ಇಡೀ ವಿಶ್ವವೇ ಕಾಯುತ್ತಿರುವ 33ನೇ ಒಲಿಂಪಿಕ್ಸ್ ಕೂಟ ಆರಂಭಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಅಧಿಕೃತವಾಗಿ ಕೂಟ ಪ್ಯಾರಿಸ್ ನಲ್ಲಿ ಜುಲೈ 26ರಂದು ಆರಂಭವಾಗಲಿದೆ. ಆದರೂ ಫ್ರಾನ್ಸ್‌ನಲ್ಲಿ ಕೆಲವು ಕ್ರೀಡೆಗಳು ಜುಲೈ 24 ರಿಂದ ಪ್ರಾರಂಭವಾಗುತ್ತವೆ. ಫ್ರಾನ್ಸ್‌ ನ 16 ವಿವಿಧ ನಗರಗಳಲ್ಲಿ ಈ ಕ್ರೀಡಾಕೂಟ ಆರಂಭವಾಗಲಿದೆ. ಈ ಕೂಟ ಆಯೋಜಿಸಲು ಬರೋಬ್ಬರಿ 61,500 ಕೋಟಿ ರೂಪಾಯಿಗಳನ್ನು ಖರ್ಚು ಮಾಡಲಾಗುತ್ತಿದೆ.
ಪ್ರತಿಯೊಂದು ಕ್ರೀಡೆಗಳಲ್ಲಿ ಗೆದ್ದ ಆಟಗಾರರು ಒಲಿಂಪಿಕ್ಸ್ ಪದಕಗಳನ್ನು ಪಡೆಯುತ್ತಾರೆ. ಪ್ರಥಮ ಸ್ಥಾನ ಪಡೆದವರಿಗೆ ಚಿನ್ನದ ಪದಕ, ಎರಡನೇ ಸ್ಥಾನ ಪಡೆದವರಿಗೆ ಬೆಳ್ಳಿ ಹಾಗೂ ಮೂರನೇ ಸ್ಥಾನ ಪಡೆದವರಿಗೆ ಕಂಚಿನ ಪದಕ ನೀಡಲಾಗುತ್ತದೆ. ಹಲವು ಸ್ಪರ್ಧೆಗಳಲ್ಲಿ ನಾಲ್ಕನೇ ಸ್ಥಾನ ಪಡೆದವರಿಗೂ ಕಂಚಿನ ಪಂದಕ ನೀಡಲಾಗುತ್ತದೆ. ಇಲ್ಲೂ ಕೂಡ ಅದೇ ನಿಯಮ ಮುಂದುವರೆಯುತ್ತದೆ.
ಪ್ಯಾರಿಸ್ ಒಲಿಂಪಿಕ್ಸ್ ಹಾಗೂ ಪ್ಯಾರಾಲಿಂಪಿಕ್ಸ್‌ ಗಾಗಿ ಒಟ್ಟು 5084 ಪದಕಗಳನ್ನು ಸಿದ್ಧಪಡಿಸಲಾಗಿದೆ. ಪ್ರತಿ ಪದಕದ ದಪ್ಪವು 9.2 ಮಿಮೀ ಆಗಿದ್ದರೆ, ಅದರ ವ್ಯಾಸವು 85 ಮಿಮೀ ಇರುತ್ತದೆ. ಚಿನ್ನದ ಪದಕದ ತೂಕ 529 ಗ್ರಾಂ, ಬೆಳ್ಳಿ ಪದಕದ ತೂಕ 525 ಗ್ರಾಂ. ಕಂಚಿನ ಪದಕ 455 ಗ್ರಾಂ ಇದೆ.
ಚಿನ್ನದ ಪದಕದಲ್ಲಿ 92.5 ಪ್ರತಿಶತ ಬೆಳ್ಳಿ ಮತ್ತು 6 ಗ್ರಾಂ ಚಿನ್ನವಿರುತ್ತದೆ. ಬೆಳ್ಳಿ ಪದಕ 92.5 ಪ್ರತಿಶತ ಬೆಳ್ಳಿಯಿಂದ ತಯಾರಿಸಲ್ಪಟ್ಟಿದ್ದರೆ, ಕಂಚಿನ ಪದಕವು 97 ಪ್ರತಿಶತ ತಾಮ್ರ, 2.5 ಪ್ರತಿಶತ ಸತು ಮತ್ತು 0.5 ಪ್ರತಿಶತದಷ್ಟು ತವರ ಹೊಂದಿರುತ್ತದೆ.
ಒಂದು ಚಿನ್ನದ ಪದಕದ ಬೆಲೆ 75 ಲಕ್ಷ ರೂ.ವಾಗಿದ್ದರೆ, ಬೆಳ್ಳಿ ಮತ್ತು ಕಂಚಿನ ಪದಕಗಳ ಬೆಲೆ ಕ್ರಮವಾಗಿ 50 ಲಕ್ಷ ರೂ. ಹಾಗೂ 30 ಲಕ್ಷ ರೂ. ಆಗಿದೆ ಎನ್ನಲಾಗಿದೆ.
