ಪ್ಯಾರಿಸ್ : ಫ್ರಾನ್ಸ್ನ ಎವಿಯನ್-ಲೆ-ಬೈನ್ಸ್ನಲ್ಲಿ ನಡೆಯುತ್ತಿರುವ ಜಿ7 ಶೃಂಗಸಭೆಯು ಜಾಗತಿಕ ವಿದ್ಯಮಾನಗಳ ಚರ್ಚೆಯ ವೇದಿಕೆಯಾಗುವುದರ ಜೊತೆಗೆ, ರಸವತ್ತಾದ ರಾಜತಾಂತ್ರಿಕ ಕ್ಷಣಗಳಿಗೂ ಸಾಕ್ಷಿಯಾಗಿದೆ. ಜಾಗತಿಕ ನಾಯಕರ ಸಮ್ಮುಖದಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ ಮತ್ತು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಅವರ ನಡುವೆ ನಡೆದ ಕಿರು ಸಂಭಾಷಣೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದ್ದು, ಅಂತರ್ಜಾಲದ ಸಾರ್ವಕಾಲಿಕ ಟ್ರೆಂಡ್ ‘ಮೆಲೋಡಿ’ (Melodi) ಮತ್ತೊಮ್ಮೆ ಮುಂಚೂಣಿಗೆ ಬಂದಿದೆ.
ಜನಪ್ರಿಯತೆ ಒಪ್ಪಿಕೊಂಡ ಮೆಲೋನಿ
ಶೃಂಗಸಭೆಯ ವೇಳೆ ಜಾಗತಿಕ ನಾಯಕರು ಗ್ರೂಪ್ ಫೋಟೋಗಾಗಿ ಜಮಾಯಿಸುತ್ತಿದ್ದ ಸಂದರ್ಭದಲ್ಲಿ ಪ್ರಧಾನಿ ಮೋದಿ ಮತ್ತು ಜಾರ್ಜಿಯಾ ಮೆಲೋನಿ ಪರಸ್ಪರ ಕೈಕುಲುಕಿ ಕುಶಲೋಪರಿ ವಿಚಾರಿಸಿದರು. ಈ ವೇಳೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೇರಿದಂತೆ ಹಲವು ಗಣ್ಯರು ಅಲ್ಲೇ ಉಪಸ್ಥಿತರಿದ್ದರು. ವಿಡಿಯೋದಲ್ಲಿ ಆಡಿಯೋ ಅಷ್ಟಾಗಿ ಸ್ಪಷ್ಟವಾಗಿಲ್ಲದಿದ್ದರೂ, ಪ್ರಧಾನಿ ಮೋದಿ ಅವರು ಸಾಮಾಜಿಕ ಜಾಲತಾಣಗಳಲ್ಲಿ ಇಬ್ಬರಿಗೂ ಇರುವ ಕ್ರೇಜ್ ಬಗ್ಗೆ ಮೆಲೋನಿ ಬಳಿ ಪ್ರಸ್ತಾಪಿಸುತ್ತಿರುವುದು ಕಂಡುಬಂದಿದೆ. ಇದಕ್ಕೆ ತಕ್ಷಣವೇ ನಗುಮುಖದಿಂದ ಪ್ರತಿಕ್ರಿಯಿಸಿದ ಇಟಲಿ ಪ್ರಧಾನಿ, “ಹೌದು, ನಾವಿಬ್ಬರೇ ಇನ್ಸ್ಟಾಗ್ರಾಮ್ನಲ್ಲಿ ಅತ್ಯಂತ ಪ್ರಸಿದ್ಧ ಜೋಡಿ” ಎಂದು ಹೇಳಿರುವುದು ಈಗ ಭಾರಿ ವೈರಲ್ ಆಗಿದೆ.
ಈ ಇಬ್ಬರು ನಾಯಕರ ನಡುವಿನ ಇಂಟರ್ನೆಟ್ ಜುಗಲ್ಬಂದಿ ಇದೇ ಮೊದಲೇನಲ್ಲ. ಕಳೆದ ತಿಂಗಳು ಪ್ರಧಾನಿ ಮೋದಿ ಅವರು ರೋಮ್ಗೆ ಭೇಟಿ ನೀಡಿದ್ದಾಗ, ಜಾರ್ಜಿಯಾ ಮೆಲೋನಿ ಅವರಿಗೆ ಭಾರತದ ಪ್ರಸಿದ್ಧ ‘ಪಾರ್ಲೆ ಮೆಲೊಡಿ’ (Parle’s Melody) ಟಾಫಿ ಪ್ಯಾಕೆಟ್ ಅನ್ನು ಉಡುಗೊರೆಯಾಗಿ ನೀಡುವ ಮೂಲಕ ಎಲ್ಲರನ್ನೂ ಚಕಿತಗೊಳಿಸಿದ್ದರು. ಇಂಟರ್ನೆಟ್ನಲ್ಲಿ ಹರಿದಾಡುತ್ತಿರುವ ‘ಮೆಲೋಡಿ’ ಎಂಬ ಹೆಸರಿನ ಟ್ರೆಂಡ್ಗೆ ಹೊಂದಿಕೆಯಾಗುವಂತೆ ಮೋದಿ ಈ ಮಧುರ ರಾಜತಾಂತ್ರಿಕ ನಡೆ ಇಟ್ಟಿದ್ದರು. ಈ ವಿಡಿಯೋವನ್ನು ಸ್ವತಃ ಮೆಲೋನಿ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡು, “ಉಡುಗೊರೆಗೆ ಧನ್ಯವಾದಗಳು, ಪ್ರಧಾನಿ ಮೋದಿ ಅವರು ತುಂಬಾ ರುಚಿಕರವಾದ ಟಾಫಿ ತಂದಿದ್ದಾರೆ” ಎಂದು ಬರೆದುಕೊಂಡಿದ್ದರು.
