ನವದೆಹಲಿ: ಸ್ಮಾರ್ಟ್ಫೋನ್ ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿಸಲು ಒನ್ಪ್ಲಸ್ ಮತ್ತೊಂದು ದೈತ್ಯ ಹೆಜ್ಜೆ ಇಟ್ಟಿದೆ. ಚೀನಾದಲ್ಲಿ ಬಹುನಿರೀಕ್ಷಿತ ‘ಒನ್ಪ್ಲಸ್ ಏಸ್ 6T’ (OnePlus Ace 6T) ಅಧಿಕೃತವಾಗಿ ಬಿಡುಗಡೆಯಾಗಿದ್ದು, ಇದು ಭಾರತೀಯ ಮಾರುಕಟ್ಟೆಗೆ ‘ಒನ್ಪ್ಲಸ್ 15R’ (OnePlus 15R) ಹೆಸರಿನಲ್ಲಿ ಲಗ್ಗೆ ಇಡುವ ಸಾಧ್ಯತೆಯಿದೆ. ವಿಶೇಷವೇನೆಂದರೆ, ಈ ಹೊಸ ಫೋನ್ ಇತ್ತೀಚೆಗೆ ಬಿಡುಗಡೆಯಾದ ಕಂಪನಿಯ ಪ್ರೀಮಿಯಂ ಫ್ಲ್ಯಾಗ್ಶಿಪ್ ಫೋನ್ ‘ಒನ್ಪ್ಲಸ್ 15’ ಅನ್ನೂ ಮೀರಿಸುವಂತಹ ಬಲಿಷ್ಠ ಬ್ಯಾಟರಿ ಮತ್ತು ಪ್ರೊಸೆಸರ್ ಸಾಮರ್ಥ್ಯವನ್ನು ಹೊಂದಿದೆ.
ಟೆಕ್ ಲೋಕದ ಕಣ್ಣು ಈಗ ಈ ಫೋನ್ನ ಬ್ಯಾಟರಿಯ ಮೇಲಿದೆ. ಒನ್ಪ್ಲಸ್ 15 ಸ್ಮಾರ್ಟ್ಫೋನ್ 7,300mAh ಬ್ಯಾಟರಿ ಹೊಂದಿದ್ದರೆ, ಈ ಹೊಸ ಏಸ್ 6T ಬರೋಬ್ಬರಿ 8,300mAh ಸಾಮರ್ಥ್ಯದ ಸಿಲಿಕಾನ್-ಕಾರ್ಬನ್ ಬ್ಯಾಟರಿಯನ್ನು ಹೊಂದಿದೆ. ಇದು ಪರ್ಫಾರ್ಮೆನ್ಸ್ ಫೋನ್ಗಳ ಇತಿಹಾಸದಲ್ಲೇ ಅತಿದೊಡ್ಡ ಬ್ಯಾಟರಿಗಳಲ್ಲಿ ಒಂದಾಗಿದೆ. ಇಷ್ಟು ದೊಡ್ಡ ಬ್ಯಾಟರಿ ಇದ್ದರೂ, ಇದು 100W ವೇಗದ ಚಾರ್ಜಿಂಗ್ ಬೆಂಬಲದೊಂದಿಗೆ ಬರಲಿದ್ದು, ಕೇವಲ 23 ನಿಮಿಷಗಳಲ್ಲಿ ಶೇ. 50ರಷ್ಟು ಚಾರ್ಜ್ ಆಗುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ.
ಹೊಸ ದಾಖಲೆ
ಪ್ರೊಸೆಸರ್ ವಿಚಾರದಲ್ಲೂ ಈ ಫೋನ್ ಹೊಸ ದಾಖಲೆ ಬರೆದಿದೆ. ಕ್ವಾಲ್ಕಾಮ್ನ ಲೇಟೆಸ್ಟ್ ಸ್ನಾಪ್ಡ್ರಾಗನ್ 8 ಜೆನ್ 5 (Snapdragon 8 Gen 5) ಚಿಪ್ಸೆಟ್ ಹೊಂದಿರುವ ವಿಶ್ವದ ಮೊದಲ ಸ್ಮಾರ್ಟ್ಫೋನ್ ಇದಾಗಿದೆ. 3nm ಪ್ರಕ್ರಿಯೆಯಲ್ಲಿ ತಯಾರಾದ ಈ ಚಿಪ್, ಗೇಮಿಂಗ್ ಮತ್ತು ಮಲ್ಟಿಟಾಸ್ಕಿಂಗ್ಗೆ ಅಪ್ರತಿಮ ವೇಗವನ್ನು ಒದಗಿಸಲಿದೆ. ಆಂಡ್ರಾಯ್ಡ್ 16 ಆಧಾರಿತ ಕಲರ್ ಓಎಸ್ 16 (ColorOS 16) ಕಾರ್ಯಾಚರಣಾ ವ್ಯವಸ್ಥೆ ಇದರಲ್ಲಿದೆ.
