ಮಹಿಳಾ ಕ್ರಿಕೆಟಿಗರಿಗೆ ಸಮಾನ ಹಣಕ್ಕಿಂತಲೂ , ಸಮಾನ ಗೌರವ ಬೇಕು: ಸ್ಮೃತಿ ಮಂಧಾನಾ

ಬೆಂಗಳೂರು: ಮಹಿಳಾ ಕ್ರಿಕೆಟ್ ಕೆಲವು ವರ್ಷಗಳಿಂದ ಮಹತ್ತರ ರೂಪಾಂತರ ಪಡೆದುಕೊಂಡಿದೆ. ಪ್ರೇಕ್ಷಕರ ಸಂಖ್ಯೆಯಲ್ಲಿ ಹೆಚ್ಚಳ, ಸ್ಪಾನ್ಸರ್‌ಶಿಪ್‌ಗಳು ಮತ್ತು ಅಭಿಮಾನಿಗಳ ಆಕರ್ಷಣೆ ಹೆಚ್ಚಾಗುತ್ತಿದೆ. ಕ್ರಾಂತಿಯಲ್ಲಿ ಪ್ರಮುಖ ಪಾತ್ರ ವಹಿಸಿರುವವರು ಭಾರತದ ಸ್ಟಾರ್ ಬ್ಯಾಟರ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮಹಿಳೆಯರ ತಂಡದ ನಾಯಕಿ ಸ್ಮೃತಿ ಮಂಧಾನ.(Smriti Mandhana)

ಫೆಬ್ರವರಿ 3, ಸೋಮವಾರ Sports-Forward Nation ಆಯೋಜಿಸಿದ ಕಾರ್ಯಕ್ರಮದಲ್ಲಿ, ಮಂಧಾನ ಮಹಿಳಾ ಕ್ರಿಕೆಟ್ ಹೇಗೆ ಅಭಿವೃದ್ಧಿ ಹೊಂದಿದೆ ಮತ್ತು ಮಹಿಳಾ ಪ್ರೀಮಿಯರ್ ಲೀಗ್ ಈ ಬೆಳವಣಿಗೆಯಲ್ಲಿ ಎಷ್ಟು ದೊಡ್ಡ ಪಾತ್ರ ವಹಿಸಿದೆ ಎಂಬುದನ್ನು ವಿವರಿಸಿದ್ದಾರೆ.

ಕಳೆದ ವರ್ಷ ಆರ್‌ಸಿಬಿ ತಂಡವನ್ನು ಮೊಟ್ಟ ಮೊದಲ ಡಬ್ಲ್ಯುಪಿಎಲ್‌ ಪ್ರಶಸ್ತಿ (WPL Award) ಕಡೆಗೆ ಮುನ್ನಡೆಸಿದ ಮಂಧಾನ, ಈ ಟೂರ್ನಿಯ ಯಶಸ್ಸಿನಿಂದ ಮಹಿಳಾ ಕ್ರಿಕೆಟ್ ಕುರಿತು ಚರ್ಚೆಗಳು ಬದಲಾಗಿವೆ ಎಂದು ಹೇಳಿದ್ದಾರೆ.

“ನಾವು ಕ್ರಿಕೆಟ್ ಆಡಲು ಪ್ರಾರಂಭಿಸಿದ ದಿನಗಳಿಂದ ಈ ದಿನದವರೆಗೆ ಹಲವು ಬದಲಾವಣೆಯನ್ನು ನೋಡಿದ್ದೇವೆ. ಆರಂಭದಲ್ಲಿ ನಾವು ಆಡುತ್ತಿದ್ದ ಸ್ಟೇಡಿಯಂಗಳು ಖಾಲಿಯಾಗಿರುತ್ತಿದ್ದವು. ಆದರೆ ಇಂದು, ಯಾವ ತಂಡಕ್ಕಾಗಿ ಆಡಿದರೂ, ಕನ್ನಡಿಗರ ಪ್ರೀತಿಯ RCB ಆಗಲೀ, ಭಾರತ ತಂಡವಾಗಲೀ, ಮೈದಾನಗಳು ತುಂಬಿರುತ್ತವೆ. ಇದು ನನಗೆ ತುಂಬಾ ಸಂತೋಷದ ವಿಷಯ. . ಬಹಳಷ್ಟು ಜನರು ನಮ್ಮ ಆಟವನ್ನು ನೋಡುತ್ತಿದ್ದಾರೆ, ಪ್ರಶಂಸಿಸುತ್ತಿದ್ದಾರೆ, ಟೀಕಿಸುತ್ತಿದ್ದಾರೆ. ಅವರು ಮಹಿಳಾ ಕ್ರೀಡೆ ಬಗ್ಗೆ ಕಾಳಜಿ ವಹಿಸುತ್ತಿದ್ದಾರೆ. ನಾವು ಪುರುಷರಂತೆ ಸಮಾನ ಹಣ ಬಯಸುವುದಿಲ್ಲ, ನಮಗೆ ಬೇಕಾದದ್ದು ಸಮಾನ ಗೌರವ ನಮ್ಮನ್ನು ಒಪ್ಪಿಕೊಳ್ಳುತ್ತಿದ್ದಾರೆ, ಇದು ಸಾಕು,”** ಎಂದು ಮಂಧಾನ ಹೇಳಿದ್ದಾರೆ.

