತಿ ವಿಫಲವಾದಾಗ ಅಸೂಯೆ ಮತ್ತು ಸೇಡಿನ ಕಿಚ್ಚು ಯಾವ ಮಟ್ಟಕ್ಕೆ ಹೋಗಬಹುದು ಎಂಬುದಕ್ಕೆ ಆಂಧ್ರಪ್ರದೇಶದ ಕರ್ನೂಲ್ ಜಿಲ್ಲೆಯಲ್ಲಿ ನಡೆದ ಈ ಘಟನೆಯೇ ಸಾಕ್ಷಿ. ತನ್ನ ಮಾಜಿ ಪ್ರಿಯಕರ ಮತ್ತೊಬ್ಬ ಮಹಿಳೆಯನ್ನು ಮದುವೆಯಾಗಿದ್ದಾನೆ ಎಂಬ ಕಾರಣಕ್ಕೆ, ಆತನ ಪತ್ನಿಗೇ ಎಚ್ಐವಿ ಸೋಂಕಿತ ರಕ್ತವನ್ನು ಇಂಜೆಕ್ಷನ್ ಮೂಲಕ ನೀಡಿದ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ.
ನಟನೆಯ ಮೂಲಕ ನಡೆದ ಸಂಚು
ಆರೋಪಿ ಮಹಿಳೆ ಬಿ. ಬೋಯಾ ವಸುಂಧರಾ (34) ಮತ್ತು ಕರ್ನೂಲ್ನ ವೈದ್ಯರೊಬ್ಬರು ಈ ಹಿಂದೆ ಪ್ರೀತಿಸುತ್ತಿದ್ದರು. ಆದರೆ ಕೆಲವು ಕಾರಣಗಳಿಂದ ಅವರು ಬೇರ್ಪಟ್ಟಿದ್ದರು. ನಂತರ ವೈದ್ಯರು ಮತ್ತೊಬ್ಬ ಮಹಿಳಾ ವೈದ್ಯೆಯನ್ನು ವಿವಾಹವಾದರು. ಇದನ್ನು ಸಹಿಸದ ವಸುಂಧರಾ, ದಂಪತಿಯನ್ನು ಬೇರ್ಪಡಿಸಲು ಹತ್ತಿರದ ಖಾಸಗಿ ಆಸ್ಪತ್ರೆಯ ನರ್ಸ್ ಕೊಂಗೆ ಜ್ಯೋತಿ ಎಂಬುವವರೊಂದಿಗೆ ಸೇರಿ ಭೀಕರ ಸಂಚು ರೂಪಿಸಿದ್ದಳು. ಸಂಶೋಧನೆಯ ನೆಪದಲ್ಲಿ ಸರ್ಕಾರಿ ಆಸ್ಪತ್ರೆಯಿಂದ ಎಚ್ಐವಿ ಸೋಂಕಿತ ರಕ್ತದ ಮಾದರಿಗಳನ್ನು ಸಂಗ್ರಹಿಸಿ, ಅದನ್ನು ಮನೆಯ ಫ್ರಿಡ್ಜ್ನಲ್ಲಿ ಶೇಖರಿಸಿಟ್ಟಿದ್ದಳು.