ಡಿಸ್ಪ್ಲೇ ವಿಭಾಗದಲ್ಲಿಯೂ ಒನ್ಪ್ಲಸ್ ರಾಜಿ ಮಾಡಿಕೊಂಡಿಲ್ಲ. 6.83 ಇಂಚಿನ ಫ್ಲಾಟ್ AMOLED ಡಿಸ್ಪ್ಲೇ, 1.5K ರೆಸಲ್ಯೂಶನ್ ಮತ್ತು ಗೇಮರ್ಗಳಿಗೆ ಹೇಳಿ ಮಾಡಿಸಿದಂತಹ 165Hz ರಿಫ್ರೆಶ್ ರೇಟ್ ನೀಡಲಾಗಿದೆ. ಬಿಸಿಲಿನಲ್ಲಿ ಸ್ಪಷ್ಟವಾಗಿ ಕಾಣಲು 3,600 ನಿಟ್ಸ್ ಪೀಕ್ ಬ್ರೈಟ್ನೆಸ್ ಅಳವಡಿಸಲಾಗಿದೆ. ಗೇಮಿಂಗ್ ಸಮಯದಲ್ಲಿ ಫೋನ್ ಬಿಸಿಯಾಗುವುದನ್ನು ತಡೆಯಲು ವಿಶೇಷ ‘ಗ್ಲೇಸಿಯರ್ ಕೂಲಿಂಗ್ ಸಿಸ್ಟಮ್’ ಅಳವಡಿಸಿರುವುದು ವಿಶೇಷ.
ಕ್ಯಾಮೆರಾ ವಿಭಾಗದಲ್ಲಿ ಹಿಂಭಾಗದಲ್ಲಿ 50 ಮೆಗಾಪಿಕ್ಸೆಲ್ ಸೋನಿ IMX906 ಮುಖ್ಯ ಸೆನ್ಸಾರ್ (OIS ಸಹಿತ) ಮತ್ತು 8 ಮೆಗಾಪಿಕ್ಸೆಲ್ ಅಲ್ಟ್ರಾ ವೈಡ್ ಲೆನ್ಸ್ ನೀಡಲಾಗಿದೆ. ಭಾರತಕ್ಕೆ ಬರುವಾಗ ಅಲ್ಟ್ರಾ ವೈಡ್ ಕ್ಯಾಮೆರಾವನ್ನು 50 ಮೆಗಾಪಿಕ್ಸೆಲ್ಗೆ ಏರಿಸುವ ಸಾಧ್ಯತೆಯಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಮುಂಭಾಗದಲ್ಲಿ 16 ಮೆಗಾಪಿಕ್ಸೆಲ್ ಸೆಲ್ಫಿ ಕ್ಯಾಮೆರಾ ಇದೆ.
ಬೆಲೆಯ ವಿಚಾರಕ್ಕೆ ಬರುವುದಾದರೆ, ಚೀನಾದಲ್ಲಿ ಇದರ ಆರಂಭಿಕ ಬೆಲೆ 2,599 ಯುವಾನ್ (ಸುಮಾರು 33,230 ರೂ.) ನಿಗದಿಪಡಿಸಲಾಗಿದೆ. ಭಾರತದಲ್ಲಿ ‘ಒನ್ಪ್ಲಸ್ 15R’ ಡಿಸೆಂಬರ್ 17ರ ಸುಮಾರಿಗೆ ಮಾರಾಟಕ್ಕೆ ಲಭ್ಯವಾಗುವ ನಿರೀಕ್ಷೆಯಿದೆ. ಕಳೆದ ಬಾರಿ ಒನ್ಪ್ಲಸ್ 13R ಸುಮಾರು 43,000 ರೂ. ಆಸುಪಾಸಿನಲ್ಲಿ ಬಿಡುಗಡೆಯಾಗಿತ್ತು, ಹೀಗಾಗಿ ಈ ಹೊಸ ಮಾಡೆಲ್ ಬೆಲೆಯ ಮೇಲೂ ಕುತೂಹಲ ಹೆಚ್ಚಿದೆ.
ಇದನ್ನೂ ಓದಿ: ಇಂಡೋ-ಟಿಬೆಟಿಯನ್ ಗಡಿ ಪೊಲೀಸ್ ಪಡೆಯಲ್ಲಿ ನೇಮಕಾತಿ : 2.08 ಲಕ್ಷ ರೂ. ಸ್ಯಾಲರಿ
