ಕ್ರಿಕೆಟ್‌ಗಿಂತ ನನಗೆ ಬೇರೆ ಯಾವುದೂ ಮುಖ್ಯವಲ್ಲ : ಮದುವೆ ರದ್ದಾದ ಬಳಿಕ ಸ್ಮೃತಿ ಮಂಧಾನ ಮನದಾಳದ ಮಾತು

ನವದೆಹಲಿ: ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ತಾರಾ ಆಟಗಾರ್ತಿ ಹಾಗೂ ಉಪನಾಯಕಿ ಸ್ಮೃತಿ ಮಂಧಾನ ಅವರು ತಮ್ಮ ಮದುವೆ ರದ್ದಾದ ಬಳಿಕ ಇದೇ ಮೊದಲ ಬಾರಿಗೆ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದು, ತಮ್ಮ ವೃತ್ತಿಜೀವನ ಮತ್ತು ವೈಯಕ್ತಿಕ ಆದ್ಯತೆಗಳ ಕುರಿತು ಮಹತ್ವದ ಹೇಳಿಕೆ ನೀಡಿದ್ದಾರೆ. ಕಳೆದ 12 ವರ್ಷಗಳ ತಮ್ಮ ಕ್ರಿಕೆಟ್ ಪಯಣದಲ್ಲಿ ಒಂದು ಸತ್ಯ ತಮಗೆ ಸ್ಪಷ್ಟವಾಗಿದೆ ಎಂದಿರುವ ಅವರು, “ನನಗೆ ಕ್ರಿಕೆಟ್‌ಗಿಂತ ಹೆಚ್ಚು ಪ್ರೀತಿಸುವ ವಿಷಯ ಬೇರಾವುದೂ ಇಲ್ಲ,” ಎಂದು ಸ್ಪಷ್ಟಪಡಿಸಿದ್ದಾರೆ.
ಪಲಾಶ್ ಮುಚ್ಚಲ್ ಅವರೊಂದಿಗಿನ ಮದುವೆ ನಿಶ್ಚಿತಾರ್ಥವನ್ನು ರದ್ದುಗೊಳಿಸಿದ ಕೆಲವೇ ದಿನಗಳ ನಂತರ ಸ್ಮೃತಿ ಮಂಧಾನ ಈ ಹೇಳಿಕೆ ನೀಡಿದ್ದಾರೆ. ನವದೆಹಲಿಯ ಭಾರತ್ ಮಂಟಪದಲ್ಲಿ ನಡೆದ ‘ಅಮೆಜಾನ್ ಸಂಭವ್ ಸಮಿಟ್’ನಲ್ಲಿ ನಾಯಕಿ ಹರ್ಮನ್‌ಪ್ರೀತ್ ಕೌರ್ ಅವರೊಂದಿಗೆ ಭಾಗವಹಿಸಿದ ಸ್ಮೃತಿ, 2013ರಲ್ಲಿ ಆರಂಭವಾದ ತಮ್ಮ ಕ್ರಿಕೆಟ್ ವೃತ್ತಿಜೀವನದಿಂದ ಹಿಡಿದು ಕಳೆದ ತಿಂಗಳು ನಡೆದ ವಿಶ್ವಕಪ್ ಗೆಲುವಿನವರೆಗಿನ ರೋಚಕ ಪಯಣವನ್ನು ಮೆಲುಕು ಹಾಕಿದರು.

