ಬಂಗಾರ. ಈ ಮೂರಕ್ಷರದ ಪದ ಶೀಘ್ರವೇ ಕೇವಲ ಬಾಯಿ ಮಾತಿಗಷ್ಟೇ ಚಿನ್ನ, ರನ್ನ ಅನ್ನುವಂತಾಗಿಸುತ್ತಾ ಅನ್ನೋ ಗುಮಾನಿ ಮೂಡಿಸ್ತಿದೆ. ವಿಶ್ವದಲ್ಲೇ ಹಳದಿ ಲೋಹದ ದರ ಏರಿಕೆ ರಾಕೆಟ್ ವೇಗವನ್ನೂ ಮೀರಿಸ್ತಿದೆ. ಹೌದು..ಬಂಗಾರ ಪ್ರತಿ ನಿತ್ಯ ಏರಿಕೆಯಾಗುತ್ತಿರುವ ವೇಗವನ್ನು ನೋಡಿದರೆ ಕೆಲವೇ ದಿನಗಳಲ್ಲಿ 10 ಗ್ರಾಂ ಬಂಗಾರ 1 ಲಕ್ಷದ ಗಡಿ ದಾಟಿ ಓಡುತ್ತೆ ಎನ್ನಲಾಗುತ್ತಿದೆ.
ಚಿನಿವಾರ ಪೇಟೆ ಮೇಲೇಕೆ ಹೂಡಿಕೆದಾರರಿಗೆ ಮೋಹ!
ಭಾರತದಲ್ಲೀಗ 10 ಗ್ರಾಂ ಬಂಗಾರದ ಬೆಲೆ 98,100 ರೂಪಾಯಿ ಗಡಿ ದಾಟಿದೆ. ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಬಂಗಾರ ಈ ಪಾಟಿ ದುಬಾರಿಯಾಗ್ತಿದ್ರೆ ಇದಕ್ಕೆ ಮೂಲ ಕಾರಣವೇನು ಅನ್ನೋದು ಇಲ್ಲಿ ಬಲು ಚರ್ಚಿತ. ಹೌದು, ಚಿನಿವಾರ ಪೇಟೆ ಹಿಂದಿನಿಂದಲೂ ಹೂಡಿಕೆದಾರರಿಗೆ ಅತ್ಯಂತ ಸೇಫ್ ಅಖಾಡ. ಜಗತ್ತಿನ ಬಹುತೇಕ ಹೂಡಿಕೆದಾರರು ಇದೀಗ ಬಂಗಾರದ ಮೇಲೆ ಬಂಡವಾಳ ಹೂಡ್ತಿದ್ದಾರೆ. ಹೀಗಾಗಿಯೇ ಬೇಡಿಕೆ ಹೆಚ್ಚಾಗುತ್ತಿದ್ದಂತೆ ಸಹಜವಾಗೇ ಬೆಲೆಯೂ ಏರಿಕೆಯ ಹಾದಿ ಹಿಡಿಯುತ್ತೆ.
ನಿಜಕ್ಕೂ ಜಗತ್ತಿನ ವಿವಿಧ ದೇಶಗಳ ಮೇಲೆ ವಿಶ್ವದ ದೊಡ್ಡಣ್ಣ ಡೊನಾಲ್ಡ್ ಟ್ರಂಪ್ ಹೇರಿರುವ ಟ್ಯಾರಿಫ್ ವಾರ್ ಹೂಡಿಕೆದಾರರನ್ನು ಷೇರುಗಳ ಮೇಲೆ ನಂಬಿಕೆ ಕಳೆದುಕೊಳ್ಳುವಂತೆ ಮಾಡಿದೆ. ಟ್ರಂಪ್ ರ ಟ್ಯಾಕ್ಸ್ ವಾರ್ ಯಾವಾಗ ಯಾವ ಏಟು ನೀಡುತ್ತೋ ಅನ್ನೋ ಅರಿವಿಲ್ಲದ ಉದ್ಯಮ ಜಗತ್ತು ಈಗ ಬಂಗಾರದ ಮೇಲೆ ತಮ್ಮ ಬಂಡವಾಳ ಹೂಡುತ್ತಿದೆ.
ಭವಿಷ್ಯದಲ್ಲಿ ನಿಜಕ್ಕೂ ಅಗ್ಗವಾಗುತ್ತಾ ಬಂಗಾರ!
ಅಮೆರಿಕದ ಕೆಲ ಅರ್ಥಶಾಸ್ತ್ರಜ್ಞರ ಲೆಕ್ಕಾಚಾರಗಳು ನಿಜಕ್ಕೂ ಬಂಗಾರ ಪ್ರಿಯರ ದಿಲ್ ಖುಷ್ ಮಾಡಿದೆ. ಯಾಕೆಂದರೆ ವರ್ಷಾಂತ್ಯಕ್ಕೆ ಬಂಗಾರದ ಮೇಲಿನ ಹೂಡಿಕೆ ಅಪಾರ ಕಮ್ಮಿಯಾಗಲಿದ್ದು ಚಿನ್ನದ ದರ 10 ಗ್ರಾಂಗೆ 50 ಸಾವಿರದ ಸನಿಹಕ್ಕೆ ಬರಬಹುದು ಅನ್ನೋ ಲೆಕ್ಕವಿದೆ. ಆದರೆ, ಭಾರತದಂಥಾ ದೇಶಗಳಲ್ಲಿ ಶೀಘ್ರವೇ ಹಬ್ಬ, ಮದುವೆಗಳ ಸೀಜನ್ ಶುರುವಾಗಲಿದೆ. ಸಹಜವಾಗೇ ಇಂಥಾ ಸಂದರ್ಭದಲ್ಲಿ ಖರೀದಿ ಭರಾಟೆ ತಾರಕಕ್ಕೇರಿರುತ್ತೆ.
ಇಂಥಾ ಸಂದರ್ಭದಲ್ಲಿ ಬೆಲೆ ಕಮ್ಮಿಯಾಗೋ ಯಾವ ಲಕ್ಷಣಗಳೂ ಇಲ್ಲ. ಹೀಗಾಗಿ ಮಧ್ಯಮ ವರ್ಗ ಬಂಗಾರ ಖರೀದಿಯನ್ನು ಕೆಲ ಕಾಲ ಮುಂದೂಡಿದ್ರೆ ಒಳಿತು. ಯಾಕೆಂದ್ರೆ ಭವಿಷ್ಯದಲ್ಲಿ ನಿಜಕ್ಕೂ ಬಂಗಾರ 50 ಸಾವಿರದ ಗಡಿಗೆ ಬರೋದಾದ್ರೆ ಈಗ್ಯಾಕೆ ಲಕ್ಷದ ಆಜುಬಾಜಿನಲ್ಲಿರೋ ಚಿನ್ನ ಖರೀದಿಸಬೇಕು ಹೇಳಿ.
