ಲಂಡನ್: ಟೆಸ್ಟ್ ನಾಯಕನಾಗಿ ಶುಭಮನ್ ಗಿಲ್ ಅವರ ಕೆಲವು ನಡವಳಿಕೆಗಳು ಮಾಜಿ ನಾಯಕ ವಿರಾಟ್ ಕೊಹ್ಲಿಯನ್ನು ಹೋಲುತ್ತಿವೆ ಎಂಬ ಚರ್ಚೆಗಳು ಶುರುವಾಗಿವೆ. ಇದು ದೀರ್ಘಾವಧಿಯಲ್ಲಿ ಭಾರತ ತಂಡಕ್ಕೆ ಸವಾಲಾಗಬಹುದೇ ಎಂಬ ಪ್ರಶ್ನೆಗಳು ಮೂಡಿವೆ. ಲಾರ್ಡ್ಸ್ನಲ್ಲಿ ನಡೆದ ಮೂರನೇ ಟೆಸ್ಟ್ನಲ್ಲಿ ಭಾರತ ಬಹುತೇಕ ಪಂದ್ಯವನ್ನು ನಿಯಂತ್ರಿಸಿದ್ದರೂ, ಕೊನೆಯಲ್ಲಿ ಸೋಲು ಕಂಡಿತು. ಈ ಸೋಲಿಗೆ ಗಿಲ್ ಅವರ ಆಕ್ರಮಣಕಾರಿ ತಂತ್ರಗಳು ಕಾರಣವಾಗಿರಬಹುದು ಎಂದು ಹಲವು ಮಾಜಿ ಕ್ರಿಕೆಟಿಗರು ಅಭಿಪ್ರಾಯಪಟ್ಟಿದ್ದಾರೆ.
ಟೆಸ್ಟ್ ನಾಯಕನಾದಾಗಿನಿಂದ, ಗಿಲ್ ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುತ್ತಿದ್ದಾರೆ, ಅಲ್ಲಿ ಅವರು ಇಂಗ್ಲೆಂಡ್ ವಿರುದ್ಧದ ಸರಣಿಯಲ್ಲಿ ಕೆಲವು ಉತ್ತಮ ಇನ್ನಿಂಗ್ಸ್ಗಳನ್ನು ಆಡಿದ್ದಾರೆ. ಆದರೆ, ಎಡ್ಜ್ಬಾಸ್ಟನ್ನಲ್ಲಿ ಶತಕ ಗಳಿಸಿದ ನಂತರ ಅವರ ಸಂಭ್ರಮಾಚರಣೆ 2018ರಲ್ಲಿ ಕೊಹ್ಲಿ ಇದೇ ಮೈದಾನದಲ್ಲಿ ಶತಕ ಗಳಿಸಿದಾಗ ಆಚರಿಸಿದ ರೀತಿಯನ್ನೇ ಹೋಲುತ್ತಿತ್ತು.
ವಿರಾಟ್ ಕೊಹ್ಲಿಯನ್ನು ಅನುಕರಿಸಲು ಪ್ರಯತ್ನಿಸುತ್ತಿದ್ದಾರೆ ಎಂದು ಹೇಳುವುದು ಅತಿಶಯೋಕ್ತಿಯಲ್ಲ. ಆದರೆ, ಈ ಅನುಕರಣೆ ಅವರ ಆಟದ ಮೇಲೆ ನಕಾರಾತ್ಮಕ ಪರಿಣಾಮ ಬೀರಬಹುದು. ವಿರಾಟ್ ಕೊಹ್ಲಿ ಅವರ ಆಕ್ರಮಣಕಾರಿ ಶೈಲಿಯು ಅವರಿಗೆ ಸೂಕ್ತವಾಗಿತ್ತು, ಏಕೆಂದರೆ ಅವರು ಒತ್ತಡದ ಸಂದರ್ಭಗಳಲ್ಲಿ ಉತ್ತಮವಾಗಿ ಆಡುತ್ತಿದ್ದರು. ಆದರೆ, ಈ ಶೈಲಿ ಎಲ್ಲರಿಗೂ ಸೂಕ್ತವಲ್ಲ, ಬಹುಶಃ ಗಿಲ್ಗೂ ಇದು ಅನ್ವಯವಾಗದಿರಬಹುದು.
ನಾಯಕರಾಗುವ ಮೊದಲು, ಗಿಲ್ ತಾವು ಯಾರ ಶೈಲಿಯನ್ನೂ ಅನುಕರಿಸಲು ಬಯಸುವುದಿಲ್ಲ, ಬದಲಿಗೆ ತಮ್ಮದೇ ಆದ ವಿಶಿಷ್ಟ ಶೈಲಿಯನ್ನು ರೂಪಿಸಿಕೊಳ್ಳುವುದಾಗಿ ಹೇಳಿದ್ದರು. ಆದರೆ, ಅವರ ಆಕ್ರಮಣಕಾರಿ ನಡವಳಿಕೆ, ವಿಶೇಷವಾಗಿ ಲಾರ್ಡ್ಸ್ನಲ್ಲಿ ಝಾಕ್ ಕ್ರಾಲಿ ವಿರುದ್ಧದ ವಾಗ್ವಾದ, ಅವರ ಹಿಂದಿನ ಶಾಂತ ಸ್ವಭಾವಕ್ಕೆ ವಿರುದ್ಧವಾಗಿದೆ. ಬೆನ್ ಸ್ಟೋಕ್ಸ್ ಲಾರ್ಡ್ಸ್ನಲ್ಲಿ ತೋರಿಸಿದಂತೆ, ಎದುರಾಳಿ ಆಟಗಾರರು ತಿರುಗೇಟು ನೀಡಲು ಸಿದ್ಧರಿರುತ್ತಾರೆ.
ಭಾರತದ ಶ್ರೇಷ್ಠ ಬ್ಯಾಟರ್ಗಳಲ್ಲಿ ಒಬ್ಬರಾದ ವೀರೇಂದ್ರ ಸೆಹ್ವಾಗ್ ಕೂಡ ಆರಂಭದಲ್ಲಿ ಸಚಿನ್ ತೆಂಡೂಲ್ಕರ್ ಅವರನ್ನು ಅನುಕರಿಸಲು ಪ್ರಯತ್ನಿಸಿ ವಿಫಲರಾಗಿದ್ದರು. ಆದರೆ, ಒಮ್ಮೆ ಅವರು ತಮ್ಮದೇ ಆದ ಶೈಲಿಯನ್ನು ಅಳವಡಿಸಿಕೊಂಡ ನಂತರ, ಅವರು ಯಶಸ್ಸನ್ನು ಕಂಡರು. ಗಿಲ್ಗೆ ಇದೇ ರೀತಿಯ ಪಾಠ ಅನ್ವಯವಾಗಬಹುದು.
ಗಿಲ್ನ ಆಕ್ರಮಣಕಾರಿ ತಂತ್ರಗಳ ವಿಮರ್ಶೆ:
ಮಾಜಿ ಕ್ರಿಕೆಟಿಗರಾದ ಸಂಜಯ್ ಮಂಜ್ರೇಕರ್ ಮತ್ತು ಮೊಹಮ್ಮದ್ ಕೈಫ್ ಇಬ್ಬರೂ, ಲಾರ್ಡ್ಸ್ ಟೆಸ್ಟ್ನ ಮೂರನೇ ದಿನ ಝಾಕ್ ಕ್ರಾಲಿ ವಿರುದ್ಧ ಗಿಲ್ ಅವರ ಮೌಖಿಕ ವಾಗ್ವಾದವು ಅವರ ವಿರುದ್ಧವೇ ಕೆಲಸ ಮಾಡಿರಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಮಂಜ್ರೇಕರ್ ಅವರು ಎಕ್ಸ್ನಲ್ಲಿ, “ಗಿಲ್ ಇದ್ದಕ್ಕಿದ್ದಂತೆ ಸಂಶಯಾಸ್ಪದವಾಗಿ ಕಾಣಲು ಇಂಗ್ಲೆಂಡ್ನಿಂದ ಸಿಕ್ಕ ಪ್ರತಿಕ್ರಿಯೆಯೇ ಕಾರಣ. ವಿರಾಟ್ ಕೋಹ್ಲಿ ಹೆಚ್ಚು ಕೋಪಗೊಂಡಷ್ಟೂ ಉತ್ತಮವಾಗಿ ಆಡುತ್ತಿದ್ದರು. ಧೋನಿ ಸಂಪೂರ್ಣ ವಿರುದ್ಧ. ಗಿಲ್ ಬ್ಯಾಟರ್ ಆಗಿ ತಮಗೆ ಬೇಕಾದ ರೀತಿಯಲ್ಲಿ ವರ್ತಿಸಬೇಕು ಎಂದು ಹೇಳಿದ್ದಾರೆ.
