‘ಮಂಗಗಳ ಜೊತೆ ಕುಳಿತರೆ ಅವರನ್ನು ಗುರುತಿಸಲಾಗದು’: ಯೋಗಿಯ ‘ಮೂರು ಕೋತಿಗಳು’ ಹೇಳಿಕೆಗೆ ಅಖಿಲೇಶ್ ತಿರುಗೇಟು

ಪಾಟ್ನಾ: ಬಿಹಾರ ವಿಧಾನಸಭಾ ಚುನಾವಣಾ ಪ್ರಚಾರದ ಕಣ ರಂಗೇರುತ್ತಿದ್ದಂತೆ, ನಾಯಕರ ನಡುವಿನ ವಾಕ್ಸಮರ ತಾರಕಕ್ಕೇರಿದೆ. ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ವಿರೋಧ ಪಕ್ಷದ ನಾಯಕರನ್ನು ‘ಗಾಂಧೀಜಿಯ ಮೂರು ಕೋತಿಗಳು’ ಎಂದು ಜರಿದಿದ್ದಕ್ಕೆ ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದಾರೆ. “ಯೋಗಿ ಆದಿತ್ಯನಾಥ್ ಅವರನ್ನು ಮಂಗಗಳ ಗುಂಪಿನಲ್ಲಿ ಕೂರಿಸಿದರೆ, ಯಾರಿಂದಲೂ ಅವರನ್ನು ಗುರುತಿಸಲು ಸಾಧ್ಯವಿಲ್ಲ” ಎಂದು ಅವರು ವ್ಯಂಗ್ಯವಾಡಿದ್ದಾರೆ.

ಯೋಗಿ ಹೇಳಿದ್ದೇನು?

ಮುಜಫರ್‌ಪುರದಲ್ಲಿ ನಡೆದ ಚುನಾವಣಾ ರ‍್ಯಾಲಿಯಲ್ಲಿ ಇತ್ತೀಚೆಗೆ ಮಾತನಾಡಿದ್ದ ಯೋಗಿ ಆದಿತ್ಯನಾಥ್, ಆರ್‌ಜೆಡಿ ನಾಯಕ ತೇಜಸ್ವಿ ಯಾದವ್, ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಮತ್ತು ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಅವರನ್ನು ಗುರಿಯಾಗಿಸಿಕೊಂಡು, ‘ಅಪ್ಪು, ಪಪ್ಪು ಮತ್ತು ಟಪ್ಪು’ ಎಂದು ಕರೆದಿದ್ದರು. “ಗಾಂಧೀಜಿಯವರ ಮೂರು ಕೋತಿಗಳ ಬಗ್ಗೆ ನಿಮಗೆ ಗೊತ್ತಿರಬಹುದು. ಅವು ಕೆಟ್ಟದ್ದನ್ನು ಮಾತನಾಡುವುದಿಲ್ಲ, ಕೆಟ್ಟದ್ದನ್ನು ಕೇಳುವುದಿಲ್ಲ ಮತ್ತು ಕೆಟ್ಟದ್ದನ್ನು ನೋಡುವುದಿಲ್ಲ. ಆದರೆ ಇಲ್ಲಿರುವ ಮೂರು ಕೋತಿಗಳಾದ ಅಪ್ಪು, ಪಪ್ಪು, ಟಪ್ಪು (ಅಖಿಲೇಶ್, ರಾಹುಲ್ ಮತ್ತು ತೇಜಸ್ವಿ) ಬಿಹಾರದ ಜನರಿಗೆ ಸುಳ್ಳು ಹೇಳಿ ಇಲ್ಲಿ ಮತ್ತೆ ‘ಜಂಗಲ್ ರಾಜ್’ ಸ್ಥಾಪಿಸಲು ಬಯಸುತ್ತಿದ್ದಾರೆ,” ಎಂದು ಅವರು ಆರೋಪಿಸಿದ್ದರು.​​

ಆರ್‌ಜೆಡಿ ಆಡಳಿತದಲ್ಲಿ ಬಿಹಾರದಲ್ಲಿ ಕೊಲೆ, ಲೂಟಿ, ದರೋಡೆಗಳು ಹೆಚ್ಚಾಗಿದ್ದವು ಎಂದು ಹೇಳಿದ್ದ ಯೋಗಿ, “ಈಗ ನಿತೀಶ್ ಕುಮಾರ್ ಆಡಳಿತದಲ್ಲಿ ಬಿಹಾರ ಅಭಿವೃದ್ಧಿ ಸಾಧಿಸುತ್ತಿದೆ. ಉದ್ಯೋಗಾವಕಾಶಗಳು ಹೆಚ್ಚುತ್ತಿವೆ. ಆದರೆ, ಅಪ್ಪು, ಪಪ್ಪು ಮತ್ತು ಟಪ್ಪು ಜಾತಿ ಆಧಾರದ ಮೇಲೆ ಜನರನ್ನು ವಿಭಜಿಸಿ, ಮತ್ತೆ ಮಾಫಿಯಾ ಆಡಳಿತವನ್ನು ತರಲು ಪ್ರಯತ್ನಿಸುತ್ತಿದ್ದಾರೆ. ನೀವು ಒಡೆದುಹೋದರೆ, ನಾಶವಾಗುತ್ತೀರಿ. ಹಾಗಾಗಿ ಎನ್‌ಡಿಎಯನ್ನು ಮತ್ತೆ ಬೆಂಬಲಿಸಿ,” ಎಂದು ಮನವಿ ಮಾಡಿದ್ದರು.

