ಕಾಲ ಈಗ ಬದಲಾಗಿದೆ. ಪ್ರತಿಯೊಂದಕ್ಕೂ ಈಗ ದುಡ್ಡಿನ ಲೆಕ್ಕಾಚಾರ ಅಗತ್ಯವಾಗಿದೆ. ಲೆಕ್ಕಾ ಬಿಟ್ಟವ ಲೋಕಾ ಬಿಟ್ಟ ಎಂಬ ಮಾತಿನಂತೆ, ಲೆಕ್ಕಾಚಾರದಿಂದ ಜೀವನ ನಡೆಸಿದರೆ ಮಾತ್ರ ಸಿರಿವಂತರಾಗಬಹುದಾಗಿದೆ. ನಾವು ಕಷ್ಟಪಟ್ಟು ದುಡಿದು, ದುಡಿದ ಹಣವನ್ನ ಉಳಿಸೋ ಜತೆಗೆ, ಅದನ್ನು ಸಮರ್ಪಕವಾಗಿ ಹೂಡಿಕೆ ಮಾಡಬೇಕಾಗಿದೆ. ಹೀಗೆ, ದುಡಿದ ಹಣವನ್ನು ಉಳಿಸಿ, ಪೋಸ್ಟ್ ಆಫೀಸ್ ನಲ್ಲಿ ಆರ್ ಡಿ ಮಾಡಿಸಿದರೆ, ಉತ್ತಮ ಆದಾಯ ಲಭಿಸಿದೆ. ಹಾಗಾದ್ರೆ, ಏನಿದು ಪೋಸ್ಟ್ ಆಫೀಸ್ ಆರ್ ಡಿ ಯೋಜನೆ? ಉಳಿತಾಯ, ಲಾಭ ಹೇಗೆ? ಮುಂದೆ ನೋಡಿ.
ಏನಿದು ಪೋಸ್ಟ್ ಆಫೀಸ್ ಆರ್ ಡಿ ಯೋಜನೆ?
ಉಳಿಸಿದ ಹಣಕ್ಕೆ ಎಷ್ಟು ರಿಟರ್ನ್ಸ್ ಸಿಗುತ್ತದೆ?
ಕನಿಷ್ಠ ಎಷ್ಟು ಉಳಿತಾಯ ಮಾಡಬಹುದು?
ಪೋಸ್ಟ್ ಆಫೀಸ್ ರಿಕರಿಂಗ್ ಡೆಪಾಸಿಟ್ ಅಥವಾ ಆರ್ ಡಿ ಯೋಜನೆಯು ಅಪಾಯ-ಮುಕ್ತ ಮತ್ತು ಸ್ಥಿರ ಆದಾಯ ಯೋಜನೆಯಾಗಿದೆ. ಇದನ್ನು ಪೋಸ್ಟ್ ಆಫೀಸ್ RD ಎಂದೂ ಕರೆಯುತ್ತಾರೆ. ಪೋಸ್ಟ್ ಆಫೀಸ್ ನ ಈ ಯೋಜನೆ 5 ವರ್ಷಗಳ ಅವಧಿಗೆ ಲಭ್ಯವಿದೆ. ನೀವು ಪ್ರತಿದಿನ ಕೇವಲ 100 ರೂ.ಗಳನ್ನು ಉಳಿಸಿ ಅದರಲ್ಲಿ ಹೂಡಿಕೆ ಮಾಡಿದರೆ, ನೀವು 5 ವರ್ಷಗಳಲ್ಲಿ ಲಕ್ಷಾಂತರ ರೂಪಾಯಿಗಳನ್ನು ಠೇವಣಿ ಮಾಡಬಹುದು. ಇದು ಕೇಂದ್ರ ಸರ್ಕಾರದ ಯೋಜನೆಯಾಗಿರುವ ಕಾರಣ ಹೆಚ್ಚಿನ ಸುರಕ್ಷತೆ ಇರುತ್ತದೆ.
ಪ್ರತಿದಿನ ಕೇವಲ 100 ರೂಪಾಯಿ ಉಳಿಸಿ
5 ವರ್ಷದಲ್ಲಿ 2.14 ಲಕ್ಷ ರೂಪಾಯಿ ಗಳಿಸಿ
ಶೇ.6.7ರ ಬಡ್ಡಿದರದ ಲೆಕ್ಕಾಚಾರ ಇಲ್ಲಿದೆ
ನೀವು ದಿನಕ್ಕೆ 100 ರೂ. ಉಳಿಸಿದರೆ, ತಿಂಗಳಿಗೆ 3,000 ರೂ. ಠೇವಣಿ ಇರಿಸಿದಂತಾಗುತ್ತದೆ. ಈ ರೀತಿಯಾಗಿ, 5 ವರ್ಷಗಳಲ್ಲಿ ನಿಮ್ಮ ಒಟ್ಟು ಠೇವಣಿ ಮೊತ್ತ 1,80,000 ರೂ. ಶೇ. 6.7 ಬಡ್ಡಿದರದಲ್ಲಿ, ನಿಮಗೆ ಸರಿಸುಮಾರು 34,097 ರೂ. ಬಡ್ಡಿ ಸಿಗುತ್ತದೆ. ಈ ರೀತಿಯಾಗಿ, ನೀವು ಮುಕ್ತಾಯದ ಸಮಯದಲ್ಲಿ ಒಟ್ಟು 2,14,097 ರೂ.ಗಳನ್ನು ಪಡೆದುಕೊಳ್ಳಬಹುದು. ನಿಮಗೆ ಹಣದ ಅವಶ್ಯಕತೆ ಇದ್ದರೆ, 12 ಕಂತುಗಳನ್ನು ಪಾವತಿಸಿದ ನಂತರ ಠೇವಣಿ ಮೊತ್ತದ ಶೇ. 50 ವರೆಗೆ ಸಾಲ ಪಡೆಯಬಹುದು. ಈ ಸಾಲದ ಮೇಲಿನ ಬಡ್ಡಿಯು ಆರ್ಡಿ ಮೇಲಿನ ಬಡ್ಡಿಗಿಂತ ಶೇ.2ರಷ್ಟು ಹೆಚ್ಚಾಗಿರುತ್ತದೆ.
