ನವದೆಹಲಿ: ಕ್ರಿಕೆಟ್ ಜಗತ್ತಿನ “ದಿ ವಾಲ್” ಎಂದೇ ಖ್ಯಾತರಾದ, ಶಾಂತ ಸ್ವಭಾವದ ರಾಹುಲ್ ದ್ರಾವಿಡ್ ಅವರು, ಮೂರು ವರ್ಷಗಳ ಹಿಂದೆ “ಇಂದಿರಾನಗರ್ ಕಾ ಗುಂಡಾ ಹೂಂ ಮೈ” (Indiranagar ka gunda hu main) ಎಂದು ಅಬ್ಬರಿಸಿದ್ದ ಜಾಹೀರಾತು ಇಂದಿಗೂ ಕ್ರಿಕೆಟ್ ಪ್ರೇಮಿಗಳ ಮನಸ್ಸಿನಲ್ಲಿ ಹಚ್ಚಹಸಿರಾಗಿದೆ. ಇದೀಗ, ಆ ಜಾಹೀರಾತಿನ ಕುರಿತು ಮಾತನಾಡಿರುವ ದ್ರಾವಿಡ್, ಆರಂಭದಲ್ಲಿ ತಮಗಿದ್ದ ಹಿಂಜರಿಕೆ ಮತ್ತು ಆ ಜಾಹೀರಾತನ್ನು ನೋಡಿದಾಗ ತಮ್ಮ ತಾಯಿಯ ಪ್ರತಿಕ್ರಿಯೆ ಹೇಗಿತ್ತು ಎಂಬುದನ್ನು ಹಂಚಿಕೊಂಡಿದ್ದಾರೆ.
2021ರಲ್ಲಿ ಬಿಡುಗಡೆಯಾದ ಈ ಜಾಹೀರಾತಿನಲ್ಲಿ, ಬೆಂಗಳೂರಿನ ಟ್ರಾಫಿಕ್ನಲ್ಲಿ ಸಿಲುಕಿದ ದ್ರಾವಿಡ್, ತಾಳ್ಮೆ ಕಳೆದುಕೊಂಡು, ಅಕ್ಕಪಕ್ಕದ ವಾಹನಗಳ ಮೇಲೆ ಕೂಗಾಡಿ, ಬ್ಯಾಟ್ನಿಂದ ಕಾರಿನ ಗ್ಲಾಸ್ ಒಡೆಯುವ ರೋಷಾವತಾರದಲ್ಲಿ ಕಾಣಿಸಿಕೊಂಡಿದ್ದರು. ಇದು ಅವರ ನಿಜ ಜೀವನದ ವ್ಯಕ್ತಿತ್ವಕ್ಕೆ ಸಂಪೂರ್ಣ ವಿರುದ್ಧವಾಗಿದ್ದರಿಂದ, ಜಾಹೀರಾತು ಬಿಡುಗಡೆಯಾದ ಕೆಲವೇ ಕ್ಷಣಗಳಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿತ್ತ
ತಾಯಿಯ ತಮಾಷೆಯ ಪ್ರತಿಕ್ರಿಯೆ
‘ಬ್ರೇಕ್ಫಾಸ್ಟ್ ವಿತ್ ಚಾಂಪಿಯನ್ಸ್’ ಕಾರ್ಯಕ್ರಮದಲ್ಲಿ ಗೌರವ್ ಕಪೂರ್ ಅವರೊಂದಿಗೆ ಮಾತನಾಡಿದ ದ್ರಾವಿಡ್, “ಜಾಹೀರಾತನ್ನು ನೋಡಿದ ನನ್ನ ತಾಯಿ, ‘ನಿನಗೆ ಯಾಕಪ್ಪಾ ಇದೆಲ್ಲಾ ಬೇಕಿತ್ತು?’ ಎಂದು ತಮಾಷೆಯಾಗಿ ಕೇಳಿದರು. ಅವರಿಗೂ ಅದರ ತಮಾಷೆಯ ಭಾಗ ಇಷ್ಟವಾಗಿತ್ತು. ಆದರೆ, ಆರಂಭದಲ್ಲಿ ನನಗೆ, ‘ಇದು ಹೇಗೆ ಕಾಣಬಹುದು? ಜನರು ಏನಂತಾರೆ?’ ಎಂಬ ಆತಂಕವಿತ್ತು,” ಎಂದು ಹೇಳಿದ್ದಾರೆ.
“ಒಂದೋ ನಿಮ್ಮನ್ನು ಬೈಯ್ಯುತ್ತೇನೆ, ಇಲ್ಲವೇ ಎಲ್ಲವೂ ಸರಿಹೋಗುತ್ತೆ”
ತಮ್ಮ ಶಾಂತ ಸ್ವಭಾವಕ್ಕೆ ವಿರುದ್ಧವಾದ ಈ ಪಾತ್ರವನ್ನು ಮಾಡಲು ಒಪ್ಪಿಕೊಂಡಿದ್ದು ಹೇಗೆ ಎಂಬುದನ್ನು ವಿವರಿಸಿದ ದ್ರಾವಿಡ್, “ತನ್ಮಯ್ ಭಟ್ ಅವರು ಸ್ಕ್ರಿಪ್ಟ್ ಬರೆಯುತ್ತಿದ್ದರು. ನಿರ್ದೇಶಕರೂ ಅಲ್ಲೇ ಇದ್ದರು. ನಾನು ಅವರಿಗೆ ಹೇಳಿದ್ದೆ, ‘ನೋಡಿ, ಈ ಶೂಟಿಂಗ್ ಮುಗಿದಾಗ, ಒಂದೋ ನಾನು ನಿಮ್ಮೆಲ್ಲರನ್ನೂ ಬೈಯ್ಯುತ್ತೇನೆ, ಇಲ್ಲವೇ ಎಲ್ಲವೂ ಚೆನ್ನಾಗಿ ಮೂಡಿಬಂದಿರುತ್ತದೆ’. ಅದೃಷ್ಟವಶಾತ್, ಎಲ್ಲವೂ ಚೆನ್ನಾಗಿಯೇ ಆಯಿತು,” ಎಂದು ನಗುತ್ತಾ ಹೇಳಿದರು.
