“ಇದೇ ಧೋನಿಯ ಲಾಸ್ಟ್ ಸೀಸನ್”; ಮಾಹಿತಿ ನಿವೃತ್ತಿ ಬಗ್ಗೆ ಬಾಂಬ್ ಸಿಡಿಸಿದ ಆಪ್ತ ಸ್ನೇಹಿತ!

ಮುಂಬೈ: ಭಾರತೀಯ ಕ್ರಿಕೆಟ್ ಕಂಡ ಶ್ರೇಷ್ಠ ನಾಯಕ ಎಂ.ಎಸ್. ಧೋನಿ (MS Dhoni) ಅವರ ಐಪಿಎಲ್ ಭವಿಷ್ಯದ ಬಗ್ಗೆ ಕಳೆದ ಕೆಲವು ವರ್ಷಗಳಿಂದ ನಡೆಯುತ್ತಿದ್ದ ಊಹಾಪೋಹಗಳಿಗೆ ಕೊನೆಗೂ ತೆರೆಬಿದ್ದಂತಿದೆ. ಮುಂಬರುವ 19ನೇ ಆವೃತ್ತಿಯ ಐಪಿಎಲ್ ಟೂರ್ನಿಯೇ ಧೋನಿಯ ಪಾಲಿಗೆ ಕೊನೆಯದಾಗಲಿದೆ ಎಂದು ಅವರ ಮಾಜಿ ಸಹ ಆಟಗಾರ ಹಾಗೂ ಆಪ್ತ ಸ್ನೇಹಿತ ರಾಬಿನ್ ಉತ್ತಪ್ಪ (Robin Uthappa) ಸ್ಪಷ್ಟಪಡಿಸಿದ್ದಾರೆ.
ಅಬುಧಾಬಿಯಲ್ಲಿ ಐಪಿಎಲ್ ಮಿನಿ ಹರಾಜು (IPL Mini Auction) ಪ್ರಕ್ರಿಯೆ ಮುಗಿದ ಬೆನ್ನಲ್ಲೇ ಜಿಯೋಹಾಟ್‌ಸ್ಟಾರ್‌ ಜೊತೆ ಮಾತನಾಡಿರುವ ಉತ್ತಪ್ಪ, ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡದ ಭವಿಷ್ಯದ ನಡೆಯ ಬಗ್ಗೆ ಮಹತ್ವದ ಸುಳಿವು ನೀಡಿದ್ದಾರೆ.

ನಿವೃತ್ತಿ ನಂತರ ‘ಮೆಂಟರ್’ ಧೋನಿ?

“ಈ ಬಾರಿ ಧೋನಿ ಇನ್ನೊಂದು ವರ್ಷ ಆಡುತ್ತಾರೋ ಇಲ್ಲವೋ ಎಂಬ ಗೊಂದಲ ಬೇಡ. ಇದು ಖಂಡಿತವಾಗಿಯೂ ಅವರ ಕೊನೆಯ ಸೀಸನ್ ಆಗಿರಲಿದೆ,” ಎಂದು ಉತ್ತಪ್ಪ ಭವಿಷ್ಯ ನುಡಿದಿದ್ದಾರೆ. ಆದರೆ, ಮೈದಾನದಿಂದ ನಿವೃತ್ತರಾದರೂ ಫ್ರಾಂಚೈಸಿಯೊಂದಿಗಿನ ಅವರ ನಂಟು ಕಡಿದುಕೊಳ್ಳುವುದಿಲ್ಲ. ಧೋನಿ ಆಟಗಾರನ ಪಾತ್ರದಿಂದ ಮಾರ್ಗದರ್ಶಕನ (Mentor) ಪಾತ್ರಕ್ಕೆ ಬಡ್ತಿ ಪಡೆಯುವುದು ಬಹುತೇಕ ಖಚಿತ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಸಿಎಸ್‌ಕೆ ತಂತ್ರದಲ್ಲಾದ ಬದಲಾವಣೆ ಏನು?

ಚೆನ್ನೈ ತಂಡದ ಇತ್ತೀಚಿನ ನಡೆಗಳು ಧೋನಿ ನಿವೃತ್ತಿಗೆ ವೇದಿಕೆ ಸಜ್ಜುಗೊಳಿಸುತ್ತಿವೆ ಎಂದು ಉತ್ತಪ್ಪ ವಿಶ್ಲೇಷಿಸಿದ್ದಾರೆ.
ಯುವಕರ ಮೇಲೆ ಹೂಡಿಕೆ: ಅನುಭವಿಗಳಿಗೆ ಮಣೆ ಹಾಕುತ್ತಿದ್ದ ‘ಡ್ಯಾಡೀಸ್ ಆರ್ಮಿ’ ಖ್ಯಾತಿಯ ಸಿಎಸ್‌ಕೆ, ಈಗ ನಾಟಕೀಯವಾಗಿ ತನ್ನ ತಂತ್ರ ಬದಲಿಸಿದೆ. ಹರಾಜಿನಲ್ಲಿ ಕಿರಿಯ ಆಟಗಾರರ ಮೇಲೆ ಕೋಟಿ ಕೋಟಿ ಸುರಿಯುತ್ತಿರುವುದು ಇದಕ್ಕೆ ಸಾಕ್ಷಿ.