ಕೈಫ್ ಕೂಡ ಇದಕ್ಕೆ ದನಿಗೂಡಿಸಿ, “ಶುಭಮನ್ ಗಿಲ್ ಮತ್ತು ಝಾಕ್ ಕ್ರಾಲಿ ನಡುವಿನ ವಾಗ್ವಾದ ಇಂಗ್ಲೆಂಡ್ ತಂಡವನ್ನು ಪ್ರಚೋದಿಸಿತು. ಎಡ್ಜ್ಬಾಸ್ಟನ್ ನಂತರ, ಅವರ ಬ್ಯಾಟಿಂಗ್, ಬೌಲಿಂಗ್ ಮತ್ತು ನಾಯಕತ್ವದ ಬಗ್ಗೆ ಪ್ರಶ್ನೆಗಳಿದ್ದವು. ಆದರೆ ಆ ಘಟನೆ ಸ್ಟೋಕ್ಸ್ ಅವರನ್ನು ಪ್ರೇರೇಪಿಸಿತು ಮತ್ತು ಅವರು ಅದ್ಭುತ ಸ್ಪೆಲ್ ಎಸೆದರು. ತಮಗೆ ಸೂಕ್ತವಾದ ವರ್ತನೆಗೆ ಅಂಟಿಕೊಳ್ಳುವುದು ವಿವೇಕತನ” ಎಂದರು.
ಗಿಲ್ ಐದು ನಿಮಿಷಗಳ ಆಟವು ಇಡೀ ಟೆಸ್ಟ್ ಪಂದ್ಯವನ್ನು ನಿರ್ಧರಿಸಲು ಸಾಧ್ಯವಿಲ್ಲ ಎಂದು ಅಭಿಪ್ರಾಯಪಟ್ಟರು. ಬದಲಾಗಿ, ಫಲಿತಾಂಶವನ್ನು ಬದಲಾಯಿಸಬಹುದಾದ ಇತರ ಪ್ರಮುಖ ಕ್ಷಣಗಳನ್ನು ಅವರು ಉಲ್ಲೇಖಿಸಿದರು. ಪಂದ್ಯದ ನಂತರದ ಪತ್ರಿಕಾಗೋಷ್ಠಿಯಲ್ಲಿ ಗಿಲ್, “ಇಲ್ಲ, ಐದು ನಿಮಿಷಗಳು ಐದು ದಿನಗಳ ಕಠಿಣ ಪರಿಶ್ರಮವನ್ನು ನಿರ್ಧರಿಸಲು ಸಾಧ್ಯವಿಲ್ಲ. ಪ್ರಮುಖ ಕ್ಷಣಗಳ ಬಗ್ಗೆ ಕೇಳಿದರೆ, ಅದು ನನ್ನ ಅಗ್ರ ಐದರಲ್ಲಿ ಕೂಡ ಇರುವುದಿಲ್ಲ.
ನಮಗೆ, ರಿಷಭ್ ಪಂತ್ ಅವರ ರನ್-ಔಟ್ ಹೆಚ್ಚು ನಿರ್ಣಾಯಕವಾಗಿತ್ತು. ಒಂದು ಹಂತದಲ್ಲಿ, ನಾವು 50-100 ರನ್ ಮುನ್ನಡೆ ಪಡೆಯಬಹುದು ಎಂದು ಭಾವಿಸಿದ್ದೆವು, ಅದು ಐದನೇ ದಿನ ಬ್ಯಾಟಿಂಗ್ ಕಠಿಣವಾಗಿದ್ದಾಗ ದೊಡ್ಡದಾಗುತ್ತಿತ್ತು. ಅದು ದೊಡ್ಡ ತಿರುವು ಕಂಡ ಕ್ಷಣ” ಎಂದು ಹೇಳಿದರು.
