ಫ್ರಾನ್ಸ್ ನ ಪ್ರತಿಷ್ಠಿತ ಕಾನ್ಸ್ ಚಿತ್ರೋತ್ಸವದಲ್ಲಿ ಕನ್ನಡದ ಕಂಪು ಪಸರಿಸಿದೆ. ಉಪೇಂದ್ರ ನಿರ್ದೇಶಿಸಿ, ನಟಿಸಿದ್ದ ಸೂಪರ್ ಹಿಟ್ ಸಿನಿಮಾ ಎ ನಲ್ಲಿ ನಾಯಕಿಯಾಗಿ ಮಿಂಚಿದ್ದ ನಟಿ ಚಾಂದಿನಿ ಈ ಬಾರಿ ಕಾನ್ಸ್ ನಲ್ಲಿ ಕಂಗೊಳಿಸಿದ್ದಾರೆ. ಕಾನ್ಸ್ ಚಿತ್ರೋತ್ಸವದಲ್ಲಿ ಭಾರತೀಯ ಸಂಪ್ರಾದಾಯಿಕ ಸೀರೆಯುಟ್ಟು ಚಾಂದಿನಿ ರೆಡ್ ಕಾರ್ಪೆಟ್ ಗೆ ಎಂಟ್ರಿಕೊಟ್ಟು ಗಮನ ಸೆಳೆದಿದ್ದಾರೆ. ಈ ಚಿತ್ರೋತ್ಸವದ ರೆಡ್ ಕಾರ್ಪೆಟ್ ನಲ್ಲಿ ಭಾರತದ ಹಲವು ನಟಿ ಮಣಿಯರು ಭಾಗವಹಿಸಿದ್ದರೂ, ಅವರೆಲ್ಲರೂ ಆಧುನಿಕ ಉಡುಗೆಗಳಲ್ಲಿ ಕಾಣಿಸಿಕೊಂಡಿದ್ದರು.
ಆದ್ರೆ ನಟಿ ಚಾಂದಿನಿ ರೆಡ್ ಕಾರ್ಪೆಟ್ ಗೆ ನೀಲಿ ಬಣ್ಣದ ಸೀರೆಯುಟ್ಟು ಆಗಮಿಸೋ ಮೂಲಕ ಭಾರತದ ಸಂಪ್ರದಾಯ ಮತ್ತು ಪರಂಪರೆಯ ಪ್ರತಿಬಿಂಬದಂತೆ ಗೋಚರಿಸಿದ್ದಾರೆ. ಚಾಂದಿನಿ ಅಲ್ಲದೆ, ಬಾಲಿವುಡ್‍ ನಟಿ ಐಶ್ವರ್ಯ ರೈ ಸಹ ಬನಾರಸ್‍ ಸೀರೆಯಲ್ಲಿ ಕಂಗೊಳಿಸಿದ್ರು. ಇಂಥದ್ದೊಂದು ಪ್ರತಿಷ್ಠಿತ ಕಾರ್ಯಕ್ರಮದಲ್ಲಿ ಸೀರೆ ಧರಿಸುವುದರ ಮೂಲಕ ಕಾರ್ಪೆಟ್ ಗ್ಲಾಮರ್ ಅನ್ನು ಚಾಂದಿನಿ ಮರು ವ್ಯಾಖ್ಯಾನಿಸಿದ್ದಾರೆ. ಶತಮಾನಗಳಷ್ಟು ಹಳೆಯದಾದ ಸೀರೆ ಉಡುವ ಸಂಪ್ರದಾಯವನ್ನು ಜಾಗತಿಕ ವೇದಿಕೆಗೆ ತರುವುದರ ಜೊತೆಗೆ, ಅಂತರರಾಷ್ಟ್ರೀಯ ವಿನ್ಯಾಸಕರಿಗೆ ಸೀರೆಯ ಪ್ರಾಮುಖ್ಯತೆ ಮತ್ತು ಆಕರ್ಷಣೆಯನ್ನು ಅನ್ವೇಷಿಸಲು ನಟಿ ಚಾಂದಿನಿ ಪ್ರೇರೇಪಿಸಿದ್ದಾರೆ.
