ಬೆಂಗಳೂರು: ಬದಲಾದ ಕಾಲಘಟ್ಟದಲ್ಲಿ ಈಗ ಬಹುತೇಕ ಜನ ಕ್ರೆಡಿಟ್ ಕಾರ್ಡ್ ಗಳನ್ನು ಬಳಸುತ್ತಾರೆ. ಇಎಂಐನಲ್ಲಿ ಯಾವುದೇ ವಸ್ತುಗಳ ಖರೀದಿ, ತುರ್ತು ಸಂದರ್ಭದಲ್ಲಿ ಎದುರಾಗುವ ಖರ್ಚುಗಳನ್ನು ನಿಭಾಯಿಸುವುದು, 45 ದಿನಗಳವರೆಗೆ ಬಡ್ಡಿರಹಿತವಾಗಿ ಸಿಗುವ ಕ್ರೆಡಿಟ್ ಲಿಮಿಟ್ ಸದ್ಬಳಕೆ, ಸಿಬಿಲ್ ಸ್ಕೋರ್ ಉತ್ತಮಗೊಳಿಸುವುದು ಸೇರಿ ಹಲವು ಕಾರಣಗಳಿಂದ ಕ್ರೆಡಿಟ್ ಕಾರ್ಡ್ ಗಳನ್ನು ಬಳಸುತ್ತಾರೆ.
ಸದ್ಬಳಕೆ ಮಾಡಿಕೊಂಡರೆ ಕ್ರೆಡಿಟ್ ಕಾರ್ಡ್ ಬಳಕೆ ಒಳ್ಳೆಯದೆ. ಆದರೆ, ಆರ್ಥಿಕ ಶಿಸ್ತು ಇರದವರಿಗೆ ಇದು ಮಾರಕವಾಗುತ್ತದೆ. ಹಾಗೆಯೇ, ಇನ್ನೂ ಕೆಲವರು ಒಂದಕ್ಕಿಂತ ಹೆಚ್ಚಿನ ಕ್ರೆಡಿಟ್ ಕಾರ್ಡ್ ಗಳನ್ನು ಬಳಸುತ್ತಾರೆ. ಹೀಗೆ ಒಂದಕ್ಕಿಂತ ಹೆಚ್ಚು ಕ್ರೆಡಿಟ್ ಕಾರ್ಡ್ ಗಳನ್ನು ಬಳಸುವುದರಿಂದ ಏನೆಲ್ಲ ಅನುಕೂಲಗಳಿವೆ? ಅನನುಕೂಲಗಳೂ ಏನೇನು? ಇಲ್ಲಿದೆ ಮಾಹಿತಿ.
ಅನುಕೂಲಗಳು ಏನೇನು?
- ಒಂದಕ್ಕಿಂತ ಹೆಚ್ಚಿನ ಕ್ರೆಡಿಟ್ ಕಾರ್ಡ್ ಗಳನ್ನು ವಿವಿಧ ವೆಚ್ಚಗಳಿಗಾಗಿ ಬಳಸಬಹುದು. ಉದಾಹರಣೆಗೆ, ನೀವು ಒಂದು ಕ್ರೆಡಿಟ್ ಕಾರ್ಡ್ನೊಂದಿಗೆ ಶಾಪಿಂಗ್ ಮಾಡುತ್ತಿದ್ದರೆ, ಇನ್ನೊಂದನ್ನು ಪ್ರಯಾಣ ಅಥವಾ ಇತರ ವೆಚ್ಚಗಳ ಪಾವತಿಗಾಗಿ ಇರಿಸಬಹುದು.
