ದೇಶದಲ್ಲಿ ರಣಜಿ ಟ್ರೋಫಿಯ 5ನೇ ಸುತ್ತಿನ ಪಂದ್ಯಗಳು ಆರಂಭವಾಗಿವೆ. ಈ ಟೂರ್ನಿಯಲ್ಲಿ ಗೋವಾ ತಂಡ ಭರ್ಜರಿ ಪ್ರದರ್ಶನ ನೀಡಿದೆ.
ಗೋವಾ ಮತ್ತು ಅರುಣಾಚಲ ಪ್ರದೇಶದ ಮಧ್ಯೆ ನಡೆದ ಪಂದ್ಯದಲ್ಲಿ ಭರ್ಜರಿ ದಾಖಲೆ ಸೃಷ್ಟಿಯಾಗಿದೆ. ಗೋವಾ ಕ್ರಿಕೆಟ್ ಸಂಸ್ಥೆಯ ಮೈದಾನದಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಗೋವಾ ತಂಡದ ಇಬ್ಬರು ಆಟಗಾರರು ದಾಖಲೆಯ ತ್ರಿಶತಕ ಸಿಡಿಸುವುದರ ಮೂಲಕ ರಣಜಿಯಲ್ಲಿ ದಾಖಲೆ ಬರೆದಿದ್ದಾರೆ.
ಗೋವಾ ತಂಡದ ಕಶ್ಯಪ್ ಬಾಕ್ಲೆ ಮತ್ತು ಸ್ನೇಹಲ್ ಕೌತಾಂಕರ್ ಇಬ್ಬರೂ ತ್ರಿಶತಕ ಬಾರಿಸಿದ್ದು, ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಇಬ್ಬರು ಬ್ಯಾಟ್ಸಮನ್ ಗಳು ಒಂದೇ ಇನ್ನಿಂಗ್ಸ್ ನಲ್ಲಿ ತ್ರಿಶತಕ ಸಿಡಿಸಿದ ಇತಿಹಾಸ ಬರೆದಿದ್ದಾರೆ.
ಮೊದಲ ಇನ್ನಿಂಗ್ಸ್ನಲ್ಲಿ ಅರುಣಾಚಲ ಪ್ರದೇಶ ತಂಡವನ್ನು ಗೋವಾ ತಂಡ ಕೇವಲ 84 ರನ್ ಗಳಿಗೆ ಕಟ್ಟಿ ಹಾಕಿತು. ನಂತರ ಬ್ಯಾಟಿಂಗ್ ಆರಂಭಿಸಿದ ಗೋವಾ 121 ರನ್ ಗಳಿಗೆ ಎರಡು ವಿಕೆಟ್ ಕಳೆದುಕೊಂಡಿತ್ತು. ಆಗ ಒಂದಾದ ಕಶ್ಯಪ್ ಹಾಗೂ ಕೌತಾಂಕರ್ ರನ್ ಚಚ್ಚಲು ಆರಂಭಿಸಿದರು. ಕಶ್ಯಪ್ 300 ರನ್ಗಳ ಅಜೇಯ ರನ್ ಗಳಿಸಿದರು. ಇದರಲ್ಲಿ 39 ಬೌಂಡರಿ ಮತ್ತು 2 ಸಿಕ್ಸರ್ಗಳು ಸೇರಿದ್ದವು. ಸ್ನೇಹಲ್ ಕೌತಾಂಕರ್ 314 ರನ್ ಸಿಡಿಸಿ ಮಿಂಚಿದರು. ಈ ಮೂಲಕ ಗೋವಾ ತಂಡ 727 ರನ್ ಗಳಿಗೆ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು.
ಇದರಲ್ಲಿ ಈ ಜೋಡಿಯ ಜೊತೆಯಾಟದ ರನ್ 606 ಆಗಿತ್ತು. ನಂತರ ಎರಡನೇ ಇನ್ನಿಂಗ್ಸ್ ಆರಂಭಿಸಿ ಅರುಣಾಚಲ ಪ್ರದೇಶ ತಂಡ 91 ರನ್ ಗಳಿಗ ಆಲೌಟ್ ಆಯಿತು. ಪರಿಣಾಮ ಗೋವಾ ತಂಡ ಬರೋಬ್ಬರಿ 552 ರನ್ ಗಳ ಗೆಲುವು ದಾಖಲಿಸಿತು. ಮೊದಲ ಇನಿಂಗ್ಸ್ನಲ್ಲಿ ಗೋವಾ ಪರ ಅರ್ಜುನ್ ತೆಂಡೂಲ್ಕರ್ 5 ವಿಕೆಟ್ ಪಡೆದಿದ್ದಾರೆ.