ಸಂಜು ಸ್ಯಾಮ್ಸನ್ ಎಂಟ್ರಿ: ರಾಜಸ್ಥಾನ್ ರಾಯಲ್ಸ್‌ನಿಂದ ಸಂಜು ಸ್ಯಾಮ್ಸನ್ ತಂಡ ಸೇರ್ಪಡೆಯಾಗಿರುವುದು ನಾಯಕತ್ವದ ಬದಲಾವಣೆ ಮತ್ತು ತಂಡದ ಭವಿಷ್ಯದ ದೃಷ್ಟಿಯಿಂದ ಮಹತ್ವದ ಬೆಳವಣಿಗೆಯಾಗಿದೆ.

ಪ್ರತಿಭೆಗಳ ಶೋಧ: ಕಳೆದ ಋತುವಿನಲ್ಲಿ ಡೆವಾಲ್ಡ್ ಬ್ರೆವಿಸ್ (22), ಆಯುಷ್ ಮ್ಹಾತ್ರೆ (18) ಮತ್ತು ಉರ್ವಿಲ್ ಪಟೇಲ್ (27) ಅವರಂತಹ ಕಿರಿಯರಿಗೆ ಅವಕಾಶ ನೀಡಿ ಯಶಸ್ಸು ಕಂಡಿತ್ತು. ಧೋನಿ ಈಗ ಪ್ರತಿಭೆಗಳನ್ನು ಗುರುತಿಸಿ, ಅವರನ್ನು ಫ್ರಾಂಚೈಸಿಯ ಆಸ್ತಿಯನ್ನಾಗಿ ಮಾಡುವ ಗುರಿ ಹೊಂದಿದ್ದಾರೆ.

ಹರಾಜಿನಲ್ಲಿ ಅನ್‌ಕ್ಯಾಪ್ಡ್ ಆಟಗಾರರಿಗೆ ಜಾಕ್‌ಪಾಟ್!

ಮಂಗಳವಾರ ನಡೆದ ಐಪಿಎಲ್ 2026ರ ಮಿನಿ ಹರಾಜಿನಲ್ಲಿ ಸಿಎಸ್‌ಕೆ ನಡೆ ಎಲ್ಲರ ಹುಬ್ಬೇರಿಸಿದೆ. ಭವಿಷ್ಯದ ತಂಡ ಕಟ್ಟುವ ನಿಟ್ಟಿನಲ್ಲಿ ಇಬ್ಬರು ಅನ್‌ಕ್ಯಾಪ್ಡ್ (ಅಂತಾರಾಷ್ಟ್ರೀಯ ಪಂದ್ಯ ಆಡದ) ಆಟಗಾರರಿಗೆ ದಾಖಲೆಯ ಮೊತ್ತ ನೀಡಿದೆ.

ಪ್ರಶಾಂತ್ ವೀರ್: 19 ವರ್ಷದ ಉತ್ತರ ಪ್ರದೇಶದ ಎಡಗೈ ಸ್ಪಿನ್ನರ್ ಮತ್ತು ಬಿಗ್ ಹಿಟ್ಟರ್ – 14.2 ಕೋಟಿ ರೂ.
ಕಾರ್ತಿಕ್ ಶರ್ಮಾ: 20 ವರ್ಷದ ವಿಕೆಟ್ ಕೀಪರ್-ಬ್ಯಾಟರ್ – 14.2 ಕೋಟಿ ರೂ.
ಐಪಿಎಲ್ ಇತಿಹಾಸದಲ್ಲೇ ಅನ್‌ಕ್ಯಾಪ್ಡ್ ಆಟಗಾರರಿಗೆ ಸಿಕ್ಕ ಗರಿಷ್ಠ ಮೊತ್ತ ಇದಾಗಿದ್ದು, ಸಿಎಸ್‌ಕೆ ಯುವಪಡೆಯ ಮೇಲೆ ಎಷ್ಟು ನಂಬಿಕೆ ಇಟ್ಟಿದೆ ಎಂಬುದನ್ನು ಇದು ತೋರಿಸುತ್ತದೆ. “ಈ ಎಲ್ಲಾ ಬೆಳವಣಿಗೆಗಳನ್ನು ನೋಡಿದರೆ, ಧೋನಿ ಮಾರ್ಗದರ್ಶಕನ ಪಾತ್ರಕ್ಕೆ ಮಾನಸಿಕವಾಗಿ ಮತ್ತು ತಾಂತ್ರಿಕವಾಗಿ ತಂಡವನ್ನು ಸಜ್ಜುಗೊಳಿಸುತ್ತಿದ್ದಾರೆ,” ಎಂದು ಉತ್ತಪ್ಪ ಹೇಳಿದ್ದಾರೆ.
ಇದನ್ನೂ ಓದಿ : ಹೊಸ ವರ್ಷಕ್ಕೆ ಹೊಸ ರೂಲ್ಸ್‌ | ಸಿಲಿಕಾನ್ ಸಿಟಿಯಲ್ಲಿ ನ್ಯೂ ಇಯರ್ ಗುಂಗಲ್ಲಿದ್ದವರಿಗೆ ಬೀಳಲಿದೆ ಲಗಾಮು