ನವದೆಹಲಿ: ಟೆಕ್ ದೈತ್ಯ ಆಪಲ್ (Apple) ತನ್ನ ಮುಂದಿನ ಪೀಳಿಗೆಯ ಸ್ಮಾರ್ಟ್ಫೋನ್ಗಳ ಅಭಿವೃದ್ಧಿಯಲ್ಲಿ ನಿರತವಾಗಿದೆ. 2026ರಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಡಲಿರುವ ‘ಐಫೋನ್ 18 ಪ್ರೊ’ (iPhone 18 Pro) ಸರಣಿಯ ಬಗ್ಗೆ ಈಗಲೇ ಭಾರಿ ಚರ್ಚೆಗಳು ಶುರುವಾಗಿವೆ. ಡಿಸೈನ್, ಕಾರ್ಯಕ್ಷಮತೆ, ಕ್ಯಾಮೆರಾ ಮತ್ತು ಬ್ಯಾಟರಿ ಬಾಳಿಕೆಯಲ್ಲಿ ದೊಡ್ಡ ಮಟ್ಟದ ಅಪ್ಗ್ರೇಡ್ಗಳನ್ನು ಇದು ಹೊತ್ತು ತರಲಿದೆ ಎಂದು ತಂತ್ರಜ್ಞಾನ ವಲಯದ ಮೂಲಗಳು ತಿಳಿಸಿವೆ. ಹಾಗಾದರೆ, ಐಫೋನ್ 18 ಪ್ರೊನಲ್ಲಿ ಏನೆಲ್ಲಾ ಹೊಸ ಫೀಚರ್ಗಳನ್ನು ನಿರೀಕ್ಷಿಸಬಹುದು? ಇಲ್ಲಿದೆ ವಿವರ.
- ಡಿಸೈನ್ ಬದಲಾವಣೆ: ಕುಗ್ಗಲಿದೆ ‘ಡೈನಾಮಿಕ್ ಐಲ್ಯಾಂಡ್’
ಐಫೋನ್ 18 ಪ್ರೊನಲ್ಲಿ ಡಿಸೈನ್ ಬದಲಾವಣೆ ಪ್ರಮುಖ ಆಕರ್ಷಣೆಯಾಗಲಿದೆ. ಫೇಸ್ ಐಡಿ (Face ID) ಸೆನ್ಸಾರ್ಗಳನ್ನು ಡಿಸ್ಪ್ಲೇಯ ಕೆಳಗೆ ಅಳವಡಿಸುವ ತಂತ್ರಜ್ಞಾನವನ್ನು ಆಪಲ್ ಪರಿಚಯಿಸುವ ಸಾಧ್ಯತೆಯಿದೆ. ಇದರಿಂದಾಗಿ ಸ್ಕ್ರೀನ್ ಮೇಲಿನ ‘ಡೈನಾಮಿಕ್ ಐಲ್ಯಾಂಡ್’ ಗಾತ್ರ ಚಿಕ್ಕದಾಗಲಿದ್ದು, ಬಳಕೆದಾರರಿಗೆ ಹೆಚ್ಚು ಕ್ಲೀನ್ ಆದ ಡಿಸ್ಪ್ಲೇ ಅನುಭವ ಸಿಗಲಿದೆ. - ಹೊಸ ಬಣ್ಣಗಳು ಮತ್ತು ಪ್ರೀಮಿಯಂ ಲುಕ್
ಐಫೋನ್ 17 ಪ್ರೊನ ಟೂ-ಟೋನ್ (Two-tone) ವಿನ್ಯಾಸಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾದ ಹಿನ್ನೆಲೆಯಲ್ಲಿ, ಐಫೋನ್ 18 ಪ್ರೊನಲ್ಲಿ ಏಕರೂಪದ (Unified) ಹಿಂಬದಿ ವಿನ್ಯಾಸವನ್ನು ನೀಡಲು ಆಪಲ್ ಮುಂದಾಗಿದೆ. ಅಲ್ಯೂಮಿನಿಯಂ ಫ್ರೇಮ್ ಮತ್ತು ಗ್ಲಾಸ್ ಬ್ಯಾಕ್ ನಡುವೆ ಉತ್ತಮ ಕಲರ್ ಬ್ಲೆಂಡಿಂಗ್ ಇರಲಿದೆ. ಜೊತೆಗೆ ಕಾಫಿ ಬ್ರೌನ್, ಪರ್ಪಲ್ ಮತ್ತು ಬರ್ಗಂಡಿಯಂತಹ ಹೊಸ ಬಣ್ಣಗಳ ಆಯ್ಕೆಯನ್ನು ನಿರೀಕ್ಷಿಸಬಹುದು. - ಎ20 ಪ್ರೊ ಚಿಪ್: ಸೂಪರ್ ಫಾಸ್ಟ್ ಪ್ರೊಸೆಸರ್
ಕಾರ್ಯಕ್ಷಮತೆಯಲ್ಲಿ ಐಫೋನ್ 18 ಪ್ರೊ ದೊಡ್ಡ ಜಿಗಿತ ಕಾಣಲಿದೆ. ಇದರಲ್ಲಿ 2nm (ನ್ಯಾನೊಮೀಟರ್) ತಂತ್ರಜ್ಞಾನ ಆಧಾರಿತ ‘ಎ20 ಪ್ರೊ’ (A20 Pro) ಚಿಪ್ ಅಳವಡಿಸುವ ಸಾಧ್ಯತೆಯಿದೆ. ಇದು ಫೋನಿನ ವೇಗವನ್ನು ಹೆಚ್ಚಿಸುವುದಲ್ಲದೆ, ಕೃತಕ ಬುದ್ಧಿಮತ್ತೆ (AI) ಮತ್ತು ಗೇಮಿಂಗ್ಗೆ ಅದ್ಭುತ ಬೆಂಬಲ ನೀಡಲಿದೆ. - ವೇರಿಯಬಲ್ ಅಪರ್ಚರ್ ಕ್ಯಾಮೆರಾ
ಛಾಯಾಗ್ರಹಣ ಪ್ರಿಯರಿಗೆ ಇದು ಗುಡ್ ನ್ಯೂಸ್. ಐಫೋನ್ 18 ಪ್ರೊನಲ್ಲಿ ‘ವೇರಿಯಬಲ್ ಅಪರ್ಚರ್’ (Variable Aperture) ಇರುವ ಮೇನ್ ಕ್ಯಾಮೆರಾ ಬರುವ ನಿರೀಕ್ಷೆಯಿದೆ. ಅಂದರೆ, ಬೆಳಕಿಗೆ ಅನುಗುಣವಾಗಿ ಲೆನ್ಸ್ ತನ್ನಷ್ಟಕ್ಕೇ ಹೊಂದಾಣಿಕೆ ಮಾಡಿಕೊಳ್ಳುತ್ತದೆ. ಇದರಿಂದ ಪೋರ್ಟ್ರೇಟ್ ಫೋಟೋಗಳಲ್ಲಿ ಹಿನ್ನೆಲೆ ಮಸುಕು (Blur) ಮಾಡುವುದು ಅಥವಾ ಲ್ಯಾಂಡ್ಸ್ಕೇಪ್ ಫೋಟೋಗಳಲ್ಲಿ ಎಲ್ಲವನ್ನೂ ಸ್ಪಷ್ಟವಾಗಿ ಸೆರೆಹಿಡಿಯುವುದು ಸುಲಭವಾಗಲಿದೆ. ಡಿಎಸ್ಎಲ್ಆರ್ ಕ್ಯಾಮೆರಾದ ಅನುಭವವನ್ನು ಇದು ನೀಡಲಿದೆ. - ಬ್ಯಾಟರಿ ಬಾಳಿಕೆಯಲ್ಲಿ ಸುಧಾರಣೆ