- ಎರಡು ಕಾರ್ಡ್ನ ಹೊರೆ ನಿಮ್ಮ ಮೇಲೆ ಹೆಚ್ಚಾಗುವುದಿಲ್ಲ. ವಿವಿಧ ಬ್ಯಾಂಕ್ಗಳು ನಿಮಗೆ ಹಲವು ರೀತಿಯ ಆಫರ್ಗಳನ್ನು ನೀಡುತ್ತವೆ. ಅಂತಹ ಪರಿಸ್ಥಿತಿಯಲ್ಲಿ, ನೀವು ಏಕಕಾಲದಲ್ಲಿ ಅನೇಕ ಕೊಡುಗೆಗಳನ್ನು ಬಳಸಬಹುದು.
- ಕ್ರೆಡಿಟ್ ಕಾರ್ಡ್ ಗಳ ಬಳಕೆಯಿಂದ ಸಿಗುವ ಪಾಯಿಂಟ್ಸ್ ಗಳನ್ನು ಎನ್ ಕ್ಯಾಶ್ ಮಾಡಿಕೊಂಡು ಉಚಿತವಾಗಿ ಹಲವು ವಸ್ತುಗಳನ್ನು ಖರೀದಿಸಬಹುದು.
- ಕೆಲ ಕ್ರೆಡಿಟ್ ಕಾರ್ಡ್ ಗಳಿಂದ ವಿಮಾನ ನಿಲ್ದಾಣಗಳ ಲಾಂಜ್ ಗೆ ಉಚಿತ ಪ್ರವೇಶ ಇರುತ್ತದೆ. ಮೂವಿ ಟಿಕೆಟ್, ಪೆಟ್ರೋಲ್ ಬಂಕ್ ನಲ್ಲಿ ಡಿಸ್ಕೌಂಟ್ ಸೇರಿ ಹಲವು ಸೌಲಭ್ಯಗಳು ಸಿಗಲಿವೆ.
ಹೆಚ್ಚು ಕ್ರೆಡಿಟ್ ಕಾರ್ಡ್ ಇದ್ದರೆ ಏನೆಲ್ಲ ಅನನುಕೂಲಗಳು?
- ಒಂದಕ್ಕಿಂತ ಹೆಚ್ಚು ಕ್ರೆಡಿಟ್ ಕಾರ್ಡ್ ಹೊಂದಿದ್ದರೆ, ನೀವು ಒಂದಕ್ಕಿಂತ ಹೆಚ್ಚು ಕಾರ್ಡ್ ಗಳಿಗೆ ವಾರ್ಷಿಕ ಶುಲ್ಕವನ್ನು ಪಾವತಿಸಬೇಕಾಗಬಹುದು.
- ಹೆಚ್ಚು ಕ್ರೆಡಿಟ್ ಕಾರ್ಡ್ ಇದ್ದರೆ ನಿಮ್ಮ ಆರ್ಥಿಕ ಹೊರೆ ಹೆಚ್ಚಾಗುತ್ತದೆ. ಒಂದಕ್ಕಿಂತ ಹೆಚ್ಚು ಕ್ರೆಡಿಟ್ ಕಾರ್ಡ್ ಗಳನ್ನು ಹೊಂದಿದ್ದರೆ ನೀವು ಅನಗತ್ಯವಾಗಿ ಶಾಪಿಂಗ್ ಸೇರಿ ಹಲವು ಖರ್ಚುಗಳನ್ನು ಮೈಮೇಲೆ ಎಳೆದುಕೊಳ್ಳುತ್ತೀರಿ.
- ಎಲ್ಲ ಕ್ರೆಡಿಟ್ ಕಾರ್ಡ್ ಬಿಲ್ ಗಳನ್ನು ನೀವು ಸಮಯಕ್ಕೆ ಪಾವತಿಸದಿದ್ದರೆ, ನೀವು ಕೂಡ ಸಾಲದ ಸುಳಿಯಲ್ಲಿ ಸಿಲುಕಬಹುದು. ಇದು ನಿಮ್ಮ CIBIL ಸ್ಕೋರ್ ಗೆ ಭಾರಿ ಹಾನಿ ಮಾಡುತ್ತದೆ.