ಯೋಗಿ ಹೇಳಿಕೆಗೆ ಅಖಿಲೇಶ್ ತಿರುಗೇಟು

ಯೋಗಿ ಆದಿತ್ಯನಾಥ್ ಅವರ ಹೇಳಿಕೆಗೆ ಬಿಹಾರದಲ್ಲಿ ಪ್ರಚಾರ ನಡೆಸುತ್ತಿದ್ದ ಅಖಿಲೇಶ್ ಯಾದವ್ ತೀಕ್ಷ್ಣವಾಗಿ ಉತ್ತರಿಸಿದ್ದಾರೆ. “ಬಿಜೆಪಿಯವರು ಗಾಂಧೀಜಿಯವರ ಮೂರು ಕೋತಿಗಳನ್ನು ನೆನಪಿಸಿಕೊಳ್ಳುತ್ತಿದ್ದಾರೆ, ಏಕೆಂದರೆ ಅವರು ಜನರ ಗಮನವನ್ನು ಪ್ರಮುಖ ವಿಷಯಗಳಿಂದ ಬೇರೆಡೆಗೆ ಸೆಳೆಯಲು ಬಯಸಿದ್ದಾರೆ. ಸತ್ಯವೇನೆಂದರೆ, ಅವರನ್ನು (ಯೋಗಿ) ಮಂಗಗಳ ಗುಂಪಿನಲ್ಲಿ ಕೂರಿಸಿದರೆ, ನೀವಾಗಲಿ, ನಾನಾಗಲಿ ಅವರನ್ನು ಗುರುತಿಸಲು ಸಾಧ್ಯವಿಲ್ಲ,” ಎಂದು ಅವರು ಹೇಳಿದ್ದಾರೆ.

ನಾಳೆ ಬಿಹಾರದಲ್ಲಿ ಮೊದಲ ಹಂತದ ಮತದಾನ

ಬಿಹಾರದಲ್ಲಿ ಹೈ-ವೋಲ್ಟೇಜ್ ವಿಧಾನಸಭಾ ಚುನಾವಣೆ ನಡೆಯುತ್ತಿದೆ. ಮೊದಲ ಹಂತದ ಮತದಾನ ನಾಳೆ ನಡೆಯಲಿದ್ದು, ಎರಡನೇ ಹಂತವು ನವೆಂಬರ್ 11 ರಂದು ನಡೆಯಲಿದೆ. ನವೆಂಬರ್ 14 ರಂದು ಮತ ಎಣಿಕೆ ನಡೆದು, ಫಲಿತಾಂಶ ಪ್ರಕಟವಾಗಲಿದೆ. ಒಂದೆಡೆ ಜೆಡಿಯು, ಬಿಜೆಪಿ, ಚಿರಾಗ್ ಪಾಸ್ವಾನ್ ಅವರ ಲೋಕ ಜನಶಕ್ತಿ ಪಕ್ಷ ಮತ್ತು ಜಿತನ್ ರಾಮ್ ಮಾಂಝಿ ಅವರ ಹಿಂದೂಸ್ತಾನಿ ಅವಾಮ್ ಮೋರ್ಚಾ (ಜಾತ್ಯತೀತ) ಒಳಗೊಂಡಿರುವ ಎನ್‌ಡಿಎ ಮೈತ್ರಿಕೂಟವಿದೆ. ಮತ್ತೊಂದೆಡೆ, ಆರ್‌ಜೆಡಿ, ಕಾಂಗ್ರೆಸ್, ಎಡಪಕ್ಷಗಳು ಮತ್ತು ಮುಖೇಶ್ ಸಹಾನಿ ಅವರ ವಿಕಾಸಶೀಲ್ ಇನ್ಸಾನ್ ಪಾರ್ಟಿ ಒಳಗೊಂಡಿರುವ ಮಹಾಘಟಬಂಧನ್ ನಡುವೆ ಪ್ರಬಲ ಸ್ಪರ್ಧೆಯಿದೆ.
ಇದನ್ನು ಓದಿ : ಗೆಲುವಿನ ಬೆನ್ನಲ್ಲೇ ಟ್ರಂಪ್‌ಗೆ ಜೊಹ್ರಾನ್ ಮಮ್ದಾನಿ ನೇರ ಸವಾಲು ; ‘ಆಟ ಈಗ ಶುರುವಾಗಿದೆ’ ಎಂದ ಅಧ್ಯಕ್ಷ