ಭಾರತದ ಪ್ರಮುಖ ವಾಹನ ತಯಾರಕ ಸಂಸ್ಥೆ ಮಾರುತಿ ಸುಜುಕಿ ತನ್ನ ಜನಪ್ರಿಯ ‘ವ್ಯಾಗನ್ಆರ್‘ (WagonR) ಕಾರಿನಲ್ಲಿ ಹೊಸದೊಂದು ಕ್ರಾಂತಿಕಾರಿ ಬದಲಾವಣೆಯನ್ನು ತಂದಿದೆ. ಹಿರಿಯ ನಾಗರಿಕರು ಮತ್ತು ವಿಶೇಷ ಚೇತನರ ಪ್ರಯಾಣವನ್ನು ಸುಲಭಗೊಳಿಸುವ ನಿಟ್ಟಿನಲ್ಲಿ ‘ಸ್ವಿವೆಲ್ ಸೀಟ್’ (Swivel Seat) ಅಥವಾ ತಿರುಗುವ ಆಸನದ ಆಯ್ಕೆಯನ್ನು ಪರಿಚಯಿಸಿದೆ. ಇದು ಭಾರತದ ವಾಹನ ಮಾರುಕಟ್ಟೆಯಲ್ಲಿಯೇ ಒಂದು ವಿಶಿಷ್ಟ ಮತ್ತು ಪ್ರಾಯೋಗಿಕ ಹೆಜ್ಜೆಯಾಗಿದೆ.
ಸಾಮಾನ್ಯವಾಗಿ ಕಾರು ಹತ್ತುವುದು ಮತ್ತು ಇಳಿಯುವುದು ವಯಸ್ಸಾದವರಿಗೆ ಹಾಗೂ ದೈಹಿಕ ಸಮಸ್ಯೆ ಇರುವವರಿಗೆ ದೊಡ್ಡ ಸವಾಲಿನ ಕೆಲಸ. ಇದನ್ನು ಮನಗಂಡಿರುವ ಮಾರುತಿ ಸುಜುಕಿ, ಹೊರಗಡೆಗೆ ತಿರುಗಬಲ್ಲ ವಿಶೇಷ ಸೀಟನ್ನು ವಿನ್ಯಾಸಗೊಳಿಸಿದೆ. ಇದರಿಂದ ಪ್ರಯಾಣಿಕರು ಯಾವುದೇ ದೈಹಿಕ ಶ್ರಮವಿಲ್ಲದೆ ಸುಲಭವಾಗಿ ಕುಳಿತುಕೊಳ್ಳಬಹುದು ಮತ್ತು ಎದ್ದೇಳಬಹುದು. ವಿಶೇಷವೆಂದರೆ, ಈ ಹೊಸ ಸೀಟನ್ನು ಅಳವಡಿಸಲು ಕಾರಿನ ಮೂಲ ವಿನ್ಯಾಸದಲ್ಲಿ ಯಾವುದೇ ಬದಲಾವಣೆ ಮಾಡುವ ಅಗತ್ಯವಿಲ್ಲ. ಕೇವಲ ಒಂದು ಗಂಟೆಯ ಅವಧಿಯಲ್ಲಿ ಈ ಸೀಟನ್ನು ಅಳವಡಿಸಬಹುದಾಗಿದೆ.
ಬೆಂಗಳೂರು ಮೂಲದ ಸ್ಟಾರ್ಟಪ್ ಕಂಪನಿಯಾದ ‘ಟ್ರೂ ಅಸಿಸ್ಟ್ ಟೆಕ್ನಾಲಜಿ’ (TRUEAssist Technology) ಸಹಯೋಗದೊಂದಿಗೆ ಮಾರುತಿ ಸುಜುಕಿ ಈ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದೆ. ಈ ಸೀಟುಗಳು ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾ (ARAI) ದಿಂದ ಸುರಕ್ಷತಾ ಪ್ರಮಾಣೀಕರಣ ಪಡೆದಿದ್ದು, ಮೂರು ವರ್ಷಗಳ ವಾರಂಟಿಯೊಂದಿಗೆ ಲಭ್ಯವಿವೆ. ವ್ಯಾಗನ್ಆರ್ನ ‘ಟಾಲ್ ಬಾಯ್’ ವಿನ್ಯಾಸ ಮತ್ತು ಎತ್ತರದ ಚಾವಣಿ (Roofline) ಇರುವುದರಿಂದ ಈ ರೀತಿಯ ಆಸನ ಅಳವಡಿಕೆಗೆ ಇದು ಅತ್ಯಂತ ಸೂಕ್ತವಾಗಿದೆ.
ಪ್ರಾಯೋಗಿಕವಾಗಿ ಈ ಯೋಜನೆಯನ್ನು ದೇಶದ 11 ನಗರಗಳ 200ಕ್ಕೂ ಹೆಚ್ಚು ಮಾರುತಿ ಅರೇನಾ ಶೋರೂಮ್ಗಳಲ್ಲಿ ಜಾರಿಗೆ ತರಲಾಗಿದೆ. ಗ್ರಾಹಕರು ಹೊಸ ಕಾರು ಖರೀದಿಸುವಾಗ ಅಥವಾ 2019ರ ನಂತರ ಖರೀದಿಸಿದ ಹಳೆಯ ವ್ಯಾಗನ್ಆರ್ ಕಾರುಗಳಿಗೂ ಈ ಸೀಟನ್ನು ಅಳವಡಿಸಿಕೊಳ್ಳಬಹುದಾಗಿದೆ. ಮಾರುತಿ ಸುಜುಕಿಯ ಈ ನಡೆ, ಕೇವಲ ವ್ಯಾಪಾರವಷ್ಟೇ ಅಲ್ಲದೆ, ಸಾಮಾಜಿಕ ಕಳಕಳಿಯನ್ನೂ ಎತ್ತಿ ತೋರಿಸಿದೆ.
ಇದನ್ನೂ ಓದಿ: ಪಾಶ್ಚಿಮಾತ್ಯರ ನಿದ್ದೆಗೆಡಿಸಿದ ಚೀನಾದ ‘ಮ್ಯಾನ್ಹ್ಯಾಟನ್ ಪ್ರಾಜೆಕ್ಟ್’ : ಎಐ ಚಿಪ್ ತಯಾರಿಕೆಯಲ್ಲಿ ಮಹತ್ವದ ಮುನ್ನಡೆ