ಮೆಲೋನಿ ಮತ್ತು ಮೋದಿ ಹೆಸರನ್ನು ಸಂಯೋಜಿಸಿ ಸೃಷ್ಟಿಸಲಾದ ‘ಮೆಲೋಡಿ’ ಎಂಬ ಪದ 2023ರ ದ್ವಿಪಕ್ಷೀಯ ಸಭೆಯ ನಂತರ ಇಂಟರ್ನೆಟ್ನಲ್ಲಿ ಜನ್ಮತಾಳಿತ್ತು. ನಂತರದ ದಿನಗಳಲ್ಲಿ ಇವರಿಬ್ಬರ ಸಭೆಗಳ ವಿಡಿಯೋಗಳು ಮತ್ತು ಮೀಮ್ಗಳು ಮಿಲಿಯನ್ಗಟ್ಟಲೆ ವೀಕ್ಷಣೆ ಪಡೆದುಕೊಂಡಿದ್ದವು. ಸ್ವತಃ ಮೆಲೋನಿ ಅವರೇ 2024 ಮತ್ತು 2025ರ ಶೃಂಗಸಭೆಗಳ ವೇಳೆ ಮೋದಿಯವರೊಂದಿಗೆ ಸೆಲ್ಫಿ ಹಾಗೂ ವಿಡಿಯೋಗಳನ್ನು ಹಂಚಿಕೊಂಡು “ಹಲೋ ಫ್ರಮ್ ದಿ ಮೆಲೋಡಿ ಟೀಮ್” ಎಂದು ಬರೆಯುವ ಮೂಲಕ ಈ ಟ್ರೆಂಡ್ ಅನ್ನು ಆಸ್ವಾದಿಸಿದ್ದರು. ಕಳೆದ ತಿಂಗಳು ರೋಮ್ನ ಐತಿಹಾಸಿಕ ಕೊಲೋಸಿಯಂಗೆ ಭೇಟಿ ನೀಡಿದ್ದ ಉಭಯ ನಾಯಕರು ಒಟ್ಟಿಗೆ ರಾತ್ರಿ ಭೋಜನ ಸವಿದು ಆತ್ಮೀಯವಾಗಿ ಚರ್ಚಿಸಿದ್ದರು.
ಕೇವಲ ಫೋಟೋ ಶೂಟ್ ಅಲ್ಲ, ಇದು ಗಟ್ಟಿ ವಿದೇಶಾಂಗ ನೀತಿ
ಪ್ರಧಾನಿ ಮೋದಿ ಮತ್ತು ಮೆಲೋನಿ ನಡುವಿನ ಈ ಆತ್ಮೀಯತೆ ಕೇವಲ ಕ್ಯಾಮೆರಾ ಕಣ್ಣುಗಳಿಗೆ ಸೀಮಿತವಾಗಿಲ್ಲ, ಬದಲಿಗೆ ಇದು ಭಾರತ ಮತ್ತು ಇಟಲಿ ನಡುವಿನ ಬಲವಾದ ವಿದೇಶಾಂಗ ನೀತಿಯ ಪ್ರತಿಬಿಂಬವಾಗಿದೆ. ಸದ್ಯ ಯುರೋಪ್ ವಲಯದಲ್ಲಿ ಇಟಲಿ ಭಾರತದ ಅತ್ಯಂತ ಪ್ರಮುಖ ಜಾಗತಿಕ ಪಾಲುದಾರ ದೇಶವಾಗಿ ಹೊರಹೊಮ್ಮಿದೆ. ಭಾರತ-ಮಧ್ಯಪ್ರಾಚ್ಯ-ಯುರೋಪ್ ಆರ್ಥಿಕ ಕಾರಿಡಾರ್ (IMEC) ಯೋಜನೆಯಲ್ಲಿ ರೋಮ್ ನಗರವನ್ನು ಇಂಡೋ-ಪೆಸಿಫಿಕ್ ವಲಯದ ಹೆಬ್ಬಾಗಿಲನ್ನಾಗಿ ಮಾಡಲು ಉಭಯ ದೇಶಗಳು ಶ್ರಮಿಸುತ್ತಿವೆ. ಪ್ರಸ್ತುತ ಎರಡೂ ರಾಷ್ಟ್ರಗಳ ನಡುವಿನ ದ್ವಿಪಕ್ಷೀಯ ವ್ಯಾಪಾರವು ಬರೋಬ್ಬರಿ 16.77 ಬಿಲಿಯನ್ ಡಾಲರ್ ದಾಟಿದ್ದು, ಈ ‘ಮೆಲೋಡಿ’ ಸ್ನೇಹವು ಜಾಗತಿಕ ರಾಜಕಾರಣದಲ್ಲಿ ಹೊಸ ಅಧ್ಯಾಯ ಬರೆಯುತ್ತಿದೆ.
ಇದನ್ನೂ ಓದಿ : ಪರಿಷತ್ ಚುನಾವಣೆ : ಜೆಡಿಎಸ್ನಿಂದ ಕಾಂಗ್ರೆಸ್ ಶಾಸಕರ ಸಂಪರ್ಕ ಸುದ್ದಿ ಸುಳ್ಳೆಂದ ಹೆಚ್ಡಿಕೆ!