ಸಾಂಸ್ಕೃತಿಕ ಸಂಕೇತವಾದ “ಇಂದಿರಾನಗರ್ ಕಾ ಗುಂಡಾ”
ಏಪ್ರಿಲ್ 2021ರಲ್ಲಿ ಬಿಡುಗಡೆಯಾದ ಈ ಜಾಹೀರಾತು, ಕೇವಲ ಒಂದು ಉತ್ಪನ್ನದ ಪ್ರಚಾರವಾಗಿ ಉಳಿಯಲಿಲ್ಲ. “ಇಂದಿರಾನಗರ್ ಕಾ ಗುಂಡಾ ಹೂಂ ಮೈ!” ಮತ್ತು “ಯೂ ಕಮ್, ಮ್ಯಾನ್!” (You come, man!) ಎಂಬ ದ್ರಾವಿಡ್ ಅವರ ಮಾತುಗಳು ಮೀಮ್ಸ್, ಜೋಕ್ಸ್ ಮತ್ತು ಸಾಮಾಜಿಕ ಜಾಲತಾಣಗಳ ಚರ್ಚೆಗಳ ಭಾಗವಾದವು. ಬೆಂಗಳೂರಿನ ಟ್ರಾಫಿಕ್ ಬಗ್ಗೆ ತಮ್ಮ ಹತಾಶೆಯನ್ನು ವ್ಯಕ್ತಪಡಿಸಲು ಜನರು ಈ ಪದಗಳನ್ನು ಬಳಸಲಾರಂಭಿಸಿದರು.
“ಭಾರತದಲ್ಲಿ ಪ್ರತಿಯೊಬ್ಬರೂ ಟ್ರಾಫಿಕ್ನಲ್ಲಿ ಸಿಲುಕಿಕೊಳ್ಳುವ ಅನುಭವವನ್ನು ಹೊಂದಿರುತ್ತಾರೆ. ಅವರೆಲ್ಲರಿಗೂ ಹೀಗೆ ಕೂಗಾಡಬೇಕು, ತಮ್ಮ ಸಿಟ್ಟನ್ನು ಹೊರಹಾಕಬೇಕು ಎಂದೆನಿಸುತ್ತದೆ, ಆದರೆ ಮಾಡಲು ಸಾಧ್ಯವಾಗುವುದಿಲ್ಲ. ನಾನು ಹಾಗೆ ಮಾಡಿದ್ದನ್ನು ನೋಡಿ, ‘ಹೌದು, ನಮಗೂ ಹೀಗೆ ಮಾಡಬೇಕೆಂದಿತ್ತು’ ಎಂದು ಜನರು ಭಾವಿಸಿದರು,” ಎಂದು ದ್ರಾವಿಡ್ ಹೇಳಿದ್ದಾರೆ.
ಆಟ ಮತ್ತು ತರಬೇತಿಯಲ್ಲೂ ‘ಜಂಟಲ್ಮನ್’
ಜಾಹೀರಾತಿನಲ್ಲಿ ‘ಗುಂಡಾ’ ಆಗಿ ಕಾಣಿಸಿಕೊಂಡರೂ, ದ್ರಾವಿಡ್ ತಮ್ಮ ವೃತ್ತಿಜೀವನದಲ್ಲಿ ಎಂದಿಗೂ ಶಾಂತ ಮತ್ತು ಸಂಯಮದ ವ್ಯಕ್ತಿತ್ವವನ್ನು ಬಿಟ್ಟುಕೊಟ್ಟಿಲ್ಲ. 2021 ರಿಂದ 2024ರವರೆಗೆ ಭಾರತೀಯ ಕ್ರಿಕೆಟ್ ತಂಡದ ಮುಖ್ಯ ಕೋಚ್ ಆಗಿ, ರೋಹಿತ್ ಶರ್ಮಾ ಅವರೊಂದಿಗೆ ಉತ್ತಮ ಬಾಂಧವ್ಯವನ್ನು ಹೊಂದಿದ್ದರು. 2023ರ ವಿಶ್ವಕಪ್ ಫೈನಲ್ನಲ್ಲಿ ಸೋತ ನಂತರ, 2024ರ ಟಿ20 ವಿಶ್ವಕಪ್ ಗೆಲ್ಲುವ ಮೂಲಕ ಭಾರತದ ಐಸಿಸಿ ಟ್ರೋಫಿ ಬರವನ್ನು ನೀಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಸದ್ಯ, ತಮ್ಮ ಇಬ್ಬರು ಪುತ್ರರಾದ ಸಮಿತ್ ಮತ್ತು ಅನ್ವಯ್ ಅವರ ಕ್ರಿಕೆಟ್ ವೃತ್ತಿಜೀವನವನ್ನು ನೋಡಿಕೊಳ್ಳುತ್ತಾ, ಕುಟುಂಬದೊಂದಿಗೆ ಸಮಯ ಕಳೆಯುತ್ತಿದ್ದಾರೆ.
ಇದನ್ನೂ ಓದಿ: ಮಹಿಳಾ ವಿಶ್ವಕಪ್ ಫೈನಲ್ಗೇರಿದ ಭಾರತ | ಸೃಷ್ಟಿಯಾದ ದಾಖಲೆಗಳೆಷ್ಟು ಗೊತ್ತೇ?