ಟೀಮ್ ಇಂಡಿಯಾ ಜೆರ್ಸಿಯೇ ಸ್ಫೂರ್ತಿ

ಕಾರ್ಯಕ್ರಮದಲ್ಲಿ ಮಾತನಾಡಿದ ಸ್ಮೃತಿ, “ನಾನು ಕ್ರಿಕೆಟ್‌ಗಿಂತ ಹೆಚ್ಚಾಗಿ ಬೇರೆ ಯಾವುದನ್ನೂ ಪ್ರೀತಿಸುತ್ತೇನೆ ಎಂದು ನನಗನಿಸುವುದಿಲ್ಲ. ಭಾರತದ ಜೆರ್ಸಿ ಧರಿಸುವುದೇ ನಮಗೆ ಅತ್ಯಂತ ದೊಡ್ಡ ಸ್ಫೂರ್ತಿ. ಮೈದಾನಕ್ಕಿಳಿದಾಗ ಎಲ್ಲಾ ವೈಯಕ್ತಿಕ ಸಮಸ್ಯೆಗಳನ್ನು ಬದಿಗಿಟ್ಟು, ಕೇವಲ ಆಟದ ಮೇಲೆ ಗಮನ ಹರಿಸಲು ಆ ಜೆರ್ಸಿ ನಮಗೆ ಶಕ್ತಿ ನೀಡುತ್ತದೆ,” ಎಂದು ಭಾವನಾತ್ಮಕವಾಗಿ ನುಡಿದರು. ಮಗುವಾಗಿದ್ದಾಗ ಬ್ಯಾಟಿಂಗ್ ಬಗ್ಗೆ ತಮಗಿದ್ದ ಹುಚ್ಚುತನವನ್ನು ಯಾರೂ ಅರ್ಥಮಾಡಿಕೊಳ್ಳುತ್ತಿರಲಿಲ್ಲ, ಆದರೆ ವಿಶ್ವ ಚಾಂಪಿಯನ್ ಎನಿಸಿಕೊಳ್ಳಬೇಕೆಂಬ ಹಂಬಲ ಸದಾ ಮನಸ್ಸಿನಲ್ಲಿತ್ತು ಎಂದು ಅವರು ಸ್ಮರಿಸಿದರು.

ವಿಶ್ವಕಪ್ ಗೆಲುವು: ಹನ್ನೆರಡು ವರ್ಷಗಳ ತಪಸ್ಸು

ಭಾರತದ ಇತ್ತೀಚಿನ ವಿಶ್ವಕಪ್ ಗೆಲುವಿನ ಬಗ್ಗೆ ಮಾತನಾಡಿದ ಅವರು, ಇದು ವರ್ಷಗಳ ಹೋರಾಟಕ್ಕೆ ಸಿಕ್ಕ ಪ್ರತಿಫಲ ಎಂದು ಬಣ್ಣಿಸಿದರು. “ನಾನು ಕಳೆದ 12 ವರ್ಷಗಳಿಂದ ಆಡುತ್ತಿದ್ದೇನೆ. ಎಷ್ಟೋ ಬಾರಿ ಫಲಿತಾಂಶಗಳು ನಮ್ಮ ಪರವಾಗಿರಲಿಲ್ಲ. ಆದರೆ ಈ ಬಾರಿ ಫೈನಲ್‌ಗೂ ಮುನ್ನವೇ ನಾವು ಗೆಲುವನ್ನು ಕಲ್ಪಿಸಿಕೊಂಡಿದ್ದೆವು. ಪರದೆಯ ಮೇಲೆ ನಾವು ಗೆದ್ದಿರುವುದನ್ನು ಕಂಡಾಗ ಮೈ ರೋಮಾಂಚನವಾಯಿತು. ಅದೊಂದು ಅವಿಸ್ಮರಣೀಯ ಕ್ಷಣ,” ಎಂದು ಸಂತಸ ಹಂಚಿಕೊಂಡರು.

ವಿಶೇಷವಾಗಿ, ತಂಡದ ಹಿರಿಯ ಆಟಗಾರ್ತಿಯರಾದ ಮಿಥಾಲಿ ರಾಜ್ ಮತ್ತು ಜೂಲನ್ ಗೋಸ್ವಾಮಿ ಅವರ ಉಪಸ್ಥಿತಿ ಈ ಗೆಲುವನ್ನು ಹೆಚ್ಚು ಭಾವನಾತ್ಮಕವಾಗಿಸಿತು ಎಂದರು. “ನಾವು ಅವರಿಗಾಗಿಯೇ ಈ ಕಪ್ ಗೆಲ್ಲಲು ಬಯಸಿದ್ದೆವು. ಅವರ ಕಣ್ಣಲ್ಲಿ ಆನಂದಬಾಷ್ಪ ಕಂಡಾಗ, ಮಹಿಳಾ ಕ್ರಿಕೆಟ್ ಜಗತ್ತೇ ಗೆದ್ದಂತೆ ಭಾಸವಾಯಿತು. ಇದು ಅವರೆಲ್ಲರಿಗಾಗಿ ಗೆದ್ದ ಯುದ್ಧ,” ಎಂದು ಸ್ಮೃತಿ ಹಿರಿಯರಿಗೆ ಗೌರವ ಸಲ್ಲಿಸಿದರು.