ಸಾನಿಯಾ ಸ್ಫೂರ್ತಿ
28 ವರ್ಷದ ಮಂಧಾನ ಮಹಿಳಾ ಕ್ರಿಕೆಟ್ ಮಾತ್ರವಲ್ಲದೆ ಬೇರೆ ಮಹಿಳೆಯರ ಕ್ರೀಡೆಗಳ ಬೆಳವಣಿಗೆ ಕುರಿತೂ ಮಾತನಾಡಿದರು. ಭಾರತದಲ್ಲಿ ಮಹಿಳೆಯರು ಕ್ರಿಕೆಟ್ ಅಥವಾ ಇತರ ಕ್ರೀಡೆಗಳಲ್ಲಿ ಪಾಲ್ಗೊಳ್ಳಲು ಭರವಸೆ ತುಂಬಿದ ಮೊದಲ ವ್ಯಕ್ತಿ ಸಾನಿಯಾ ಮಿರ್ಜಾ ಎಂದು ಅವರು ಹೇಳಿದರು.

ನಾನು ಕ್ರಿಕೆಟ್ ಆರಂಭಿಸಿದ್ದು, ನನ್ನ ಅಣ್ಣನ ಆಟವನ್ನು ನೋಡಿ ಪ್ರಭಾವಿತಗೊಂಡಿದ್ದರಿಂದ ಮತ್ತು ತಂದೆ ಕ್ರಿಕೆಟ್ ಪ್ರಿಯರಾಗಿದ್ದರಿಂದ . ಆದರೆ, ಆ ವೇಳೆ ಮಹಿಳಾ ಕ್ರಿಕೆಟ್ ಬಗ್ಗೆ ಅಷ್ಟು ಚರ್ಚೆಗಳಿರಲಿಲ್ಲ. ನಾನು 10 ಅಥವಾ 11 ವರ್ಷ ವಯಸ್ಸಿನವಳಾಗಿದ್ದಾಗ ಭಾರತದಲ್ಲಿ ಸಾನಿಯಾ ಮಿರ್ಜಾ(Sania Mirza) ದೊಡ್ಡ ಐಕಾನ್ ಆಗಿ ಹೊರಹೊಮ್ಮಿದರು. ಆ ಸಮಯದಲ್ಲಿ ನಾವು ಕ್ರೀಡೆಯಲ್ಲಿ ಮಹಿಳೆಯೊಬ್ಬಳು ಪ್ರಭಾವ ಬೀರುತ್ತಿದ್ದಾರೆ` ಎಂದು ಖುಷಿಪಟ್ಟೆವು. ಅವರು ನಮಗೆ ಪ್ರೇರಣೆ ನೀಡಿದರು,”** ಎಂದು ಮಂಧಾನ ಹೇಳಿದ್ದಾರೆ.

ಫೆಬ್ರವರಿ 14ರಿಂದ ಡಬ್ಲ್ಯುಪಿಎಲ್‌
ಮಹಿಳಾ ಪ್ರೀಮಿಯರ್ ಲೀಗ್ ಈಗ ತನ್ನ ಮೂರನೇ ಆವೃತ್ತಿಗೆ ಪ್ರವೇಶಿಸುತ್ತಿದೆ. ಫೆಬ್ರವರಿ 14ರಿಂದ ಮಾರ್ಚ್ 15ರವರೆಗೆ ನಾಲ್ಕು ಸ್ಥಳಗಳಲ್ಲಿ ಪಂದ್ಯಗಳು ನಡೆಯಲಿವೆ. ಮಂಧಾನ ನೇತೃತ್ವದ ಆರ್‌ಸಿಬಿ ಮಹಿಳಾ ತಂಡವು, ಗುಜರಾತ್ ಜೈಂಟ್ಸ್ ವಿರುದ್ಧ ವಡೋದರದಲ್ಲಿ ಮೊದಲ ಪಂದ್ಯ ಆಡಲಿದೆ.