ಹಿಂದಿನ ಮಾದರಿಗಳಿಗಿಂತ ದೊಡ್ಡದಾದ ಬ್ಯಾಟರಿಯನ್ನು ಐಫೋನ್ 18 ಪ್ರೊ ಮ್ಯಾಕ್ಸ್ ಹೊಂದಿರಲಿದೆ ಎಂದು ಹೇಳಲಾಗುತ್ತಿದೆ. ಫೋನಿನ ದಪ್ಪ ಮತ್ತು ತೂಕ ಸ್ವಲ್ಪ ಹೆಚ್ಚಾಗಲಿದ್ದು, ಇದು ದೀರ್ಘಕಾಲದ ಬ್ಯಾಟರಿ ಬಾಳಿಕೆಗೆ ಸಾಕ್ಷಿಯಾಗಲಿದೆ. ಸಣ್ಣ ಪ್ರೊ ಮಾದರಿಯಲ್ಲೂ ಬ್ಯಾಟರಿ ಸಾಮರ್ಥ್ಯ ಹೆಚ್ಚಿಸುವ ಸಾಧ್ಯತೆಯಿದೆ. - ಕ್ಯಾಮೆರಾ ಕಂಟ್ರೋಲ್ ಬಟನ್ ಬದಲಾವಣೆ
ಈ ಹಿಂದೆ ಪರಿಚಯಿಸಲಾಗಿದ್ದ ಟಚ್-ಸೆನ್ಸಿಟಿವ್ ಕ್ಯಾಮೆರಾ ಬಟನ್ ಬಗ್ಗೆ ಕೆಲವರಿಂದ ಟೀಕೆಗಳು ವ್ಯಕ್ತವಾಗಿದ್ದವು. ಹೀಗಾಗಿ, ಐಫೋನ್ 18 ಪ್ರೊನಲ್ಲಿ ಆಪಲ್ ಸರಳೀಕೃತ ಮತ್ತು ಹೆಚ್ಚು ವಿಶ್ವಾಸಾರ್ಹವಾದ ಕ್ಯಾಮೆರಾ ಬಟನ್ ಅನ್ನು ಪರಿಚಯಿಸುವ ಸಾಧ್ಯತೆಯಿದೆ. ಟಚ್ ಗೆಸ್ಚರ್ಗಳನ್ನು ತೆಗೆದುಹಾಕಿ, ನೇರವಾದ ಕಂಟ್ರೋಲ್ ನೀಡಬಹುದು. - ಆಪಲ್ನ ಸ್ವಂತ 5ಜಿ ಮೋಡೆಮ್
ಕನೆಕ್ಟಿವಿಟಿ ವಿಚಾರದಲ್ಲಿ ಆಪಲ್ ಮಹತ್ವದ ಬದಲಾವಣೆ ಮಾಡುತ್ತಿದೆ. ಕ್ವಾಲ್ಕಾಮ್ (Qualcomm) ಮೋಡೆಮ್ಗಳ ಮೇಲಿನ ಅವಲಂಬನೆ ಕಡಿಮೆ ಮಾಡಲು, ತನ್ನದೇ ಆದ ‘C2 ಮೋಡೆಮ್’ ಅನ್ನು ಐಫೋನ್ 18 ಪ್ರೊನಲ್ಲಿ ಬಳಸುವ ಸಾಧ್ಯತೆಯಿದೆ. ಇದು ಬ್ಯಾಟರಿ ಉಳಿತಾಯದ ಜೊತೆಗೆ ಉತ್ತಮ 5ಜಿ ನೆಟ್ವರ್ಕ್ ಅನುಭವ ನೀಡಲಿದೆ.
ಒಟ್ಟಾರೆಯಾಗಿ, 2026ರಲ್ಲಿ ಬಿಡುಗಡೆಯಾಗಲಿರುವ ಐಫೋನ್ 18 ಪ್ರೊ, ಕೇವಲ ಸಾಧಾರಣ ಅಪ್ಗ್ರೇಡ್ ಆಗಿರದೆ, ಸ್ಮಾರ್ಟ್ಫೋನ್ ಲೋಕದಲ್ಲಿ ಹೊಸ ಸಂಚಲನ ಮೂಡಿಸುವ ಎಲ್ಲಾ ಲಕ್ಷಣಗಳನ್ನು ಹೊಂದಿದೆ.
ಇದನ್ನೂ ಓದಿ : ಮಾರುತಿ ಸುಜುಕಿ ಸೆಲೆರಿಯೊ ಕ್ರ್ಯಾಶ್ ಟೆಸ್ಟ್ ವರದಿ ಇಲ್ಲಿದೆ.. ಎಷ್ಟಿದೆ ಓದಿ ನೋಡಿ..