ರಸ್ತೆ ಅಪಘಾತದ ನಾಟಕ ಮತ್ತು ದಾಳಿ
ಜ.9 ರಂದು ಮಧ್ಯಾಹ್ನ ಸಂತ್ರಸ್ತ ಮಹಿಳಾ ವೈದ್ಯೆ ಕಾಲೇಜಿನಿಂದ ಮನೆಗೆ ಹಿಂದಿರುಗುತ್ತಿದ್ದಾಗ, ವಿನಾಯಕ ಘಾಟ್ ಬಳಿ ಆರೋಪಿಗಳು ಮೋಟಾರ್ಸೈಕಲ್ನಿಂದ ಉದ್ದೇಶಪೂರ್ವಕವಾಗಿ ಆಕೆಯ ಸ್ಕೂಟರ್ಗೆ ಡಿಕ್ಕಿ ಹೊಡೆದಿದ್ದಾರೆ. ಅಪಘಾತದಲ್ಲಿ ಬಿದ್ದ ವೈದ್ಯೆಗೆ ಸಹಾಯ ಮಾಡುವಂತೆ ನಟಿಸಿದ ವಸುಂಧರಾ ಮತ್ತು ತಂಡ, ಆಕೆಯನ್ನು ಆಟೋರಿಕ್ಷಾ ಹತ್ತಿಸುವ ನೆಪದಲ್ಲಿ ಎಚ್ಐವಿ ಸೋಂಕಿತ ರಕ್ತವಿದ್ದ ಇಂಜೆಕ್ಷನ್ ಅನ್ನು ದೇಹಕ್ಕೆ ಚುಚ್ಚಿದ್ದಾರೆ. ವೈದ್ಯೆ ಕಿರುಚಾಡಿದಾಗ ಆರೋಪಿಗಳು ಸ್ಥಳದಿಂದ ಪರಾರಿಯಾಗಿದ್ದಾರೆ.
ಘಟನೆಯ ನಂತರ ಸಂತ್ರಸ್ತೆಯ ಪತಿ ನೀಡಿದ ದೂರಿನ ಮೇರೆಗೆ ಕರ್ನೂಲ್ ಪೊಲೀಸರು ತನಿಖೆ ಆರಂಭಿಸಿದ್ದರು. ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಸತ್ಯ ಹೊರಬಂದಿದೆ. ಪ್ರಮುಖ ಆರೋಪಿ ವಸುಂಧರಾ ಸೇರಿದಂತೆ ನರ್ಸ್ ಜ್ಯೋತಿ ಮತ್ತು ಕೃತ್ಯಕ್ಕೆ ಸಹಕರಿಸಿದ ಜ್ಯೋತಿಯ ಇಬ್ಬರು ಮಕ್ಕಳನ್ನು ಪೊಲೀಸರು ಬಂಧಿಸಿದ್ದಾರೆ. ಆರೋಪಿಗಳ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯ (BNS) ವಿವಿಧ ಸೆಕ್ಷನ್ಗಳ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದ್ದು, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.
ಸಂತ್ರಸ್ತೆಯೂ ವೈದ್ಯೆಯಾಗಿರುವುದರಿಂದ ತಕ್ಷಣವೇ ಮುನ್ನೆಚ್ಚರಿಕೆ ಕ್ರಮವಾಗಿ ಚಿಕಿತ್ಸೆ ಮತ್ತು ಔಷಧಿಗಳನ್ನು ಪಡೆದುಕೊಂಡಿದ್ದಾರೆ. ವೈದ್ಯಕೀಯ ವರದಿಗಳ ಪ್ರಕಾರ, ಫ್ರಿಡ್ಜ್ನಲ್ಲಿಟ್ಟ ರಕ್ತದಲ್ಲಿ ವೈರಸ್ ದೀರ್ಘಕಾಲ ಬದುಕುವ ಸಾಧ್ಯತೆ ಕಡಿಮೆ ಇರುವುದರಿಂದ ಸಂತ್ರಸ್ತೆಯ ಜೀವಕ್ಕೆ ಸದ್ಯಕ್ಕೆ ಅಪಾಯವಿಲ್ಲ ಎಂದು ಹೇಳಲಾಗಿದೆಯಾದರೂ, ಮುನ್ನೆಚ್ಚರಿಕೆಯಾಗಿ ಅವರು ನಿರಂತರ ನಿಗಾದಲ್ಲಿದ್ದಾರೆ.
ಇದನ್ನೂ ಓದಿ: ಕೆ.ಸಿ ಜನರಲ್ ಆಸ್ಪತ್ರೆಯನ್ನು ವೈದ್ಯಕೀಯ, ಸಂಶೋಧನಾ ಮಹಾವಿದ್ಯಾಲಯವಾಗಿ ಉನ್ನತ್ತೀಕರಿಸಲು ಸರ್ಕಾರ ಸಜ್ಜು