5 ವರ್ಷಗಳ ಬಳಿಕ ವಿಸ್ತರಣೆ ಮಾಡಬಹುದು
ಮತ್ತೈದು ವರ್ಷಗಳಿಗೆ ವಿಸ್ತರಣೆ ಸಾಧ್ಯವಿದೆ
ಇದರಿಂದ ಹೆಚ್ಚಿನ ರಿಟರ್ನ್ಸ್ ನಿಶ್ಚಿತ
ನೀವು ಆರ್ಡಿ ಖಾತೆಯನ್ನು ವಿಸ್ತರಿಸುವ ಸೌಲಭ್ಯ 5 ವರ್ಷಗಳ ನಂತರವೂ ನೀವು RD ಯ ಪ್ರಯೋಜನಗಳನ್ನು ಪಡೆಯಲು ಬಯಸಿದರೆ, ನೀವು ಅದನ್ನು ಮುಂದಿನ 5 ವರ್ಷಗಳವರೆಗೆ ವಿಸ್ತರಣೆ ಕೂಡ ಮಾಡಿಕೊಳ್ಳಬಹುದು. ನೀವು ಖಾತೆಯನ್ನು ತೆರೆಯುವ ಸಮಯದಲ್ಲಿ ಅನ್ವಯವಾಗುವ ಬಡ್ಡಿದರವು ವಿಸ್ತೃತ ಖಾತೆಗಳಿಗೂ ಅನ್ವಯವಾಗುತ್ತದೆ. ವಿಸ್ತೃತ ಖಾತೆಯನ್ನು ವಿಸ್ತರಣೆಯ ಸಮಯದಲ್ಲಿ ಯಾವುದೇ ಸಮಯದಲ್ಲಿ ಸ್ಥಗಿತಗೊಳಿಸಬಹುದು. ಇದರಿಂದ ನಿಮಗೆ ಹೆಚ್ಚಿನ ರಿಟರ್ನ್ಸ್ ಸಿಗುತ್ತದೆ.
ಕನಿಷ್ಠ 100 ರೂ. ಹೂಡಿಕೆ ಮಾಡಬಹುದು
ಗರಿಷ್ಠ ಎಷ್ಟು ಬೇಕಾದರೂ ಹೂಡಿಕೆ ಸಾಧ್ಯ
3 ವರ್ಷದ ಲಾಕ್ ಇನ್ ಪೀರಿಯಡ್ ಮರೆಯದಿರಿ
ಅಂಚೆ ಕಚೇರಿಯ ವೆಬ್ಸೈಟ್ ಪ್ರಕಾರ, ಅಂಚೆ ಕಚೇರಿಯಲ್ಲಿ ಕೇವಲ 100 ರೂಪಾಯಿಗಳೊಂದಿಗೆ ಆರ್ಡಿ ಖಾತೆಯನ್ನು ತೆರೆಯಬಹುದು ಮತ್ತು ಅದರಲ್ಲಿ ಹೂಡಿಕೆ ಮಾಡಲು ಗರಿಷ್ಠ ಮಿತಿಯಿಲ್ಲ. ಅಗತ್ಯವಿರುವ ಸಮಯದಲ್ಲಿ ನೀವು ಅಂಚೆ ಕಚೇರಿಯಲ್ಲಿ ಆರ್ಡಿ ಖಾತೆಯ ಮೇಲೆ ಸಾಲವನ್ನು ಕೂಡ ಪಡೆಯಬಹುದಾಗಿದೆ. ಇದರಿಂದ ತೆರಿಗೆ ಉಳಿತಾಯವೂ ಸಾಧ್ಯವಿದೆ ಎಂಬುದು ನೆನಪಿರಲಿ.
ಆರ್ ಡಿ ಖಾತೆಯಲ್ಲಿ ಹಣ ಹೂಡಿಕೆ ಮಾಡಲು ಶುರು ಮಾಡಿದರೆ, ನೀವು ಯಾವಾಗ ಬೇಕಾದರೂ ಹಣವನ್ನು ಹಿಂಪಡೆಯಲು ಆಗುವುದಿಲ್ಲ. ಐದು ವರ್ಷದ ಹೂಡಿಕೆ ಆರಂಭಿಸಿದರೆ, ನಿಮಗೆ ಮೂರು ವರ್ಷಗಳ ಲಾಕ್ ಇನ್ ಪೀರಿಯಡ್ ಇರುತ್ತದೆ. ಮೂರು ವರ್ಷದೊಳಗೆ ಹಣ ಹಿಂಪಡೆದರೆ ಯಾವುದೇ ಬಡ್ಡಿಯ ಲಾಭ ಸಿಗೋದಿಲ್ಲ. ಸಣ್ಣ ವ್ಯಾಪಾರಿಗಳು, ನಿಯಮಿತ ಸಂಬಳ ಪಡೆಯುವವರು ಇದನ್ನು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.