ಶ್ರೀಲಂಕಾ ಸರಣಿಗೆ ಸಜ್ಜು

ವೈಯಕ್ತಿಕ ಜೀವನದ ಬದಲಾವಣೆಗಳ ನಡುವೆಯೂ ಸ್ಮೃತಿ ಮಂಧಾನ ಸಂಪೂರ್ಣವಾಗಿ ಕ್ರಿಕೆಟ್ ಕಡೆಗೆ ಗಮನ ಹರಿಸಿದ್ದಾರೆ. ಮದುವೆ ರದ್ದುಗೊಳಿಸಿದ ಮರುದಿನವೇ ಅವರ ಸಹೋದರ ಶ್ರವಣ್, ಸ್ಮೃತಿ ಮೈದಾನದಲ್ಲಿ ಅಭ್ಯಾಸ ನಡೆಸುತ್ತಿರುವ ಫೋಟೋವನ್ನು ಹಂಚಿಕೊಂಡಿದ್ದರು. ಇದೀಗ ಡಿಸೆಂಬರ್ 21ರಿಂದ ವಿಶಾಖಪಟ್ಟಣಂನಲ್ಲಿ ಶ್ರೀಲಂಕಾ ವಿರುದ್ಧ ಆರಂಭವಾಗಲಿರುವ ಐದು ಪಂದ್ಯಗಳ ಟಿ20 ಸರಣಿಗಾಗಿ ಪ್ರಕಟಿಸಲಾದ 15 ಸದಸ್ಯರ ಭಾರತೀಯ ತಂಡದಲ್ಲಿ ಸ್ಮೃತಿ ಮಂಧಾನ ಹೆಸರಿಸಲ್ಪಟ್ಟಿದ್ದಾರೆ.

ಡಿಸೆಂಬರ್ 7 ರಂದು ಪಲಾಶ್ ಮುಚ್ಚಲ್ ಅವರೊಂದಿಗಿನ ಮದುವೆಯನ್ನು ರದ್ದುಗೊಳಿಸುತ್ತಿರುವುದಾಗಿ ಸ್ಮೃತಿ ಘೋಷಿಸಿದ್ದರು. ಈ ವಿಷಯದಲ್ಲಿ ಗೌಪ್ಯತೆಯನ್ನು ಕಾಪಾಡುವಂತೆ ಕೋರಿದ್ದ ಅವರು, ಕ್ರಿಕೆಟ್ ತಮ್ಮ ಏಕೈಕ ಆದ್ಯತೆಯಾಗಿದ್ದು, ಭಾರತಕ್ಕೆ ಪ್ರಮುಖ ಟ್ರೋಫಿಗಳನ್ನು ಗೆದ್ದುಕೊಡುವುದು ತಮ್ಮ ಗುರಿ ಎಂದು ಸ್ಪಷ್ಟಪಡಿಸಿದ್ದರು. “ನೀವು ಹಿಂದೆ ಎಷ್ಟೇ ಶತಕಗಳನ್ನು ಬಾರಿಸಿದ್ದರೂ, ಪ್ರತಿ ಇನ್ನಿಂಗ್ಸ್ ಶೂನ್ಯದಿಂದಲೇ ಪ್ರಾರಂಭವಾಗುತ್ತದೆ ಮತ್ತು ಆಟವನ್ನು ನಿಮಗಾಗಿ ಆಡದೇ ತಂಡಕ್ಕಾಗಿ ಆಡಬೇಕು,” ಎಂಬ ಎರಡು ಪ್ರಮುಖ ಪಾಠಗಳನ್ನು ವಿಶ್ವಕಪ್ ತಮಗೆ ಕಲಿಸಿಕೊಟ್ಟಿದೆ ಎಂದು ಅವರು ತಿಳಿಸಿದರು.

ಇದನ್ನೂ ಓದಿ: ODI ಶ್ರೇಯಾಂಕದಲ್ಲಿ ಎರಡನೇ ಸ್ಥಾನಕ್ಕೆ ಜಿಗಿದ ವಿರಾಟ್‌ ಕೊಹ್ಲಿ | ಅಗ್ರಸ್ಥಾನ ಯಾರಿಗೆ?